ಡನ್ (ರಾಯಿಟರ್ಸ್): ಅಮೆರಿಕದ ಮಾಜಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮತ್ತು ರಷ್ಯಾದ ಅಧ್ಯಕ್ಷ ವ್ಲಾದಿಮಿರ್ ಪುಟಿನ್ ಅವರ ನಡುವೆ ಆಗಸ್ಟ್ 15ರಂದು (ಶುಕ್ರವಾರ) ಅಲಾಸ್ಕಾದಲ್ಲಿ ನಡೆಯಲಿರುವ ಮಾತುಕತೆಯು ಜಾಗತಿಕ ಮಹತ್ವ ಪಡೆದಿದೆ.
ಈ ಸಭೆಯು ಉಕ್ರೇನ್ ಯುದ್ಧಕ್ಕೆ ಸಂಬಂಧಿಸಿದಂತೆ ಕದನ ವಿರಾಮ ಅಥವಾ ಶಾಂತಿ ಒಪ್ಪಂದಕ್ಕೆ ದಾರಿ ಮಾಡಿಕೊಡಬಹುದು ಎಂಬ ನಿರೀಕ್ಷೆಯಿದೆ. ಈ ಸಭೆಯು ಉಕ್ರೇನ್ ಯುದ್ಧ, ಕಚ್ಚಾ ತೈಲ ಬೆಲೆ, ಹೆಚ್ಚುವರಿ ಸುಂಕಗಳು ಮತ್ತು ಭಾರತ-ಚೀನಾ ಸೇರಿದಂತೆ ಇತರ ದೇಶಗಳ ಆರ್ಥಿಕ ಹಿತಾಸಕ್ತಿಗಳನ್ನು ಪ್ರಭಾವಿಸಬಹುದು.
ರಷ್ಯಾ–ಉಕ್ರೇನ್ ಯುದ್ಧವನ್ನು ಕೊನೆಗಾಣಿಸುವುದು ಅಥವಾ ಕನಿಷ್ಠ ಕದನ ವಿರಾಮ ಘೋಷಿಸುವುದು ಈ ಮಾತುಕತೆಯ ಪ್ರಮುಖ ಅಜೆಂಡಾವಾಗಿರಬಹುದು ಎಂದು ಮೂಲಗಳಿಂದ ತಿಳಿದುಬಂದಿದೆ. ಒಂದು ವೇಳೆ ಕದನ ವಿರಾಮದ ಘೋಷಣೆ ಹೊರಬಂದರೆ, ಜಾಗತಿಕ ಮಾರುಕಟ್ಟೆಗಳಲ್ಲಿ ತೈಲದ ಬೆಲೆ ಇಳಿಯುವ ನಿರೀಕ್ಷೆ ಇದೆ. ಈಗಾಗಲೇ ಈ ಬೆಳವಣಿಗೆ ಹಿನ್ನೆಲೆಯಲ್ಲಿ ಕಚ್ಚಾ ತೈಲದ ಬೆಲೆ ಬ್ಯಾರೆಲ್ಗೆ 2 ಸೆಂಟ್ಗಳಷ್ಟು ಇಳಿಕೆಯಾಗಿದೆ.
ಭಾರತವು ರಷ್ಯಾದಿಂದ ತೈಲವನ್ನು ಖರೀದಿಸುತ್ತಿರುವ ಹಿನ್ನೆಲೆಯಲ್ಲಿ, ಅಮೆರಿಕ ಈಗಾಗಲೇ ಶೇ.25ರಷ್ಟು ಹೆಚ್ಚುವರಿ ಸುಂಕ ವಿಧಿಸಿದೆ. ಇದು ನೇರವಾಗಿ ಭಾರತದ ಆರ್ಥಿಕತೆಗೆ ಹೊರೆ ತಂದಿದೆ. ಇದೇ ರೀತಿಯಲ್ಲಿ ಚೀನಾಗೂ ಹೆಚ್ಚುವರಿ ಸುಂಕ ವಿಧಿಸುವ ಬಗ್ಗೆ ಅಮೆರಿಕ ಚರ್ಚೆ ನಡೆಸುತ್ತಿದೆ. ಆದರೆ ಕದನ ವಿರಾಮ ಅಥವಾ ಶಾಂತಿ ಒಪ್ಪಂದ ಏರ್ಪಟ್ಟರೆ, ಭಾರತ ಮತ್ತು ಚೀನಾ ಎರಡೂ ನಿರಾಳವಾಗುವ ಸಾಧ್ಯತೆ ಇದೆ. ‘ಕಾಮರ್ಸ್ ಬ್ಯಾಂಕ್’ ವರದಿ ಪ್ರಕಾರ, ಶಾಂತಿ ಒಪ್ಪಂದದ ನಂತರ ಭಾರತಕ್ಕೆ ಹೆಚ್ಚುವರಿ ಸುಂಕದಿಂದ ವಿನಾಯಿತಿ ದೊರೆಯಬಹುದು.
ರಷ್ಯಾದಿಂದ ತೈಲ ಖರೀದಿಸುತ್ತಿರುವ ಚೀನಾ ವಿರುದ್ಧ ಹೆಚ್ಚುವರಿ ಸುಂಕ ವಿಧಿಸುವ ನಿರ್ಧಾರವನ್ನು ಅಮೆರಿಕ ತಾತ್ಕಾಲಿಕವಾಗಿ ನಿಲ್ಲಿಸಿದೆ. ಈ ವಿರಾಮ ನವೆಂಬರ್ 10ರವರೆಗೆ ಜಾರಿಯಲ್ಲಿರಲಿದೆ. ಈ ಅವಧಿಯಲ್ಲಿ ಶಾಂತಿ ಮಾತುಕತೆಗಳಿಂದ ಫಲಿತಾಂಶ ಬಂದ್ರೆ, ಚೀನಾದ ಮೇಲಿನ ಒತ್ತಡವೂ ಕಡಿಮೆಯಾಗಬಹುದು.
ಟ್ರಂಪ್–ಪುಟಿನ್ ಸಭೆಗೆ ಮುನ್ನ, ಯೂರೋಪಿಯನ್ ಒಕ್ಕೂಟದ ನಾಯಕರು ಟ್ರಂಪ್ ಅವರಿಗೆ ಉಕ್ರೇನ್ ಮತ್ತು ಯೂರೋಪ್ನ ಭದ್ರತಾ ಹಿತಾಸಕ್ತಿಯನ್ನು ಸಮರ್ಥಿಸುವಂತೆ ಮನವಿ ಮಾಡಿದ್ದಾರೆ. ಉಕ್ರೇನ್ ಸಭೆಯಲ್ಲಿ ಭಾಗವಹಿಸುವುದೇ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ.
ಕದನ ವಿರಾಮ ಸಾಧಿಸಲು, ರಷ್ಯಾ ಹಿಡಿತದಲ್ಲಿರುವ ಕೆಲವು ಪ್ರದೇಶಗಳನ್ನು ಉಕ್ರೇನ್ ಬಿಟ್ಟು ಕೊಡಬೇಕೆಂದು ಟ್ರಂಪ್ ಅಭಿಪ್ರಾಯಪಟ್ಟಿದ್ದಾರೆ. ಈ ಹೇಳಿಕೆ ಅಮೆರಿಕದ ಕೆಲವು ಮಿತ್ರ ರಾಷ್ಟ್ರಗಳಿಗೆ ಅಸಮಾಧಾನ ತಂದಿದೆ. ಪುಟಿನ್ ಅವರ ನಿಲುವು ಇನ್ನೂ ಸ್ಪಷ್ಟವಾಗದ ಕಾರಣ, ಸಭೆಯ ಫಲಿತಾಂಶದ ಬಗ್ಗೆ ಊಹಾಪೋಹಗಳು ಜೋರಾಗಿವೆ.
ಈ ಮಾತುಕತೆಯ ಫಲಿತಾಂಶ ನೇರವಾಗಿ ಜಾಗತಿಕ ಮಾರುಕಟ್ಟೆ, ತೈಲ ಬೆಲೆ, ವಾಣಿಜ್ಯ ಒಪ್ಪಂದಗಳು ಹಾಗೂ ಸುಂಕ ನೀತಿಗಳ ಮೇಲೆ ಪರಿಣಾಮ ಬೀರುವ ಸಾಧ್ಯತೆ ಇದೆ. ಸಭೆ ಯಶಸ್ವಿಯಾದರೆ, ತೈಲ ಬೆಲೆ ಇಳಿಕೆಯಾಗುವ ಜೊತೆಗೆ ವಾಣಿಜ್ಯ ನಿರ್ಬಂಧಗಳು ಸಡಿಲಗೊಳ್ಳಬಹುದು.