ಸ್ಮಶಾನಕ್ಕೆ ಬಿರಿಯಾನಿ ಆರ್ಡರ್..ಬೆಚ್ಚಿಬಿದ್ದ ಡೆಲಿವರಿ ಬಾಯ್; ವಿಡಿಯೋ ವೈರಲ್

ನವದೆಹಲಿ, ಫೆ.3: ಇಂದಿನ ಡಿಜಿಟಲ್ ಯುಗದಲ್ಲಿ ಆಹಾರದಿಂದ ಹಿಡಿದು ಬಟ್ಟೆ, ಔಷಧಿ ಸೇರಿದಂತೆ ಬಹುತೇಕ ಎಲ್ಲ ಅಗತ್ಯ ವಸ್ತುಗಳನ್ನೂ ಆನ್‌ಲೈನ್ ಮೂಲಕವೇ ಆರ್ಡರ್ ಮಾಡುವ ಪದ್ಧತಿ ಹೆಚ್ಚಾಗಿದೆ. ಕೆಲವೇ ನಿಮಿಷಗಳಲ್ಲಿ ಮನೆಬಾಗಿಲಿಗೆ ತಲುಪುವ ಈ ಸೇವೆ ಜನಜೀವನವನ್ನು ಬಹಳ ಸುಲಭಗೊಳಿಸಿದೆ. ಆದರೆ ಒಂದು ವಿಚಿತ್ರ ಘಟನೆಯ ವಿಡಿಯೋ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ.

ವಿಡಿಯೋದಲ್ಲಿ ಮಹಿಳೆಯೊಬ್ಬರು ಆನ್‌ಲೈನ್ ಮೂಲಕ ಬಿರಿಯಾನಿ ಆರ್ಡರ್ ಮಾಡುತ್ತಾರೆ. ಆಹಾರ ವಿತರಣಾ ಏಜೆಂಟ್ ಗ್ರಾಹಕರು ನೀಡಿದ ಲೊಕೇಶನ್‌ಗೆ ತಲುಪಿದಾಗ ಆತ ಅಚ್ಚರಿಗೊಳ್ಳುತ್ತಾನೆ. ಏಕೆಂದರೆ ಅದು ಒಂದು ಸ್ಮಶಾನ ಆಗಿತ್ತು. ಗೇಟ್ ಬಳಿ ನಿಂತು ಗ್ರಾಹಕಿಗೆ ಕರೆ ಮಾಡಿದ ಡೆಲಿವರಿ ಬಾಯ್, “ನಾನು ನಿಮ್ಮ ಲೊಕೇಶನ್‌ಗೆ ಬಂದಿದ್ದೇನೆ” ಎಂದು ತಿಳಿಸುತ್ತಾನೆ. ಆದರೆ ಮಹಿಳೆ, “ನಾನು ಸ್ಮಶಾನದ ಒಳಗಿದ್ದೇನೆ, ನೀವು ಗೇಟ್ ದಾಟಿ ಬನ್ನಿ” ಎಂದು ಹೇಳುತ್ತಾಳೆ.

ಈ ಮಾತು ಕೇಳಿದ ತಕ್ಷಣವೇ ಡೆಲಿವರಿ ಬಾಯ್‌ ಆತಂಕಕ್ಕೊಳಗಾಗುತ್ತಾನೆ. ವಿಡಿಯೋದಲ್ಲೇ ಆತ, “ಇಲ್ಲಿ ತುಂಬಾ ಕತ್ತಲಿದೆ, ನನಗೆ ಭಯ ಆಗುತ್ತಿದೆ. ದಯವಿಟ್ಟು ನೀವೇ ಹೊರಗೆ ಬನ್ನಿ, ನಾನು ಒಳಗೆ ಬರೋದಿಲ್ಲ” ಎಂದು ಪದೇಪದೆ ವಿನಂತಿಸುತ್ತಾನೆ. ಸ್ಮಶಾನದೊಳಗೆ ಹೋಗಲು ಆತ ನಿರಾಕರಿಸುವ ದೃಶ್ಯಗಳು ವಿಡಿಯೋದಲ್ಲಿ ಸ್ಪಷ್ಟವಾಗಿ ಕಾಣಿಸುತ್ತವೆ.

ಮಹಿಳೆಯ ಧ್ವನಿ ಮಾತ್ರ ವಿಡಿಯೋದಲ್ಲಿ ಕೇಳಿಸುತ್ತದೆ. ಆಕೆ ನಿರಂತರವಾಗಿ ಡೆಲಿವರಿ ಬಾಯ್‌ಗೆ ಒಳಗೆ ಬರುವಂತೆ ಸೂಚಿಸುತ್ತಾಳೆ. ಆದರೆ ಡೆಲಿವರಿ ಬಾಯ್ ತನ್ನ ಭಯವನ್ನು ಮರೆಮಾಚದೇ, “ನನಗೆ ದೆವ್ವಗಳ ಭಯ ಇದೆ, ನಾನು ಇಲ್ಲೇ ನಿಲ್ಲುತ್ತೇನೆ” ಎಂದು ಹೇಳುತ್ತಾನೆ. ಈ ಸಂಭಾಷಣೆ ಸಾಮಾಜಿಕ ಜಾಲತಾಣಗಳಲ್ಲಿ ಜನರನ್ನು ನಗು ಬರಿಸುವುದಷ್ಟೇ ಅಲ್ಲ, ಕೆಲವರಿಗೆ ಅಚ್ಚರಿ ಮತ್ತು ಆತಂಕವನ್ನೂ ಉಂಟುಮಾಡಿದೆ.

ವಿಡಿಯೋ ವೈರಲ್ ಆದ ಬೆನ್ನಲ್ಲೇ ನೆಟ್ಟಿಗರು ವಿವಿಧ ರೀತಿಯ ಪ್ರತಿಕ್ರಿಯೆಗಳನ್ನು ನೀಡಿದ್ದಾರೆ. ಹಲವರು ಡೆಲಿವರಿ ಬಾಯ್‌ನ ಭಯವನ್ನು ಸಮರ್ಥಿಸಿಕೊಂಡಿದ್ದಾರೆ. “ರಾತ್ರಿ ವೇಳೆ ಸ್ಮಶಾನದೊಳಗೆ ಹೋಗುವುದು ಯಾರಿಗಾದರೂ ಭಯವಾಗುವುದು ಸಹಜ” ಎಂದು ಕೆಲವರು ಹೇಳಿದ್ದಾರೆ. ಇನ್ನೂ ಕೆಲವರು ಮಹಿಳೆಯ ನಡೆಗೆ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಆದರೆ ಮತ್ತೊಂದು ವರ್ಗದ ನೆಟ್ಟಿಗರು ಈ ವಿಡಿಯೋ ಸತ್ಯಾಸತ್ಯತೆ ಬಗ್ಗೆ ಅನುಮಾನ ವ್ಯಕ್ತಪಡಿಸಿದ್ದಾರೆ. ಕ್ಯಾಮೆರಾ ಆಂಗಲ್, ಸಂಭಾಷಣೆಯ ಶೈಲಿ ಮತ್ತು ದೃಶ್ಯಗಳನ್ನಾಧರಿಸಿ, “ಇದು ಸಂಪೂರ್ಣವಾಗಿ ಸ್ಕ್ರಿಪ್ಟ್ ಮಾಡಿದ ವಿಡಿಯೋ, ಕೇವಲ ಪ್ರಚಾರಕ್ಕಾಗಿ ಮಾಡಲಾಗಿದೆ” ಎಂದು ಆರೋಪಿಸಿದ್ದಾರೆ. ಕೆಲವರು ಇದನ್ನು ಕಂಟೆಂಟ್ ಕ್ರಿಯೇಷನ್ ಅಥವಾ ಸಾಮಾಜಿಕ ಜಾಲತಾಣಗಳಲ್ಲಿ ವೀಕ್ಷಣೆ ಪಡೆಯುವ ಪ್ರಯತ್ನ ಎಂದು ಹೇಳಿದ್ದಾರೆ…