ನವದೆಹಲಿ: ಮೇಘಾಲಯದಲ್ಲಿ ನಡೆದ ‘ಹನಿಮೂನ್ ಮರ್ಡರ್’ ಪ್ರಕರಣಕ್ಕೆ ಆಘಾತಕಾರಿ ತಿರುವು ಸಿಕ್ಕಿದೆ. ಮೃತ ರಾಜ ರಘುವಂಶಿ ಅವರ ಪತ್ನಿ ಸೋನಮ್ ರಘುವಂಶಿ, ತನ್ನ ಗಂಡನ ಕೊಲೆಗೆ 20 ಲಕ್ಷ ರೂ.ಗಳ ಆಫರ್ ನೀಡಿದ್ದಳು ಎಂಬ ಸತ್ಯ ಬೆಳಕಿಗೆ ಬಂದಿದೆ. ಕೆಲವೇ ದಿನಗಳ ಹಿಂದೆ ವಿವಾಹವಾದ ಈ ದಂಪತಿಗಳು, ಮೇ 20, 2025ರಂದು ಮೇಘಾಲಯಕ್ಕೆ ಹನಿಮೂನ್ಗೆ ತೆರಳಿದ್ದರು. ಆದರೆ, ಎರಡು ವಾರಗಳ ನಂತರ ರಾಜಾ ಅವರ ಕೊಳೆತ ಮೃತದೇಹ ಕಾಡಿನಲ್ಲಿ ಪತ್ತೆಯಾಗಿದೆ. ಕೊಲೆಗಾರರು ರಾಜಾ ಅವರ ಚಿನ್ನದ ಸರ ಮತ್ತು ಉಂಗುರವನ್ನು ಕಸಿದುಕೊಂಡಿದ್ದಾರೆ ಎಂದು ತನಿಖೆಯಿಂದ ತಿಳಿದುಬಂದಿದೆ.
ಪೊಲೀಸ್ ತನಿಖೆಯಿಂದ ಸೋನಮ್ನ ಷಡ್ಯಂತ್ರದ ವಿವರಗಳು ಬಯಲಾಗಿವೆ. ಆಕೆ ತನ್ನ ಪ್ರೇಮಿ ರಾಜ್ ಕುಶ್ವಾಹನ ಸ್ನೇಹಿತರಾದ ಮೂವರು ಆರೋಪಿಗಳೊಂದಿಗೆ ಕೊಲೆಗೆ ಸಂಚು ರೂಪಿಸಿದ್ದಳು. ಆರಂಭದಲ್ಲಿ 4 ಲಕ್ಷ ರೂ.ಗಳನ್ನು ಆಫರ್ ಮಾಡಿದ್ದ ಸೋನಮ್, ನಂತರ ಈ ಮೊತ್ತವನ್ನು 20 ಲಕ್ಷ ರೂ.ಗಳಿಗೆ ಏರಿಸಿದ್ದಳು. ಕೊಲೆಗೆ ಮುಂಗಡವಾಗಿ 15,000 ರೂ.ಗಳನ್ನು ಆರೋಪಿಗಳಿಗೆ ನೀಡಿದ್ದಳು. ಉಳಿದ ಮೊತ್ತವನ್ನು ಕೊಲೆಯ ನಂತರ ಪಾವತಿಸುವ ಒಪ್ಪಂದ ಮಾಡಿಕೊಂಡಿದ್ದಳು. ಸೋನಮ್ ಮತ್ತು ಆರೋಪಿಗಳು ಮೊದಲು ಬೆಂಗಳೂರಿನಲ್ಲಿ ದಂಪತಿಗಳನ್ನು ಭೇಟಿಯಾಗಿದ್ದರು. ಅಲ್ಲಿಂದ ಮೇಘಾಲಯಕ್ಕೆ ಸಂಪರ್ಕ ವಿಮಾನದ ಮೂಲಕ ತೆರಳಿದ್ದರು ಎಂದು ಪೊಲೀಸ್ ಮೂಲಗಳು ತಿಳಿಸಿವೆ.
ತನಿಖೆಯ ಸಂದರ್ಭದಲ್ಲಿ, ಸೋನಮ್ನ ಪ್ರೇಮಿಯಾದ ರಾಜ್ ಕುಶ್ವಾಹನಿಗೆ ಈ ಯೋಜನೆಯಲ್ಲಿ ಪಾತ್ರವಿದೆ ಎಂಬುದು ಸ್ಪಷ್ಟವಾಗಿದೆ. ಆರೋಪಿಗಳು ರಾಜಾ ಅವರನ್ನು ಕಾಡಿನಲ್ಲಿ ಕೊಂದು, ಚಿನ್ನಾಭರಣಗಳನ್ನು ಕಿತ್ತುಕೊಂಡು ಪರಾರಿಯಾಗಿದ್ದರು. ಪೊಲೀಸರು ಸೋನಮ್ ಮತ್ತು ಆರೋಪಿಗಳನ್ನು ವಶಕ್ಕೆ ಪಡೆದಿದ್ದಾರೆ. ತನಿಖೆಯಲ್ಲಿ ಆರೋಪಿಗಳು ಕೊಲೆಯ ಯೋಜನೆಯನ್ನು ಒಪ್ಪಿಕೊಂಡಿದ್ದಾರೆ ಎಂದು ವರದಿಯಾಗಿದೆ.