ನವದೆಹಲಿ: ಭಾರತದ ಆಂತರಿಕ ಭದ್ರತೆಗೆ ದಶಕಗಳಿಂದ ಶಾಪವಾಗಿದ್ದ ನಕ್ಸಲಿಸಂ ಅನ್ನು ಬೇರುಸಹಿತ ಕಿತ್ತೊಗೆಯುವ ಕೇಂದ್ರ ಸರ್ಕಾರದ ಸಂಕಲ್ಪ ಈಗ ತಾರ್ಕಿಕ ಅಂತ್ಯಕ್ಕೆ ತಲುಪಿದೆ. ಲೋಕಸಭೆಯಲ್ಲಿ ನಕ್ಸಲ್ ವಿರೋಧಿ ಕಾರ್ಯಾಚರಣೆಗಳ ಕುರಿತು ಮಾತನಾಡಿದ ಕೇಂದ್ರ ಗೃಹ ಸಚಿವ ಅಮಿತ್ ಶಾ, ದೇಶದಲ್ಲಿ ನಕ್ಸಲಿಸಂನ ಉಗಮ, ಅದರ ಹಿಂದಿರುವ ವಿದೇಶಿ ಶಕ್ತಿಗಳು ಮತ್ತು ಪ್ರಸಕ್ತ ಬದಲಾದ ಪರಿಸ್ಥಿತಿಯ ಬಗ್ಗೆ ಸ್ಫೋಟಕ ಮಾಹಿತಿಗಳನ್ನು ಹಂಚಿಕೊಂಡಿದ್ದಾರೆ.
ಭಾರತಕ್ಕೆ ಕಮ್ಯುನಿಸಂ ಸಿದ್ಧಾಂತ ಪರಿಚಯವಾಗಿದ್ದು ರಷ್ಯಾದಿಂದ ಎಂದು ಹೇಳಿದ ಅಮಿತ್ ಶಾ, ಸಿಪಿಎಂ (CPM) ಪಕ್ಷದ ರಚನೆಯ ಹಿಂದೆ ಚೀನಾದ ಬೆಂಬಲವಿತ್ತು ಎಂಬ ಗಂಭೀರ ಆರೋಪ ಮಾಡಿದರು. ಮಾವೋವಾದಿ ಸಿದ್ಧಾಂತಗಳು ದೇಶದ ಪ್ರಜಾಪ್ರಭುತ್ವ ಮತ್ತು ಸಂವಿಧಾನಕ್ಕೆ ಮಾರಕವಾಗಿದ್ದು, ಈ ಹಿಂದೆ ಇಂದಿರಾ ಗಾಂಧಿಯವರು ಸಹ ಇಂತಹ ಸಿದ್ಧಾಂತಗಳಿಗೆ ಬಂಧಿಯಾಗಿದ್ದರು ಎಂದು ಇತಿಹಾಸದ ಪುಟಗಳನ್ನು ಸ್ಮರಿಸಿದರು. ಇತ್ತೀಚಿನ ವರ್ಷಗಳಲ್ಲಿ ‘ನಗರ ನಕ್ಸಲರ’ (Urban Naxals) ಮೂಲಕ ನಕ್ಸಲಿಸಂಗೆ ಪೂರಕ ವಾತಾವರಣ ನಿರ್ಮಿಸುವ ಸಂಚನ್ನು ಸರ್ಕಾರ ಯಶಸ್ವಿಯಾಗಿ ಭೇದಿಸಿದೆ ಎಂದರು.
ಒಂದು ಕಾಲದಲ್ಲಿ ನಕ್ಸಲರು ದೇಶದ ಹಲವು ಭಾಗಗಳಲ್ಲಿ ತಮ್ಮದೇ ಆದ ಪರ್ಯಾಯ ಸರ್ಕಾರವನ್ನು ನಡೆಸುತ್ತಿದ್ದರು. ಅಸಹಾಯಕ ಬುಡಕಟ್ಟು ಜನರು ಅನ್ಯಾಯದ ವಿರುದ್ಧದ ಹೋರಾಟವೆಂದು ನಂಬಿ ಇವರ ಜಾಲಕ್ಕೆ ಬಿದ್ದಿದ್ದರು. ಆದರೆ, ನಕ್ಸಲಿಸಂ ಹೆಸರಿನಲ್ಲಿ ಅಮಾಯಕ ಕೃಷಿಕರು, ಮಹಿಳೆಯರು ಮತ್ತು ಮಕ್ಕಳ ಹತ್ಯೆಗಳೇ ಹೆಚ್ಚಾಗಿ ನಡೆದವು. ಛತ್ತೀಸ್ಗಢದಲ್ಲಿ ನಕ್ಸಲವಾದ ಅಳಿಯದೆ ಉಳಿಯಲು ಕಾಂಗ್ರೆಸ್ ಪಕ್ಷವೇ ಕಾರಣ ಎಂದು ಅಮಿತ್ ಶಾ ಆರೋಪಿಸಿದರು. ಕಾಂಗ್ರೆಸ್ ಅಧಿಕಾರದಲ್ಲಿದ್ದಾಗ ನಕ್ಸಲರಿಗೆ ರಕ್ಷಣೆ ನೀಡಲಾಗಿತ್ತು, ಆದರೆ ಬಿಜೆಪಿ ಅಧಿಕಾರಕ್ಕೆ ಬಂದ ಮೇಲೆ ಅವರ ಶಕ್ತಿ ಕುಂದಿದೆ ಎಂದು ವಾಗ್ದಾಳಿ ನಡೆಸಿದರು.
ಕೇಂದ್ರ ಸರ್ಕಾರ ನಡೆಸಿದ ಕಾರ್ಯಾಚರಣೆಗಳಲ್ಲಿ, ಕಳೆದ ಕೇವಲ 3 ವರ್ಷಗಳಲ್ಲಿ ಭದ್ರತಾ ಪಡೆಗಳು 706 ನಕ್ಸಲರನ್ನು ಹತ್ಯೆ ಮಾಡಿವೆ. ಸರ್ಕಾರದ ಸೌಲಭ್ಯಗಳು ಮತ್ತು ಮುಖ್ಯವಾಹಿನಿಗೆ ಬರುವ ಕರೆಗೆ ಓಗೊಟ್ಟು ಈವರೆಗೆ 4,800 ನಕ್ಸಲರು ಶಸ್ತ್ರಾಸ್ತ್ರ ತ್ಯಜಿಸಿ ಶರಣಾಗಿದ್ದಾರೆ. ಒಂದು ಕಾಲದಲ್ಲಿ ನೂರಾರು ಜಿಲ್ಲೆಗಳಲ್ಲಿದ್ದ ನಕ್ಸಲ್ ಬಾಧೆ ಈಗ ಕೇವಲ 2 ಪ್ರದೇಶಗಳಿಗೆ ಸೀಮಿತವಾಗಿದೆ ಎಂದು ಹೇಳಿದ್ದಾರೆ.
ನಕ್ಸಲ್ ಪೀಡಿತ ಪ್ರದೇಶಗಳಲ್ಲಿ ಸರ್ಕಾರವು ಕೇವಲ ಸೇನಾ ಕಾರ್ಯಾಚರಣೆಗೆ ಸೀಮಿತವಾಗದೆ, ಅಭಿವೃದ್ಧಿಗೂ ಒತ್ತು ನೀಡಿದೆ. ಹಿಂದೆ ನಕ್ಸಲರು ಸಂವಹನಕ್ಕಾಗಿ ಬಳಸುತ್ತಿದ್ದ ಮೊಬೈಲ್ ಟವರ್ಗಳ ಜಾಗದಲ್ಲಿ ಇಂದು ಸೂಪರ್ ಸ್ಪೆಷಾಲಿಟಿ ಆಸ್ಪತ್ರೆಗಳು ಮತ್ತು ಉನ್ನತ ಶಿಕ್ಷಣ ಸಂಸ್ಥೆಗಳು ತಲೆ ಎತ್ತಿವೆ. ದೆಹಲಿ ಮಾದರಿಯ ಸಂಪರ್ಕ ವ್ಯವಸ್ಥೆಯನ್ನು ಈ ಸುಗಮ ಪ್ರದೇಶಗಳಿಗೆ ಕಲ್ಪಿಸಲಾಗಿದೆ.
ನಕ್ಸಲ್ ಮುಕ್ತ ಭಾರತಕ್ಕೆ ಅಮಿತ್ ಶಾ ಅವರು ನೀಡಿದ್ದ ಡೆಡ್ಲೈನ್ ನಾಳೆಗೆ (ಮಾರ್ಚ್ 31, 2026) ಅಂತ್ಯಗೊಳ್ಳುತ್ತಿದೆ. ನಕ್ಸಲರೇ, ನಿಮ್ಮ ಶಸ್ತ್ರಾಸ್ತ್ರಗಳನ್ನು ಒಪ್ಪಿಸಿ ಶರಣಾಗಿ. ಪ್ರಜಾಪ್ರಭುತ್ವದ ಹಾದಿಗೆ ಬನ್ನಿ. ಇಲ್ಲವಾದರೆ, ಗುಂಡಿಗೆ ಪ್ರತಿಯಾಗಿ ಗುಂಡಿನಿಂದಲೇ ಉತ್ತರ ನೀಡಲಾಗುವುದು ಎಂದು ಅಮಿತ್ ಶಾ ಎಚ್ಚರಿಕೆ ನೀಡಿದ್ದಾರೆ.