ಬೆಂಗಳೂರು: ಇಂಡಿಯನ್ ಪ್ರೀಮಿಯರ್ ಲೀಗ್ (IPL) ಆರಂಭವಾದಾಗಿನಿಂದಲೂ ಕೋಟ್ಯಂತರ ಅಭಿಮಾನಿಗಳ ಹೃದಯ ಗೆದ್ದಿರುವ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ತಂಡ ಈಗ ಹೊಸ ಅಧ್ಯಾಯಕ್ಕೆ ನಾಂದಿ ಹಾಡುತ್ತಿದೆ. ಸುಮಾರು 18 ವರ್ಷಗಳ ಕಾಲ ಯುನೈಟೆಡ್ ಸ್ಪಿರಿಟ್ಸ್ ಲಿಮಿಟೆಡ್ (USL) ಒಡೆತನದಲ್ಲಿದ್ದ ಈ ತಂಡವು, ಈಗ ಆದಿತ್ಯ ಬಿರ್ಲಾ ಗ್ರೂಪ್ ಪಾಲಾಗಿದೆ. ಈ ಭಾರೀ ಮೊತ್ತದ ವ್ಯವಹಾರವು ಕ್ರಿಕೆಟ್ ಲೋಕದಲ್ಲಿ ಹೊಸ ಚರ್ಚೆಗೆ ಕಾರಣವಾಗಿದೆ.
16,706 ಕೋಟಿ ರೂಪಾಯಿಯ ಬೃಹತ್ ಡೀಲ್
ಆದಿತ್ಯ ಬಿರ್ಲಾ ಸಮೂಹವು ಸುಮಾರು 16,706 ಕೋಟಿ ರೂಪಾಯಿ ಪಾವತಿಸುವ ಮೂಲಕ ಆರ್ಸಿಬಿ ಫ್ರಾಂಚೈಸಿಯನ್ನು ಖರೀದಿ ಮಾಡಿದೆ. ಈ ಖರೀದಿಯಲ್ಲಿ ಕೇವಲ ಬಿರ್ಲಾ ಸಮೂಹ ಮಾತ್ರವಲ್ಲದೆ, ಬ್ಲ್ಯಾಕ್ಸ್ಟೋನ್ ಇಕ್ವಿಟಿ ಫರ್ಮ್, ಅಮೆರಿಕದ ಹೂಡಿಕೆದಾರ ಡೇವಿಡ್ ಬ್ಲಿಟ್ಝರ್ ಒಡೆತನದ ಬೋಲ್ಟ್ ವೆಂಚರ್ಸ್ ಮತ್ತು ಟೈಮ್ಸ್ ಆಫ್ ಇಂಡಿಯಾ ಮಾಧ್ಯಮ ಸಮೂಹ ಕೂಡ ಕೈಜೋಡಿಸಿವೆ. ಮಾರ್ಚ್ 28ರಂದು ಆರ್ಸಿಬಿ ಈ ಸೀಸನ್ನ ಮೊದಲ ಪಂದ್ಯವನ್ನು ಆಡಲಿದ್ದು, ಅದಕ್ಕೂ ಮುನ್ನವೇ ಈ ಮಾಲೀಕತ್ವದ ವರ್ಗಾವಣೆ ಪ್ರಕ್ರಿಯೆ ಪೂರ್ಣಗೊಂಡಿರುವುದು ವಿಶೇಷ.
ಹೆಸರು ಬದಲಾವಣೆಗೆ ಕಾರಣವೇನು ?
ಆರ್ಸಿಬಿ ತಂಡದ ಹೆಸರು ಬದಲಾವಣೆಯ ಸಾಧ್ಯತೆ ಈಗ ದಟ್ಟವಾಗಿ ಕಾಣಿಸುತ್ತಿದೆ. ಇದರ ಹಿಂದೆ ಬಲವಾದ ವಾಣಿಜ್ಯ ಕಾರಣವಿದೆ. ತಂಡದ ಈ ಹಿಂದಿನ ಮಾಲೀಕರಾದ ಯುಎಸ್ಎಲ್ (ಡಿಯಾಜಿಯೊ ಅಂಗಸಂಸ್ಥೆ) ಮದ್ಯ ತಯಾರಿಕಾ ಕಂಪನಿಯಾಗಿತ್ತು. ತಮ್ಮ ಜನಪ್ರಿಯ ವಿಸ್ಕಿ ಬ್ರ್ಯಾಂಡ್ ಆದ ‘ರಾಯಲ್ ಚಾಲೆಂಜ್’ ಅಥವಾ ‘RC’ ಅನ್ನು ಪ್ರಚಾರ ಮಾಡುವ ಉದ್ದೇಶದಿಂದ ವಿಜಯ್ ಮಲ್ಯ ಅಂದು ತಂಡಕ್ಕೆ ‘ರಾಯಲ್ ಚಾಲೆಂಜರ್ಸ್ ಬೆಂಗಳೂರು’ ಎಂದು ಹೆಸರಿಟ್ಟಿದ್ದರು.
ಈಗ ಮಾಲೀಕತ್ವವು ಆದಿತ್ಯ ಬಿರ್ಲಾ ಗ್ರೂಪ್ ಕೈ ಸೇರಿರುವುದರಿಂದ, ಹಳೆಯ ಮದ್ಯದ ಬ್ರ್ಯಾಂಡ್ ಹೆಸರನ್ನು ಮುಂದುವರಿಸಲು ಅವರು ಇಚ್ಛಿಸದಿರಬಹುದು. ಒಂದು ವೇಳೆ ಅದೇ ಹೆಸರನ್ನು ಉಳಿಸಿಕೊಂಡರೆ, ಅದು ಈಗಲೂ ಹಳೆಯ ಮಾಲೀಕರ ಬ್ರ್ಯಾಂಡ್ ಅನ್ನು ಉಚಿತವಾಗಿ ಪ್ರಮೋಷನ್ ಮಾಡಿದಂತಾಗುತ್ತದೆ. ಈ ಹಿನ್ನೆಲೆಯಲ್ಲಿ ಬ್ರ್ಯಾಂಡ್ ಇಮೇಜ್ ಬದಲಿಸಲು ಹೆಸರು ಬದಲಾವಣೆಯ ನಿರ್ಧಾರಕ್ಕೆ ಬರಬಹುದು ಎನ್ನಲಾಗಿದೆ.
ಆರ್ಸಿಬಿ ಎಂಬುದು ಕೇವಲ ಹೆಸರಾಗಿ ಉಳಿದಿಲ್ಲ, ಅದು ಅಭಿಮಾನಿಗಳ ಪಾಲಿಗೆ ಒಂದು ಭಾವನೆಯಾಗಿದೆ. ತಂಡದ ಘೋಷವಾಕ್ಯ ‘ಈ ಸಲ ಕಪ್ ನಮ್ದೆ’ ಎಂಬುದು ಎಷ್ಟು ಫೇಮಸ್ ಆಗಿದೆಯೋ, ‘ಆರ್ಸಿಬಿ’ ಎಂಬ ಶಾರ್ಟ್ ಫಾರ್ಮ್ ಕೂಡ ಅಷ್ಟೇ ತೂಕವನ್ನು ಹೊಂದಿದೆ. ಮೂಲಗಳ ಪ್ರಕಾರ, ಆದಿತ್ಯ ಬಿರ್ಲಾ ಗ್ರೂಪ್ ತಂಡದ ಹೆಸರನ್ನು ಬದಲಿಸಿದರೂ, ‘RCB’ ಎಂಬ ಮೂರು ಅಕ್ಷರಗಳು ಬರುವಂತೆಯೇ ಹೊಸ ಹೆಸರನ್ನು ನಾಮಕರಣ ಮಾಡುವ ಸಾಧ್ಯತೆ ಇದೆ. ಇದು ಅಭಿಮಾನಿಗಳ ಭಾವನೆಗೆ ಧಕ್ಕೆ ತರದಂತೆ ಬ್ರ್ಯಾಂಡ್ ಮೌಲ್ಯವನ್ನು ಉಳಿಸಿಕೊಳ್ಳುವ ತಂತ್ರವಾಗಿದೆ.
ಲಂಡನ್ ಮೂಲದ ಡಿಯಾಜಿಯೊ ಕಂಪನಿಯು ಕಳೆದ ನವೆಂಬರ್ನಲ್ಲೇ ತಂಡದ ಮಾರಾಟದ ಸುಳಿವು ನೀಡಿತ್ತು. ತಮ್ಮ ಕಂಪನಿಯ ಮುಖ್ಯ ಉದ್ದೇಶ ಮದ್ಯದ ವ್ಯವಹಾರವಾಗಿದ್ದು, ಕ್ರಿಕೆಟ್ ಕ್ಷೇತ್ರಕ್ಕೂ ತಮ್ಮ ವ್ಯವಹಾರಕ್ಕೂ ನೇರ ಸಂಬಂಧ ಇಲ್ಲದ ಕಾರಣ ಮಾರ್ಚ್ 31ರೊಳಗೆ ತಂಡವನ್ನು ಮಾರಾಟ ಮಾಡುವುದಾಗಿ ತಿಳಿಸಿತ್ತು. ಇದೀಗ ಪುರುಷರ ಮತ್ತು ಮಹಿಳಾ (WPL) ಎರಡೂ ತಂಡಗಳನ್ನು ಆದಿತ್ಯ ಬಿರ್ಲಾ ಸಮೂಹ ಖರೀದಿಸಿದೆ.
