ಹೊಸ ಆದಾಯ ತೆರಿಗೆ ವಿಧೇಯಕದ ಮೂಲಕ ತೆರಿಗೆ ಅಧಿಕಾರಿಗಳಿಗೆ ಡಿಜಿಟಲ್ ಸ್ಪೇಸ್ ಮತ್ತು ಸಾಮಾಜಿಕ ಮಾಧ್ಯಮ ಖಾತೆಗಳನ್ನು ಭೇದಿಸುವ ಅಧಿಕಾರ ನೀಡಲಿದೆ. ಆದರೆ ನಿರ್ದಿಷ್ಟ ಪ್ರಕರಣಗಳಲ್ಲಿ ಆದಾಯ ತೆರಿಗೆ ಇಲಾಖೆ ಅಧಿಕಾರಿಗಳಿಗೆ ನೀಡಿ ರುವ ಈ ‘ಸೂಪರ್ ಪವರ್’ ದುರ್ಬಳಕೆಗೆ ಕಾರಣ ವಾಗುವ ಸಾಧ್ಯತೆಯನ್ನೂ ತಳ್ಳಿ ಹಾಕುವಂತಿಲ್ಲ ಎಂಬ ಕಳವಳ ವ್ಯಕ್ತವಾಗಿದೆ.
ಐಟಿ ರೇಡ್:
ಆರು ದಶಕಗಳಷ್ಟು ಹಳೆಯ ತೆರಿಗೆ ಕಾಯ್ದೆ ಬದಲು ಸರಳವಾದ ಹೊಸ ತೆರಿಗೆ ಕಾನೂನು ಜಾರಿಗೆ ಕೇಂದ್ರ ಸರ್ಕಾರ ಉದ್ದೇಶಿಸಿದೆ. ಈ ಸಂಬಂಧ ನೂತನ ಆದಾಯ ತೆರಿಗೆ ವಿಧೇಯಕ-2025 ಅನ್ನು ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್ ಸಂಸತ್ತಿನಲ್ಲಿ ಮಂಡಿಸಿದ್ದಾರೆ. ಸದ್ಯ ಸಂಸತ್ತಿನ ಆಯ್ಕೆ ಸಮಿತಿಯ ಪರಿಶಿಲನೆಗೆ ಒಳಪಟ್ಟಿರುವ ಹೊಸ ಕಾಯ್ದೆಯಲ್ಲಿ ತೆರಿಗೆ ಅಧಿಕಾರಿಗಳಿಗೆ ವರ್ಚುವಲ್ ಡಿಜಿಟಲ್ ಸ್ಪೇಸ್‌ನಲ್ಲೂ ತನಿಖೆಗೆ ಅವಕಾಶ ಮಾಡಿಕೊಡುವ ಅಧಿಕಾರ ನೀಡಲಾಗಿದೆ.
ಹಳೆ ಕಾಯ್ದೆ ಹೇಗಿತ್ತು?:
ಹಾಲಿ ತೆರಿಗೆ ಕಾಯ್ದೆ ಪ್ರಕಾರ ತೆರಿಗೆ ಅಧಿಕಾರಿಗಳು ಲ್ಯಾಪ್ಟಾಪ್, ಹಾರ್ಡ್‌ ಡ್ರೈವ್, ಇ-ಮೇಲ್‌ಗಳ ಪರಿಶೀಲನೆಗೆ ಅವಕಾಶ ಕೇಳಬಹುದು. ಕಾಯ್ದೆಯಲ್ಲಿ ಎಲ್ಲೂ ಡಿಜಿಟಲ್ ರೆಕಾರ್ಡ್‌ಗಳ ಕುರಿತು ಸ್ಪಷ್ಟ ಉಲ್ಲೇಖವಿಲ್ಲ. ಡಿಜಿಟಲ್ ರೆಕಾರ್ಡ್‌ಗಳ ಪರಿಶೀಲನೆಯ ಬೇಡಿಕೆ ಕಾನೂನು ಸಮಸ್ಯೆಗೂ ದಾರಿ ಮಾಡಿಕೊಡುವ ಅವಕಾಶ ಇತ್ತು.
ಹೊಸ ಕಾಯ್ದೆ ಹೇಗಿದೆ?:
ಆದರೆ ಹೊಸ ತೆರಿಗೆ ಕಾನೂನಲ್ಲಿ ಡಿಜಿಟಲ್ ದಾಖಲೆಗಳ ಪರಿಶೀಲನೆಗೂ ಬೇಡಿಕೆ ಇಡಬಹುದು. ಅವಕಾಶ ಸಿಗದಿದ್ದರೆ ಪಾಸ್ ವರ್ಡ್, ಸೆಕ್ಯುರಿಟಿ ಸೆಟ್ಟಿಂಗ್ಸ್‌ಗಳನ್ನು ಮುರಿದು ಫೈಲ್ ಗಳನ್ನು ಪರಿಶೀಲಿಸುವ ಅಧಿಕಾರವೂ ಅಧಿಕಾರಿಗಳಿಗೆ ಇರುತ್ತದೆ.
ಹೊಸ ತೆರಿಗೆ ವಿಧೇಯಕದ 247ನೇ ಕಲಂ ಪ್ರಕಾರ, ತೆರಿಗೆ ಕಳ್ಳತನದ ಅನುಮಾನ ಬಂದರೆ ಇ-ಮೇಲ್‌ ಗಳು, ಸಾಮಾಜಿಕ ಜಾಲತಾಣ, ಬ್ಯಾಂಕ್ ಮಾಹಿತಿ, ಹೂಡಿಕೆ ಖಾತೆಗಳನ್ನು ಕೆಲ ಪ್ರಕರಣಗಳಲ್ಲಿ ಪರಿಶೀಲಿಸಬಹುದು. ತೆರಿಗೆದಾರನ ವರ್ಚುವಲ್ ಡಿಜಿಟಲ್ ಸ್ಪೇಸ್‌ನಲ್ಲಿರುವ ದಾಖಲೆಗಳನ್ನು ಬಲವಂತವಾಗಿಯೂ ಪರಿಶೀಲಿಸಲೂ ಇದು ಅವಕಾಶ ಮಾಡಿಕೊಡುತ್ತದೆ.
ಆದರೆ ಕಾನೂನು ತಜ್ಞರು ಈ ಕಲಂ ಕುರಿತು ಆತಂಕ ವ್ಯಕ್ತಪಡಿಸಿದ್ದು, ಸರಿಯಾದ ನಿಯಂತ್ರಣ ಇಲ್ಲದಿದ್ದರೆ ಇದು ದುರುಪಯೋಗ ಆಗುವ ಸಾಧ್ಯತೆ ಇದೆ ಎಂದು ಅಭಿಪ್ರಾಯಪಟ್ಟಿದ್ದಾರೆ.