ಬೆಂಗಳೂರು: ಕಡಿಮೆ ಪ್ರಮಾಣದಲ್ಲಿ ಆಹಾರ ಸೇವಿಸಿದರೂ ಹೊಟ್ಟೆ ತುಂಬಿದಂತೆ, ಬಿಗಿಯಾದಂತೆ ಅಥವಾ ಉಬ್ಬಿದಂತೆ ಅನುಭವವಾಗುತ್ತಿದೆಯೇ? ಹೊಟ್ಟೆಯಲ್ಲಿ ಗ್ಯಾಸ್, ಭಾರ ಅಥವಾ ಅಸ್ವಸ್ಥತೆ ಕಾಣಿಸಿಕೊಳ್ಳುವುದು ಹಲವರಲ್ಲಿ ಸಾಮಾನ್ಯವಾಗಿ ಕಂಡುಬರುವ ಸಮಸ್ಯೆಯಾಗಿದೆ. ಆಹಾರ ಸೇವಿಸುವ ವಿಧಾನ, ಆಹಾರದ ಗುಣಮಟ್ಟ, ಜೀರ್ಣಕ್ರಿಯೆ, ಮಲಬದ್ಧತೆ ಸೇರಿದಂತೆ ಹಲವು ಕಾರಣಗಳಿಂದ ಹೊಟ್ಟೆ ಉಬ್ಬರ ಉಂಟಾಗಬಹುದು.
ಅಪರೂಪಕ್ಕೊಮ್ಮೆ ಹೊಟ್ಟೆ ಉಬ್ಬರಿಸುವುದು ಸಾಮಾನ್ಯವಾಗಿರಬಹುದು. ಆದರೆ ಪದೇ ಪದೇ ಇದೇ ಸಮಸ್ಯೆ ಮರುಕಳಿಸುತ್ತಿದ್ದರೆ ಅದನ್ನು ನಿರ್ಲಕ್ಷಿಸಬಾರದು. ಹೊಟ್ಟೆ ಉಬ್ಬರದ ಜೊತೆಗೆ ತೀವ್ರ ಹೊಟ್ಟೆ ನೋವು, ವಾಂತಿ, ತೂಕ ಇಳಿಕೆ ಅಥವಾ ಮಲದಲ್ಲಿ ರಕ್ತದಂತಹ ಲಕ್ಷಣಗಳು ಕಂಡುಬಂದರೆ ವೈದ್ಯರ ಸಲಹೆ ಪಡೆಯುವುದು ಅಗತ್ಯ.
ಹೊಟ್ಟೆ ಉಬ್ಬರಕ್ಕೆ ಕಾರಣಗಳೇನು?
ವೇಗವಾಗಿ ಆಹಾರ ಸೇವಿಸುವುದು: ಆತುರದಲ್ಲಿ ಆಹಾರ ಸೇವಿಸುವಾಗ ಆಹಾರದ ಜೊತೆಗೆ ಹೆಚ್ಚಿನ ಗಾಳಿಯೂ ಜೀರ್ಣಾಂಗಕ್ಕೆ ಸೇರುವ ಸಾಧ್ಯತೆ ಇದೆ. ಇದರಿಂದ ಹೊಟ್ಟೆಯಲ್ಲಿ ಗ್ಯಾಸ್ ಸಂಗ್ರಹವಾಗಿ ಉಬ್ಬರದ ಅನುಭವ ಉಂಟಾಗಬಹುದು. ಆದ್ದರಿಂದ ಆಹಾರವನ್ನು ನಿಧಾನವಾಗಿ ಹಾಗೂ ಚೆನ್ನಾಗಿ ಅಗಿದು ಸೇವಿಸುವ ಅಭ್ಯಾಸ ಬೆಳೆಸಿಕೊಳ್ಳುವುದು ಉತ್ತಮ.
ಕೆಲವು ಆಹಾರ ಪದಾರ್ಥಗಳು: ಕಡಲೆ, ಉದ್ದು, ಕೆಲವು ತರಕಾರಿಗಳು ಹಾಗೂ ಸೋಡಾ ಅಥವಾ ಕಾರ್ಬೊನೇಟೆಡ್ ಪಾನೀಯಗಳು ಕೆಲವರಲ್ಲಿ ಗ್ಯಾಸ್ ಹೆಚ್ಚಿಸಬಹುದು. ಯಾವ ಆಹಾರ ಸೇವಿಸಿದ ಬಳಿಕ ಪದೇ ಪದೇ ಉಬ್ಬರ ಉಂಟಾಗುತ್ತದೆ ಎಂಬುದನ್ನು ಗಮನಿಸುವುದು ಸಹಾಯಕ.
ಮಲಬದ್ಧತೆ: ಮಲ ಸರಿಯಾಗಿ ವಿಸರ್ಜನೆಯಾಗದೆ ಕರುಳಿನಲ್ಲಿ ಹೆಚ್ಚು ಸಮಯ ಉಳಿದಾಗ ಹೊಟ್ಟೆ ಬಿಗಿಯಾದಂತೆ, ಭಾರವಾದಂತೆ ಅಥವಾ ಉಬ್ಬಿದಂತೆ ಅನಿಸಬಹುದು. ಹೀಗಾಗಿ ಮಲಬದ್ಧತೆಯನ್ನು ನಿರ್ಲಕ್ಷಿಸದೆ ಆರಂಭದಲ್ಲೇ ಸೂಕ್ತ ಕ್ರಮ ಕೈಗೊಳ್ಳಬೇಕು.
ಆಹಾರ ಅಸಹನೀಯತೆ: ಕೆಲವರಿಗೆ ಹಾಲು ಅಥವಾ ಕೆಲವು ಆಹಾರ ಪದಾರ್ಥಗಳು ಸುಲಭವಾಗಿ ಜೀರ್ಣವಾಗುವುದಿಲ್ಲ. ಅಂತಹ ಸಂದರ್ಭಗಳಲ್ಲಿ ಗ್ಯಾಸ್, ಹೊಟ್ಟೆ ಉಬ್ಬರ ಹಾಗೂ ಅಸ್ವಸ್ಥತೆ ಕಾಣಿಸಿಕೊಳ್ಳಬಹುದು.
ಹೆಚ್ಚಿನ ಉಪ್ಪಿನ ಸೇವನೆ: ಆಹಾರದಲ್ಲಿ ಉಪ್ಪಿನ ಪ್ರಮಾಣ ಹೆಚ್ಚಾದರೆ ದೇಹದಲ್ಲಿ ನೀರು ಶೇಖರಣೆಯಾಗುವ ಸಾಧ್ಯತೆ ಇದೆ. ಇದರಿಂದ ದೇಹದಲ್ಲಿ, ವಿಶೇಷವಾಗಿ ಹೊಟ್ಟೆ ಭಾಗದಲ್ಲಿ ಉಬ್ಬರದ ಅನುಭವ ಉಂಟಾಗಬಹುದು.
ಮಹಿಳೆಯರಲ್ಲಿ ಮುಟ್ಟಿನ ಅವಧಿಯಲ್ಲಿ ಉಂಟಾಗುವ ಹಾರ್ಮೋನ್ ಬದಲಾವಣೆಗಳಿಂದಲೂ ದೇಹದಲ್ಲಿ ನೀರು ಶೇಖರಣೆಯಾಗಬಹುದು. ಪರಿಣಾಮವಾಗಿ ಹೊಟ್ಟೆ ಉಬ್ಬರಿಸುವ ಅನುಭವ ಕಾಣಿಸಿಕೊಳ್ಳಬಹುದು.
ಹೊಟ್ಟೆ ಉಬ್ಬರ ಕಡಿಮೆ ಮಾಡಲು ಏನು ಮಾಡಬೇಕು?
ಆಹಾರವನ್ನು ನಿಧಾನವಾಗಿ ಹಾಗೂ ಚೆನ್ನಾಗಿ ಅಗಿದು ಸೇವಿಸುವುದು ಮೊದಲ ಹೆಜ್ಜೆ. ಒಂದೇ ಬಾರಿಗೆ ಹೆಚ್ಚು ಆಹಾರ ಸೇವಿಸುವ ಬದಲು, ಅಗತ್ಯಕ್ಕೆ ತಕ್ಕ ಪ್ರಮಾಣದಲ್ಲಿ ನಿಯಮಿತವಾಗಿ ಆಹಾರ ಸೇವಿಸುವುದು ಉತ್ತಮ.
ಪ್ರತಿದಿನ ಸಾಕಷ್ಟು ನೀರು ಕುಡಿಯುವುದು ಜೀರ್ಣಕ್ರಿಯೆಗೆ ಸಹಕಾರಿಯಾಗಬಹುದು. ಜೊತೆಗೆ ಸೋಡಾ ಹಾಗೂ ಕಾರ್ಬೊನೇಟೆಡ್ ಪಾನೀಯಗಳ ಸೇವನೆಯನ್ನು ಕಡಿಮೆ ಮಾಡಬೇಕು. ಆಹಾರದಲ್ಲಿ ನಾರಿನಂಶವನ್ನು ಸಮತೋಲನದಿಂದ ಸೇರಿಸಿಕೊಳ್ಳುವುದು ಮತ್ತು ನಿಯಮಿತ ದೈಹಿಕ ಚಟುವಟಿಕೆ ಅಥವಾ ವ್ಯಾಯಾಮ ಮಾಡುವುದೂ ಸಹಕಾರಿ.
ಮಲಬದ್ಧತೆ ಇದ್ದರೆ ಅದನ್ನು ನಿರ್ಲಕ್ಷಿಸಬಾರದು. ನಿರ್ದಿಷ್ಟ ಆಹಾರ ಸೇವಿಸಿದ ನಂತರವೇ ಪದೇ ಪದೇ ಹೊಟ್ಟೆ ಉಬ್ಬರಿಸುತ್ತಿದ್ದರೆ, ಸ್ವತಃ ಆಹಾರಗಳನ್ನು ಸಂಪೂರ್ಣವಾಗಿ ನಿಲ್ಲಿಸುವ ಬದಲು ವೈದ್ಯರು ಅಥವಾ ಆಹಾರ ತಜ್ಞರ ಸಲಹೆ ಪಡೆಯುವುದು ಸೂಕ್ತ.
ಯಾವಾಗ ವೈದ್ಯರನ್ನು ಸಂಪರ್ಕಿಸಬೇಕು?
ಅಪರೂಪಕ್ಕೊಮ್ಮೆ ಉಂಟಾಗುವ ಸಣ್ಣ ಪ್ರಮಾಣದ ಹೊಟ್ಟೆ ಉಬ್ಬರ ಸಾಮಾನ್ಯವಾಗಿರಬಹುದು. ಆದರೆ ಸಮಸ್ಯೆ ನಿರಂತರವಾಗಿ ಕಾಡುತ್ತಿದ್ದರೆ ಅಥವಾ ದಿನನಿತ್ಯದ ಚಟುವಟಿಕೆಗಳಿಗೆ ತೊಂದರೆ ಉಂಟುಮಾಡುತ್ತಿದ್ದರೆ ವೈದ್ಯರನ್ನು ಸಂಪರ್ಕಿಸುವುದು ಒಳಿತು.
ತೀವ್ರ ಹೊಟ್ಟೆ ನೋವು, ಪದೇ ಪದೇ ವಾಂತಿ, ಮಲದಲ್ಲಿ ರಕ್ತ, ಕಾರಣವಿಲ್ಲದೆ ತೂಕ ಇಳಿಕೆಯಾಗುವುದು, ನಿರಂತರ ಮಲಬದ್ಧತೆ ಅಥವಾ ಭೇದಿ, ಹಸಿವಿನ ಕೊರತೆ ಹಾಗೂ ಆಹಾರ ನುಂಗಲು ಕಷ್ಟವಾಗುವುದು ಮುಂತಾದ ಲಕ್ಷಣಗಳು ಕಂಡುಬಂದರೆ ತಡ ಮಾಡದೆ ವೈದ್ಯಕೀಯ ತಪಾಸಣೆ ಮಾಡಿಸಿಕೊಳ್ಳಬೇಕು.
ಹೊಟ್ಟೆ ಉಬ್ಬರಕ್ಕೆ ಒಂದೇ ಕಾರಣ ಇರುವುದಿಲ್ಲ. ಹೀಗಾಗಿ ಪದೇ ಪದೇ ಈ ಸಮಸ್ಯೆ ಕಾಣಿಸಿಕೊಂಡರೆ ಕಾರಣವನ್ನು ಗುರುತಿಸಿ ಸೂಕ್ತ ಸಲಹೆ ಪಡೆಯುವುದು ಉತ್ತಮ.