ನಾಳೆಯಿಂದ 4 ದಿನಗಳ ಕಾಲ ಕರ್ನಾಟಕದ ಹಲವೆಡೆ ಸಾಧಾರಣ ಮಳೆಗೆ ಬ್ರೇಕ್

ಕರ್ನಾಟಕದ ಹಲವು ಜಿಲ್ಲೆಗಳಲ್ಲಿ ಸುರಿದ ಮಳೆಗೆ ಇನ್ನು ನಾಲ್ಕು ದಿನಗಳ ಕಾಲ ಬ್ರೇಕ್ ಬೀಳಲಿದೆ. ಭಾರತೀಯ ಹವಾಮಾನ ಇಲಾಖೆ (IMD) ನೀಡಿರುವ ಮಾಹಿತಿ ಪ್ರಕಾರ ಡಿಸೆಂಬರ್ 6ರಿಂದ 9ರವರೆಗೆ ರಾಜ್ಯದ ಬಹುತೇಕ ಭಾಗಗಳಲ್ಲಿ ಒಣ ಹವೆ ಮುಂದುವರಿಯಲಿದೆ. ಕರಾವಳಿ ಜಿಲ್ಲೆಗಳು ಮತ್ತು ಮಲೆನಾಡಿನ ಕೆಲವು ಪ್ರದೇಶಗಳಲ್ಲಿ ಮಾತ್ರ ಮೋಡ ಕವಿದ ವಾತಾವರಣ ಇರಲಿದ್ದು, ಉಳಿದೆಲ್ಲೆಡೆ ತಂಪು ಗಾಳಿ ಬೀಸಲಿದೆ.

ಎಲ್ಲೆಲ್ಲಿ ಒಣ ಹವೆ?

ಉತ್ತರ ಒಳನಾಡು ಜಿಲ್ಲೆಗಳಾದ ಬೆಳಗಾವಿ, ಬೀದರ್, ವಿಜಯಪುರ, ಬಾಗಲಕೋಟೆ, ಗದಗ, ಧಾರವಾಡ, ಹಾವೇರಿ, ಕಲಬುರಗಿ, ಕೊಪ್ಪಳ, ಬಳ್ಳಾರಿ, ರಾಯಚೂರು, ಯಾದಗಿರಿ, ವಿಜಯನಗರಗಳಲ್ಲಿ ಸಂಪೂರ್ಣ ಒಣ ಹವೆ ಇರಲಿದೆ. ದಕ್ಷಿಣ ಒಳನಾಡಿನ ಬೆಂಗಳೂರು ನಗರ, ಬೆಂಗಳೂರು ಗ್ರಾಮಾಂತರ, ರಾಮನಗರ, ಕೋಲಾರ, ಚಿಕ್ಕಬಳ್ಳಾಪುರ, ತುಮಕೂರು, ಚಿತ್ರದುರ್ಗ, ದಾವಣಗೆರೆ, ಶಿವಮೊಗ್ಗ, ಮಂಡ್ಯ, ಮೈಸೂರು, ಚಾಮರಾಜನಗರ, ಹಾಸನಗಳಲ್ಲಿಯೂ ಒಣ ಹವೆಯೇ ಪ್ರಧಾನವಾಗಿರಲಿದೆ. ಈ ಜಿಲ್ಲೆಗಳಲ್ಲಿ ಮಳೆಯ ಯಾವುದೇ ಸಾಧ್ಯತೆ ಇಲ್ಲ ಎಂದು ಹವಾಮಾನ ಇಲಾಖೆ ಸ್ಪಷ್ಟಪಡಿಸಿದೆ.

ಕರಾವಳಿ + ಮಲೆನಾಡಿನಲ್ಲಿ ಮೋಡ ಕವಿದ ವಾತಾವರಣ ಉತ್ತರ ಕನ್ನಡ, ಉಡುಪಿ, ದಕ್ಷಿಣ ಕನ್ನಡ ಜಿಲ್ಲೆಗಳ ಕೆಲವು ಭಾಗಗಳಲ್ಲಿ ಮೋಡ ಕವಿದ ವಾತಾವರಣ ಇರಲಿದೆ. ಚಿಕ್ಕಮಗಳೂರು, ಕೊಡಗು, ಶಿವಮೊಗ್ಗದ ಮಲೆನಾಡು ಭಾಗದಲ್ಲಿ ಸಹ ಮೋಡಗಳು ಕಾಣಿಸಿಕೊಳ್ಳಲಿವೆ. ಆದರೆ ಇಲ್ಲೂ ಗಮನಾರ್ಹ ಮಳೆಯ ಸಾಧ್ಯತೆ ಕಡಿಮೆಯೇ ಇದೆ.

ಬೆಂಗಳೂರಿನಲ್ಲಿ ಚಳಿ ಜೋರು. ಸಿಲಿಕಾನ್ ಸಿಟಿಯಲ್ಲಿ ಇಂದು ಬೆಳಗ್ಗೆಯೇ ಮಂಜು ಮತ್ತು ತಂಪಾದ ಗಾಳಿ ಆವರಿಸಿತ್ತು. ನಾಳೆಯೂ (ಡಿಸೆಂಬರ್ 6) ಇದೇ ರೀತಿ ಮುಂಜಾನೆ ಮಂಜು ಕವಿದ ವಾತಾವರಣ ಇರಲಿದೆ. ಬೆಳಗ್ಗೆ 8 ಗಂಟೆಯಿಂದ ಸಂಜೆ 5 ಗಂಟೆಯವರೆಗೆ ಮೋಡ ಕವಿದ ಆಕಾಶ ಕಾಣಿಸಿಕೊಳ್ಳಲಿದೆ.

• ಗರಿಷ್ಠ ತಾಪಮಾನ: 27 ಡಿಗ್ರಿ ಸೆಲ್ಸಿಯಸ್​​ 
• ಕನಿಷ್ಠ ತಾಪಮಾನ: 17 ಡಿಗ್ರಿ ಸೆಲ್ಸಿಯಸ್​​ 
• ಗಾಳಿಯ ವೇಗ: ಗಂಟೆಗೆ 8–14 ಕಿ.ಮೀ. ಉತ್ತರ-ಈಶಾನ್ಯ ದಿಕ್ಕಿನಿಂದ ತಂಪು ಗಾಳಿ ಬೀಸಲಿದೆ. ಅಂದರೆ, ಬೆಂಗಳೂರಿನ ಜನರಿಗೆ ಸ್ವೆಟರ್, ಶಾಲು, ಜಾಕೆಟ್ ರೆಡಿಯಾಗಿರಲಿ ಚಳಿ ಜೋರಾಗಿ ಶುರುವಾಗ್ತಿದೆ.

ಏಕೆ ಒಣ ಹವೆ? ಈಗಾಗಲೇ ಈಶಾನ್ಯ ಮಾನ್ಸೂನ್ ದುರ್ಬಲಗೊಂಡಿದ್ದು, ಬಂಗಾಳ ಕೊಲ್ಲಿಯಲ್ಲಿ ಯಾವುದೇ ವಾಯುಗುಂಡ ಇಲ್ಲ. ಉತ್ತರ ಭಾರತದಿಂದ ಬೀಸುತ್ತಿರುವ ಶೀತಲ ಗಾಳಿಯೇ ರಾಜ್ಯದಲ್ಲಿ ತಾಪಮಾನವನ್ನು ಕಡಿಮೆ ಮಾಡುತ್ತಿದೆ. ಇದರಿಂದಾಗಿ ಡಿಸೆಂಬರ್ ಮಧ್ಯಭಾಗದವರೆಗೂ ಒಣ ಹವೆ ಮತ್ತು ಚಳಿ ಮುಂದುವರಿಯುವ ಸಾಧ್ಯತೆ ಇದೆ ಎಂದು ಹವಾಮಾನ ತಜ್ಞರು ತಿಳಿಸಿದ್ದಾರೆ.

ಮುಂದಿನ ನಾಲ್ಕು ದಿನಗಳು ಪಿಕ್ನಿಕ್, ಟ್ರೆಕ್ಕಿಂಗ್, ರೋಡ್ ಟ್ರಿಪ್‌ಗೆ ಪರ್ಫೆಕ್ಟ್ ಆದರೆ ಬೆಳಗ್ಗೆ-ಸಂಜೆ ಚಳಿ ಜಾಸ್ತಿ ಇರುವುದರಿಂದ ಉಣ್ಣೆಯ ಬಟ್ಟೆ ಜೊತೆಯಲ್ಲಿರಲಿ.