ಇತ್ತೀಚೆಗೆ ಸಾಮಾಜಿಕ ಜಾಲತಾಣದಲ್ಲಿ ಮುನ್ನೆಲೆಗೆ ಬರಲು ನಾನಾ ರೀತಿಯ ಅಪಾಕಾರಿ ಪ್ರಯತ್ನಗಳು ನಡೆಯುತ್ತಿರುತ್ತವೆ. ಅಂಥದ್ದೇ ಒಂದು ಘಟನೆ ರಾಜಸ್ಥಾನದ ಭರತ್ಪುರ ಜಿಲ್ಲೆಯ ಬರೇಥಾ ಡ್ಯಾಂನಲ್ಲಿ ನಡೆದಿದೆ. ಇನ್ಸ್ಟಾಗ್ರಾಮ್ ರೀಲ್ಗಾಗಿ ತಂದೆಯೊಬ್ಬ ತನ್ನ 7 ವರ್ಷದ ಮಗಳ ಜೀವವನ್ನು ಅಪಾಯಕ್ಕೆ ತಳ್ಳಿದ ಆಘಾತಕಾರಿ ಘಟನೆಯ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗಿದೆ.
ಸುರಕ್ಷಿತ ರೇಲಿಂಗ್ನಾಚೆಗಿನ ಕಬ್ಬಿಣದ ಕೋನದ ಮೇಲೆ, 25 ಅಡಿ ಆಳದ ತುಂಬಿ ಹರಿಯುತ್ತಿರುವ ಜಲಾಶಯದ ಮೇಲೆ, ಹುಡುಗಿಯನ್ನು ಕೂರಿಸಿ ವಿಡಿಯೋ ಚಿತ್ರೀಕರಿಸಿದ್ದಾನೆ. ಈ ಕೃತ್ಯದಲ್ಲಿ ತಾಯಿಯೂ ಪಾಲ್ಗೊಂಡಿದ್ದು, ಮಗಳನ್ನು ಪ್ರೋತ್ಸಾಹಿಸಿದ್ದಾಳೆ ಎಂದು ವರದಿಯಾಗಿದೆ, ಇದು ಸಾರ್ವಜನಿಕ ಆಕ್ರೋಶಕ್ಕೆ ಕಾರಣವಾಗಿದೆ.
ವಿಡಿಯೋದಲ್ಲಿ, ಭಯಭೀತಳಾದ ಹುಡುಗಿಯು ತಂದೆಯ ಕೈಯನ್ನು ಬಿಗಿಯಾಗಿ ಹಿಡಿದಿರುವುದು ಕಂಡುಬಂದಿದೆ. ಆದರೂ, ತಂದೆಯಾದ ಉಮಾಶಂಕರ್ ಎಂಬಾತ ಆಕೆಯನ್ನು ಕಬ್ಬಿಣದ ಗೇಜ್ ಬಾಕ್ಸ್ನ ಮೇಲೆ ಕೂರಿಸಿ ಕೈಬಿಟ್ಟಿದ್ದಾನೆ. ಈ ಘಟನೆಯು ಜುಲೈ 4ರಂದು ರುದಾವಲ್ ಪೊಲೀಸ್ ಠಾಣೆ ವ್ಯಾಪ್ತಿಯ ಬರೇಥಾ ಡ್ಯಾಂನಲ್ಲಿ ನಡೆದಿದ್ದು, ‘Umashankar’ ಎಂಬ ಇನ್ಸ್ಟಾಗ್ರಾಮ್ ಖಾತೆಯಿಂದ ಜುಲೈ 7 ರಂದು ಹಂಚಿಕೊಳ್ಳಲಾಗಿದೆ. ಈ ಕೃತ್ಯವನ್ನು ಸಾಮಾಜಿಕ ಜಾಲತಾಣದಲ್ಲಿ ಕಂಡ ಜನರು, “ಇಂತಹ ಪೋಷಕರಿಗೆ ಶಿಕ್ಷೆಯಾಗಬೇಕು” ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
रील के लिए बेटी की जान को खतरे में डाल दिया। गजब पागलपन है। वीडियो भरतपुर का है।@RajPoliceHelp #YehThikKarKeDikhao
#Rajasthan #Monsoon #reelsvideo #monsoonsession2025 #Bharatpur pic.twitter.com/0fjJlQ228i— Sourabh Khandelwal (@sourabhskhandel) July 7, 2025
ಹೌದು, ಈ ಘಟನೆಯು ಸಾಮಾಜಿಕ ಮಾಧ್ಯಮದ ರೀಲ್ಗಳ ಜನಪ್ರಿಯತೆಗಾಗಿ ಜೀವವನ್ನೇ ಪಣಕ್ಕಿಡುವ ಧೋರಣೆಯ ಬಗ್ಗೆ ಗಂಭೀರ ಚರ್ಚೆಗೆ ಕಾರಣವಾಗಿದೆ. ಭರತ್ಪುರ ಜಿಲ್ಲಾಧಿಕಾರಿ ಕಮರ್ ಚೌಧರಿ ಕೇವಲ ಮೂರು ದಿನಗಳ ಹಿಂದೆ ಅಣೆಕಟ್ಟುಗಳು, ಜಲಾಶಯಗಳು ಮತ್ತು ನದಿಗಳಿಂದ ದೂರವಿರುವಂತೆ ಸಾರ್ವಜನಿಕರಿಗೆ ಮನವಿ ಮಾಡಿದ್ದರು. ಆದರೂ, ಈ ಘಟನೆಯು ಸರ್ಕಾರದ ಎಚ್ಚರಿಕೆಯನ್ನು ಗಾಳಿಗೆ ತೂರಿದೆ.
ಬರೇಥಾ ಡ್ಯಾಂ, ಇತ್ತೀಚಿನ ಭಾರೀ ಮಳೆಯಿಂದ ತುಂಬಿರುವುದರಿಂದ ಪ್ರವಾಸಿಗರಿಗೆ ಆಕರ್ಷಣೀಯ ಸ್ಥಳವಾಗಿದೆ. ಪೊಲೀಸರು ಈ ದಂಪತಿಗಳ ವಿರುದ್ಧ ಕಾನೂನು ಕ್ರಮಕ್ಕೆ ಮುಂದಾಗಿದ್ದು, ಸಾರ್ವಜನಿಕರು ಇಂತಹ ಅಪಾಯಕಾರಿ ಸಾಹಸಗಳಿಂದ ದೂರವಿರಬೇಕೆಂದು ಮನವಿ ಮಾಡಿದ್ದಾರೆ.
