ನವದೆಹಲಿ: ಸೈಬರ್ ಅಪರಾಧಗಳನ್ನು ಕಡಿವಾಣ ಹಾಕುವ ನಿಟ್ಟಿನಲ್ಲಿ ಕೇಂದ್ರ ಸರ್ಕಾರ ದೊಡ್ಡ ನಿರ್ಧಾರ ಕೈಗೊಂಡಿದೆ. ವಾಟ್ಸಾಪ್, ಟೆಲಿಗ್ರಾಂ, ಸಿಗ್ನಲ್‌, ಒಟಿಟಿ ಆ್ಯಪ್‌ಗಳಾದ ಅರಟ್ಟೆ, ಡಿಸ್ಕಾರ್ಡ್‌ ಮುಂತಾದ ಎಲ್ಲ ಓವರ್-ದಿ-ಟಾಪ್ (OTT) ಸಂದೇಶ ಸೇವೆಗಳಲ್ಲಿ ಖಾತೆ ರಚಿಸಲು ಮತ್ತು ಬಳಸಲು ಮೊಬೈಲ್‌ನಲ್ಲಿ ಆ ಖಾತೆಗೆ ಲಿಂಕ್ ಆಗಿರುವ ಸಕ್ರಿಯ ಸಿಮ್ ಕಾರ್ಡ್ ಇರುವುದು ಕಡ್ಡಾಯವಾಗಲಿದೆ. 2025ರ ಹೊಸ ದೂರಸಂಪರ್ಕ ಸೈಬರ್ ಭದ್ರತಾ ತಿದ್ದುಪಡಿ ನಿಯಮಗಳಡಿ ಈ ಆದೇಶ ಹೊರಡಿಸಲಾಗಿದೆ.
- 2026ರ ಏಪ್ರಿಲ್ 1ರಿಂದ ಜಾರಿಗೆ ಬರುವಂತೆ ವಾಟ್ಸಾಪ್, ಟೆಲಿಗ್ರಾಂ, ಸಿಗ್ನಲ್‌ ಸೇರಿದಂತೆ ಎಲ್ಲ OTT ಆ್ಯಪ್‌ಗಳಲ್ಲಿ ಖಾತೆ ರಚಿಸಲು ಮತ್ತು ಬಳಸಲು ಆ ಮೊಬೈಲ್ ಸಂಖ್ಯೆಯ ಸಕ್ರಿಯ ಸಿಮ್ ಇರುವ ಫೋನ್‌ನಲ್ಲೇ ಲಾಗಿನ್ ಆಗಬೇಕು.
- ಸಿಮ್ ತೆಗೆದುಬಿಟ್ಟರೆ ಅಥವಾ ಸಿಮ್ ನಿಷ್ಕ್ರಿಯಗೊಂಡರೆ ಆ್ಯಪ್ ತಾನಾಗಿಯೇ ಲಾಗ್-ಔಟ್ ಆಗಲಿದೆ. ಮತ್ತೆ ಬಳಸಲು ಸಿಮ್ ಹಾಕಿ OTP ಪಡೆದು ಲಾಗಿನ್ ಮಾಡಬೇಕು.
- ವಾಟ್ಸಾಪ್ ವೆಬ್, ಡೆಸ್ಕ್‌ಟಾಪ್ ಆ್ಯಪ್, ಟೆಲಿಗ್ರಾಂ ವೆಬ್ ಸೇರಿದಂತೆ ಎಲ್ಲ ವೆಬ್ ಆವೃತ್ತಿಗಳಲ್ಲಿ ಪ್ರತಿ 6 ಗಂಟೆಗೊಮ್ಮೆ ಸ್ವಯಂಚಾಲಿತ ಲಾಗ್-ಔಟ್ ಆಗಲಿದೆ. ಮತ್ತೆ ಮೊಬೈಲ್ OTP ಮೂಲಕವೇ ಲಾಗಿನ್ ಮಾಡಬೇಕು.
- ಎಲ್ಲ ಆ್ಯಪ್ ಕಂಪನಿಗಳು 120 ದಿನಗಳೊಳಗೆ (2026 ಮಾರ್ಚ್ ಅಂತ್ಯದೊಳಗೆ) ಈ ನಿಯಮಗಳ ಪಾಲನಾ ವರದಿ ಸಲ್ಲಿಸಬೇಕು.
- ಭಾರತದಲ್ಲಿ ನೋಂದಾಯಿತ ಸಂಖ್ಯೆಗಳಿಗೆ ಮಾತ್ರ ಖಾತೆ ರಚನೆಗೆ ಅನುಮತಿ. ವಿದೇಶಿ ವರ್ಚುವಲ್ ನಂಬರ್‌ಗಳ ಮೂಲಕ ಖಾತೆ ತೆರೆಯಲು ಸಂಪೂರ್ಣ ನಿರ್ಬಂಧ.
ಈ ಕ್ರಮಕ್ಕೆ ಕಾರಣವೇನು?
ಪ್ರಸ್ತುತ ಸಿಸ್ಟಂನಲ್ಲಿ ಒಮ್ಮೆ OTP ಬಂದು ಖಾತೆ ರಚಿಸಿದ ನಂತರ ಸಿಮ್ ತೆಗೆದುಬಿಟ್ಟರೂ ಆ್ಯಪ್ ಬಳಕೆ ಮುಂದುವರಿಯುತ್ತದೆ. ಇದನ್ನೇ ದುರುಪಯೋಗಪಡಿಸಿಕೊಂಡು ಸೈಬರ್ ಅಪರಾಧಿಗಳು, ಉಗ್ರರು, ವಂಚಕರು ವಿದೇಶದಿಂದಲೇ ಭಾರತೀಯ ನಂಬರ್ ಖರೀದಿಸಿ, ಸಿಮ್ ನಿಷ್ಕ್ರಿಯಗೊಳಿಸಿ ವಾಟ್ಸಾಪ್/ಟೆಲಿಗ್ರಾಂ ಖಾತೆಗಳನ್ನು ರಚಿಸಿ ಅಪರಾಧ ನಡೆಸುತ್ತಿದ್ದಾರೆ. ಬಾಂಬ್ ಬೆದರಿಕೆ ಸಂದೇಶ, ಆನ್‌ಲೈನ್ ವಂಚನೆ ಸೇರಿದಂತೆ ಡ್ರಗ್ ಡೀಲಿಂಗ್ ಚಾಟ್ ಗ್ರೂಪ್‌ಗಳು ಇವೆಲ್ಲವನ್ನೂ ಟ್ರೇಸ್ ಮಾಡಲು ಪೊಲೀಸರಿಗೆ ತೊಂದರೆಯಾಗುತ್ತಿತ್ತು. ಈ ಹೊಸ ನಿಯಮದಿಂದ ಸಿಮ್ ಸಕ್ರಿಯವಾಗಿರದಿದ್ದರೆ ಖಾತೆ ಕೂಡ ಸಕ್ರಿಯವಿರದು ಇದರಿಂದ ಅಪರಾಧಿಗಳ ಗುರುತು ಸುಲಭವಾಗಲಿದೆ ಎಂದು ಕೇಂದ್ರ ಗೃಹ ಇಲಾಖೆ ತಿಳಿಸಿದೆ.
ಯಾರಿಗೆಲ್ಲ ಪರಿಣಾಮ?
- ವಿದೇಶದಲ್ಲಿ ವಾಸಿಸುತ್ತಿರುವ ಭಾರತೀಯರು ತಮ್ಮ ಭಾರತೀಯ ಸಿಮ್ ಇಲ್ಲದೆ ಆ್ಯಪ್ ಬಳಸಲು ಸಾಧ್ಯವಾಗದು (ರೋಮಿಂಗ್ ಆನ್ ಮಾಡಿಕೊಂಡರೆ ಮಾತ್ರ ಸಾಧ್ಯ).
- ವಿದೇಶಿ ವರ್ಚುವಲ್ ನಂಬರ್‌ಗಳನ್ನು ಬಳಸುತ್ತಿದ್ದವರ ಖಾತೆಗಳು ಸ್ವಯಂಚಾಲಿತವಾಗಿ ನಿಷ್ಕ್ರಿಯಗೊಳ್ಳಲಿವೆ.
- ಗೌಪ್ಯತೆಗಾಗಿ ಸೆಕೆಂಡ್ ಫೋನ್ ಬಳಸುತ್ತಿದ್ದವರಿಗೂ ತೊಂದರೆ.
ಕೇಂದ್ರ ದೂರಸಂಪರ್ಕ ಸಚಿವಾಲಯದ ಅಧಿಕಾರಿಯೊಬ್ಬರು ಭದ್ರತೆ ಮತ್ತು ಗೌಪ್ಯತೆ ಎರಡೂ ಮುಖ್ಯ. ಆದರೆ ರಾಷ್ಟ್ರೀಯ ಭದ್ರತೆಗೆ ಧಕ್ಕೆ ಬರದಂತೆ ನೋಡಿಕೊಳ್ಳುವುದು ಸರ್ಕಾರದ ಕರ್ತವ್ಯ ಎಂದು ತಿಳಿಸಿದ್ದಾರೆ.
