ನೇಪಿಡಾವ್: ಮ್ಯಾನ್ಮಾರ್‌ನಲ್ಲಿ ಥಡಿಂಗ್ಯುಟ್ ಹುಣ್ಣಿಮೆ ಉತ್ಸವದ ಸಂದರ್ಭದಲ್ಲಿ ಪ್ಯಾರಾಗ್ಲೆಡರ್‌ಗಳ ಮೂಲಕ ನಡೆಸಲಾದ ಭೀಕರ ಬಾಂಬ್ ದಾಳಿಯಲ್ಲಿ ಕನಿಷ್ಠ 40 ಜನರು ಮೃತಪಟ್ಟಿದ್ದಾರೆ ಮತ್ತು 80ಕ್ಕೂ ಹೆಚ್ಚು ಮಂದಿ ಗಾಯಗೊಂಡಿದ್ದಾರೆ.
ದಾಳಿಯ ಕೆಲವು ನಿಮಿಷಗಳ ಮೊದಲು, ಸಂಘಟಕರು ಪ್ಯಾರಾಮೋಟಾರ್‌ಗಳು (ಮೋಟಾರ್ ಚಾಲಿತ ಪ್ಯಾರಾಗ್ಲೆಡರ್‌ಗಳು) ಕಾಣಿಸಿಕೊಂಡಾಗ ಇವೆಂಟ್‌ ಅನ್ನು ಕೊನೆಗೊಳಿಸಲು ಪ್ರಯತ್ನಿಸಿದರು. ಆದರೆ, ವರದಿಗಳ ಪ್ರಕಾರ ಒಂದು ಪ್ಯಾರಾಗ್ಲೆಡರ್ ಜನಸಮೂಹದ ಮೇಲೆ ಹಾರಿ ಎರಡು ಬಾಂಬ್‌ಗಳನ್ನು ಬೀಳಿಸಿತು. ದಾಳಿಯ ಮುನ್ನ ಎಚ್ಚರಿಕೆ ನೀಡಲಾಗಿದ್ದು, ಗುಂಪಿನಲ್ಲಿ ಮೂರನೇ ಒಂದು ಭಾಗದಷ್ಟು ಜನರು ತಪ್ಪಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿದ್ದರು. ಇಲ್ಲದಿದ್ದರೆ ಸಾವಿನ ಸಂಖ್ಯೆ ಇನ್ನೂ ಹೆಚ್ಚಾಗುತ್ತಿತ್ತು.
ಘಟನೆಯ ನಂತರದ ದೃಶ್ಯಗಳನ್ನು ಭಯಾನಕವಾಗಿ ವರ್ಣಿಸಲಾಗಿದೆ. ಸ್ಥಳದಲ್ಲಿ ಶವಗಳು ಚೆಲ್ಲಾಪಿಲ್ಲಿಯಾಗಿ ಬಿದ್ದಿದ್ದು, ಅನೇಕರು ಗುರುತಿಸಲು ಸಾಧ್ಯವಾಗದಷ್ಟು ಛಿದ್ರಗೊಂಡ ಸ್ಥಿತಿಯಲ್ಲಿ ಸಿಕ್ಕಿದ್ದಾರೆ.
ಈ ದಾಳಿಯನ್ನು ಆಮ್ನಸ್ಟಿ ಇಂಟರ್ನ್ಯಾಷನಲ್ ತೀವ್ರವಾಗಿ ಖಂಡಿಸಿದೆ. ಸೇನಾ ವಿಮಾನಗಳು ಮತ್ತು ಹೆಲಿಕಾಪ್ಟರ್‌ಗಳು ಸುಲಭವಾಗಿ ಪ್ರವೇಶಿಸಲು ಅಸಾಧ್ಯವಾದ ಪ್ರದೇಶಗಳಲ್ಲಿ ದಾಳಿ ನಡೆಸಲು ಪ್ಯಾರಾಗ್ಲೆಡರ್‌ಗಳನ್ನು ಬಳಸುವುದು ಮ್ಯಾನ್ಮಾರ್ ಸೇನೆಯ ಗೊಂದಲದ ಮಾದರಿಯ ಭಾಗ ಎಂದು ಸಂಸ್ಥೆ ಹೇಳಿದೆ . ಈ ಘಟನೆಯು 2021ರ ಸೇನಾ ದಂಗೆಯ ನಂತರ ದೇಶದ ಮಾನವ ಹಕ್ಕುಗಳ ಪರಿಸ್ಥಿತಿ ಮತ್ತಷ್ಟು ಹದಗೆಡುತ್ತಿದೆ ಎಂಬುದನ್ನು ತಿಳಿಸುತ್ತದೆ .
ಸಂಯುಕ್ತ ರಾಷ್ಟ್ರಗಳ (UN) ಪ್ರತಿವೇದನೆಗಳು ಮ್ಯಾನ್ಮಾರ್ ಸೇನೆಯು ನಾಗರಿಕರ ಮೇಲೆ ದಾಳಿ ನಡೆಸುವುದು, ಶಾಲೆಗಳು, ಆಸ್ಪತ್ರೆಗಳು ಮತ್ತು ಧಾರ್ಮಿಕ ಕಟ್ಟಡಗಳನ್ನು ಬಾಂಬ್ ದಾಳಿ ಮಾಡುವುದು ಸೇರಿದಂತೆ ಯುದ್ಧ ಅಪರಾಧಗಳು ಆತಂಕದ ಮಟ್ಟ ತಲುಪಿದೆ ಎಂದು ಹೇಳಿದೆ. 2024ರಲ್ಲಿ UN ತನಿಖೆದಾರರು ಸೇನೆಯು ದೇಶದಾದ್ಯಂತ 2,471 ವಾಯು ದಾಳಿಗಳನ್ನು ನಡೆಸಿದೆ ಎಂದು ದಾಖಲಿಸಿದ್ದಾರೆ .
2021ರ ಸೇನಾ ದಂಗೆಯ ನಂತರ ದೇಶವು ಗಂಭೀರ ಸಮಸ್ಯೆಯಲ್ಲಿದೆ. ಸುಮಾರು ಮೂರು ಮಿಲಿಯನ್ ಜನರು ತಮ್ಮ ಮನೆಗಳನ್ನು ಬಿಟ್ಟು ಹೋಗಬೇಕಾಗಿದೆ ಮತ್ತು ಶಿಕ್ಷಣ, ಆರೋಗ್ಯ ವ್ಯವಸ್ಥೆಗಳು ಮತ್ತು ಆರ್ಥಿಕತೆ ಗಂಭೀರವಾಗಿ ಹಾನಿಗೊಂಡಿವೆ .
ಮ್ಯಾನ್ಮಾರ್‌ನಲ್ಲಿ ಸಾರ್ವತ್ರಿಕ ಚುನಾವಣೆ ನಡೆಯುವ ನಿರೀಕ್ಷೆ ಇದೆಯಾದರೂ, ವಿಮರ್ಶಕರು ಚುನಾವಣೆಗಳು ಮುಕ್ತವಾಗಿರದೆ ಸೇನಾ ಆಡಳಿತದ ಅಧಿಕಾರವನ್ನು ಭದ್ರಪಡಿಸಿಕೊಳ್ಳುವ ಉದ್ದೇಶ ಹೊಂದಿದೆ ಎಂದು ತಿಳಿಸಿದ್ದಾರೆ.
