ಜನ್ಮ ದಿನಾಂಕದ ಆಧಾರದ ಮೇಲೆ ನಮ್ಮ ವ್ಯಕ್ತಿತ್ವ ಮತ್ತು ಭವಿಷ್ಯವನ್ನು ನಿರ್ಧರಿಸುವ ಸಂಖ್ಯಾಶಾಸ್ತ್ರ ಇಂದು ಬಹಳ ಪ್ರಾಮುಖ್ಯತೆ ಪಡೆದಿದೆ. ಗ್ರಹಗತಿಗಳ ಚಲನೆಯಂತೆ ಪ್ರತಿ ಸಂಖ್ಯೆಗೂ ತನ್ನದೇ ಆದ ಶಕ್ತಿ ಇರುತ್ತದೆ. ಇಂದು (ಮಾರ್ಚ್ 2,2026)1 ರಿಂದ 9 ರವರೆಗಿನ ಜನ್ಮಸಂಖ್ಯೆಯವರಿಗೆ ದಿನದ ಫಲ ಹೇಗಿರಲಿದೆ ಎಂಬುದರ ಸಂಪೂರ್ಣ ವಿವರ ಇಲ್ಲಿದೆ.
ಜನ್ಮಸಂಖ್ಯೆ 1, 10, 19, 28
ಇಂದು ಸಂಗಾತಿಯ ಹಠಮಾರಿತನವು ನಿಮಗೆ ಸಾರ್ವಜನಿಕವಾಗಿ ಮುಜುಗರ ಉಂಟುಮಾಡುವ ಸಾಧ್ಯತೆಯಿದೆ, ತಾಳ್ಮೆಯಿಂದ ಪರಿಸ್ಥಿತಿ ನಿಭಾಯಿಸಿ. ಇತ್ತೀಚೆಗೆ ಮನೆ ನಿರ್ಮಾಣ ಅಥವಾ ನವೀಕರಣ (Renovation) ಮಾಡಿಸಿ ಆರ್ಥಿಕ ಒತ್ತಡಕ್ಕೆ ಸಿಲುಕಿದ್ದರೆ, ಇಂದು ಅದರಿಂದ ಹೊರಬರುವ ಹೊಸ ಮಾರ್ಗಗಳು ಗೋಚರಿಸಲಿವೆ. ಸ್ವಂತ ಉದ್ಯಮ ನಡೆಸುತ್ತಿರುವವರಿಗೆ ವ್ಯಾಪಾರ ವಿಸ್ತರಣೆಯ ಶುಭ ಅವಕಾಶಗಳು ದೊರೆಯಲಿವೆ.
ಜನ್ಮಸಂಖ್ಯೆ 2, 11, 20, 29
ಆರ್ಥಿಕವಾಗಿ ಇಂದು ಮಿಶ್ರಫಲ ಇರಲಿದೆ. ಬ್ಯಾಂಕ್ ಸಾಲಕ್ಕಾಗಿ ಪ್ರಯತ್ನಿಸುತ್ತಿರುವವರಿಗೆ ಪೂರಕ ವಾತಾವರಣವಿದೆ. ಆಪ್ತ ಸ್ನೇಹಿತರು ಅಥವಾ ಸಂಬಂಧಿಕರಿಂದ ತಾತ್ಕಾಲಿಕ ಧನಸಹಾಯ ಸಿಗಬಹುದು. ನೀವು ಮರೆತೇ ಹೋಗಿದ್ದ ಹಳೆಯ ಅವಕಾಶವೊಂದು ಮತ್ತೆ ನಿಮ್ಮನ್ನು ಹುಡುಕಿಕೊಂಡು ಬರಲಿದೆ. ಈ ಅವಕಾಶವನ್ನು ಸ್ವೀಕರಿಸುವ ಮೊದಲು ಹಿರಿಯರ ಸಲಹೆ ಪಡೆಯುವುದು ಉತ್ತಮ.
ಜನ್ಮಸಂಖ್ಯೆ 3, 12, 21, 30
ನಿಮಗೆ ಇಂದು ಮಾನಸಿಕವಾಗಿ ಗೊಂದಲದ ದಿನ. ಒಂದು ಕಡೆ ಸಂತೋಷವಿದ್ದರೂ, ನಿರ್ಧಾರಗಳನ್ನು ತೆಗೆದುಕೊಳ್ಳುವಲ್ಲಿ ಸವಾಲು ಎದುರಿಸುವಿರಿ. ಕೈಗೆ ಬಂದ ಜವಾಬ್ದಾರಿಗಳು ಲಾಭದಾಯಕವೋ ಅಥವಾ ಸಂಕಷ್ಟವೋ ಎಂದು ನಿರ್ಧರಿಸಲು ನಿಮಗೆ ಹೆಚ್ಚಿನ ಸಮಯ ಬೇಕಾಗಬಹುದು. ಅವಸರದ ತೀರ್ಮಾನ ಬೇಡ.
ಜನ್ಮಸಂಖ್ಯೆ 4, 13, 22, 31
ಇತರರ ಭರವಸೆಯ ಮಾತುಗಳನ್ನು ನಂಬಿ ಯಾವುದೇ ಗಂಭೀರ ಹೂಡಿಕೆ ಅಥವಾ ನಿರ್ಧಾರಗಳನ್ನು ತೆಗೆದುಕೊಳ್ಳಬೇಡಿ. ಯಾರೋ ಸಹಾಯ ಮಾಡುತ್ತಾರೆಂಬ ನಿರೀಕ್ಷೆ ಸುಳ್ಳಾಗಬಹುದು. ಆದರೆ, ವೃತ್ತಿ ಕ್ಷೇತ್ರದಲ್ಲಿ ಮೇಲಧಿಕಾರಿಗಳು ನೀಡಿದ ಕೆಲಸವನ್ನು ಶ್ರದ್ಧೆಯಿಂದ ಪೂರೈಸಿ, ಅದಕ್ಕೆ ತಕ್ಕ ಪ್ರತಿಫಲ ಮತ್ತು ಮೆಚ್ಚುಗೆ ಇಂದು ಖಂಡಿತ ಸಿಗಲಿದೆ.
ಜನ್ಮಸಂಖ್ಯೆ 5, 14, 23
ನಿಮ್ಮ ಮಾತಿನ ಚಾತುರ್ಯಕ್ಕೆ ಇಂದು ಕುಟುಂಬದಲ್ಲಿ ಹೆಚ್ಚಿನ ಗೌರವ ಸಿಗಲಿದೆ. ಆಕರ್ಷಕ ಸಂವಹನದ ಮೂಲಕ ಎಲ್ಲರನ್ನೂ ಒಪ್ಪಿಸುವಿರಿ. ಮನೆ ಅಥವಾ ನಿವೇಶನ ಖರೀದಿಗೆ ಸಾಲದ ಅವಶ್ಯಕತೆ ಇದ್ದರೆ ಇಂದು ಶುಭ ಸುದ್ಧಿ ಕೇಳುವಿರಿ. ಹಣಕಾಸಿನ ಅಡೆತಡೆಗಳು ನಿವಾರಣೆಯಾಗಿ ನಿಮ್ಮಲ್ಲಿ ಹೊಸ ಆತ್ಮವಿಶ್ವಾಸ ಮೂಡಲಿದೆ.
ಜನ್ಮಸಂಖ್ಯೆ 6, 15, 24
ಹೊಸದಾಗಿ ವ್ಯಾಪಾರ ಆರಂಭಿಸುವ ಕನಸು ಹೊತ್ತವರಿಗೆ ಇಂದು ಆಪ್ತರಿಂದ ದೊಡ್ಡ ಮಟ್ಟದ ಬೆಂಬಲ ಸಿಗಲಿದೆ. ನಿಮ್ಮನ್ನು ಹಾದಿ ತಪ್ಪಿಸಲು ನೋಡುವವರು ತಾವೇ ಸಂಕಷ್ಟಕ್ಕೆ ಸಿಲುಕಿಕೊಳ್ಳಲಿದ್ದಾರೆ. ನಿಮ್ಮ ದೂರದೃಷ್ಟಿಯ ಮಾತುಗಳು ನಿಜವಾಗುತ್ತದೆ. ನಿಮ್ಮ ಮೇಲಿನ ವಿಶ್ವಾಸ ಸಮಾಜದಲ್ಲಿ ಹೆಚ್ಚಾಗಲಿದೆ.
ಜನ್ಮಸಂಖ್ಯೆ 7, 16, 25
ನಿಮ್ಮ ವೈಯಕ್ತಿಕ ಮತ್ತು ಪ್ರೇಮ ಜೀವನದಲ್ಲಿ ಮೂರನೇ ವ್ಯಕ್ತಿಗಳ ಪ್ರವೇಶವಾಗದಂತೆ ಎಚ್ಚರವಹಿಸಿ. ಇತರರು ನಿಮ್ಮ ಮೇಲೆ ಪ್ರಭಾವ ಬೀರಲು ಪ್ರಯತ್ನಿಸುತ್ತಿರುವುದು ಇಂದು ನಿಮ್ಮ ಗಮನಕ್ಕೆ ಬರಲಿದೆ. ಆದಾಯ ಹೆಚ್ಚಿಸಿಕೊಳ್ಳಲು ಹೊಸ ಯೋಜನೆಗಳನ್ನು ರೂಪಿಸುವಿರಿ. ಆಸ್ತಿ ಮಾರಾಟ ಮಾಡುವ ಆಲೋಚನೆ ಇದ್ದರೆ ಇಂದು ಉತ್ತಮ ಬೇಡಿಕೆ ಬರುವ ಸಾಧ್ಯತೆಯಿದೆ.
ಜನ್ಮಸಂಖ್ಯೆ 8, 17, 26
ಹೆಚ್ಚುವರಿ ಆದಾಯಕ್ಕಾಗಿ ಬಾಡಿಗೆ ನೀಡುವ ಉದ್ದೇಶದಿಂದ ಮನೆ ಅಥವಾ ವಾಣಿಜ್ಯ ಮಳಿಗೆ ನಿರ್ಮಿಸಲು ಯೋಜನೆ ಹಾಕುವಿರಿ. ಮಾನಸಿಕ ಶಾಂತಿಗಾಗಿ ದುರ್ಗಾದೇವಿ ಆರಾಧನೆ ಅಥವಾ ವಿಷ್ಣು ಸಹಸ್ರನಾಮ ಪಠಣ ಮಾಡುವುದು ಶ್ರೇಯಸ್ಕರ. ಇದರಿಂದ ಆಲೋಚನೆಗಳಲ್ಲಿ ಸ್ಪಷ್ಟತೆ ಸಿಗಲಿದೆ. ಫೋಟೋಗ್ರಫಿ ವೃತ್ತಿಯಲ್ಲಿ ಇರುವವರಿಗೆ ಇಂದು ಸುವರ್ಣ ಅವಕಾಶಗಳಿವೆ.
ಜನ್ಮಸಂಖ್ಯೆ 9, 18, 27
ಕ್ರೆಡಿಟ್ ಕಾರ್ಡ್ ಬಳಕೆಯ ಮೇಲೆ ಇಂದು ನಿಯಂತ್ರಣವಿರಲಿ. ಸಾಲದ ವ್ಯವಹಾರಗಳು ಕಿರಿಕಿರಿ ಉಂಟುಮಾಡಬಹುದು. ಸ್ನೇಹಿತರಿಗೆ ಅಥವಾ ಸಂಬಂಧಿಕರಿಗೆ ಕಾರ್ಡ್ ಸಾಲ ನೀಡುವುದರಿಂದ ದೂರವಿರಿ. ಇಂದು ಬೆಳ್ಳಿ ಅಥವಾ ಬಂಗಾರದ ಆಭರಣಗಳನ್ನು ಖರೀದಿಸುವ ಯೋಗವಿದೆ. ದಾನ-ಧರ್ಮದಂತಹ ಸತ್ಕಾರ್ಯಗಳಲ್ಲಿ ಪಾಲ್ಗೊಳ್ಳುವಿರಿ.
