ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್‌ಸಿಬಿ) ತಂಡದ ಐಪಿಎಲ್ 2025ರ ಗೆಲುವಿನ ಸಂಭ್ರಮಾಚರಣೆಗೆ ಚಿನ್ನಸ್ವಾಮಿ ಕ್ರೀಡಾಂಗಣದ ಬಳಿ ಜಮಾಯಿಸಿದ್ದ ಲಕ್ಷಾಂತರ ಅಭಿಮಾನಿಗಳ ಸಂತೋಷ ಕ್ಷಣಮಾತ್ರದಲ್ಲಿ ದುರಂತವಾಗಿ ಮಾರ್ಪಟ್ಟಿತು. ಜೂನ್ 4, 2025ರಂದು ವಿಜಯೋತ್ಸವ ಮೆರವಣಿಗೆಯ ಸಂದರ್ಭದಲ್ಲಿ ಸಂಭವಿಸಿದ ಕಾಲ್ತುಳಿತದಲ್ಲಿ 11 ಅಮಾಯಕರು ತಮ್ಮ ಪ್ರಾಣವನ್ನು ಕಳೆದುಕೊಂಡಿದ್ದಾರೆ, ಜೊತೆಗೆ 30ಕ್ಕೂ ಹೆಚ್ಚು ಮಂದಿ ಗಾಯಗೊಂಡಿದ್ದಾರೆ. ಈ ಘೋರ ದುರಂತವು ಕರ್ನಾಟಕವನ್ನೇ ಶೋಕದ ಗೂಡಾಗಿ ಮಾಡಿದೆ.
ಜೀವ ಕಳೆದುಕೊಂಡವರ ದುರಂತ ಕಥೆ
ಈ ಕಾಲ್ತುಳಿತ ದುರಂತವು ಹಲವಾರು ಕುಟುಂಬಗಳಿಗೆ ತೀರದ ನೋವನ್ನು ಉಂಟುಮಾಡಿದೆ. ಮೃತರ ಕಥೆಗಳು ಎಲ್ಲರ ಹೃದಯವನ್ನು ಕಲಕಿವೆ:
ADVERTISEMENT
ADVERTISEMENT
- ಭೂಮಿಕ್ (20): ನಾಗಸಂದ್ರ ಮೂಲದ ಈ ಯುವಕ ತನ್ನ ಸ್ನೇಹಿತರೊಂದಿಗೆ ಆರ್‌ಸಿಬಿ ಆಟಗಾರರನ್ನು ಕಾಣಲು ಚಿನ್ನಸ್ವಾಮಿ ಕ್ರೀಡಾಂಗಣಕ್ಕೆ ಬಂದಿದ್ದ. ಸ್ನೇಹಿತರು ಕ್ರೀಡಾಂಗಣದ ಒಳಗೆ ಪ್ರವೇಶಿಸಿದರೆ, ಭೂಮಿಕ್ ಹೊರಗೆ ಸಿಲುಕಿ ಕಾಲ್ತುಳಿತದಲ್ಲಿ ಉಸಿರುಗಟ್ಟಿ ಸಾವನ್ನಪ್ಪಿದ.
- ಅಕ್ಷತಾ (26): ಉತ್ತರ ಕನ್ನಡ ಮೂಲದ ಅಕ್ಷತಾ ಒಂದು ವರ್ಷದ ಹಿಂದೆ ಮದುವೆಯಾಗಿ, ಪತಿ ಆಶಯ್ ಜೊತೆ ಕಮ್ಮನಹಳ್ಳಿಯಲ್ಲಿ ವಾಸವಾಗಿದ್ದಳು. ದಂಪತಿ ಒಟ್ಟಿಗೆ ಸಂಭ್ರಮಾಚರಣೆಗೆ ಬಂದಿದ್ದಾಗ, ಕಾಲ್ತುಳಿತದಲ್ಲಿ ಅಕ್ಷತಾ ಗಂಡನ ಎದುರಿಗೇ ಪ್ರಾಣಬಿಟ್ಟಳು.
- ಸಹನಾ (24): ಕೆಜಿಎಫ್‌ನ ಬಡಮಾಕನಹಳ್ಳಿ ಗ್ರಾಮದ ಸಹನಾ ಇಂಜಿನಿಯರಿಂಗ್ ಪದವೀಧರೆಯಾಗಿ ಬೆಂಗಳೂರಿನ ಖಾಸಗಿ ಕಂಪನಿಯಲ್ಲಿ ಕೆಲಸ ಮಾಡುತ್ತಿದ್ದಳು. ಸ್ನೇಹಿತರೊಂದಿಗೆ ವಿಜಯೋತ್ಸವವನ್ನು ಕಾಣಲು ಬಂದಿದ್ದ ಆಕೆ ಕಾಲ್ತುಳಿತದ ಬಲಿಯಾದಳು. ಸಹನಾ ಮೃತದೇಹವನ್ನು ಕೋಲಾರದ ಎಸ್‌ಜಿ ಬಡಾವಣೆಗೆ ಕೊಂಡೊಯ್ಯಲಾಗಿದೆ.
- ಪ್ರಜ್ವಲ್ (22): ಚಿಕ್ಕಬಳ್ಳಾಪುರದ ಈ ಯುವಕ ಇಂಜಿನಿಯರಿಂಗ್ ಮುಗಿಸಿ ಖಾಸಗಿ ಕಂಪನಿಯಲ್ಲಿ ಸಂದರ್ಶನಕ್ಕೆ ತೆರಳಿದ್ದ. ವಿಜಯೋತ್ಸವಕ್ಕೆ ಬಂದಿದ್ದು ಮನೆಯವರಿಗೆ ಗೊತ್ತಿರಲಿಲ್ಲ. ಕಾಲ್ತುಳಿತದಲ್ಲಿ ಸಾವನ್ನಪ್ಪಿದ ಸುದ್ದಿ ತಿಳಿದಾಗ ಕುಟುಂಬ ಆಘಾತಕ್ಕೊಳಗಾಯಿತು.
- ದಿವ್ಯಾನ್ಷಿ (14): ಯಲಹಂಕ ಕಣ್ಣೂರಿನ 9ನೇ ತರಗತಿ ವಿದ್ಯಾರ್ಥಿನಿ ದಿವ್ಯಾನ್ಷಿ ಚಿಕ್ಕಮ್ಮ ರಚನಾ ಜೊತೆ ಸ್ಟೇಡಿಯಂಗೆ ಬಂದಿದ್ದಳು. ಕಾಲ್ತುಳಿತದಲ್ಲಿ ಉಸಿರುಗಟ್ಟಿ ಮೃತಪಟ್ಟ ಆಕೆಯ ಕುಟುಂಬದ ಆಕ್ರಂದನ ಮುಗಿಲು ಮುಟ್ಟಿದೆ.
- ಶಿವಲಿಂಗ (17): ಯಾದಗಿರಿಯ ರಾಮಸಂದ್ರದ ಶಿವಲಿಂಗ ದ್ವಿತೀಯ ಪಿಯುಸಿಗೆ ಟಿಸಿ ತರಲು ಬೆಂಗಳೂರಿಗೆ ಬಂದಿದ್ದ. ಆರ್‌ಸಿಬಿ ಸಂಭ್ರಮವನ್ನು ಕಾಣಲು ಸ್ಟೇಡಿಯಂಗೆ ತೆರಳಿದ ಆತ ಕಾಲ್ತುಳಿತಕ್ಕೆ ಬಲಿಯಾದ.
- ಪೂರ್ಣಚಂದ್ರ (26): ಮಂಡ್ಯದ ಕೆ.ಆರ್. ಪೇಟೆಯ ರಾಯಸಮುದ್ರದ ಸಿವಿಲ್ ಇಂಜಿನಿಯರ್ ಪೂರ್ಣಚಂದ್ರ ಕಾಲ್ತುಳಿತದಲ್ಲಿ ಸಿಪಿಆರ್‌ಗೆ ಸ್ಪಂದಿಸದೇ ಸಾವನ್ನಪ್ಪಿದ. ಆತನ ಮೃತದೇಹವು ಹುಟ್ಟೂರಿಗೆ ತಲುಪಿದೆ.
- ದೇವಿ (29): ತಮಿಳುನಾಡಿನ ಕೊಯಮತ್ತೂರಿನ ದೇವಿ ರಾಮಮೂರ್ತಿನಗರದಲ್ಲಿ ವಾಸವಾಗಿದ್ದಳು. ಕಾಲ್ತುಳಿತದಲ್ಲಿ ಮೃತಪಟ್ಟ ಆಕೆಯ ದೇಹವನ್ನು ಕೊಯಮತ್ತೂರಿಗೆ ರವಾನಿಸಲಾಗಿದೆ.
- ಶ್ರವಣ್ (20): ಅಂಬೇಡ್ಕರ್ ಕಾಲೇಜಿನ ಡೆಂಟಲ್ ವಿದ್ಯಾರ್ಥಿ ಶ್ರವಣ್ ಚಿಕ್ಕಬಳ್ಳಾಪುರದ ಕುರುಟಹಳ್ಳಿಯವನು. ಆತನ ಮೃತದೇಹ ಮನೆಗೆ ತಲುಪಿದಾಗ ಕುಟುಂಬದ ಆಕ್ರಂದನ ತೀವ್ರವಾಯಿತು.
- ಚಿನ್ಮಯಿ ಶೆಟ್ಟಿ (22): ಯಕ್ಷಗಾನ ಕಲಾವಿದೆ ಮತ್ತು ಬ್ಯಾಸ್ಕೆಟ್‌ಬಾಲ್ ಆಟಗಾರ್ತಿಯಾಗಿದ್ದ ಚಿನ್ಮಯಿ ‘ಯಕ್ಷತರಂಗ ಬೆಂಗಳೂರು’ದಲ್ಲಿ ಕಲಿಯುತ್ತಿದ್ದಳು. ಆಕೆಯ ಸಾವು ಕುಟುಂಬದ ಕನಸುಗಳನ್ನು ಛಿದ್ರಗೊಳಿಸಿತು.
- ಮನೋಜ್ (18): ತುಮಕೂರಿನ ಕುಣಿಗಲ್‌ನ ಯಡಿಯೂರಿನ ಪಾನಿಪುರಿ ವ್ಯಾಪಾರಿಯ ಮಗ ಮನೋಜ್ ಯಲಹಂಕದ ಕಾಲೇಜಿನಲ್ಲಿ ದ್ವಿತೀಯ ಪಿಯುಸಿ ಓದುತ್ತಿದ್ದ.
