ಬೇಸಿಗೆಯ ಬಿಸಿಲು ಬರುವ ಮುನ್ನವೇ ದಿನನಿತ್ಯದ ಅಗತ್ಯ ವಸ್ತುಗಳ ಬೆಲೆ ಏರಿಕೆಯಿಂದ ಜನಸಾಮಾನ್ಯರು ಆತಂಕಕ್ಕೆ ಒಳಗಾಗಿದ್ದಾರೆ. ಅಕ್ಕಿ, ಬೇಳೆಕಾಳುಗಳು, ಮೆಣಸಿನಕಾಯಿ ಸೇರಿದಂತೆ ಅಡುಗೆಗೆ ಬೇಕಾದ ಪದಾರ್ಥಗಳ ದರಗಳು ದಿಢೀರ್ ಏರಿಕೆಯಾಗಿವೆ. ಅಂತರರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಅಕ್ಕಿ ರಫ್ತು ಹೆಚ್ಚಳ, ಸ್ಥಳೀಯ ಇಳುವಳಿ ಕೊರತೆ ಮತ್ತು ಇತರ ಕಾರಣಗಳಿಂದಾಗಿ ಈ ಬೆಲೆ ಏರಿಕೆಯಾಗಿದೆ ಎಂದು ವ್ಯಾಪಾರಿಗಳು ತಿಳಿಸಿದ್ದಾರೆ.
ಬೆಂಗಳೂರು ಮತ್ತು ರಾಜ್ಯದ ವಿವಿಧ ಭಾಗಗಳಲ್ಲಿ ಸಗಟು ಮತ್ತು ಚಿಲ್ಲರೆ ಮಾರುಕಟ್ಟೆಯಲ್ಲಿ ಅಕ್ಕಿ ಬೆಲೆ ಕೆ.ಜಿಗೆ 5 ರಿಂದ 10 ರೂಪಾಯಿ ವರೆಗೆ ಏರಿಕೆಯಾಗಿದೆ. ಮೆಣಸಿನಕಾಯಿ ದರಗಳು ಭಾರೀ ಏರಿಕೆ ಕಂಡಿವೆ. ಬ್ಯಾಡಗಿ ಮೆಣಸಿನಕಾಯಿ ಕೆ.ಜಿಗೆ 260 ರೂಪಾಯಿಯಿಂದ 420 ರೂಪಾಯಿಗೆ ಜಿಗಿದಿದೆ. ತೊಗರಿ ಬೇಳೆ, ಉದ್ದಿನ ಬೇಳೆ, ಕಡಲೆಬೀಜ ಸೇರಿದಂತೆ ಬೇಳೆಕಾಳುಗಳ ದರಗಳೂ ಗಣನೀಯವಾಗಿ ಹೆಚ್ಚಾಗಿವೆ.
ಪ್ರಮುಖ ಪದಾರ್ಥಗಳ ಹಳೆಯ ಮತ್ತು ಹೊಸ ದರಗಳು (ಪ್ರತಿ ಕೆ.ಜಿ.):
- ಸೋನಾ ಮಸೂರಿ ಅಕ್ಕಿ ಹಳೆಯ ದರ: 38 ರೂಪಾಯಿ ಹೊಸ ದರ: 44 ರೂಪಾಯಿ
- ಆರ್ಎಫ್ಒ (RFO) ಅಕ್ಕಿ ಹಳೆಯ ದರ : 49 ರೂಪಾಯಿ ಹೊಸ ದರ: 54 ರೂಪಾಯಿ
- ದೋಸೆ ಅಕ್ಕಿ ಹಳೆಯ ದರ : 29 ರೂಪಾಯಿ ಹೊಸ ದರ: 39 ರೂಪಾಯಿ
- ಬ್ಯಾಡಗಿ ಮೆಣಸಿನಕಾಯಿ ಹಳೆಯ ದರ : 260 ರೂಪಾಯಿ ಹೊಸ ದರ: 420 ರೂಪಾಯಿ
- ಗುಂಟೂರು ಮೆಣಸಿನಕಾಯಿ ಹಳೆಯ ದರ : 180 ರೂಪಾಯಿ ಹೊಸ ದರ: 230 ರೂಪಾಯಿ
- ತೊಗರಿ ಬೇಳೆ ಹಳೆಯ ದರ : 110 ರೂಪಾಯಿ ಹೊಸ ದರ: 135 ರೂಪಾಯಿ
- ಉದ್ದಿನ ಬೇಳೆ ಹಳೆಯ ದರ : 100 ರೂಪಾಯಿ ಹೊಸ ದರ: 120 ರೂಪಾಯಿ
- ಕಡಲೆಬೀಜ ಹಳೆಯ ದರ : 120 ರೂಪಾಯಿ ಹೊಸ ದರ: 150 ರೂಪಾಯಿ
ಈ ಬೆಲೆ ಏರಿಕೆಯಿಂದಾಗಿ ಜನಸಾಮಾನ್ಯರ ಅಡುಗೆ ಖರ್ಚು ಗಣನೀಯವಾಗಿ ಹೆಚ್ಚಾಗಿದೆ. ವ್ಯಾಪಾರಿಗಳ ಪ್ರಕಾರ, ಅಕ್ಕಿ ರಫ್ತು ಹೆಚ್ಚಳ (ವಿಶೇಷವಾಗಿ ಬಾಂಗ್ಲಾದೇಶ, ಆಫ್ರಿಕಾ ಮತ್ತು ಇತರ ದೇಶಗಳಿಗೆ) ಮತ್ತು ಸ್ಥಳೀಯ ಮಾರುಕಟ್ಟೆಯಲ್ಲಿ ಹಳೆಯ ಅಕ್ಕಿಯ ಕೊರತೆಯಿಂದಾಗಿ ದರಗಳು ಏರಿಕೆಯಾಗಿವೆ. ಮುಂದಿನ ದಿನಗಳಲ್ಲಿ ಇನ್ನಷ್ಟು ಏರಿಕೆಯ ಸಾಧ್ಯತೆ ಇದ್ದು, ಜನರು ಆರ್ಥಿಕ ಒತ್ತಡಕ್ಕೆ ಒಳಗಾಗುವ ಸಾಧ್ಯತೆಯಿದೆ.
ಸರ್ಕಾರದಿಂದ ಬೆಲೆ ನಿಯಂತ್ರಣಕ್ಕಾಗಿ ಯಾವುದೇ ಕ್ರಮ ಕೈಗೊಳ್ಳಲಾಗದೇ ಇರುವುದು ಜನರಲ್ಲಿ ಆಕ್ರೋಶಕ್ಕೆ ಕಾರಣವಾಗಿದೆ.