ಪತಿಯನ್ನು ಕುತ್ತಿಗೆ ತನಕ ಮಣ್ಣಿನಲ್ಲಿ ಹೂತು ಶಿರಕ್ಕೆ ಕ್ಷೀರಾಭಿಷೇಕ ಮಾಡಿದ ಪತ್ನಿ: ವಿಡಿಯೋ ವೈರಲ್

ದೆಹಲಿ, ಫೆ. 17: ದೇಶದಲ್ಲಿ ಅನೇಕ ವಿಭಿನ್ನ ಆಚರಣೆಗಳು ನಡೆದು ಬರುತ್ತಿವೆ. ಕೆಲವೊಂದು ಸಂಪ್ರದಾಯಗಳು ಅಚ್ಚರಿಗೊಳಿಸುತ್ತವೆ, ಮತ್ತಷ್ಟು ಚರ್ಚೆಗೆ ಕಾರಣವಾಗುತ್ತವೆ. ಇತ್ತೀಚೆಗೆ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿರುವ ಒಂದು ವಿಡಿಯೋ ಸಂಚಲನ ಮೂಡಿಸಿದೆ. ಶಿವರಾತ್ರಿ ಹಿನ್ನೆಲೆ ಎನ್ನಲಾಗುತ್ತಿರುವ ಈ ವಿಡಿಯೋದಲ್ಲಿ ಮಹಿಳೆಯೊಬ್ಬಳು ತನ್ನ ಪತಿಯನ್ನು ಕುತ್ತಿಗೆ ತನಕ ಮಣ್ಣಿನಲ್ಲಿ ಹೂತು, ಆತನ ಶಿರವನ್ನು ಶಿವಲಿಂಗದಂತೆ ಪೂಜಿಸುತ್ತಿರುವುದು ಕಂಡುಬಂದಿದೆ.

ವಿಡಿಯೋದಲ್ಲಿ ಮಧ್ಯವಯಸ್ಕ ವ್ಯಕ್ತಿಯೊಬ್ಬನ ತಲೆ ಮಾತ್ರ ನೆಲದ ಮೇಲ್ಭಾಗದಲ್ಲಿ ಕಾಣಿಸುತ್ತದೆ. ಉಳಿದ ದೇಹ ಸಂಪೂರ್ಣ ಮಣ್ಣಿನ ಅಡಿಯಲ್ಲಿ ಹೂತಿರುವುದು ಕಾಣಿಸುತ್ತದೆ. ಆತನ ಮುಂದೆ ನಿಂತಿರುವ ಮಹಿಳೆ ಮೊದಲಿಗೆ ಪುಷ್ಪವೃಷ್ಟಿ ಮಾಡಿ, ಬಳಿಕ ಹಾಲು ಸುರಿದು ಕ್ಷೀರಾಭಿಷೇಕ ಮಾಡುತ್ತಾಳೆ. ಆಕೆ ಕೈಮುಗಿದು ಪ್ರಾರ್ಥನೆ ಸಲ್ಲಿಸಿ “ಹರ ಹರ ಮಹಾದೇವ” ಎಂದು ಘೋಷಣೆ ಕೂಗುತ್ತಾಳೆ. ಈ ವೇಳೆ ತಲೆಯ ಮೇಲೆ ಹಾಲು ಹರಿಯುತ್ತಿದ್ದಂತೆ ವ್ಯಕ್ತಿ ಕಣ್ಣು ಮಿಟುಕಿಸುವ ದೃಶ್ಯವೂ ಸ್ಪಷ್ಟವಾಗಿ ಕಾಣುತ್ತದೆ.

ಕೆಲವೇ ಕ್ಷಣಗಳ ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೇಗವಾಗಿ ಹರಡಿದ್ದು, ಪರ-ವಿರೋಧದ ಚರ್ಚೆಗೆ ಕಾರಣವಾಗಿದೆ. ಹಲವರು ಈ ದೃಶ್ಯ ನೋಡಿ ನಗು ತಡೆಯಲಾಗಲಿಲ್ಲ ಎಂದು ಕಾಮೆಂಟ್ ಮಾಡಿದ್ದಾರೆ. “ಇಂತಹ ಆಚರಣೆ ಏಕೆ?” ಎಂದು ಕೆಲವರು ಪ್ರಶ್ನಿಸಿದರೆ, “ಪತಿಗೆ ಮುಕ್ತಿ ಕೊಡಪ್ಪ ಎಂದು ಆತ ಪ್ರಾರ್ಥಿಸುತ್ತಿರಬಹುದು” ಎಂದು ವ್ಯಂಗ್ಯವಾಡಿದವರೂ ಇದ್ದಾರೆ. “ಈ ಕಣ್ಣುಗಳಿಂದ ಇನ್ನೇನು ನೋಡಬೇಕು?” ಎಂಬ ಪ್ರತಿಕ್ರಿಯೆಗಳೂ ಹರಿದಾಡುತ್ತಿವೆ.

ಇದುವರೆಗೆ ಇಂತಹ ಆಚರಣೆ ಬಗ್ಗೆ ಕೇಳಿರಲಿಲ್ಲ ಎಂದು ಕೆಲವರು ಆಶ್ಚರ್ಯ ವ್ಯಕ್ತಪಡಿಸಿದ್ದಾರೆ. ಇದು ಕೇವಲ ಮನರಂಜನೆಗಾಗಿ ಮಾಡಿದ ವಿಡಿಯೋವೋ? ಅಥವಾ ನಿಜವಾದ ಆಚರಣೆಯೋ? ಎಂಬ ಅನುಮಾನವೂ ವ್ಯಕ್ತವಾಗಿದೆ. ವಿಡಿಯೋ ಎಲ್ಲಿ ಚಿತ್ರೀಕರಿಸಲಾಗಿದೆ ಎಂಬುದು ಸ್ಪಷ್ಟವಾಗಿಲ್ಲ. ಹಾಗೆಯೇ ಇದರ ಹಿನ್ನೆಲೆಯೂ ತಿಳಿದುಬಂದಿಲ್ಲ.

ಇನ್ನೊಂದೆಡೆ, ಕೆಲವರು ಈ ಆಚರಣೆಗೆ ಸಮರ್ಥನೆಯ ಧ್ವನಿಯನ್ನೂ ಎತ್ತಿದ್ದಾರೆ. ಭಾರತದಲ್ಲಿ ಅನೇಕ ಬುಡಕಟ್ಟು ಸಮುದಾಯಗಳು ತಮ್ಮದೇ ಆದ ವೈಶಿಷ್ಟ್ಯಪೂರ್ಣ ಆಚರಣೆಗಳನ್ನು ಪಾಲಿಸುತ್ತಾರೆ. ಅಂಥದ್ದೇ ಯಾವುದೋ ಒಂದು ಸಂಪ್ರದಾಯ ಇದಾಗಿರಬಹುದು ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ. “ಸರಿಯಾಗಿ ತಿಳಿದುಕೊಳ್ಳದೆ ವ್ಯಂಗ್ಯ ಮಾಡಬೇಡಿ. ಪ್ರತಿಯೊಂದು ಸಂಸ್ಕೃತಿಗೂ ತನ್ನದೇ ಆದ ಮಹತ್ವವಿದೆ” ಎಂದು ಒಬ್ಬರು ಕಾಮೆಂಟ್ ಮಾಡಿದ್ದಾರೆ.

ಧಾರ್ಮಿಕ ಭಕ್ತಿ ಮತ್ತು ಅಂಧಭಕ್ತಿ ನಡುವಿನ ರೇಖೆ ಯಾವುದು? ಎಂಬ ಪ್ರಶ್ನೆಯನ್ನೂ ಈ ವಿಡಿಯೋ ಮತ್ತೆ ಮುಂದಿಟ್ಟಿದೆ. ಸಾಮಾಜಿಕ ಜಾಲತಾಣಗಳ ಯುಗದಲ್ಲಿ ಇಂತಹ ದೃಶ್ಯಗಳು ಕ್ಷಣಾರ್ಧದಲ್ಲಿ ವೈರಲ್ ಆಗುತ್ತವೆ. ಆದರೆ ಅವುಗಳ ಸತ್ಯಾಸತ್ಯತೆ, ಹಿನ್ನೆಲೆ ಮತ್ತು ಉದ್ದೇಶ ತಿಳಿದುಕೊಳ್ಳುವುದು ಮುಖ್ಯ.