100 ವರ್ಷಗಳ ಬಳಿಕ ಹೋಳಿ ಸಂಭ್ರಮದಂದೇ ‘ರಕ್ತ ಚಂದ್ರ ಗ್ರಹಣ: ಭಾರತದಲ್ಲಿ ವೀಕ್ಷಣೆ ಎಲ್ಲಿ? ಹೇಗೆ? ಇಲ್ಲಿದೆ ಕಂಪ್ಲೀಟ್ ಡಿಟೇಲ್ಸ್

ಬೆಂಗಳೂರು: ಬರೋಬ್ಬರಿ ಒಂದು ಶತಮಾನದ ನಂತರ, ಬಣ್ಣಗಳ ಹಬ್ಬ ಹೋಳಿ ದಿನದಂದೇ (ಮಾರ್ಚ್ 3, 2026) ವರ್ಷದ ಮೊದಲ ಸಂಪೂರ್ಣ ಚಂದ್ರಗ್ರಹಣ ಸಂಭವಿಸುತ್ತಿದೆ. ಈ ದಿನ ಚಂದ್ರನು ಕೆಂಪು ಮಿಶ್ರಿತ ತಾಮ್ರದ ಬಣ್ಣಕ್ಕೆ ತಿರುಗಲಿದ್ದು, ಇದನ್ನು ವಿಜ್ಞಾನಿಗಳು ‘ಬ್ಲಡ್ ಮೂನ್’ (Blood Moon) ಎಂದು ಕರೆಯುತ್ತಾರೆ.

ಏನಿದು ಬ್ಲಡ್ ಮೂನ್? ಚಂದ್ರ ಕೆಂಪಾಗುವುದು ಏಕೆ ?

ಸೂರ್ಯ, ಭೂಮಿ ಮತ್ತು ಚಂದ್ರ ಒಂದೇ ಸರಳರೇಖೆಯಲ್ಲಿ ಬಂದಾಗ ಭೂಮಿಯ ನೆರಳು ಚಂದ್ರನ ಮೇಲೆ ಬೀಳುತ್ತದೆ. ಈ ಪ್ರಕ್ರಿಯೆಯನ್ನು ನಾವು ಚಂದ್ರಗ್ರಹಣ ಎನ್ನುತ್ತೇವೆ. ಆದರೆ ‘ಬ್ಲಡ್ ಮೂನ್’ ಸಮಯದಲ್ಲಿ, ಭೂಮಿಯ ವಾತಾವರಣವು ಸೂರ್ಯನ ಬೆಳಕನ್ನು ಫಿಲ್ಟರ್ ಮಾಡುತ್ತದೆ. ನೀಲಿ ಬಣ್ಣದ ಕಿರಣಗಳು ಚದುರಿಹೋಗಿ, ಕೇವಲ ಉದ್ದನೆಯ ತರಂಗಾಂತರದ ಕೆಂಪು ಕಿರಣಗಳು ಮಾತ್ರ ಚಂದ್ರನನ್ನು ತಲುಪುತ್ತವೆ. ಇದರಿಂದ ಚಂದ್ರನು ರಕ್ತದಂತೆ ಕೆಂಪಾಗಿ ಕಂಗೊಳಿಸುತ್ತಾನೆ.

ಭಾರತದಲ್ಲಿ ಗ್ರಹಣದ ಸಮಯ (IST)

ಕೋಲ್ಕತ್ತಾದ ಪೊಸಿಷನಲ್ ಅಸ್ಟೋನಾಮಿಕಲ್ ಸೆಂಟರ್ ಮಾಹಿತಿಯಂತೆ, ಗ್ರಹಣದ ವಿವಿಧ ಹಂತಗಳು ಹೀಗಿವೆ:

ಭಾರತದಲ್ಲಿ ವೀಕ್ಷಣೆಗೆ ಬೆಸ್ಟ್ ಸ್ಥಳಗಳು ಯಾವುವು ?

ಭಾರತದ ಬಹುತೇಕ ಭಾಗಗಳಲ್ಲಿ ಚಂದ್ರೋದಯವಾಗುವ ಮೊದಲೇ ಗ್ರಹಣದ ಪ್ರಮುಖ ಹಂತಗಳು ಆರಂಭವಾಗಿರುತ್ತದೆ. ಹೀಗಾಗಿ ಪೂರ್ವ ದಿಕ್ಕಿನ ನಗರಗಳಲ್ಲಿ ವೀಕ್ಷಣೆ ಸುಲಭ.

• ಈಶಾನ್ಯ ಭಾರತ: ಗುವಾಹಟಿ, ಇಟಾನಗರ ಮತ್ತು ಶಿಲ್ಲಾಂಗ್‌ನಲ್ಲಿ ಚಂದ್ರನು ಉದಯಿಸುವಾಗಲೇ ಕೆಂಪು ಬಣ್ಣದಲ್ಲಿ (ಬ್ಲಡ್ ಮೂನ್) ಕಂಗೊಳಿಸುವುದರಿಂದ ಅದ್ಭುತ ನೋಟ ಸಿಗಲಿದೆ.

• ಪೂರ್ವ ಭಾರತ: ಕೋಲ್ಕತ್ತಾ ಮತ್ತು ಪಾಟ್ನಾದಲ್ಲಿ ಸಂಪೂರ್ಣ ಗ್ರಹಣ ಮುಕ್ತಾಯದ ದೃಶ್ಯಗಳನ್ನು ವೀಕ್ಷಿಸಬಹುದು.

• ದಕ್ಷಿಣ ಮತ್ತು ಪಶ್ಚಿಮ ಭಾರತ: ಬೆಂಗಳೂರು, ಮೈಸೂರು, ಚೆನ್ನೈ ಮತ್ತು ಮುಂಬೈನಲ್ಲಿ ಚಂದ್ರೋದಯದ ನಂತರ ಕೇವಲ 15 ರಿಂದ 25 ನಿಮಿಷಗಳ ಕಾಲ ಮಾತ್ರ ಪಾರ್ಶ್ವ ಗ್ರಹಣವನ್ನು ವೀಕ್ಷಿಸಬಹುದು.

ವೀಕ್ಷಿಸುವುದು ಹೇಗೆ? ಮುನ್ನೆಚ್ಚರಿಕೆಗಳೇನು?

1. ಬರಿಗಣ್ಣಿನಿಂದ ವೀಕ್ಷಿಸಿ: ಸೂರ್ಯಗ್ರಹಣವನ್ನು ನೋಡುವಾಗ ಬಳಸುವ ಎಚ್ಚರಿಕೆಗಳು ಇಲ್ಲಿ ಅಗತ್ಯವಿಲ್ಲ. ಚಂದ್ರಗ್ರಹಣವು ಕಣ್ಣಿಗೆ ಸಂಪೂರ್ಣವಾಗಿ ಸುರಕ್ಷಿತ.

2. ಸ್ಥಳದ ಆಯ್ಕೆ: ಚಂದ್ರೋದಯದ ಸಮಯದಲ್ಲಿ ಈ ವಿದ್ಯಮಾನ ನಡೆಯುವುದರಿಂದ, ಪೂರ್ವ ದಿಕ್ಕಿನಲ್ಲಿ ಅಡೆತಡೆಗಳಿಲ್ಲದ ಎತ್ತರದ ಕಟ್ಟಡ ಅಥವಾ ಬಯಲು ಜಾಗವನ್ನು ಆರಿಸಿಕೊಳ್ಳಿ.

3. ಲೈವ್ ವೀಕ್ಷಣೆ: ಒಂದು ವೇಳೆ ಮೋಡ ಕವಿದ ವಾತಾವರಣವಿದ್ದರೆ, ‘TimeandDate’ ಯುಟ್ಯೂಬ್ ಚಾನೆಲ್‌ನಲ್ಲಿ ಇದರ ನೇರ ಪ್ರಸಾರವನ್ನು ವೀಕ್ಷಿಸಬಹುದು.

ಇದು 2026ರ ಏಕೈಕ ಸಂಪೂರ್ಣ ಚಂದ್ರಗ್ರಹಣವಾಗಿದ್ದು, ಈ ಅವಕಾಶ ಮಿಸ್ ಮಾಡಿಕೊಂಡರೆ ಮತ್ತೆ ಅಂತಹದ್ದೇ ದೃಶ್ಯ ನೋಡಲು ನಾವು ಜುಲೈ 2028ರವರೆಗೆ ಕಾಯಲೇಬೇಕು.