ಶ್ರೀಲಂಕಾ, ಡಿಸೆಂಬರ್ 02: ‘ದಿತ್ವಾ’ ಚಂಡಮಾರುತದ ಅಪಾರ ವಿನಾಶಕಾಂಡವನ್ನು ಎದುರಿಸುತ್ತಿರುವ ಶ್ರೀಲಂಕಾದಲ್ಲಿ, ಭೂಕುಸಿತ ಮತ್ತು ಅತಿವೃಷ್ಟಿ ಪ್ರವಾಹಗಳಿಂದಾಗಿ 410ಜನರು ಮೃತಪಟ್ಟಿದ್ದಾರೆ. ಇನ್ನೂ 336 ಜನರು ಕಾಣೆಯಾಗಿದ್ದು, ಅವರನ್ನು ಹುಡುಕುವ ಮಹತ್ವದ ರಕ್ಷಣಾ ಕಾರ್ಯಾಚರಣೆ ಸಾಗಿದೆ.
ಶ್ರೀಲಂಕಾದ ವಿಪತ್ತು ನಿರ್ವಹಣಾ ಕೇಂದ್ರದ ನವೀನ ಮಾಹಿತಿಯ ಪ್ರಕಾರ, ರಾಷ್ಟ್ರವ್ಯಾಪಿ ಪ್ರವಾಹಗಳು ಸುಮಾರು 4.07 ಲಕ್ಷ ಕುಟುಂಬಗಳಿಗೆ ಹಾನಿ ಮಾಡಿದ್ದು, 14.66 ಲಕ್ಷಕ್ಕೂ ಹೆಚ್ಚು ನಾಗರಿಕರು ನೇರವಾಗಿ ಸಮಸ್ಯೆಗೀಡಾಗಿದ್ದಾರೆ. ಇದು ದಶಕದ ಅತ್ಯಂತ ಭಾಯಾನಕ ಪ್ರಕೃತಿ ವಿಕೋಪಗಳಲ್ಲಿ ಒಂದಾಗಿದೆ.
ಚಂಡಮಾರುತ ಮತ್ತು ಅದರ ನಂತರದ ಪ್ರವಾಹಗಳು ರಾಷ್ಟ್ರದ ಮೂಲಸೌಕರ್ಯಕ್ಕೆ ಅಪಾರ ಹಾನಿಯನ್ನು ಉಂಟುಮಾಡಿವೆ. ಅಧಿಕಾರಿಗಳ ಪ್ರಕಾರ:
-
15 ಪ್ರಮುಖ ಸೇತುವೆಗಳು ಸಂಪೂರ್ಣವಾಗಿ ನಾಶವಾಗಿವೆ ಅಥವಾ ಗಂಭೀರವಾಗಿ ಹಾನಿಗೊಂಡಿವೆ.
-
256ಕ್ಕೂ ಹೆಚ್ಚು ಪ್ರಮುಖ ಮತ್ತು ಸ್ಥಳೀಯ ರಸ್ತೆಗಳು ಕತ್ತರಿಸಿಹೋಗಿವೆ ಅಥವಾ ಮಣ್ಣಿನಡಿ ಹೂತುಹೋಗಿವೆ.
-
ಹಲವಾರು ಜಿಲ್ಲೆಗಳು ರಸ್ತೆ ಮತ್ತು ಸಂಪರ್ಕ ಕಡಿತಗೊಂಡು ವಿಭಿನ್ನವಾಗಿವೆ, ಪಾರುಮಾಡುವ ಮತ್ತು ಪುನರ್ವಸತಿ ಕಾರ್ಯಗಳನ್ನು ಸಂಕೀರ್ಣಗೊಳಿಸಿವೆ.
ಈ ದುರಂತದ ಮಧ್ಯದಲ್ಲಿ, ಶ್ರೀಲಂಕಾದ ಸೇನಾ ಪಡೆ ಮತ್ತು ಪೊಲೀಸ್ ಇಲಾಖೆಯ ನೂರಾರು ಸಿಬ್ಬಂದಿ ವಿಪತ್ತು ಪಾರುಗಾಣಿಕೆ ಕಾರ್ಯಾಚರಣೆಯಲ್ಲಿ ತಮ್ಮ ಜೀವನವನ್ನು ಪಣಕ್ಕಿಟ್ಟು ಕೆಲಸ ಮಾಡುತ್ತಿದ್ದಾರೆ. ವಿಶೇಷ ತಂಡಗಳು ಮಣ್ಣು ಮತ್ತು ಕಸದಡಿ ಸಿಲುಕಿರುವ ಜನರನ್ನು ಹುಡುಕುತ್ತಿವೆ. ರಸ್ತೆಗಳನ್ನು ಮರುಸ್ಥಾಪಿಸುವ, ವಿದ್ಯುತ್ ಸರಬರಾಜು ಪುನರಾರಂಭಿಸುವ ಮತ್ತು ಸಂವಹನ ಜಾಲಗಳನ್ನು ಸರಿಪಡಿಸುವ ಕಾರ್ಯ ‘ಸಮರೋಪಾದಿಯಲ್ಲಿ’ ಸಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಈ ತುರ್ತು ಪರಿಸ್ಥಿತಿಯಲ್ಲಿ, ಭಾರತವು ಪ್ರಮುಖ ಪಾತ್ರ ವಹಿಸಿದೆ. ಶ್ರೀಲಂಕಾದ ಅಧ್ಯಕ್ಷ ಅನುರಾ ಕುಮಾರ ದಿಸ್ಸನಾಯಕೆ ಅವರ ಕಚೇರಿಯು, ದಿತ್ವಾ ಚಂಡಮಾರುತದಿಂದ ಉಂಟಾದ ತುರ್ತು ಪರಿಸ್ಥಿತಿಯನ್ನು ಸಮರ್ಪಕವಾಗಿ ನಿಭಾಯಿಸುವಲ್ಲಿ ಭಾರತ ಪ್ರಮುಖ ಪಾತ್ರ ವಹಿಸಿದೆ ಎಂದು ಮಂಗಳವಾರ ಘೋಷಿಸಿತು.
ಭಾರತದ ಪ್ರಧಾನಿ ನರೇಂದ್ರ ಮೋದಿಯವರು ಅಧ್ಯಕ್ಷ ದಿಸ್ಸನಾಯಕೆ ಅವರೊಂದಿಗೆ ಮಾತನಾಡಿ ಸಂತಾಪ ವ್ಯಕ್ತಪಡಿಸಿದ್ದಾರೆ. ಈ ಕಷ್ಟದ ಸಮಯದಲ್ಲಿ ಭಾರತವು ಶ್ರೀಲಂಕಾ ಮತ್ತು ಅದರ ಜನರೊಂದಿಗೆ ದೃಢವಾಗಿ ನಿಲ್ಲುತ್ತದೆ ಎಂದು ಪುನರುಚ್ಚರಿಸಿದ್ದಾರೆ. ಈ ಬೆಂಬಲದ ಅಂಗವಾಗಿ, ಭಾರತವು ‘ಸಾಗರ ಬಂಧು’ ಕಾರ್ಯಾಚರಣೆಯಡಿ ತನ್ನ ರಾಷ್ಟ್ರೀಯ ವಿಪತ್ತು ಪ್ರತಿಕ್ರಿಯಾ ಬಲ (ಎನ್ಡಿಆರ್ಎಫ್) ನ 80 ಮಂದಿ ತರಬೇತಿ ಪಡೆದ ಸಿಬ್ಬಂದಿಯನ್ನು ಶ್ರೀಲಂಕೆಗೆ ಕಳುಹಿಸಿದೆ.