ಆಗ್ನೇಯ ಏಷ್ಯಾದ ಪ್ರಮುಖ ರಾಷ್ಟ್ರ ಥೈಲ್ಯಾಂಡ್ ಈಗ ಇತಿಹಾಸದಲ್ಲೇ ಅತಿ ಭೀಕರ ಪ್ರವಾಹ ಮತ್ತು ಭೂಕುಸಿತಗಳ ಸುಳಿಯಲ್ಲಿ ಸಿಲುಕಿದೆ. ದಕ್ಷಿಣ ಥೈಲ್ಯಾಂಡ್‌ನಲ್ಲಿ ಸುರಿದ ಅತಿವೃಷ್ಟಿಯಿಂದ ಉಂಟಾದ ಪ್ರವಾಹದಲ್ಲಿ ಈವರೆಗೆ 145 ಮಂದಿ ಮೃತಪಟ್ಟಿದ್ದು, ಒಂದೇ ಸಾಂಗ್ಖ್ಲಾ ಪ್ರಾಂತ್ಯದಲ್ಲಿ 110 ಸಾವುಗಳು ಸಂಭವಿಸಿವೆ. ಸರ್ಕಾರ ಅಂದಾಜಿನ ಪ್ರಕಾರ 15 ಲಕ್ಷಕ್ಕೂ ಹೆಚ್ಚು ಮನೆಗಳು ಜಲಾವೃತಗೊಂಡಿದ್ದು, 36 ಲಕ್ಷಕ್ಕಿಂತಲೂ ಹೆಚ್ಚು ಜನರು ಈ ನೈಸರ್ಗಿಕ ವಿಕೋಪದ ದೊಡ್ಡ ಬಾಧಿತರಾಗಿದ್ದಾರೆ.
ದಕ್ಷಿಣ ಥೈಲ್ಯಾಂಡ್‌ನ ಒಂಬತ್ತು ಪ್ರಾಂತ್ಯಗಳು ಪೂರ್ತಿಯಾಗಿ ನೀರಿನಡಿ ಮುಳುಗಿವೆ. ರಸ್ತೆಗಳು, ರೈಲ್ವೆ, ಶಾಲೆಗಳು, ಆಸ್ಪತ್ರೆಗಳು ಎಲ್ಲವೂ ನೀರಿನಡಿಯಲ್ಲಿವೆ. ಸಾವಿರಾರು ಜನರು ತಮ್ಮ ಮನೆಗಳ ಮೇಲ್ಛಾವಣಿಯಲ್ಲೋ, ಗುಡ್ಡಗಳ ಮೇಲೋ ಆಶ್ರಯ ಪಡೆದಿದ್ದಾರೆ. ವಿದ್ಯುತ್, ಕುಡಿಯುವ ನೀರು, ಆಹಾರ ಎಲ್ಲದರ ಕೊರತೆ ತೀವ್ರವಾಗಿದೆ.
ಸರ್ಕಾರದ ನಿರ್ಲಕ್ಷ್ಯಕ್ಕೆ ಜನರ ಆಕ್ರೋಶ
ಈಗಾಗಲೇ ಆರ್ಥಿಕ ಕುಸಿತ, ಪ್ರವಾಸೋದ್ಯಮದ ಭಾರೀ ಹಿನ್ನಡೆ ಹಾಗೂ ಗಡಿ ವಿವಾದಗಳನ್ನು ಎದುರಿಸುತ್ತಿರುವ ಥೈಲ್ಯಾಂಡ್‌ಗೆ ಈ ಪ್ರವಾಹ ದೊಡ್ಡ ಆಘಾತವಾಗಿದೆ. ಸಾರ್ವಜನಿಕರು ಸರ್ಕಾರದ ಮೇಲೆ ತೀವ್ರ ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ. “ಪ್ರವಾಹ ಬರೋದು ಮೊದಲೇ ಗೊತ್ತಿತ್ತು, ಆದರೆ ಯಾವ ಮುಂಜಾಗ್ರತೆ ಕ್ರಮವೂ ತೆಗೆದುಕೊಳ್ಳಲಿಲ್ಲ” ಎಂದು ಬಾಧಿತರು ಆರೋಪಿಸುತ್ತಿದ್ದಾರೆ. ಸರ್ಕಾರಿ ವಕ್ತಾರರು ಒಪ್ಪಿಕೊಂಡಂತೆ, “ತಪ್ಪುಗಳಾಗಿವೆ, ಅದನ್ನು ನಿರಾಕರಿಸುವುದಿಲ್ಲ” ಎಂದು ಹೇಳಿದ್ದಾರೆ.
ಪ್ರಧಾನಿ ಅನುತಿನ್ ಚಾರ್ನ್‌ವಿರಕುಲ್ ಅವರು ನವೆಂಬರ್ 25ರಂದು ಸಾಂಗ್ಖ್ಲಾ ಪ್ರಾಂತ್ಯದಲ್ಲಿ ತುರ್ತು ಪರಿಸ್ಥಿತಿ ಘೋಷಿಸಿದ್ದಾರೆ. ತುರ್ತು ಕಾನೂನುಗಳನ್ನು ಜಾರಿಗೆ ತಂದು ರಕ್ಷಣಾ ಕಾರ್ಯಾಚರಣೆಯನ್ನು ತ್ವರಿತಗೊಳಿಸಲಾಗುತ್ತಿದೆ. ಆದರೆ ಪತ್ರಿಕಾಗೋಷ್ಠಿಯಲ್ಲಿ ವಿಪತ್ತು ನಿರ್ವಹಣಾ ಸಚಿವರೇ ಪ್ರಶ್ನೆಗಳ ಸುರಿಮಳೆಯಿಂದ ತತ್ತರಿಸಿ ಹೊರನಡೆದಿದ್ದಾರೆ.
ಗುರುವಾರ ಸಂಜೆಯ ವೇಳೆಗೆ ನೀರಿನ ಮಟ್ಟ ಕಡಿಮೆಯಾಗುವ ನಿರೀಕ್ಷೆ
ಥೈ ಸರ್ಕಾರದ ವಕ್ತಾರರು ಗುರುವಾರ ಸಂಜೆಯ ವೇಳೆಗೆ ನದಿ ತೀರದಲ್ಲಿ ನೀರಿನ ಮಟ್ಟ ಕಡಿಮೆಯಾಗುವ ಸಾಧ್ಯತೆ ಇದೆ ಎಂದು ತಿಳಿಸಿದ್ದಾರೆ. ಇದರಿಂದ ರಕ್ಷಣಾ ಕಾರ್ಯಾಚರಣೆಗೆ ಅನುಕೂಲವಾಗಲಿದ್ದು, ಬೃಹತ್ ಸ್ವಚ್ಛತಾ ಕಾರ್ಯ ಮತ್ತು ಪುನರ್ವಸತಿ ಕಾರ್ಯ ಆರಂಭಿಸಲು ಸಹಾಯವಾಗಲಿದೆ. ಸೇನೆ, ನೌಕಾಪಡೆ ಮತ್ತು ಸ್ವಯಂಸೇವಕರು ದಿನರಾತ್ರಿ ರಕ್ಷಣಾ ಕಾರ್ಯದಲ್ಲಿ ತೊಡಗಿದ್ದಾರೆ.
ಈ ಪ್ರವಾಹ ಥೈಲ್ಯಾಂಡ್‌ನ ಆರ್ಥಿಕತೆಗೆ ದೊಡ್ಡ ಹೊಡೆತ ನೀಡಿದೆ. ಪ್ರವಾಸೋದ್ಯಮ ಈಗಾಗಲೇ ಕುಸಿದಿರುವಾಗ ಈ ವಿಕೋಪ ದೇಶದ ಆರ್ಥಿಕ ಬೆನ್ನೆಲುಬನ್ನೇ ಮುರಿದಂತಾಗಿದೆ. ಜಾಗತಿಕ ಮಟ್ಟದಲ್ಲಿ ಥೈಲ್ಯಾಂಡ್‌ಗೆ ಸಹಾಯ ಕೈಯಾಂತಿಯಾಗುವ ನಿರೀಕ್ಷೆಯಿದೆ.