ಇಸ್ಲಾಮಾಬಾದ್ (ಜುಲೈ 8): ಯುನೈಟೆಡ್ ಅರಬ್ ಎಮಿರೇಟ್ಸ್ನಿಂದ ಪಾಕಿಸ್ತಾನಕ್ಕೆ ತೆರಳುತ್ತಿದ್ದ ಸರಕು ವಿಮಾನವೊಂದು ನಿನ್ನೆ (ಮಂಗಳವಾರ) ಅರಬ್ಬಿ ಸಮುದ್ರದ ಮೇಲೆ ರಾಡಾರ್ನಿಂದ ಕಣ್ಮರೆಯಾಗಿದೆ ಎಂದು ವರದಿಯೊಂದು ತಿಳಿಸಿದೆ.
ಪಾಕಿಸ್ತಾನದ ಕರಾಚಿ ಸಮುದ್ರ ತೀರದ ಬಳಿ ‘ಕೆ2 ಏರ್ವೇಸ್’ (K2 Airways)ಗೆ ಸೇರಿದ ಬೋಯಿಂಗ್ 737-400 ಕಾರ್ಗೋ ವಿಮಾನ ಕಾಣೆಯಾಗಿರುವ ಘಟನೆ ಆತಂಕ ಮೂಡಿಸಿದೆ. ಯುಎಇಯ ಶಾರ್ಜಾದಿಂದ ಕರಾಚಿಗೆ ಬರುತ್ತಿದ್ದ ಈ ವಿಮಾನದಲ್ಲಿ ಐವರು ಸಿಬ್ಬಂದಿ ಇದ್ದರು. ಮಂಗಳವಾರ ರಾತ್ರಿ ಸ್ಥಳೀಯ ಕಾಲಮಾನ ಪ್ರಕಾರ 9.18ರ ಸುಮಾರಿಗೆ ವಿಮಾನವು ನ್ಯಾವಿಗೇಷನ್ ವ್ಯವಸ್ಥೆಯಲ್ಲಿ ತೊಂದರೆ ಇದೆ ಎಂದು ಏರ್ ಟ್ರಾಫಿಕ್ ಕಂಟ್ರೋಲರ್ಗಳಿಗೆ ಮಾಹಿತಿ ನೀಡಿದ ಕೆಲವೇ ನಿಮಿಷಗಳಲ್ಲಿ ರಡಾರ್ ಸಂಪರ್ಕ ಕಳೆದುಕೊಂಡಿದೆ ಎಂದು ಪಾಕಿಸ್ತಾನ ವಿಮಾನ ನಿಲ್ದಾಣ ಪ್ರಾಧಿಕಾರ ತಿಳಿಸಿದೆ.
ಅಧಿಕೃತ ಮಾಹಿತಿಯ ಪ್ರಕಾರ, ರಾತ್ರಿ 9.21ರ ಸುಮಾರಿಗೆ ವಿಮಾನವು ವೇಗವಾಗಿ ತನ್ನ ದಿಕ್ಕನ್ನು ಕಳೆದುಕೊಳ್ಳುತ್ತಿರುವುದು ರಡಾರ್ನಲ್ಲಿ ದಾಖಲಾಗಿದ್ದು, ತಕ್ಷಣವೇ ಅದರ ದಿಕ್ಕಿನಲ್ಲಿ ತೀವ್ರ ಬದಲಾವಣೆ ಕಂಡುಬಂದಿದೆ. ಬಳಿಕ ಕರಾಚಿಯಿಂದ ಸುಮಾರು 155 ನಾಟಿಕಲ್ ಮೈಲು (287 ಕಿಮೀ) ದೂರದ ಅರೇಬಿಯನ್ ಸಮುದ್ರ ಪ್ರದೇಶದಲ್ಲಿ ವಿಮಾನದೊಂದಿಗೆ ರೇಡಿಯೋ ಹಾಗೂ ರಡಾರ್ ಸಂಪರ್ಕ ಸಂಪೂರ್ಣವಾಗಿ ಕಡಿದುಹೋಯಿತು.
ಘಟನೆ ಬಳಿಕ ಪಾಕಿಸ್ತಾನ ಅಧಿಕಾರಿಗಳು ರೆಸ್ಕ್ಯೂ ಕೋ-ಆರ್ಡಿನೇಷನ್ ಸೆಂಟರ್ ಅನ್ನು ಸಕ್ರಿಯಗೊಳಿಸಿ ಶೋಧ ಮತ್ತು ರಕ್ಷಣಾ ಕಾರ್ಯಾಚರಣೆಯನ್ನು ಆರಂಭಿಸಿದರು. ಪಾಕಿಸ್ತಾನ ನೌಕಾಪಡೆಯ PNS Zulfiqar ಫ್ರಿಗೇಟ್ನ್ನು ತಕ್ಷಣವೇ ಘಟನಾ ಪ್ರದೇಶಕ್ಕೆ ತಿರುಗಿಸಲಾಗಿದೆ. ಜೊತೆಗೆ ಪಾಕಿಸ್ತಾನ ವಾಯುಪಡೆಯ ವಿಮಾನಗಳು, ನೌಕಾಪಡೆಯ ATR ವಿಮಾನ ಹಾಗೂ ಪಾಕಿಸ್ತಾನ ನ್ಯಾಷನಲ್ ಶಿಪ್ಪಿಂಗ್ ಕಾರ್ಪೊರೇಷನ್ನ ವ್ಯಾಪಾರ ಹಡಗುಗಳನ್ನೂ ಕಾರ್ಯಾಚರಣೆಗೆ ನಿಯೋಜಿಸಲಾಗಿದೆ.
ಈ ಕಾರ್ಗೋ ವಿಮಾನವು K2 Airways ಸಂಸ್ಥೆಗೆ ಸೇರಿದ್ದು, ಇದು ಕರಾಚಿ ಕೇಂದ್ರವಾಗಿಸಿಕೊಂಡ ಖಾಸಗಿ ಕಾರ್ಗೋ ಏರ್ಲೈನ್ ಆಗಿದೆ. 2018ರಲ್ಲಿ ಸ್ಥಾಪನೆಯಾದ ಈ ಸಂಸ್ಥೆಯ ವಿಮಾನವು ಶಾರ್ಜಾದಿಂದ ಕರಾಚಿಗೆ ಸರಕು ಸಾಗಣೆಗಾಗಿ ತೆರಳುತ್ತಿತ್ತು. ವಿಮಾನ ಕಾಣೆಯಾಗಲು ನಿಖರ ಕಾರಣ ಏನು ಎಂಬುದು ಇನ್ನೂ ತಿಳಿದುಬಂದಿಲ್ಲ. ವಿಮಾನಯಾನ ತಜ್ಞ ಇಮ್ರಾನ್ ಅಸ್ಲಂ ಅವರ ಪ್ರಕಾರ, ಸಾಮಾನ್ಯವಾಗಿ ಎಂಜಿನ್ ವೈಫಲ್ಯ ಉಂಟಾದರೂ ವಿಮಾನ ಹಠಾತ್ ಕುಸಿಯುವುದಕ್ಕಿಂತ ಗ್ಲೈಡ್ ಆಗುವ ಸಾಧ್ಯತೆ ಹೆಚ್ಚು. ಹೀಗಾಗಿ ಈ ಘಟನೆ ಹೇಗೆ ಇಷ್ಟು ಆಕಸ್ಮಿಕವಾಗಿ ಸಂಭವಿಸಿತು ಎಂಬುದು ತನಿಖೆಯ ಪ್ರಮುಖ ಪ್ರಶ್ನೆಯಾಗಿದೆ.
2020ರಲ್ಲಿ ಕರಾಚಿಯಲ್ಲೇ ಪಾಕಿಸ್ತಾನ ಇಂಟರ್ನ್ಯಾಷನಲ್ ಏರ್ಲೈನ್ಸ್ನ ಪ್ರಯಾಣಿಕರ ವಿಮಾನ ದುರಂತ ನಡೆದಿದ್ದನ್ನು ಈ ಘಟನೆ ಮತ್ತೆ ನೆನಪಿಸಿದೆ. ಪ್ರಸ್ತುತ K2 Airways ವಿಮಾನಕ್ಕಾಗಿ ಸಮುದ್ರದಲ್ಲಿ ಶೋಧ ಕಾರ್ಯಾಚರಣೆ ಮುಂದುವರಿದಿದ್ದು, ಐವರು ಸಿಬ್ಬಂದಿಯ ಸುರಕ್ಷತೆ ಬಗ್ಗೆ ಆತಂಕ ಹೆಚ್ಚಾಗಿದೆ.
