ಕ್ಯಾಲಿಫೋರ್ನಿಯಾ: ಕೃತಕ ಬುದ್ಧಿಮತ್ತೆಯ ಕ್ರಾಂತಿ ತಂದಿರುವ ಓಪನ್ಎಐ (OpenAI) ಸಂಸ್ಥೆಯು ಈಗ ವಿವಾದದ ಸುಳಿಯಲ್ಲಿದೆ. ಅಮೆರಿಕದ ರಕ್ಷಣಾ ಇಲಾಖೆಯಾದ ಪೆಂಟಗನ್ ಜೊತೆಗೆ AI ಒಪ್ಪಂದಕ್ಕೆ ಸಹಿ ಹಾಕಿದ ಬೆನ್ನಲ್ಲೇ, ಜಗತ್ತಿನಾದ್ಯಂತ ಸುಮಾರು 2.5 ಮಿಲಿಯನ್ಗಿಂತಲೂ ಹೆಚ್ಚು ಬಳಕೆದಾರರು ChatGPT ಯನ್ನ ಅನ್ಇನ್ಸ್ಟಾಲ್ ಮಾಡಿದ್ದಾರೆ.
ವಿವಾದಕ್ಕೆ ಕಾರಣವಾದ ಒಪ್ಪಂದವೇನು?
900 ಮಿಲಿಯನ್ಗಿಂತಲೂ ಹೆಚ್ಚು ಸಕ್ರಿಯ ಬಳಕೆದಾರರನ್ನು ಹೊಂದಿರುವ OpenAI, ಕಳೆದ ವಾರ ಪೆಂಟಗನ್ ಜೊತೆ ಮಹತ್ವದ ಒಪ್ಪಂದಕ್ಕೆ ಸಹಿ ಹಾಕಿತ್ತು. ಈ ಒಪ್ಪಂದದ ಪ್ರಕಾರ, ರಕ್ಷಣಾ ಇಲಾಖೆಯು ತನ್ನ ವರ್ಗೀಕೃತ (Classified) ನೆಟ್ವರ್ಕ್ಗಳಲ್ಲಿ OpenAI ನ AI ಮಾದರಿಗಳನ್ನು ಬಳಸಿಕೊಳ್ಳಲು ಅವಕಾಶ ನೀಡಲಾಗಿತ್ತು. ಆದರೆ, ಶಾಂತಿ ಮತ್ತು ನಾಗರಿಕ ಉದ್ದೇಶಗಳಿಗಾಗಿ ಬಳಕೆಯಾಗಬೇಕಿದ್ದ ತಂತ್ರಜ್ಞಾನವನ್ನು ಮಿಲಿಟರಿ ಮತ್ತು ಕಣ್ಗಾವಲು ಉದ್ದೇಶಗಳಿಗಾಗಿ ಬಳಸುತ್ತಿರುವುದು ಬಳಕೆದಾರರ ಆಕ್ರೋಶಕ್ಕೆ ಕಾರಣವಾಗಿದೆ.
ChatGPT ಮೇಲಿನ ಅಸಮಾಧಾನವು ಅದರ ಸ್ಪರ್ಧಿಗಳಿಗೆ ವರದಾನವಾಗಿದೆ. ಆಂಥ್ರೊಪಿಕ್ (Anthropic) ಸಂಸ್ಥೆಯ ‘ಕ್ಲೌಡ್’ (Claude) ಚಾಟ್ಬಾಟ್ ಈಗ ಆಪಲ್ ಆಪ್ ಸ್ಟೋರ್ನಲ್ಲಿ ChatGPT ಅನ್ನು ಹಿಂದಿಕ್ಕಿ ಅಗ್ರಸ್ಥಾನಕ್ಕೇರಿದೆ. ವರದಿಗಳ ಪ್ರಕಾರ, ಪೆಂಟಗನ್ ಒಪ್ಪಂದದ ಸುದ್ದಿ ಹೊರಬಿದ್ದ ನಂತರದ ಒಂದೇ ದಿನದಲ್ಲಿ ChatGPT ಮೊಬೈಲ್ ಅಪ್ಲಿಕೇಶನ್ ಅನ್ಇನ್ಸ್ಟಾಲ್ ಪ್ರಮಾಣವು ಶೇಕಡಾ 295 ರಷ್ಟು ಹೆಚ್ಚಾಗಿದೆ.
ಕುತೂಹಲಕಾರಿ ವಿಷಯವೆಂದರೆ, ಪೆಂಟಗನ್ ಮೊದಲು ಆಂಥ್ರೊಪಿಕ್ ಸಂಸ್ಥೆಯನ್ನೇ ಸಂಪರ್ಕಿಸಿತ್ತು. ಆದರೆ, ಡೇರಿಯೊ ಅಮೋಡೆ ನೇತೃತ್ವದ ಈ ಕಂಪನಿಯು, ಸರ್ಕಾರವು ಈ ತಂತ್ರಜ್ಞಾನವನ್ನು ದೇಶೀಯ ಕಣ್ಗಾವಲಿಗಾಗಿ ಬಳಸುವ ಯೋಜನೆಯನ್ನು ಹೊಂದಿದೆ, ಇದು ನಮ್ಮ ಪ್ರಜಾಪ್ರಭುತ್ವ ಮೌಲ್ಯಗಳಿಗೆ ವಿರುದ್ಧವಾಗಿದೆ ಎಂದು ಹೇಳಿ ಒಪ್ಪಂದವನ್ನು ತಿರಸ್ಕರಿಸಿತ್ತು. ಆದರೆ OpenAI ಈ ಒಪ್ಪಂದಕ್ಕೆ ಒಪ್ಪಿಗೆ ನೀಡಿದ್ದು ಟೀಕೆಗೆ ಗುರಿಯಾಗಿದೆ.
ಸ್ಯಾಮ್ ಆಲ್ಟ್ಮನ್ ಕ್ಷಮೆಯಾಚನೆ
ಬಳಕೆದಾರರ ಬಹಿಷ್ಕಾರ ಮತ್ತು ತೀವ್ರ ಪ್ರತಿರೋಧದ ನಂತರ OpenAI ಸಿಇಒ ಸ್ಯಾಮ್ ಆಲ್ಟ್ಮನ್ ಸಾಮಾಜಿಕ ಮಾಧ್ಯಮದಲ್ಲಿ ಪ್ರತಿಕ್ರಿಯಿಸಿದ್ದಾರೆ. ನಾವು ಈ ನಿರ್ಧಾರವನ್ನು ತೆಗೆದುಕೊಳ್ಳುವಲ್ಲಿ ಆತುರಪಟ್ಟೆವು. ಶುಕ್ರವಾರವೇ ಈ ಒಪ್ಪಂದವನ್ನು ಘೋಷಿಸಬಾರದಿತ್ತು. ಇದು ಅತ್ಯಂತ ಸಂಕೀರ್ಣವಾದ ಸಮಸ್ಯೆ ಮತ್ತು ಇದಕ್ಕೆ ಸ್ಪಷ್ಟವಾದ ಸಂವಹನದ ಅಗತ್ಯವಿದೆ ಎಂದು ಅವರು ಒಪ್ಪಿಕೊಂಡಿದ್ದಾರೆ. ಅಲ್ಲದೆ, ಈ ಒಪ್ಪಂದವು ಅಸಡ್ಡೆಯಿಂದ ಕೂಡಿದೆ ಎಂದು ಅವರು ವಿಷಾದ ವ್ಯಕ್ತಪಡಿಸಿದ್ದಾರೆ.
ಸದ್ಯ ಓಪನ್ಎಐ ತನ್ನ ಒಪ್ಪಂದದಲ್ಲಿ ತಿದ್ದುಪಡಿ ತರಲು ಮುಂದಾಗಿದೆ. ತನ್ನ ತಂತ್ರಜ್ಞಾನವನ್ನು ಸಾಮೂಹಿಕ ಕಣ್ಗಾವಲು ಅಥವಾ ಎನ್ಎಸ್ಎ (NSA) ಅಂತಹ ಗುಪ್ತಚರ ಸಂಸ್ಥೆಗಳು ಬಳಸದಂತೆ ನಿರ್ಬಂಧ ವಿಧಿಸುವುದಾಗಿ ಸ್ಟಾರ್ಟ್ಅಪ್ ಹೇಳಿದೆ. ಆದರೂ, ಬಳಕೆದಾರರ ನಂಬಿಕೆಯನ್ನು ಮರಳಿ ಗಳಿಸುವುದು ಈಗ ಸ್ಯಾಮ್ ಆಲ್ಟ್ಮನ್ ಮುಂದಿರುವ ದೊಡ್ಡ ಸವಾಲಾಗಿದೆ.
