ಇತ್ತೀಚಿನ ದಿನಗಳಲ್ಲಿ ಅನೇಕರು “ಯಾವಾಗಲೂ ನಿದ್ರೆ ಬರುತ್ತಿದೆ”, “ಹಗಲಲ್ಲೂ ಕಣ್ಣು ತೆರೆಯಲು ಆಗುತ್ತಿಲ್ಲ” ಎಂದು ದೂರುತ್ತಿದ್ದಾರೆ. ಕೆಲವರು ಇದನ್ನು ಸಾಮಾನ್ಯ ಆಯಾಸ ಎಂದು ನಿರ್ಲಕ್ಷಿಸಿದರೂ, ವೈದ್ಯಕೀಯ ತಜ್ಞರ ಪ್ರಕಾರ ಇದು ದೇಹದಲ್ಲಿ ಅಡಗಿರುವ ಕೆಲವು ಆರೋಗ್ಯ ಸಮಸ್ಯೆಗಳ ಪ್ರಮುಖ ಸೂಚನೆಯಾಗಿರಬಹುದು. ವಿಶೇಷವಾಗಿ ವಾರಗಳ ಕಾಲ ನಿರಂತರವಾಗಿ ನಿದ್ರೆಯ ಮಂಪರು ಕಾಡುತ್ತಿದ್ದರೆ ತಕ್ಷಣ ವೈದ್ಯಕೀಯ ಸಲಹೆ ಪಡೆಯುವುದು ಅಗತ್ಯ ಎಂದು ತಜ್ಞರು ಎಚ್ಚರಿಸುತ್ತಿದ್ದಾರೆ.
ಸಾಮಾನ್ಯ ಆಯಾಸ ಮತ್ತು ನಿದ್ರೆಯ ಮಂಪರಿನ ನಡುವಿನ ವ್ಯತ್ಯಾಸ
ಸಾಮಾನ್ಯವಾಗಿ ಕೆಲಸದ ಒತ್ತಡ, ಕಡಿಮೆ ವಿಶ್ರಾಂತಿ ಅಥವಾ ಹೆಚ್ಚು ಶ್ರಮದಿಂದ ಆಯಾಸ ಉಂಟಾಗಬಹುದು. ಆದರೆ ಸ್ವಲ್ಪ ವಿಶ್ರಾಂತಿ ಅಥವಾ ಒಂದು ರಾತ್ರಿ ಚೆನ್ನಾಗಿ ನಿದ್ರೆ ಮಾಡಿದರೆ ಅದು ಕಡಿಮೆಯಾಗುತ್ತದೆ. ಆದರೆ ನಿದ್ರೆಯ ಮಂಪರು ಹಾಗಲ್ಲ. ಎಷ್ಟು ಹೊತ್ತು ನಿದ್ರೆ ಮಾಡಿದರೂ ಮತ್ತೆ ನಿದ್ರೆ ಬರುತ್ತಿರುವ ಅನುಭವವಾಗುತ್ತದೆ. ಕೆಲಸ ಮಾಡುವಾಗ, ಓದುತ್ತಿರುವಾಗ, ಸಭೆಯಲ್ಲಿ ಕುಳಿತಿರುವಾಗ ಅಥವಾ ವಾಹನ ಚಾಲನೆ ಮಾಡುವಾಗಲೂ ಕಣ್ಣು ಜಾರುವುದು ಕಂಡುಬರುತ್ತದೆ. ಇದು ದೇಹದಲ್ಲಿ ಏನೋ ಅಸಮತೋಲನ ನಡೆಯುತ್ತಿರುವ ಸಂಕೇತವಾಗಿರಬಹುದು.
ಯಾವ ಕಾರಣಗಳಿಂದ ಅತಿಯಾಗಿ ನಿದ್ರೆ ಬರುತ್ತದೆ?
ವೈದ್ಯರ ಪ್ರಕಾರ ನಿದ್ರೆಯ ಮಂಪರಿಗೆ ಹಲವು ಕಾರಣಗಳಿರಬಹುದು. ಮುಖ್ಯವಾಗಿ ರಾತ್ರಿ ಸರಿಯಾದ ನಿದ್ರೆ ಸಿಗದಿರುವುದು ದೊಡ್ಡ ಕಾರಣ. ಕೆಲವರು ರಾತ್ರಿ ಹೊತ್ತು ಮೊಬೈಲ್, ಟಿವಿ ಅಥವಾ ಸಾಮಾಜಿಕ ಜಾಲತಾಣಗಳಲ್ಲಿ ಹೆಚ್ಚು ಸಮಯ ಕಳೆಯುತ್ತಾರೆ. ಇದರಿಂದ ದೇಹದ ನೈಸರ್ಗಿಕ ನಿದ್ರೆ ಹಾಳಾಗುತ್ತದೆ.
ಇದಕ್ಕೆ ಜೊತೆಗೆ ಥೈರಾಯ್ಡ್ ಸಮಸ್ಯೆಗಳು, ಮಧುಮೇಹ ಮತ್ತು ರಕ್ತಹೀನತೆ ಮುಂತಾದ ಕಾಯಿಲೆಗಳೂ ದೇಹದಲ್ಲಿ ಸುಸ್ತು ಹಾಗೂ ನಿದ್ರೆಯ ಮಂಪರನ್ನು ಹೆಚ್ಚಿಸಬಹುದು. ಖಿನ್ನತೆ ಹಾಗೂ ಒತ್ತಡದಂತಹ ಮಾನಸಿಕ ಆರೋಗ್ಯ ಸಮಸ್ಯೆಗಳು ಸಹ ದೇಹದ ಶಕ್ತಿಯನ್ನು ಕುಗ್ಗಿಸಿ ಯಾವಾಗಲೂ ನಿದ್ರೆ ಬರುವಂತೆ ಮಾಡುತ್ತವೆ.
ಕೆಲವು ಔಷಧಿಗಳ ಪಾರ್ಶ್ವ ಪರಿಣಾಮದಿಂದಲೂ ಈ ಸಮಸ್ಯೆ ಕಾಣಿಸಬಹುದು. ಅಲರ್ಜಿ, ಮಾನಸಿಕ ಒತ್ತಡ ಅಥವಾ ನೋವಿನ ಚಿಕಿತ್ಸೆಗೆ ಬಳಸುವ ಔಷಧಿಗಳು ನಿದ್ರೆಯನ್ನು ಹೆಚ್ಚಿಸಬಹುದು.
‘ಸ್ಲೀಪ್ ಅಪ್ನಿಯಾ’ ಅಪಾಯಕಾರಿ ಸಮಸ್ಯೆ
ಹೆಚ್ಚು ನಿದ್ರೆ ಬರಲು ಪ್ರಮುಖ ಕಾರಣಗಳಲ್ಲಿ ‘ಸ್ಲೀಪ್ ಅಪ್ನಿಯಾ’ ಕೂಡ ಒಂದು. ಈ ಸಮಸ್ಯೆಯಲ್ಲಿ ವ್ಯಕ್ತಿ ನಿದ್ರೆಯಲ್ಲಿರುವಾಗ ಉಸಿರಾಟ ಕೆಲ ಕ್ಷಣಗಳ ಕಾಲ ನಿಲ್ಲುತ್ತದೆ. ಇದರಿಂದ ಗಾಢ ನಿದ್ರೆ ವ್ಯತ್ಯಯಗೊಳ್ಳುತ್ತದೆ. ಪರಿಣಾಮವಾಗಿ ಬೆಳಗ್ಗೆ ಎದ್ದರೂ ದೇಹಕ್ಕೆ ವಿಶ್ರಾಂತಿ ಸಿಕ್ಕ ಅನುಭವವಾಗುವುದಿಲ್ಲ. ದಿನಪೂರ್ತಿ ಸುಸ್ತು ಮತ್ತು ನಿದ್ರೆಯ ಮಂಪರು ಕಾಡುತ್ತದೆ.
ಜೋರಾಗಿ ಗೊರಕೆ ಹೊಡೆಯುವುದು, ರಾತ್ರಿ ಅಚಾನಕ್ ಎಚ್ಚರವಾಗುವುದು, ಬೆಳಿಗ್ಗೆ ತಲೆನೋವು ಇವು ‘ಸ್ಲೀಪ್ ಅಪ್ನಿಯಾ’ ಲಕ್ಷಣಗಳಾಗಿರಬಹುದು.
ಈ ಲಕ್ಷಣಗಳನ್ನು ನಿರ್ಲಕ್ಷಿಸಬೇಡಿ
ನಿರಂತರವಾಗಿ ಹಗಲಿನಲ್ಲಿ ತೂಕಡಿಕೆ ಆಗುವುದು, ಏಕಾಗ್ರತೆ ಕಡಿಮೆಯಾಗುವುದು, ಕೆಲಸದಲ್ಲಿ ತಪ್ಪುಗಳಾಗುವುದು, ಓದಿನಲ್ಲಿ ಆಸಕ್ತಿ ಕಡಿಮೆಯಾಗುವುದು, ವಾಹನ ಚಾಲನೆ ವೇಳೆ ನಿದ್ರೆ ಬರುವುದು ಮುಂತಾದ ಸಮಸ್ಯೆಗಳು ಗಂಭೀರ ಎಚ್ಚರಿಕೆಯ ಸಂಕೇತಗಳಾಗಿವೆ.
ಕೆಲವರಿಗೆ ಇದ್ದಕ್ಕಿದ್ದಂತೆ ನಿದ್ರೆ ಬರುವ ಸಮಸ್ಯೆಯೂ ಕಾಣಿಸಬಹುದು. ಇದು ದೈನಂದಿನ ಜೀವನದ ಮೇಲೆ ಪರಿಣಾಮ ಬೀರಬಹುದು. ವಿದ್ಯಾರ್ಥಿಗಳು ಮತ್ತು ವಾಹನ ಚಾಲಕರಿಗೆ ಇದು ಅಪಾಯಕಾರಿಯಾಗಬಹುದು.
ಸಮಸ್ಯೆ ತಡೆಯಲು ಏನು ಮಾಡಬೇಕು?
ಪ್ರತಿದಿನ ಒಂದೇ ಸಮಯಕ್ಕೆ ಮಲಗುವ ಮತ್ತು ಏಳುವ ಅಭ್ಯಾಸ ಮಾಡಿಕೊಳ್ಳುವುದು ಅತ್ಯಂತ ಮುಖ್ಯ. ರಾತ್ರಿ ವೇಳೆ ಭಾರಿ ಆಹಾರ ಸೇವನೆ, ಹೆಚ್ಚು ಕಾಫಿ ಮತ್ತು ಟೀ ಕುಡಿಯುವುದನ್ನು ಕಡಿಮೆ ಮಾಡಬೇಕು. ಮಲಗುವ ಮೊದಲು ಕನಿಷ್ಠ ಒಂದು ಗಂಟೆ ಮೊಬೈಲ್ ಮತ್ತು ಟಿವಿ ಬಳಕೆಯನ್ನು ನಿಲ್ಲಿಸುವುದು ಉತ್ತಮ.
ನಿಯಮಿತ ವ್ಯಾಯಾಮ ಮತ್ತು ಆರೋಗ್ಯಕರ ಆಹಾರ ಪದ್ಧತಿ ಉತ್ತಮ ನಿದ್ರೆಗೆ ಸಹಕಾರಿ. ಜೊತೆಗೆ ಒತ್ತಡ ಕಡಿಮೆ ಮಾಡಲು ಧ್ಯಾನ ಅಥವಾ ಯೋಗಾಭ್ಯಾಸ ಸಹ ಉಪಯುಕ್ತ.
ಸಮಸ್ಯೆ ದೀರ್ಘಕಾಲ ಮುಂದುವರಿದರೆ ವೈದ್ಯರನ್ನು ಸಂಪರ್ಕಿಸುವುದು ಅಗತ್ಯ. ವೈದ್ಯರು ರಕ್ತ ಪರೀಕ್ಷೆ, ಥೈರಾಯ್ಡ್ ಹಾಗೂ ಸಕ್ಕರೆ ಮಟ್ಟ ಪರೀಕ್ಷೆ ಮಾಡುವ ಮೂಲಕ ಮೂಲ ಕಾರಣ ಪತ್ತೆಹಚ್ಚುತ್ತಾರೆ. ಅಗತ್ಯವಿದ್ದರೆ ‘ಸ್ಲೀಪ್ ಲ್ಯಾಬ್’ನಲ್ಲಿ ನಿದ್ರೆಯ ಪರೀಕ್ಷೆಯನ್ನೂ ಮಾಡಬಹುದು.