ಕೃಷ್ಣ ಜಿಲ್ಲೆ, ಆಂಧ್ರಪ್ರದೇಶ: ಗಂಡನ ಮನೆಯವರಿಂದ ನಿರಂತರ ಕಿರುಕುಳಕ್ಕೆ ಒಳಗಾಗಿ 24 ವರ್ಷದ ಕಾಲೇಜು ಉಪನ್ಯಾಸಕಿ ಶ್ರೀವಿದ್ಯಾ ಆತ್ಮಹತ್ಯೆಗೆ ಶರಣಾಗಿರುವ ದುರಂತ ಘಟನೆ ಆಂಧ್ರಪ್ರದೇಶದ ಕೃಷ್ಣ ಜಿಲ್ಲೆಯಲ್ಲಿ ನಡೆದಿದೆ. ಆಕೆ ತನ್ನ ತಮ್ಮನಿಗೆ ಬರೆದಿಟ್ಟ ಭಾವುಕ ಪತ್ರದಲ್ಲಿ, “ಈ ಸಲ ನಿನಗೆ ರಾಖಿ ಕಟ್ಟಲು ಆಗುವುದಿಲ್ಲ, ಕ್ಷಮಿಸು” ಎಂದು ಬರೆದು ಆತ್ಮಹತ್ಯೆಗೆ ಶರಣಾಗಿದ್ದಾಳೆ.
ಶ್ರೀವಿದ್ಯಾ ಆರು ತಿಂಗಳ ಹಿಂದೆ ರಾಂಬಾಬು ಎಂಬಾತನನ್ನು ಮದುವೆಯಾಗಿದ್ದರು. ಆದರೆ, ಮದುವೆಯಾದ ಕೆಲವೇ ತಿಂಗಳಲ್ಲಿ ಗಂಡನ ಮನೆಯವರಿಂದ ಕಿರುಕುಳ ಶುರುವಾಗಿತ್ತು ಎಂದು ಆಕೆ ತನ್ನ ಪತ್ರದಲ್ಲಿ ತಿಳಿಸಿದ್ದಾರೆ. ರಾಂಬಾಬು ಕುಡಿದು ಮನೆಗೆ ಬಂದು ದೈಹಿಕ ಹಿಂಸೆ ನೀಡುತ್ತಿದ್ದ, ಮಾತಿನಲ್ಲಿ ನಿಂದಿಸುತ್ತಿದ್ದ, ಮತ್ತು ಇತರ ಮಹಿಳೆಯರ ಮುಂದೆ ಆಕೆಯನ್ನು ಅಪಹಾಸ್ಯ ಮಾಡುತ್ತಿದ್ದ ಎಂದು ಶ್ರೀವಿದ್ಯಾ ಬರೆದಿದ್ದಾರೆ. ತನ್ನನ್ನು “ನಿಷ್ಪ್ರಯೋಜಕ” ಎಂದು ಕರೆಯುವ ಮೂಲಕ ಆಕೆಯ ಆತ್ಮಗೌರವಕ್ಕೆ ಧಕ್ಕೆ ತರುತ್ತಿದ್ದ ಎಂದು ಆಕೆ ತಿಳಿಸಿದ್ದಾಳೆ.
ಈ ನಿರಂತರ ಕಿರುಕುಳಕ್ಕೆ ಬೇಸತ್ತ ಶ್ರೀವಿದ್ಯಾ ಈ ದುರಂತ ನಿರ್ಧಾರ ಕೈಗೊಂಡಿದ್ದಾರೆ. ಆಕೆಯ ಈ ಭಾವುಕ ಪತ್ರ ಕುಟುಂಬದವರಿಗೆ ಆಘಾತವನ್ನುಂಟು ಮಾಡಿದ್ದು, ರಾಖಿ ಹಬ್ಬದ ಸಂದರ್ಭದಲ್ಲಿ ತಮ್ಮನಿಗೆ ರಾಖಿ ಕಟ್ಟಲಾಗದ ದುಃಖವನ್ನು ಆಕೆ ವ್ಯಕ್ತಪಡಿಸಿದ್ದಾಳೆ.