ಪೇಶಾವರ: ಪಾಕಿಸ್ತಾನದ ಖೈಬರ್ ಪಖ್ತೂನ್ಖ್ವಾ ಪ್ರಾಂತ್ಯದ ರಾಜಧಾನಿ ಪೇಶಾವರದಲ್ಲಿ ಇಂದು ಬೆಳಗ್ಗೆ ಭೀಕರ ಉಗ್ರರ ದಾಳಿ ನಡೆದಿದೆ. ಫ್ರಾಂಟಿಯರ್ ಕಾನ್ಸ್ಟಾಬ್ಯುಲರಿ (ಎಫ್ಸಿ)ಯ ಪ್ರಧಾನ ಕಚೇರಿ ಮತ್ತು ರಕ್ಷಣಾ ಸಂಕೀರ್ಣದ ಮೇಲೆ ಆತ್ಮಾಹುತಿ ಬಾಂಬರ್ಗಳು ಹಾಗೂ ಬಂದೂಕುಧಾರಿಗಳು ಏಕಕಾಲದಲ್ಲಿ ದಾಳಿ ನಡೆಸಿದ್ದು, ಒಟ್ಟು ಆರು ಮಂದಿ ಮೃತಪಟ್ಟಿದ್ದಾರೆ. ಮೃತರಲ್ಲಿ ಮೂವರು ಉಗ್ರರು ಮತ್ತು ಮೂವರು ಎಫ್ಸಿ ಭದ್ರತಾ ಸಿಬ್ಬಂದಿ ಸೇರಿದ್ದಾರೆ. ಈ ದಾಳಿಯ ಹೊಣೆಯನ್ನು ತೆಹ್ರೀಕ್-ಇ-ತಾಲಿಬಾನ್ ಪಾಕಿಸ್ತಾನ್ (ಟಿಟಿಪಿ)ಯ ಕಟ್ಟಾ ಬಣ ಜಮಾತುಲ್ ಅಹ್ರಾರ್ ಹೊತ್ತುಕೊಂಡಿದೆ.
ವರದಿ ಪ್ರಕಾರ, ಆತ್ಮಹತ್ಯಾ ಬಾಂಬರ್ಗಳಿಬ್ಬರು ರಕ್ಷಣಾ ಸಂಕೀರ್ಣದ ವಿಭಿನ್ನ ಭಾಗಗಳ ಮೇಲೆ ದಾಳಿ ನಡೆಸಿದ್ದಾರೆ. ಮೊದಲ ಆತ್ಮಾಹುತಿ ಬಾಂಬರ್ ಪ್ರಧಾನ ಗೇಟ್ ಬಳಿ ನಿಂತಿದ್ದ ಎಫ್ಸಿ ಭದ್ರತಾ ಸಿಬ್ಬಂದಿಯ ಮೇಲೆ ಬಾಂಬ್ ಸಿಡಿಸಿದ್ದರೆ, ಇನ್ನೊಬ್ಬ ದಾಳಿಕೋರ ಕಚೇರಿಯ ಒಳಾಂಗಣ ಮೈದಾನದವರೆಗೆ ನುಗ್ಗಿದ್ದಾನೆ ಎಂದು ಭದ್ರತಾ ಮೂಲಗಳು ತಿಳಿಸಿವೆ.
ಘಟನೆ ನಡೆದ ತಕ್ಷಣ ಸೇನಾ ಪಡೆ ಮತ್ತು ಪೊಲೀಸರು ಸಂಪೂರ್ಣ ಪ್ರದೇಶವನ್ನು ಸುತ್ತುವರೆದು ಭದ್ರತೆ ಬಿಗಿಗೊಳಿಸಿದರು. “ಪ್ರಧಾನ ಕಚೇರಿಯೊಳಗೆ ಇನ್ನೂ ಕೆಲ ಭಯೋತ್ಪಾದಕರು ಅಡಗಿಕೊಂಡಿರುವ ಸಾಧ್ಯತೆ ಇರುವುದರಿಂದ ಶೋಧ ಕಾರ್ಯ ಎಚ್ಚರಿಕೆಯಿಂದ ನಡೆಯುತ್ತಿದೆ,” ಎಂದು ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಇದರಿಂದ ಸಂಚಲನ ಸೃಷ್ಠಿಯಾಗಿ, ಸುತ್ತಮುತ್ತಿನ ರಸ್ತೆಗಳನ್ನೆಲ್ಲ ತಕ್ಷಣವೇ ಬಂದ್ ಮಾಡಲಾಯಿತು.
ಸೋಷಿಯಲ್ ಮೀಡಿಯಾದಲ್ಲಿ ಹರಿದಾಡುತ್ತಿರುವ ದೃಶ್ಯಗಳಲ್ಲಿ ಭದ್ರತಾ ಸಿಬ್ಬಂದಿ ಮತ್ತು ದಾಳಿಕೋರರ ನಡುವೆ ನಡೆದ ಗುಂಡಿನ ದಾಳಿಯ ತೀವ್ರತೆ ಸ್ಪಷ್ಟವಾಗಿ ಕಾಣಿಸಿದೆ. ಸ್ಥಳೀಯ ಮಾಧ್ಯಮಗಳು ನೀಡಿರುವ ಮಾಹಿತಿ ಪ್ರಕಾರ, ಮೃತಪಟ್ಟ ಎಫ್ಸಿ ಅಧಿಕಾರಿಗಳು ದಾಳಿ ನಡೆದ ಕ್ಷಣದಲ್ಲಿ ಗೇಟ್ ಬಳಿ ಕರ್ತವ್ಯ ನಿರ್ವಹಿಸುತ್ತಿದ್ದರು. ಪೇಶಾವರದ ಪೊಲೀಸ್ ಮುಖ್ಯಸ್ಥ ಸಯೀದ್ ಅಹ್ಮದ್ ಅವರ ಪ್ರಕಾರ, “ದಾಳಿ ಸಂಭವಿಸಿದ ಸಮಯದಲ್ಲಿ ಬೆಳಗಿನ ಪರೇಡ್ ಅಭ್ಯಾಸ ನಡೆಯುತ್ತಿತ್ತು. ಮೈದಾನದಲ್ಲಿ ಹೆಚ್ಚಿನ ಸಂಖ್ಯೆಯ ಭದ್ರತಾ ಸಿಬ್ಬಂದಿ ಹಾಜರಿದ್ದರು. ದೊಡ್ಡ ದುರಂತವಾಗಬಹುದಾದ ಪರಿಸ್ಥಿತಿಯನ್ನು ನಮ್ಮ ಪಡೆಗಳು ತಡೆದಿವೆ,” ಎಂದು ತಿಳಿಸಿದ್ದಾರೆ.
“ಈ ದಾಳಿಯಲ್ಲಿ ಭಾಗವಹಿಸಿದ್ದ ಉಗ್ರರು ಕಾಲ್ನಡಿಗೆಯಲ್ಲಿಯೇ ಆಗಮಿಸಿದ್ದರು. ಶೀಘ್ರ ಕಾರ್ಯಾಚರಣೆಯಿಂದ ನಾವು ಹೆಚ್ಚಿನ ಪ್ರಾಣಾಪಾಯವನ್ನು ತಪ್ಪಿಸಿದೆವು,” ಎಂದು ಅವರು ಹೇಳಿದರು. ದಾಳಿಯಲ್ಲಿ ಕನಿಷ್ಠ ಆರು ನಾಗರಿಕರು ಗಾಯಗೊಂಡಿದ್ದು, ಅವರನ್ನು ಪೇಶಾವರದ ಲೇಡಿ ರೀಡಿಂಗ್ ಆಸ್ಪತ್ರೆಗೆ ದಾಖಲಿಸಲಾಗಿದೆ.
ಈ ದಾಳಿಯ ಹೊಣೆಗಾರಿಕೆಯನ್ನು ಪಾಕಿಸ್ತಾನದ ಭಯೋತ್ಪಾದಕ ಸಂಘಟನೆ ತೆಹ್ರೀಕ್-ಇ-ತಾಲಿಬಾನ್ ಪಾಕಿಸ್ತಾನ್ (ಟಿಟಿಪಿ)ನ ಜಮಾತುಲ್ ಅಹ್ರಾರ್ ಉಪ ಘಟಕ ಹೊತ್ತುಕೊಂಡಿದೆ.