ಬೆಂಗಳೂರು: ಸಿಲಿಕಾನ್ ಸಿಟಿಯ ನಮ್ಮ ಮೆಟ್ರೋ ತನ್ನ ಪ್ರಯಾಣಿಕರಿಗೆ ಸಂಕ್ರಾಂತಿ ಹಬ್ಬದ ಸಂದರ್ಭದಲ್ಲೇ ಭರ್ಜರಿ ಸಿಹಿ ಸುದ್ದಿಯೊಂದನ್ನು ನೀಡಿದೆ. ಇನ್ಮುಂದೆ ಮೆಟ್ರೋದಲ್ಲಿ ದಿನಪೂರ್ತಿ ಅಥವಾ ವಾರಪೂರ್ತಿ ಸುತ್ತಾಡಲು ಸ್ಮಾರ್ಟ್ ಕಾರ್ಡ್ ಹಿಡಿದು ಓಡಾಡುವ ಅವಶ್ಯಕತೆಯಿಲ್ಲ. ಬೆಂಗಳೂರು ಮೆಟ್ರೋ ರೈಲು ನಿಗಮ ನಿಯಮಿತ (BMRCL) ಸಂಪೂರ್ಣ ಡಿಜಿಟಲ್ ರೂಪದ ಕ್ಯೂಆರ್ (QR) ಆಧಾರಿತ ಅನಿಯಮಿತ ಪ್ರಯಾಣದ ಪಾಸ್ಗಳನ್ನು ಬಿಡುಗಡೆ ಮಾಡಿದೆ.
ಜನೆವರಿ 15ರಿಂದ ಜಾರಿ:
ಪ್ರಯಾಣಿಕರ ದಟ್ಟಣೆಯನ್ನು ಕಡಿಮೆ ಮಾಡಲು ಮತ್ತು ಡಿಜಿಟಲ್ ಪಾವತಿಗೆ ಹೆಚ್ಚಿನ ಒತ್ತು ನೀಡಲು ಈ ಹೊಸ ಕ್ರಮ ಕೈಗೊಳ್ಳಲಾಗಿದೆ. ಈ ಮೊದಲು 1, 3 ಮತ್ತು 5 ದಿನಗಳ ಅನ್ಲಿಮಿಟೆಡ್ ಪಾಸ್ಗಳು ಕೇವಲ ಸ್ಮಾರ್ಟ್ ಕಾರ್ಡ್ಗಳಲ್ಲಿ ಮಾತ್ರ ಲಭ್ಯವಿತ್ತು. ಆದರೆ ಜನೆವರಿ 15 ರಿಂದ ನಿಮ್ಮ ಮೊಬೈಲ್ ಮೂಲಕವೇ ಈ ಪಾಸ್ಗಳನ್ನು ಪಡೆದು ಮೆಟ್ರೋದಲ್ಲಿ ಪ್ರಯಾಣ ಮಾಡಬಹುದಾಗಿದೆ.
ದಿನಾಂಕ 15ನೇ ಜನವರಿ 2026 ರಿಂದ ಬಿ.ಎಂ.ಆರ್.ಸಿ.ಎಲ್ ಮೊಬೈಲ್ ಕ್ಯೂಆರ್ (QR) ಆಧಾರಿತ 1, 3 ಮತ್ತು 5 ದಿನಗಳ ಅನಿಯಮಿತ ಪ್ರಯಾಣದ ಪಾಸ್ ಪರಿಚಯ ಹೆಚ್ಚಿನ ವಿವರಗಳಿಗೆ ಮಾಧ್ಯಮ ಪ್ರಕಟಣೆಯನ್ನು ಪರಿಶೀಲಿಸಿ.
BMRCL Launches Mobile QR-based 1-Day, 3-Day & 5-Day Unlimited Travel Passes. pic.twitter.com/76PN4j9u9f
— ನಮ್ಮ ಮೆಟ್ರೋ (@OfficialBMRCL) January 13, 2026
ಸ್ಮಾರ್ಟ್ ಕಾರ್ಡ್ಗಿಂತ ಕ್ಯೂಆರ್ ಪಾಸ್ ಏಕೆ ಉತ್ತಮ?
ಇಲ್ಲಿಯವರೆಗೆ ಅನ್ಲಿಮಿಟೆಡ್ ಪಾಸ್ ಪಡೆಯಬೇಕಿದ್ದರೆ ಪ್ರಯಾಣಿಕರು ಸ್ಮಾರ್ಟ್ ಕಾರ್ಡ್ ಖರೀದಿಸಬೇಕಿತ್ತು. ಇದಕ್ಕೆ 50 ರೂಪಾಯಿ ಭದ್ರತಾ ಠೇವಣಿ (Security Deposit) ಪಾವತಿಸುವುದು ಕಡ್ಡಾಯವಾಗಿತ್ತು. ಕಾರ್ಡ್ ಕಳೆದುಹೋದರೆ ಅಥವಾ ಹಾನಿಯಾದರೆ ಹಣ ವ್ಯರ್ಥವಾಗುವ ಭಯವಿತ್ತು. ಆದರೆ ಈಗ ಪರಿಚಯಿಸಲಾಗಿರುವ ಮೊಬೈಲ್ ಕ್ಯೂಆರ್ ಪಾಸ್ನಲ್ಲಿ ಯಾವುದೇ ಠೇವಣಿ ಇರುವುದಿಲ್ಲ. ನಿಮ್ಮ ಮೊಬೈಲ್ ಫೋನೇ ನಿಮ್ಮ ಪಾಸ್ ಆಗಿ ಕಾರ್ಯನಿರ್ವಹಿಸುತ್ತದೆ.
ದರಗಳ ಪಟ್ಟಿ: ಇಲ್ಲಿದೆ ಉಳಿತಾಯದ ಲೆಕ್ಕಾಚಾರ
ಬಿಎಂಆರ್ಸಿಎಲ್ ಡಿಜಿಟಲ್ ಪಾಸ್ಗಳ ದರವನ್ನು ಅತ್ಯಂತ ಆಕರ್ಷಕವಾಗಿ ನಿಗದಿಪಡಿಸಿದೆ. ಸ್ಮಾರ್ಟ್ ಕಾರ್ಡ್ಗೆ ಹೋಲಿಸಿದರೆ ಕ್ಯೂಆರ್ ಪಾಸ್ ದರಗಳು ಅಗ್ಗವಾಗಿವೆ:
| ಪಾಸ್ ಅವಧಿ | ಕ್ಯೂಆರ್ ಪಾಸ್ ದರ (ಠೇವಣಿ ಇಲ್ಲ) | ಸ್ಮಾರ್ಟ್ ಕಾರ್ಡ್ ದರ (₹50 ಠೇವಣಿ ಸೇರಿ) |
| 1 ದಿನದ ಪಾಸ್ | ₹ 250 | ₹ 300 |
| 3 ದಿನದ ಪಾಸ್ | ₹ 550 | ₹ 600 |
| 5 ದಿನದ ಪಾಸ್ | ₹ 850 | ₹ 900 |
ಖರೀದಿಸುವುದು ಹೇಗೆ ?
ಪ್ರಯಾಣಿಕರು ನಮ್ಮ ಮೆಟ್ರೋ ಅಧಿಕೃತ ಮೊಬೈಲ್ ಆಪ್ ಮೂಲಕ ಸುಲಭವಾಗಿ ಈ ಪಾಸ್ಗಳನ್ನು ಖರೀದಿಸಬಹುದು. ಶೀಘ್ರದಲ್ಲೇ ಪೇಟಿಎಂ, ಫೋನ್ ಪೇ ಮತ್ತು ವಾಟ್ಸಾಪ್ ಸೇರಿದಂತೆ ಇತರ ಪ್ರಮುಖ ಪಾವತಿ ಆಪ್ಗಳಲ್ಲೂ ಈ ಸೌಲಭ್ಯ ದೊರೆಯಲಿದೆ. ಟಿಕೆಟ್ ಕೌಂಟರ್ಗಳ ಮುಂದೆ ಸಾಲು ನಿಲ್ಲುವ ಕಿರಿಕಿರಿ ಇನ್ನು ಇರುವುದಿಲ್ಲ. ಎಎಫ್ಸಿ (AFC) ಗೇಟ್ಗಳಲ್ಲಿ ನಿಮ್ಮ ಮೊಬೈಲ್ ಕ್ಯೂಆರ್ ಕೋಡ್ ಸ್ಕ್ಯಾನ್ ಮಾಡಿದರೆ ಸಾಕು, ಪ್ರವೇಶ ಮತ್ತು ನಿರ್ಗಮನ ಸುಲಭವಾಗಲಿದೆ.
ಬಿಎಂಆರ್ಸಿಎಲ್ ಉದ್ದೇಶ:
ನಮ್ಮ ಮೆಟ್ರೋವನ್ನು ಸಂಪೂರ್ಣವಾಗಿ ಡಿಜಿಟಲ್ ಸ್ನೇಹಿಯನ್ನಾಗಿಸುವುದು ನಮ್ಮ ಗುರಿ. ಈ ಹೊಸ ಸೌಲಭ್ಯದಿಂದ ಸಮಯ ಉಳಿತಾಯವಾಗುವುದಲ್ಲದೆ, ಪ್ಲಾಸ್ಟಿಕ್ ಕಾರ್ಡ್ಗಳ ಬಳಕೆಯೂ ಕಡಿಮೆಯಾಗಲಿದೆ ಎಂದು ಬಿಎಂಆರ್ಸಿಎಲ್ ಸಾರ್ವಜನಿಕ ಸಂಪರ್ಕ ಅಧಿಕಾರಿ ತಿಳಿಸಿದ್ದಾರೆ. ಪ್ರವಾಸಿಗರಿಗೆ ಮತ್ತು ಪ್ರತಿದಿನ ಹೆಚ್ಚು ಪ್ರಯಾಣಿಸುವವರಿಗೆ ಈ ಯೋಜನೆ ಅತ್ಯಂತ ಲಾಭದಾಯಕವಾಗಿದೆ.
