ಬೆಂಗಳೂರು: ಚಿತ್ರದುರ್ಗದ ಬಳಿ ನಡೆದ ಭೀಕರ ಖಾಸಗಿ ಬಸ್ ಅಗ್ನಿದುರಂತದ ಬೆನ್ನಲ್ಲೇ ಎಚ್ಚೆತ್ತುಕೊಂಡಿರುವ ರಾಜ್ಯ ಸಾರಿಗೆ ಇಲಾಖೆ, ಪ್ರಯಾಣಿಕರ ಸುರಕ್ಷತೆಯ ದೃಷ್ಟಿಯಿಂದ ಕಟ್ಟುನಿಟ್ಟಿನ ನಿರ್ಧಾರಗಳನ್ನು ಕೈಗೊಂಡಿದೆ. ರಾಷ್ಟ್ರೀಯ ಮಾನವ ಹಕ್ಕುಗಳ ಆಯೋಗ (NHRC) ಮತ್ತು ಸೆಂಟ್ರಲ್ ಇನ್ಸ್ಟಿಟ್ಯೂಟ್ ಆಫ್ ರೋಡ್ ಟ್ರಾನ್ಸ್ಪೋರ್ಟ್ (CIRT) ನೀಡಿದ ಸೂಚನೆಗಳ ಅನ್ವಯ, ರಾಜ್ಯದ ಎಲ್ಲಾ ಖಾಸಗಿ ಸ್ಲೀಪರ್ ಕೋಚ್ ಹಾಗೂ ಅಖಿಲ ಭಾರತ ಪ್ರವಾಸಿ ಬಸ್ಗಳಿಗೆ ಫೆಬ್ರವರಿ 28ರ ಗಡುವು ನೀಡಲಾಗಿದೆ.
ಸಚಿವ ರಾಮಲಿಂಗ ರೆಡ್ಡಿ ಖಡಕ್ ವಾರ್ನಿಂಗ್
ಸಾರಿಗೆ ಸಚಿವ ರಾಮಲಿಂಗ ರೆಡ್ಡಿ ಅವರು ಇತ್ತೀಚೆಗೆ ಖಾಸಗಿ ಬಸ್ ಮಾಲೀಕರು ಮತ್ತು ಕೋಚ್ ನಿರ್ಮಾಣ ಸಂಸ್ಥೆಗಳೊಂದಿಗೆ ಮಹತ್ವದ ಸಭೆ ನಡೆಸಿದರು. ಈ ಸಭೆಯಲ್ಲಿ ಬಸ್ಸಿನ ಬಾಡಿ ನಿರ್ಮಾಣದಿಂದ ಹಿಡಿದು ತುರ್ತು ನಿರ್ಗಮನದವರೆಗೆ ಒಟ್ಟು 11 ಕಟ್ಟುನಿಟ್ಟಿನ ಮಾನದಂಡಗಳನ್ನು ಕಡ್ಡಾಯಗೊಳಿಸಲಾಗಿದೆ. ಪ್ರಯಾಣಿಕರ ಜೀವದ ಜೊತೆ ಚೆಲ್ಲಾಟವಾಡುವಂತಿಲ್ಲ. ನಿಗದಿಪಡಿಸಿದ ಅವಧಿಯೊಳಗೆ ಸುರಕ್ಷತಾ ಕ್ರಮಗಳನ್ನು ಅಳವಡಿಸದ ಬಸ್ಗಳ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಲಾಗುವುದು ಎಂದು ಸಚಿವರು ಎಚ್ಚರಿಕೆ ನೀಡಿದ್ದಾರೆ.
ಪ್ರಮುಖವಾಗಿ ಜಾರಿಗೆ ಬಂದಿರುವ 11 ನಿಯಮಗಳು:
ಖಾಸಗಿ ಬಸ್ಗಳಲ್ಲಿ ಇನ್ಮುಂದೆ ಈ ಕೆಳಗಿನ ಬದಲಾವಣೆಗಳು ಕಡ್ಡಾಯವಾಗಿರಲಿವೆ:
-
ಎಮರ್ಜೆನ್ಸಿ ಎಕ್ಸಿಟ್: 12 ಮೀಟರ್ ಉದ್ದದ ಬಸ್ಸಿನಲ್ಲಿ ಕನಿಷ್ಠ 4 ಮತ್ತು ಅದಕ್ಕಿಂತ ಹೆಚ್ಚಿನ ಉದ್ದದ ಬಸ್ಗಳಲ್ಲಿ ಕನಿಷ್ಠ 5 ತುರ್ತು ನಿರ್ಗಮನ ಡೋರ್ಗಳಿರಬೇಕು
-
ಸ್ಲೀಪರ್ ಬರ್ತ್ ಬದಲಾವಣೆ: ಸ್ಲೀಪರ್ ಕೋಚ್ಗಳಲ್ಲಿರುವ ಸ್ಲೈಡರ್ಗಳನ್ನು ತೆರವುಗೊಳಿಸಬೇಕು ಮತ್ತು ಚಾಲಕನ ಹಿಂಬದಿಯ ಬಾಗಿಲನ್ನು ಸುಲಭವಾಗಿ ತೆರೆಯುವಂತೆ ಮಾಡಬೇಕು.
-
ಅಗ್ನಿಶಾಮಕ ವ್ಯವಸ್ಥೆ: ಪ್ರತಿ ಬಸ್ಸಿನಲ್ಲಿ 10 ಕೆಜಿ ತೂಕದ ಅಗ್ನಿಶಾಮಕ ಸಾಧನ ಇರಬೇಕು ಹಾಗೂ ಒಂದು ತಿಂಗಳೊಳಗೆ ‘ಫೈರ್ ಡಿಟೆಕ್ಷನ್’ ಸಿಸ್ಟಮ್ ಅಳವಡಿಸಬೇಕು.
-
ಹ್ಯಾಮರ್ ಮತ್ತು ಅಲಾರಂ: ಬೆಂಕಿ ಅಥವಾ ಅಪಘಾತದ ಸಮಯದಲ್ಲಿ ಗ್ಲಾಸ್ ಒಡೆಯಲು ಹ್ಯಾಮರ್ಗಳನ್ನು ಸಿದ್ಧವಾಗಿಡಬೇಕು ಮತ್ತು ಪ್ರಯಾಣಿಕರಿಗೆ ಎಚ್ಚರಿಕೆ ನೀಡಲು ಅಲಾರಂ ಇರಬೇಕು.
-
ನಕ್ಷೆ ಪ್ರದರ್ಶನ: ಬಸ್ಸಿನ ಚಾವಣಿಯ ಹ್ಯಾಚ್ಗಳು ಮತ್ತು ತುರ್ತು ನಿರ್ಗಮನಗಳ ರೇಖಾಚಿತ್ರವನ್ನು ಪ್ರಯಾಣಿಕರಿಗೆ ಕಾಣುವಂತೆ ಪ್ರದರ್ಶಿಸಬೇಕು.
-
ಅನಧಿಕೃತ ಬದಲಾವಣೆ ನಿಷೇಧ: ಬಸ್ಸಿನ ಚಾಸಿಸ್ ಅನ್ನು ಅನಧಿಕೃತವಾಗಿ ವಿಸ್ತರಿಸುವುದಕ್ಕೆ ಬ್ರೇಕ್ ಹಾಕಲಾಗಿದೆ.
-
ಪ್ರಮಾಣಪತ್ರ ಕಡ್ಡಾಯ: ಅನುಮೋದಿತ ಟೆಸ್ಟಿಂಗ್ ಏಜೆನ್ಸಿಯಿಂದ ಸುರಕ್ಷತಾ ಪ್ರಮಾಣಪತ್ರ ಪಡೆದರೆ ಮಾತ್ರ ಎಫ್ಸಿ (FC) ನವೀಕರಣ ಮಾಡಲಾಗುವುದು.
ರಾಜ್ಯ ಖಾಸಗಿ ಬಸ್ ಮಾಲೀಕರ ಸಂಘದ ಅಧ್ಯಕ್ಷ ನಟರಾಜ್ ಶರ್ಮಾ ಅವರು ಈ ಬಗ್ಗೆ ಪ್ರತಿಕ್ರಿಯಿಸಿ, ಹಲವು ನಿಯಮಗಳನ್ನು ಈಗಾಗಲೇ ಜಾರಿಗೆ ತಂದಿದ್ದೇವೆ ಎಂದಿದ್ದಾರೆ. ಆದರೆ, ಗಡುವಿಗೆ ಇನ್ನು ಕೇವಲ 16 ದಿನಗಳು ಮಾತ್ರ ಬಾಕಿ ಇರುವುದರಿಂದ, ಸಾವಿರಾರು ಖಾಸಗಿ ಬಸ್ಗಳು ಈ ಎಲ್ಲಾ 11 ನಿಯಮಗಳನ್ನು ಪೂರೈಸುವುದು ದೊಡ್ಡ ಸವಾಲಾಗಿದೆ. ಫೆಬ್ರವರಿ 28ರ ನಂತರ ಸಾರಿಗೆ ಅಧಿಕಾರಿಗಳು ಕಾರ್ಯಾಚರಣೆಗಿಳಿಯಲಿದ್ದು, ನಿಯಮ ಪಾಲಿಸದ ಬಸ್ಗಳ ಪರವಾನಗಿ ರದ್ದಾಗುವ ಸಾಧ್ಯತೆಯಿದೆ.
