ಬೆಂಗಳೂರು, ಏಪ್ರಿಲ್ 4: ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ಇನ್ಸೈಡರ್ ಶೋನಲ್ಲಿ ಮತ್ತೊಮ್ಮೆ ಮಿಸ್ಟರ್ ನಾಗ್ಸ್ ಹಾಸ್ಯ ಶೈಲಿ ಮಾತುಗಳೊಂದಿಗೆ ಕಾಣಿಸಿಕೊಂಡಿದ್ದಾರೆ. ಇಷ್ಟು ದಿನ ಅವರಿವರ ಕಾಲೆಳೆಯುತ್ತಿದ್ದ ನಾಗ್ಸ್ ಖ್ಯಾತಿಯ ಡ್ಯಾನಿಶ್ ಸೇಠ್, ಈಗ ಕಿಂಗ್ ಕೊಹ್ಲಿಯನ್ನೇ ಟ್ರೋಲಿಗೆಳೆದಿದ್ದಾರೆ. ಈ ವಿಡಿಯೋವನ್ನು RCB ತನ್ನ ಸಾಮಾಜಿಕ ಮಾಧ್ಯಮ ಖಾತೆಗಳಲ್ಲಿ ಹಂಚಿಕೊಂಡಿದ್ದು, ಕೆಲವೇ ಗಂಟೆಗಳಲ್ಲಿ ಲಕ್ಷಾಂತರ ಅಭಿಮಾನಿಗಳು ನೋಡಿ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
ನಾಗ್ಸ್ ಪ್ರಶ್ನೆಗೆ ಕೊಹ್ಲಿ ಕ್ಲಾಸಿಕ್ ಉತ್ತರ
ಸಂದರ್ಶನದಲ್ಲಿ ನಾಗ್ಸ್ ಈ ರೀತಿ ಕೇಳಿದ್ದು, “ಸೋಷಿಯಲ್ ಮೀಡಿಯಾದಲ್ಲಿ ನಿಮ್ಮ ಕುರಿತು ಅನೇಕ ಸಂಗತಿಗಳು ಚರ್ಚೆಯಾಗುತ್ತಿವೆ. ‘ಈ ಎಪಿಸೋಡ್ನಲ್ಲಿ RCB ಐವರು ವಿದೇಶಿ ಆಟಗಾರರೊಂದಿಗೆ ಆಡುತ್ತಿದೆ’ ಅನ್ನೋದು ಚರ್ಚೆಯಾಗ್ತಿದೆ. ನನಗೇಕೋ ಇದು ಅರ್ಥವಾಗ್ತಿಲ್ಲ.” ಎಂದರು. ಇದಕ್ಕೆ ಒಂದು ಕ್ಷಣ ಸ್ಟನ್ ಆದ ಕೊಹ್ಲಿ, ಮುಗುಳು ನಕ್ಕು ಉತ್ತರಿಸುತ್ತಾರೆ, “ಈ ಪ್ರಶ್ನೆ ನನಗೆ ಯಾಕೆ ಕೇಳ್ತಿದ್ದೀರಿ? ವಿದೇಶಿ ಆಟಗಾರರನ್ನ ಕೇಳಿ, ನನ್ನನ್ನ ಯಾಕೆ ಕೇಳ್ತಿದ್ದೀರಿ? ನಾನಂತೂ ವಿದೇಶಿ ಆಟಗಾರನಲ್ಲ. ನಿಮಗನ್ನಿಸುತ್ತಾ ನಾನು ವಿದೇಶಿ ಆಟಗಾರ ಅಂತ?” ಎಮದು ಕೊಹ್ಲಿ ಹೇಳಿದ್ದಾರೆ. ಇದಕ್ಕೆ ನಾಗ್ಸ್ ತಕ್ಷಣ, “ಖಂಡಿತಾ ಇಲ್ಲ” ಎನ್ನುತ್ತಲೇ ಮುಗುಳ್ನಗುತ್ತಾರೆ. ಕೊಹ್ಲಿ ಅವರ ಈ ಉತ್ತರ ನಾಗ್ಸ್ ಬುಡಕ್ಕೆ ಬೆಂಕಿ ಇಟ್ಟಂತಾಯಿತು.
ಲಂಡನ್ ಗಾಳಿಸುದ್ದಿಗೆ ತಿರುಗೇಟು
ಲಂಡನ್ನಲ್ಲಿ ವಿರಾಟ್ ಕೊಹ್ಲಿ ಮನೆ ಮಾಡಿದ್ದು, ಅವರ ಕುಟುಂಬ ಅಲ್ಲೇ ನೆಲೆಸಿದೆ. ಕ್ರಿಕೆಟ್ ಪಂದ್ಯಗಳಿಗೆ ಮಾತ್ರ ಅವರು ಭಾರತಕ್ಕೆ ಬರುತ್ತಾರೆ ಎಂಬ ಗಾಳಿಸುದ್ದಿ ಹಬ್ಬಿತ್ತು. ಕೊಹ್ಲಿ ಅವರು ತಮ್ಮ ಇನ್ಸ್ಟಾಗ್ರಾಮ್ ಸ್ಟೋರಿಯಲ್ಲಿ ಇದನ್ನು ತಳ್ಳಿಹಾಕಿದ್ದರು. ಅದೇ ವಿಷಯವನ್ನು ಸೂಕ್ಷ್ಮವಾಗಿ ಪ್ರಸ್ತಾಪಿಸಿದ ನಾಗ್ಸ್, ಕೊಹ್ಲಿ ಅವರನ್ನು ‘ವಿದೇಶಿ ಆಟಗಾರ’ ಎಂಬಂತೆ ಕೇಳಿದ ಪ್ರಶ್ನೆಗೆ ಕೊಹ್ಲಿ ತಮ್ಮ ಶೈಲಿಯಲ್ಲೇ ಉತ್ತರಿಸಿದರು. ಹೇರ್ ಕಟಿಂಗ್, ಟ್ಯಾಟೂಗಳ ಬಗ್ಗೆಯೂ ನಾಗ್ಸ್ ಕೆಣಕಿದರೂ ಕೊಹ್ಲಿ ಸಮರ್ಥವಾಗಿ ಸ್ಪಂದಿಸಿದರು.
ಮಿಸ್ಟರ್ ನಾಗ್ಸ್ ಯಾರು?
ಆರ್ಸಿಬಿಯ ಆಫ್-ಫೀಲ್ಡ್ ಎಂಟರ್ಟೇನರ್ ಮಿಸ್ಟರ್ ನಾಗ್ಸ್ ಖ್ಯಾತಿಯ ಡ್ಯಾನಿಶ್ ಸೇಠ್. ಪ್ರತಿ ಬಾರಿ IPL ಶುರುವಾದಾಗೆಲ್ಲ ಅವರ ವಿಡಿಯೋಗಳು ಹೆಚ್ಚು ಸದ್ದು ಮಾಡುತ್ತವೆ. RCB ಡ್ರೆಸ್ಸಿಂಗ್ ರೂಮ್ ವಿಷಯಗಳನ್ನು ತಮಾಷೆಭರಿತವಾಗಿ ಅಭಿಮಾನಿಗಳಿಗೆ ತಲುಪಿಸುವ ನಾಗ್ಸ್, ಮರ್ಮಭರಿತ ಟಿಪ್ಸ್ ನೀಡುವ ಮೂಲಕ ಗಮನ ಸೆಳೆಯುತ್ತಾರೆ. 2019ರಲ್ಲಿ ಅವರ ಅಭಾವ ಕಂಡುಬಂದಾಗ ಅಭಿಮಾನಿಗಳು ನಿರಾಶೆ ವ್ಯಕ್ತಪಡಿಸಿದ್ದರು.
ಕೊಹ್ಲಿ ಆಸೆ: ಸ್ಯಾಂಡಲ್ವುಡ್ಗೆ ಎಂಟ್ರಿ!
ಇದೇ ಸಂದರ್ಶನದಲ್ಲಿ ವಿರಾಟ್ ಕೊಹ್ಲಿ ಅವರು ನಟನೆಯ ಆಸೆಯನ್ನು ಬಿಚ್ಚಿಟ್ಟಿದ್ದಾರೆ. “ಚಾನ್ಸ್ ಸಿಕ್ರೆ ನಾನು ಖಂಡಿತಾ ಆಕ್ಟ್ ಮಾಡ್ತೀನಿ. ಏನೂ ಆಗಿಲ್ಲ ಅಂದ್ರೆ ಸ್ಯಾಂಡಲ್ವುಡ್ಗೆ ಎಂಟ್ರಿ ಕೊಡ್ತೀನಿ. ಸೈಡ್ ರೋಲ್ ಆದ್ರೂ ಪರವಾಗಿಲ್ಲ, ಮಾಡ್ತೀನಿ” ಎಂದು ವಿರಾಟ್ ಹೇಳಿದ್ದಾರೆ. ನಟ ಡ್ಯಾನಿಶ್ ಸೇಠ್ ಎದುರೇ ಕೊಹ್ಲಿ ಈ ಪ್ರಾಮಿಸ್ ಮಾಡಿದ್ದು, ಅಭಿಮಾನಿಗಳಲ್ಲಿ ಕುತೂಹಲ ಮೂಡಿಸಿದೆ. ಮುಂದಿನ ದಿನಗಳಲ್ಲಿ ಕೊಹ್ಲಿ, ಕನ್ನಡ ಚಿತ್ರರಂಗಕ್ಕೆ ಎಂಟ್ರಿ ಕೊಡ್ತಾರೋ ಎಂಬ ನಿರೀಕ್ಷೆ ಹೆಚ್ಚಿದೆ.
RCB vs CSK ಮ್ಯಾಚ್ ಸಂಭ್ರಮ
ನಾಳೆ (ಭಾನುವಾರ) ಬೆಂಗಳೂರಿನ ಎಂ. ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ RCB ಮತ್ತು ಚೆನ್ನೈ ಸೂಪರ್ ಕಿಂಗ್ಸ್ ತಂಡಗಳು ಮುಖಾಮುಖಿಯಾಗಲಿವೆ. ಪಂದ್ಯಕ್ಕೂ ಮುನ್ನ ಈ ವೈರಲ್ ವಿಡಿಯೋ ಅಭಿಮಾನಿಗಳ ಉತ್ಸಾಹವನ್ನು ಮತ್ತಷ್ಟು ಹೆಚ್ಚಿಸಿದೆ. ಕೊಹ್ಲಿ ಅವರ ತಿರುಗೇಟಿನ ಮಾತುಗಳು ಮತ್ತು ನಟನೆಯ ಆಸೆ ಕುರಿತ ಘೋಷಣೆ ಕ್ರಿಕೆಟ್ ವಲಯದಲ್ಲಿ ಭಾರೀ ಚರ್ಚೆಯಾಗುತ್ತಿದೆ. ನಾಗ್ಸ್ ಮತ್ತು ಕೊಹ್ಲಿ ನಡುವಿನ ಈ ಹಾಸ್ಯ ಸ್ಫೋಟ ಅಭಿಮಾನಿಗಳಿಗೆ ಸಖತ್ ಕಿಕ್ ಕೊಟ್ಟಿದೆ.