ಕ್ರಿಕೆಟ್ ಜಗತ್ತಿನ ದಿಗ್ಗಜ ಬ್ಯಾಟ್ಸ್‌ಮನ್ ವಿರಾಟ್ ಕೊಹ್ಲಿ ಇದೀಗ ಕ್ರಿಕೆಟ್ ಮೈದಾನದಿಂದ ಬ್ಯುಸಿನೆಸ್ ಲೋಕಕ್ಕೆ ಭವ್ಯವಾಗಿ ಕಾಲಿಟ್ಟಿದ್ದಾರೆ. ಟಿ20 ಇಂಟರ್‌ನ್ಯಾಷನಲ್ ಮತ್ತು ಟೆಸ್ಟ್ ಕ್ರಿಕೆಟ್‌ಗೆ ವಿದಾಯ ಹೇಳಿರುವ ಕೊಹ್ಲಿ, ಏಕದಿನ ಕ್ರಿಕೆಟ್‌ಗೆ ಮಾತ್ರ ಸೀಮಿತರಾಗಿದ್ದಾರೆ. ಕ್ರಿಕೆಟ್‌ನಿಂದ ಕ್ರಮೇಣ ದೂರವಾಗುತ್ತಿರವ ವಿರಾಟ್ ಕೊಹ್ಲಿ, ಇದೀಗ ಬ್ಯುಸಿನೆಸ್ ಲೋಕದಲ್ಲಿ ತಮ್ಮ ಸಾಮ್ರಾಜ್ಯವನ್ನು ಕಟ್ಟಿಕೊಳ್ಳಲು ಮುಂದಾಗಿದ್ದಾರೆ. ಕ್ರಿಕೆಟ್‌ನಲ್ಲಿ ತಮ್ಮ ಮಾಂತ್ರಿಕ ಆಟದಿಂದ ಜಗತ್ತನ್ನು ಆಕರ್ಷಿಸಿದ ಕಿಂಗ್ ಕೊಹ್ಲಿ, ಇದೀಗ ಬ್ಯುಸಿನೆಸ್ ಕ್ಷೇತ್ರದಲ್ಲಿ ತಮ್ಮದೇ ಆದ ಛಾಪು ಮೂಡಿಸಲು ದಿಟ್ಟ ಹೆಜ್ಜೆ ಇಟ್ಟಿದ್ದಾರೆ.
ಕೊಹ್ಲಿ ಕ್ರಿಕೆಟ್ ಆಡುವಾಗಲೇ ಬ್ಯುಸಿನೆಸ್‌ನಲ್ಲಿ ಸಕ್ರಿಯವಾಗಿದ್ದರು. ಆದರೆ, ಆಗ ಅವರು ಪೂರ್ಣಕಾಲಿಕ ಕ್ರಿಕೆಟಿಗರಾಗಿದ್ದು, ಬ್ಯುಸಿನೆಸ್‌ನಲ್ಲಿ ಅರ್ಧಕಾಲಿಕವಾಗಿ ತೊಡಗಿದ್ದರು. ಈಗ, ಅವರು ಪೂರ್ಣಕಾಲಿಕ ಬ್ಯುಸಿನೆಸ್‌ಮನ್‌ ಆಗಲು ಮತ್ತು ಅರ್ಧಕಾಲಿಕ ಕ್ರಿಕೆಟಿಗರಾಗಲು ತಯಾರಾಗಿದ್ದಾರೆ. ತಮ್ಮ ಬ್ಯುಸಿನೆಸ್ ಪಯಣವನ್ನು ಭವ್ಯವಾಗಿ ಆರಂಭಿಸಿರುವ ಕೊಹ್ಲಿ, ಮೊದಲ ಹೆಜ್ಜೆಯಲ್ಲೇ 40 ಕೋಟಿ ರೂಪಾಯಿಗಳ ಬಂಡವಾಳವನ್ನು ಹೂಡಿಕೆ ಮಾಡಲು ಮುಂದಾಗಿದ್ದಾರೆ.
ಅಜಿಲಿಟಾಸ್ ಕಂಪನಿಯಲ್ಲಿ ಹೂಡಿಕೆಮಾಡಿದ ಕೊಹ್ಲಿ:
ಪೂಮಾ ಇಂಡಿಯಾದ ಮಾಜಿ ಮುಖ್ಯಸ್ಥ ಅಭಿಷೇಕ್ ಗಂಗೂಲಿ ಅವರು ಸ್ಥಾಪಿಸಿದ ಅಜಿಲಿಟಾಸ್ ಎಂಬ ಸ್ಪೋರ್ಟ್ಸ್‌ವೇರ್ ಕಂಪನಿಯಲ್ಲಿ ಕೊಹ್ಲಿ ದೊಡ್ಡ ಹೂಡಿಕೆ ಮಾಡಿದ್ದಾರೆ. ಈ ಕಂಪನಿಯಲ್ಲಿ ಕೊಹ್ಲಿ ಕೇವಲ ಬ್ರ್ಯಾಂಡ್ ಅಂಬಾಸಿಡರ್ ಅಲ್ಲ, ಭಾಗೀದಾರರೂ ಆಗಿದ್ದಾರೆ. ಅಜಿಲಿಟಾಸ್‌ನಲ್ಲಿ 40 ಕೋಟಿ ರೂಪಾಯಿಗಳನ್ನು ಹೂಡಿಕೆ ಮಾಡಿರುವ ಕೊಹ್ಲಿ, ಮುಂದಿನ ದಿನಗಳಲ್ಲಿ ಇನ್ನಷ್ಟು ಬಂಡವಾಳ ಹೂಡಲಿದ್ದಾರೆ ಎಂದು ಕಂಪನಿಯ ಮೂಲಗಳು ತಿಳಿಸಿವೆ.
2023ರಲ್ಲಿ, ಅಜಿಲಿಟಾಸ್ ಕಂಪನಿಯು ಭಾರತದ ಪ್ರಮುಖ ಶೂ ಉತ್ಪಾದಕ ಕಂಪನಿಯಾದ ಮೊಚಿಕೋ ಶೂಸ್‌ನ್ನು ಸ್ವಾಧೀನಪಡಿಸಿಕೊಂಡಿತು. ಈ ಕಂಪನಿಯು ಅಡಿಡಾಸ್, ಪೂಮಾ, ನ್ಯೂ ಬ್ಯಾಲೆನ್ಸ್, ಮತ್ತು ಯುಎಸ್ ಪೋಲೋನಂತಹ ಜಾಗತಿಕ ಬ್ರಾಡ್‌ಗಳ ಶೂಗಳನ್ನು ತಯಾರಿಸುತ್ತದೆ. ಇದರ ಜೊತೆಗೆ, ಭಾರತದ ಅತಿದೊಡ್ಡ ಸ್ಪೋರ್ಟ್ಸ್ ಫುಟ್‌ವೇರ್ ಕಂಪನಿಯಾದ ಲೊಟೋದ ಲೈಸನ್ಸ್ ರೈಟ್ಸ್‌ನ್ನು ಕೂಡ ಅಜಿಲಿಟಾಸ್ ಖರೀದಿಸಿದೆ. ಇದರಿಂದ ಭಾರತ ಮತ್ತು ಇತರ ದೇಶಗಳಲ್ಲಿ ಶೂಗಳ ಮಾರಾಟದ ಹಕ್ಕುಗಳನ್ನು ಪಡೆದುಕೊಂಡಿದೆ. ತಯಾರಿಕೆ ಮತ್ತು ಮಾರಾಟದ ಎರಡೂ ಹಕ್ಕುಗಳನ್ನು ಹೊಂದಿರುವ ಅಜಿಲಿಟಾಸ್, ಈಗ ತನ್ನದೇ ಆದ ಹೊಸ ಸ್ಪೋರ್ಟ್ಸ್‌ವೇರ್ ಬ್ರಾಂಡ್ ಅನ್ನು ಪರಿಚಯಿಸಲು ಯೋಜನೆ ರೂಪಿಸಿದೆ. ಈ ಬ್ರಾಂಡ್ ಕೇವಲ ಶೂಗಳಿಗೆ ಸೀಮಿತವಾಗಿರದೆ, ಸ್ಪೋರ್ಟ್ಸ್‌ಗೆ ಸಂಬಂಧಿಸಿದ ಎಲ್ಲ ಉತ್ಪನ್ನಗಳನ್ನು ಒಳಗೊಂಡಿರುತ್ತದೆ.
ಪೂಮಾದ ಆಫರ್ ತಿರಸ್ಕರಿಸಿದ್ದೇಕೆ?
2017 ರಿಂದ ವಿರಾಟ್ ಕೊಹ್ಲಿ ಪೂಮಾದ ಬ್ರಾಂಡ್ ಅಂಬಾಸಿಡರ್ ಆಗಿದ್ದರು. 8 ವರ್ಷಗಳ ಕಾಲ 110 ಕೋಟಿ ರೂಪಾಯಿಗಳ ಒಪ್ಪಂದಕ್ಕೆ ಸಹಿ ಹಾಕಿದ್ದರು. ಆ ಸಮಯದಲ್ಲಿ ಅಭಿಷೇಕ್ ಗಂಗೂಲಿ ಪೂಮಾ ಇಂಡಿಯಾದ ವ್ಯವಸ್ಥಾಪಕ ನಿರ್ದೇಶಕರಾಗಿದ್ದರು. 2025 ರ ಆರಂಭದಲ್ಲಿ, ಪೂಮಾ 300 ಕೋಟಿ ರೂಪಾಯಿಗಳ ದೊಡ್ಡ ಒಪ್ಪಂದವನ್ನು ನೀಡಿತ್ತು. ಆದರೆ, ಕೊಹ್ಲಿ ಈ ಆಫರ್‌ನನ್ನು ತಿರಸ್ಕರಿಸಿದರು. ಅಭಿಷೇಕ್ ಗಂಗೂಲಿಯ ಅಜಿಲಿಟಾಸ್ ಕಂಪನಿಯಲ್ಲಿ ಹೂಡಿಕೆ ಮಾಡುವ ಉದ್ದೇಶದಿಂದಲೇ ಈ ಆಫರ್‌ನನ್ನು ತಿರಸ್ಕರಿಸಿದ್ದಾರೆ ಎನ್ನಲಾಗಿದೆ.
ಕೊಹ್ಲಿ ಈಗಾಗಲೇ ತಮ್ಮದೇ ಆದ ಒನ್8 ಕಂಪನಿಯನ್ನು ಸ್ಥಾಪಿಸಿದ್ದಾರೆ ಮತ್ತು ಡಿಜಿಟ್ ಇನ್ಶೂರೆನ್ಸ್, MPL, Wrognನಂತಹ ಸ್ಟಾರ್ಟ್‌ಅಪ್‌ಗಳಲ್ಲಿ ಹೂಡಿಕೆ ಮಾಡಿದ್ದಾರೆ. ಕ್ರಿಕೆಟ್‌ನಂತೆ ಬ್ಯುಸಿನೆಸ್‌ನಲ್ಲೂ ಕೊಹ್ಲಿ ಯಶಸ್ಸಿನ ಶಿಖರವನ್ನೇರಲಿ ಎಂಬುದು ಅವರ ಅಭಿಮಾನಿಗಳ ಆಶಯವಾಗಿದೆ.