ಅಹಮದಾಬಾದ್‌: ಚೆನ್ನೈ ಸೂಪರ್ ಕಿಂಗ್ಸ್ (CSK) ತಂಡವು ಗುಜರಾತ್ ಟೈಟಾನ್ಸ್ (GT) ವಿರುದ್ಧ 83 ರನ್‌ಗಳ ಭರ್ಜರಿ ಗೆಲುವು ಸಾಧಿಸಿ, ಐಪಿಎಲ್ 18ನೇ ಆವೃತ್ತಿಗೆ ಅದ್ಭುತ ವಿದಾಯ ಹೇಳಿದೆ. ಸಿಡಿಲಬ್ಬರದ ಬ್ಯಾಟಿಂಗ್ ಮತ್ತು ಸಂಘಟಿತ ಬೌಲಿಂಗ್ ದಾಳಿಯಿಂದ CSK ತನ್ನ ಕೊನೆಯ ಲೀಗ್ ಪಂದ್ಯವನ್ನು ಗೆದ್ದು, ಗುಜರಾತ್ಗೆ ನಂ.1 ಸ್ಥಾನ ಕಳೆದುಕೊಳ್ಳುವ ಆತಂಕವನ್ನುಂಟುಮಾಡಿದೆ.
ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ನಡೆದ 67ನೇ ಐಪಿಎಲ್ ಪಂದ್ಯದಲ್ಲಿ ಟಾಸ್ ಗೆದ್ದ CSK ಮೊದಲು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡಿತು. 20 ಓವರ್‌ಗಳಲ್ಲಿ 5 ವಿಕೆಟ್‌ಗೆ 230 ರನ್‌ಗಳ ಬೃಹತ್ ಮೊತ್ತ ಕಲೆಹಾಕಿತು. 231 ರನ್‌ಗಳ ಗುರಿ ಬೆನ್ನಟ್ಟಿದ ಗುಜರಾತ್ ಟೈಟಾನ್ಸ್ 18.3 ಓವರ್‌ಗಳಲ್ಲಿ 147 ರನ್‌ಗಳಿಗೆ ಸೋಲನ್ನು ಒಪ್ಪಿಕೊಂಡಿತ್ತು.
CSK ಬ್ಯಾಟಿಂಗ್‌ನಲ್ಲಿ ಮಿಂಚಿದ ಆಟಗಾರರು
CSK ತಂಡದ ಆರಂಭಿಕ ಜೋಡಿಯಾದ ಆಯುಷ್ ಮ್ಹಾತ್ರೆ ಮತ್ತು ಡೆವೊನ್ ಕಾನ್ವೆ 22 ಎಸೆತಗಳಲ್ಲಿ 44 ರನ್‌ಗಳ ಜೊತೆಯಾಟವಾಡಿದರು. ಆಯುಷ್ 17 ಎಸೆತಗಳಲ್ಲಿ 34 ರನ್ (3 ಬೌಂಡರಿ, 3 ಸಿಕ್ಸ್) ಗಳಿಸಿ ಔಟಾದರು. ಡೆವೊನ್ ಕಾನ್ವೆ ರವಿಲ್ ಪಟೇಲ್ ಜೊತೆ 34 ಎಸೆತಗಳಲ್ಲಿ 63 ರನ್ ಕಲೆಹಾಕಿದರು. ರವಿಲ್ 19 ಎಸೆತಗಳಲ್ಲಿ 37 ರನ್ (4 ಬೌಂಡರಿ, 2 ಸಿಕ್ಸ್) ಗಳಿಸಿದರು. ಶಿವಂ ದುಬೆ 8 ಎಸೆತಗಳಲ್ಲಿ 17 ರನ್ ಗಳಿಸಿ, ಡೆವೊನ್ ಜೊತೆ 19 ಎಸೆತಗಳಲ್ಲಿ 37 ರನ್ ಸೇರಿಸಿದರು. ಡೆವೊನ್ ಕಾನ್ವೆ 35 ಎಸೆತಗಳಲ್ಲಿ 52 ರನ್ (6 ಬೌಂಡರಿ, 2 ಸಿಕ್ಸ್) ಸಿಡಿಸಿ ಮಿಂಚಿದರು. ಡೆವಾಲ್ಡ್ ಬ್ರೇವಿಸ್ 23 ಎಸೆತಗಳಲ್ಲಿ 57 ರನ್ (4 ಬೌಂಡರಿ, 5 ಸಿಕ್ಸ್) ಗಳಿಸಿ ಗಮನ ಸೆಳೆದರು. ರವೀಂದ್ರ ಜಡೆಜಾ 18 ಎಸೆತಗಳಲ್ಲಿ 21 ರನ್ ಗಳಿಸಿ ಅಜೇಯರಾಗಿ ಉಳಿದರು.
ಗುಜರಾತ್ ಟೈಟಾನ್ಸ್‌ನ ಆರಂಭಿಕ ಜೋಡಿಯಾದ ಸಾಯಿ ಸುದರ್ಶನ್ ಮತ್ತು ಶುಭಮನ್ ಗಿಲ್ 15 ಎಸೆತಗಳಲ್ಲಿ 24 ರನ್ ಗಳಿಸಿದರು. ಗಿಲ್ 9 ಎಸೆತಗಳಲ್ಲಿ 13 ರನ್ (1 ಬೌಂಡರಿ, 1 ಸಿಕ್ಸ್) ಗಳಿಸಿ ಔಟಾದರು. ಜೋಸ್ ಬಟ್ಲರ್ 5 ರನ್‌ಗೆ, ಶೆರ್ಫೇನ್ ರುದರ್‌ಫೋರ್ಡ್ ಶೂನ್ಯಕ್ಕೆ ಔಟಾದರು. ಸಾಯಿ ಸುದರ್ಶನ್ ಶಾರುಖ್ ಖಾನ್ ಜೊತೆ 34 ಎಸೆತಗಳಲ್ಲಿ 55 ರನ್ ಸೇರಿಸಿದರು. ಸಾಯಿ 28 ಎಸೆತಗಳಲ್ಲಿ 41 ರನ್ (6 ಬೌಂಡರಿ) ಗಳಿಸಿದರೆ, ಶಾರುಖ್ 15 ಎಸೆತಗಳಲ್ಲಿ 19 ರನ್ (2 ಸಿಕ್ಸ್) ಗಳಿಸಿದರು. ರಶೀದ್ ಖಾನ್ 12 ರನ್, ರಾಹುಲ್ ತೆವಾಟಿಯಾ 14 ರನ್, ಅರ್ಶದ್ ಖಾನ್ 20 ರನ್ ಗಳಿಸಿದರೂ ತಂಡವನ್ನು ಕಾಪಾಡಲಾಗಲಿಲ್ಲ.
CSKನ ಬೌಲಿಂಗ್‌ನಲ್ಲಿ ನೂರ್ ಅಹ್ಮದ್ ಮತ್ತು ಅನ್ಶುಲ್ ತಲಾ 3 ವಿಕೆಟ್ ಕಿತ್ತರು. ರವೀಂದ್ರ ಜಡೆಜಾ 2 ವಿಕೆಟ್, ಖಲೀಲ್ ಅಹ್ಮದ್ ಮತ್ತು ಮಥೀಶಾ ಪತಿರಾನ ತಲಾ 1 ವಿಕೆಟ್ ಪಡೆದರು. ಗುಜರಾತ್‌ನಿಂದ ಪ್ರಸಿದ್ಧ್ ಕೃಷ್ಣ 2 ವಿಕೆಟ್, ಸಾಯಿ ಕಿಶೋರ್, ರಶೀದ್ ಖಾನ್ ಮತ್ತು ಶಾರುಖ್ ಖಾನ್ ತಲಾ 1 ವಿಕೆಟ್ ಕಿತ್ತರು.
ನಂ.1 ಸ್ಥಾನಕ್ಕೆ ತೀವ್ರ ಕಾದಾಟ
ಗುಜರಾತ್ ಟೈಟಾನ್ಸ್ 14 ಪಂದ್ಯಗಳಲ್ಲಿ 9 ಗೆಲುವಿನೊಂದಿಗೆ 18 ಅಂಕಗಳೊಂದಿಗೆ ಅಗ್ರಸ್ಥಾನದಲ್ಲಿದೆ. ಆದರೆ, ಪಂಜಾಬ್ ಕಿಂಗ್ಸ್, ಆರ್‌ಸಿಬಿ, ಮತ್ತು ಮುಂಬೈ ಇಂಡಿಯನ್ಸ್‌ಗೆ ಇನ್ನೂ ಒಂದು ಪಂದ್ಯ ಬಾಕಿಯಿದ್ದು, ನಂ.1 ಸ್ಥಾನಕ್ಕೆ ತೀವ್ರ ಪೈಪೋಟಿ ನಡೆಯುತ್ತಿದೆ. ಮುಂಬೈ ಇಂಡಿಯನ್ಸ್ ಪಂಜಾಬ್ ವಿರುದ್ಧ ಸೋತು, ಆರ್‌ಸಿಬಿ ಲಕ್ನೋ ವಿರುದ್ಧ ಉತ್ತಮ ರನ್‌ರೇಟ್‌ನೊಂದಿಗೆ ಗೆದ್ದರೆ, ಆರ್‌ಸಿಬಿ ನಂ.1 ಸ್ಥಾನಕ್ಕೇರಬಹುದು. ಇಲ್ಲದಿದ್ದರೆ, ಮುಂಬೈ ಮತ್ತು ಪಂಜಾಬ್‌ಗೆ ಮೊದಲ ಎರಡು ಸ್ಥಾನಗಳು ಸಿಗುವ ಸಾಧ್ಯತೆಯಿದೆ.
