ಬಿಹಾರ ವಿಧಾನಸಭಾ ಚುನಾವಣಾ ಫಲಿತಾಂಶಗಳು ಕರ್ನಾಟಕ ರಾಜಕೀಯಕ್ಕೆ ದೊಡ್ಡ ಶಾಕ್ ನೀಡಿವೆ. ಎನ್ಡಿಎ ಮೈತ್ರಿಕೂಟ 208 ಸ್ಥಾನಗಳೊಂದಿಗೆ ಭರ್ಜರಿ ಗೆಲುವು ಸಾಧಿಸಿದ್ದು, ಇದು ಕರ್ನಾಟಕದ ಬಿಜೆಪಿ-ಜೆಡಿಎಸ್ ಮೈತ್ರಿಯನ್ನು 2028ರ ವಿಧಾನಸಭಾ ಚುನಾವಣೆಗೆ ಸಂಪೂರ್ಣ ಫಿಕ್ಸ್ ಮಾಡಿದೆ. ಬಿಹಾರದಲ್ಲಿ ನೀತೀಶ್ ಕುಮಾರ್ (ಜೆಡಿಯು) ಮತ್ತು ಬಿಜೆಪಿಯ ಒಗ್ಗಟ್ಟು ಗೆಲುವಿನ ರಹಸ್ಯವಾದಂತೆ, ಕರ್ನಾಟಕದಲ್ಲಿ ಬಿ.ವೈ. ವಿಜಯೇಂದ್ರ ಮತ್ತು ಹೆಚ್.ಡಿ. ಕುಮಾರಸ್ವಾಮಿ ನೇತೃತ್ವದ ಮೈತ್ರಿ ಪಕ್ಷಗಳು ಕಾಂಗ್ರೆಸ್ ಸೋಲಿಸಲು ಬಿಹಾರ ಮಾದರಿಯನ್ನು ಅಳವಡಿಸಿಕೊಳ್ಳುತ್ತಿವೆ. ಮೈತ್ರಿ ಸಂಬಂಧ ಇನ್ನಷ್ಟು ಗಟ್ಟಿಯಾಗಿದ್ದು, ಬಿಜೆಪಿಯ ಆಂತರಿಕ ಜಗಳಗಳಿಗೆ ಬ್ರೇಕ್ ಹಾಕಿ, ರಾಜ್ಯ ಮಟ್ಟದಿಂದ ಬೂತ್ ಮಟ್ಟದವರೆಗೆ ಹೊಂದಾಣಿಕೆ ಮಾಡಿಸುವ ಮಾಸ್ಟರ್ ಪ್ಲಾನ್ ರೂಪುಗೊಂಡಿದೆ.
ಬಿಹಾರ ಮಾದರಿ ಸೀಟ್ ಹಂಚಿಕೆ:
ಬಿಹಾರದಲ್ಲಿ ಜೆಡಿಯುಗೆ 84 ಸ್ಥಾನಗಳನ್ನು ನೀಡಿ ಬಿಜೆಪಿ 94 ಸ್ಥಾನಗಳನ್ನು ತೆಗೆದುಕೊಂಡಂತೆ, ಕರ್ನಾಟಕದಲ್ಲಿ ಹಳೆ ಮೈಸೂರು ಭಾಗದಲ್ಲಿ ಜೆಡಿಎಸ್ಗೆ ಹೆಚ್ಚು ಸ್ಥಾನಗಳನ್ನು ಕೊಡುವ ಯೋಜನೆಯಿದೆ. ಇದರಿಂದ ಒಕ್ಕಲಿಗ ಮತ್ತು ವೈಶ್ಯ ಸಮುದಾಯಗಳ ಮತಗಳನ್ನು ಗಟ್ಟಿಗೊಳಿಸಬಹುದು. ಉತ್ತರ ಕರ್ನಾಟಕದಲ್ಲಿ ಬಿಜೆಪಿ ಬಹುಪಾಲು ಸ್ಥಾನಗಳನ್ನು ತೆಗೆದುಕೊಂಡು, ಲಿಂಗಾಯತ, ಕುರುಬ ಮತ್ತು ಪ್ರಬಲ ಸಮುದಾಯಗಳ ಮತಗಳನ್ನು ಸೆಳೆಯುವ ತಂತ್ರ ರೂಪಿಸಲಾಗಿದೆ.
ವಿಜಯೇಂದ್ರ ತಂಡ ಬೂತ್ ಮಟ್ಟದಲ್ಲಿ ಮೈತ್ರಿ ಹೊಂದಾಣಿಕೆ ಮಾಡಿಸುವಂತೆ ಸೂಚಿಸಿದ್ದು, ಲಿಂಗಾಯತ, ಒಕ್ಕಲಿಗ , ಒಬಿಸಿ ಮತಗಳನ್ನು ಒಟ್ಟುಗೂಡಿಸಿ ಚುನಾವಣೆ ಎದುರಿಸುವ ಪ್ಲಾನ್ ಇದೆ. ದಲಿತ ಸಮುದಾಯವನ್ನು ಓಲೈಸಲು ಬೈರತಿ ಬಸವರಾಜು, ಎಂ.ಟಿ.ಬಿ. ನಾಗರಾಜ್, ಶರಣು ತಳ್ಳಿಕೇರೆ ಅವರನ್ನು ವಿಜಯೇಂದ್ರ ಟೀಮ್ಗೆ ಸೇರಿಸಿ, ಉತ್ತರ ಕರ್ನಾಟಕದ ಮತಗಳನ್ನು ಗಳಿಸುವ ಯೋಜನೆಯಿದೆ.
ಜಾತಿ ಸಮೀಕರಣದ ಮಾಸ್ಟರ್ ಪ್ಲಾನ್:
ಬಿಹಾರದಲ್ಲಿ ಎನ್ಡಿಎ ಮಹಿಳಾ, ದಲಿತ ಮತ್ತು ಕುರುಬ ಮತಗಳನ್ನು ಒಗ್ಗೂಡಿಸಿ ಗೆದ್ದಂತೆ, ಕರ್ನಾಟಕದಲ್ಲಿ ಲಿಂಗಾಯತ-ಕುರುಬ ನಿರ್ಣಾಯಕ ಮತಗಳನ್ನು ಬಳಸಿಕೊಂಡು ಜಾತಿ ಸಮೀಕರಣ ಯಶಸ್ವಿಗೊಳಿಸುವುದೇ ಗುರಿ. ಬಿಜೆಪಿ ಆಂತರಿಕ ಜಗಳಗಳಿಗೆ ಬ್ರೇಕ್ ಹಾಕಿ, ಕಾಂಗ್ರೆಸ್ ಸೋಲಿಸಲು ಬಿಹಾರದ ಮಾದರಿಯಲ್ಲಿ ರಾಜ್ಯದಲ್ಲೂ ಗೆದ್ದು ಬೀಗುವುದೇ ಮಾಸ್ಟರ್ ಪ್ಲಾನ್.
ಈ ಒಗ್ಗಟ್ಟು ಕರ್ನಾಟಕ ರಾಜಕೀಯದಲ್ಲಿ ಹೊಸ ಅಧ್ಯಾಯ ಆರಂಭಿಸಲಿದ್ದು, 2028ರಲ್ಲಿ ಕಾಂಗ್ರೆಸ್ಗೆ ದೊಡ್ಡ ಸವಾಲಾಗಲಿದೆ.