ಗೆಳೆಯನ ಬ್ಯಾಂಕ್‌ ಖಾತೆಯನ್ನ ದುರುಪಯೋಗ ಪಡಿಸಿಕೊಂಡು ಕೋಟಿ ಕೋಟಿ ವರ್ಗಾವಣೆ ನಡೆಸಿದ ಸ್ನೇಹಿತ! ಕಡೆಗೆ ಏನಾಯ್ತು..?

ಬೆಂಗಳೂರು: ವಿದ್ಯಾರ್ಥಿಯ ಬ್ಯಾಂಕ್ ಖಾತೆಯನ್ನು ಬಳಸಿಕೊಂಡು ಬರೋಬ್ಬರಿ 7 ಕೋಟಿ ರೂಪಾಯಿಗಳ ಅಕ್ರಮ ವರ್ಗಾವಣೆ ನಡೆಸಿರುವ ಆಘಾತಕಾರಿ ಪ್ರಕರಣವೊಂದು ಬೆಂಗಳೂರಿನಲ್ಲಿ ಬೆಳಕಿಗೆ ಬಂದಿದೆ.

ಘಟನೆಯ ಹಿನ್ನೆಲೆ

ಬೆಂಗಳೂರಿನಲ್ಲಿ ವಿದ್ಯಾಭ್ಯಾಸ ಮಾಡುತ್ತಿರುವ ವಿದ್ಯಾರ್ಥಿಯೊಬ್ಬನಿಗೆ ಸುಮಾರು ಒಂದು ವರ್ಷದ ಹಿಂದೆ ಆಯುಷ್ ಎಂಬಾತನ ಪರಿಚಯವಾಗಿತ್ತು. ಇಬ್ಬರೂ ಉತ್ತಮ ಸ್ನೇಹಿತರಾಗಿದ್ದರು. ಈ ಸ್ನೇಹವನ್ನೇ ಬಂಡವಾಳವಾಗಿಸಿಕೊಂಡ ಆಯುಷ್, ತನ್ನ ಬ್ಯಾಂಕ್ ಖಾತೆಯಲ್ಲಿ ತಾಂತ್ರಿಕ ತೊಂದರೆಯಾಗಿದೆ ಅಥವಾ ಬ್ಲಾಕ್ ಆಗಿದೆ ಎಂಬ ನೆಪವೊಡ್ಡಿ ವಿದ್ಯಾರ್ಥಿಯ ಸಹಾಯ ಕೋರಿದ್ದನು.

ವಿದ್ಯಾರ್ಥಿಯು, ತನ್ನ ಗೆಳೆಯ ಸಂಕಷ್ಟದಲ್ಲಿದ್ದಾನೆ ಎಂದು ನಂಬಿ ತನ್ನ ಬ್ಯಾಂಕ್ ಖಾತೆಯ ಸಂಪೂರ್ಣ ವಿವರಗಳನ್ನು ಆಯುಷ್‌ಗೆ ನೀಡಿದ್ದನು. ಇದರಲ್ಲಿ ಬ್ಯಾಂಕ್ ಪಾಸ್ ಬುಕ್, ಎಟಿಎಂ ಕಾರ್ಡ್ ಹಾಗೂ ಬ್ಯಾಂಕ್ ಖಾತೆಗೆ ಲಿಂಕ್ ಆಗಿದ್ದ ಮೊಬೈಲ್ ಸಿಮ್ ಕಾರ್ಡ್ ಕೂಡ ಸೇರಿತ್ತು. ಈ ಮೂಲಕ ವಿದ್ಯಾರ್ಥಿಯ ಖಾತೆಯ ಸಂಪೂರ್ಣ ಮಾಹಿತಿ ಆಯುಷ್‌ ಬಳಿ ಇತ್ತು.

7 ಕೋಟಿಯ ಅಕ್ರಮ ವರ್ಗಾವಣೆ

ಸಿಮ್ ಮತ್ತು ಎಟಿಎಂ ಕಾರ್ಡ್ ಕೈ ಸೇರಿದ ಮೇಲೆ ಆಯುಷ್ ತನ್ನ ಅಸಲಿ ಆಟ ಶುರು ಮಾಡಿದ್ದನು. ವಿದ್ಯಾರ್ಥಿಯ ಖಾತೆಯನ್ನು ಹಣ ವರ್ಗಾವಣೆಯ ‘ಮ್ಯೂಲ್ ಅಕೌಂಟ್’ (Mule Account) ಆಗಿ ಬಳಸಿಕೊಂಡಿದ್ದಾನೆ. ವಿವಿಧ ಮೂಲಗಳಿಂದ ಬಂದ ಸುಮಾರು 7 ಕೋಟಿ ರೂಪಾಯಿ ಹಣವನ್ನು ಈ ಖಾತೆಯ ಮೂಲಕ ಹರಿಸಲಾಗಿದೆ.

ಈ ಹಣ ವರ್ಗಾವಣೆ ಬಗ್ಗೆ ವಿದ್ಯಾರ್ಥಿಗೆ ಯಾವುದೇ ಸುಳಿವಿರಲಿಲ್ಲ. ಆದರೆ, ಅಸಹಜವಾಗಿ ದೊಡ್ಡ ಮೊತ್ತದ ಹಣದ ಓಡಾಟ ನಡೆಯುತ್ತಿರುವುದನ್ನು ಗಮನಿಸಿದ ಬ್ಯಾಂಕ್ ಅಧಿಕಾರಿಗಳು ವಿದ್ಯಾರ್ಥಿಯ ಬ್ಯಾಂಕ್‌ ಖಾತೆಯನ್ನ ತಕ್ಷಣವೇ ಬ್ಲಾಕ್‌ ಮಾಡಿದ್ದಾರೆ. ಬಳಿಕ ಬ್ಯಾಂಕ್ ಅಧಿಕಾರಿಗಳು ವಿದ್ಯಾರ್ಥಿಯನ್ನು ಸಂಪರ್ಕಿಸಿ ವಿಷಯ ತಿಳಿಸಿದ್ದಾರೆ.

ಬ್ಯಾಂಕ್‌ನಿಂದ ಬಂದ ಶಾಕಿಂಗ್ ಕಾಲ್

ತನ್ನ ಅಕೌಂಟ್‌ನಲ್ಲಿ ಕೋಟಿ ಕೋಟಿ ವ್ಯವಹಾರ ನಡೆದಿದೆ ಎಂಬ ವಿಷಯ ತಿಳಿದು ವಿದ್ಯಾರ್ಥಿಯೇ ಶಾಕ್‌ ಆಗಿದ್ದಾನೆ. ತಾನು ನಂಬಿದ ಗೆಳೆಯನೇ ತನ್ನನ್ನು ಈ ಜಾಲಕ್ಕೆ ಸಿಲುಕಿಸಿ ಮೋಸ ಮಾಡಿದ್ದಾನೆ ಎಂದು ತಿಳಿದು ಬೇಸರ ವ್ಯಕ್ತಪಡಿಸಿದ್ದಾನೆ. ಈ ಮೂಲಕ ಸೈಬರ್ ಅಪರಾಧಿಗಳು ಇಂತಹ ವಿದ್ಯಾರ್ಥಿಗಳನ್ನು ಗುರಿಯಾಗಿಸಿಕೊಂಡು ಅವರ ಖಾತೆಗಳನ್ನು ಅಕ್ರಮ ಹಣ ವರ್ಗಾವಣೆಗೆ ಬಳಸಿಕೊಳ್ಳುತ್ತಿದ್ದಾರೆ ಎಂದು ತಿಳಿದುಬಂದಿದೆ.

ಈ ಬಗ್ಗೆ ವಿದ್ಯಾರ್ಥಿಯು ತಕ್ಷಣ ಬೆಂಗಳೂರು ಉತ್ತರ ವಿಭಾಗದ ಸೈಬರ್ ಕ್ರೈಂ ಪೊಲೀಸ್ ಠಾಣೆಗೆ (CEN Police Station) ತೆರಳಿ ದೂರು ದಾಖಲಿಸಿದ್ದಾನೆ. ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು, ಪರಾರಿಯಾಗಿರುವ ಆಯುಷ್ ಪತ್ತೆಗಾಗಿ ತೀವ್ರ ಹುಡುಕಾಟ ನಡೆಸುತ್ತಿದ್ದಾರೆ. ಈ ಹಣವು ಸೈಬರ್ ವಂಚನೆಯದ್ದೇ ಅಥವಾ ಹವಾಲಾ ವ್ಯವಹಾರದ್ದೇ ಎಂಬ ಬಗ್ಗೆ ವಿವಿಧ ಆಯಾಮಗಳಲ್ಲಿ ತನಿಖೆ ಮುಂದುವರಿದಿದೆ.

ಎಚ್ಚರಿಕೆ 

ಇತ್ತೀಚಿನ ದಿನಗಳಲ್ಲಿ ಸೈಬರ್ ವಂಚಕರು ಇಂತಹ ‘ಮ್ಯೂಲ್ ಅಕೌಂಟ್’ಗಳ ಮೇಲೆ ಕಣ್ಣಿಟ್ಟಿದ್ದಾರೆ. ನಿಮ್ಮ ಖಾತೆಯನ್ನು ಬೇರೆಯವರಿಗೆ ನೀಡುವ ಮುನ್ನ ಈ ಅಂಶಗಳನ್ನು ನೆನಪಿಡಿ:

1. ಯಾರೇ ಆಗಲಿ ನಿಮ್ಮ ಎಟಿಎಂ ಕಾರ್ಡ್, ಪಿನ್ ಅಥವಾ ಸಿಮ್ ಕಾರ್ಡ್ ನೀಡಬೇಡಿ.

2. ಸೈಬರ್ ಕೆಫೆ ಅಥವಾ ಅಪರಿಚಿತರ ಫೋನ್‌ನಲ್ಲಿ ಬ್ಯಾಂಕಿಂಗ್ ಆ್ಯಪ್ ಬಳಸಬೇಡಿ.

3. ಅಕಸ್ಮಾತ್ ನಿಮ್ಮ ಖಾತೆಯಲ್ಲಿ ಅಸಹಜ ವ್ಯವಹಾರ ನಡೆದರೆ ಕೂಡಲೇ ಬ್ಯಾಂಕ್ ಮತ್ತು 1930 ಸೈಬರ್ ಸಹಾಯವಾಣಿಗೆ ಕರೆ ಮಾಡಿ.