ಟೆಹ್ರಾನ್, ಏಪ್ರಿಲ್ 11: ಇರಾನ್ನ ಸುಪ್ರೀಂ ಲೀಡರ್ ಆಗಿ ಅಧಿಕಾರ ಸ್ವೀಕರಿಸಿದ್ದ ಮೊಜ್ತಾಬಾ ಖಮೇನಿ (Mojtaba Khamenei) ಗಂಭೀರವಾಗಿ ಗಾಯಗೊಂಡಿರುವುದಾಗಿ ವರದಿಯಾಗಿವೆ. ರಾಯಿಟರ್ಸ್ ಸುದ್ದಿ ಸಂಸ್ಥೆಗೆ ತಿಳಿಸಿರುವ ಮೂಲಗಳ ಪ್ರಕಾರ, ಫೆಬ್ರವರಿ 28 ರಂದು ಟೆಹ್ರಾನ್ನ ಕೇಂದ್ರ ಭಾಗದಲ್ಲಿರುವ ಸುಪ್ರೀಂ ಲೀಡರ್ ನಿವಾಸದ ಮೇಲೆ ನಡೆದ ಅಮೆರಿಕ-ಇಸ್ರೇಲ್ ವಾಯುದಾಳಿಯಲ್ಲಿ ಮೊಜಬಾ ತೀವ್ರವಾಗಿ ಗಾಯಗೊಂಡಿದ್ದಾರೆ.
ಗಾಯದ ಸ್ವರೂಪವೇನು?
ಮೂಲಗಳ ಪ್ರಕಾರ, ಈ ದಾಳಿಯಲ್ಲಿ ಮೊಜ್ತಾಬಾ ಖಮೇನಿ ಅವರ ಮುಖ ವಿಕೃತಗೊಂಡಿದೆ (disfigured) ಮತ್ತು ಅವರ ಒಂದು ಅಥವಾ ಎರಡೂ ಕಾಲುಗಳಿಗೆ ತೀವ್ರ ಗಾಯಗಳಾಗಿವೆ. ಅಮೆರಿಕದ ಗುಪ್ತಚರ ಮಾಹಿತಿಯನ್ನು ಆಧರಿಸಿರುವ ಮೂಲವೊಂದು, ಖಮೇನಿ ತಮ್ಮ ಒಂದು ಕಾಲು ಕಳೆದುಕೊಂಡಿರಬಹುದು ಎಂದು ರಾಯಿಟರ್ಸ್ಗೆ ತಿಳಿಸಿದೆ. ಇದೇ ದಾಳಿಯಲ್ಲಿ ಅವರ ಪತ್ನಿ, ಸೋದರ-ಸೋದರಿಯರು ಮತ್ತು ಇತರ ಕುಟುಂಬಸ್ಥರು ಕೊಲ್ಲಲಾಗಿದೆ. ಇದೇ ವಾಯುದಾಳಿಯಲ್ಲಿ ಅವರ ತಂದೆ ಮತ್ತು ಮಾಜಿ ಸುಪ್ರೀಂ ಲೀಡರ್ ಆಲಿ ಖಮೇನಿ ಸಹ ಮೃತಪಟ್ಟಿದ್ದಾರೆ.
ಗಂಭೀರ ಗಾಯದ ನಡುವೆಯೂ ಮಾನಸಿಕವಾಗಿ ಸಚೇತನಾಗಿದ್ದಾರೆ
ಗಾಯದ ತೀವ್ರತೆಯ ಹೊರತಾಗಿಯೂ, ಮೊಜ್ತಾಬಾ ಖಮೇನಿ ಮಾನಸಿಕವಾಗಿ ಸಚೇತನಾಗಿದ್ದಾರೆ ಮತ್ತು ಆಡಿಯೋ ಕಾನ್ಫರೆನ್ಸಿಂಗ್ ಮೂಲಕ ಹಿರಿಯ ಅಧಿಕಾರಿಗಳ ಸಭೆಗಳಲ್ಲಿ ಭಾಗವಹಿಸುತ್ತಿದ್ದಾರೆ ಎಂದು ಮೂಲಗಳು ತಿಳಿಸಿವೆ. ಯುದ್ಧ ಮತ್ತು ವಾಷಿಂಗ್ಟನ್ನೊಂದಿಗಿನ ಮಾತುಕತೆ ಸೇರಿದಂತೆ ಪ್ರಮುಖ ನಿರ್ಧಾರಗಳಲ್ಲಿ ಅವರು ತೊಡಗಿಸಿಕೊಂಡಿದ್ದಾರೆ.
ಇರಾನ್ ಸರ್ಕಾರದ ಮೌನ
ಫೆಬ್ರವರಿ 28 ರ ದಾಳಿಯ ನಂತರ ಮಾರ್ಚ್ 8 ರಂದು ಅವರು ಸುಪ್ರೀಂ ಲೀಡರ್ ಆಗಿ ನೇಮಕಗೊಂಡಿದ್ದಾರೆ. ಆದರೆ ಅಂದಿನಿಂದ ಇಲ್ಲಿಯವರೆಗೆ ಮೊಜ್ತಾಬಾ ಖಮೇನಿ ಅವರ ಯಾವುದೇ ಫೋಟೋ, ವಿಡಿಯೋ ಅಥವಾ ಆಡಿಯೋ ರೆಕಾರ್ಡಿಂಗ್ ಸಾರ್ವಜನಿಕವಾಗಿ ಬಿಡುಗಡೆಯಾಗಿಲ್ಲ. ಇರಾನ್ನ ಸರ್ಕಾರಿ ಮಾಧ್ಯಮವು ಸೀಮಿತ ಪ್ರತಿಕ್ರಿಯೆ ನೀಡಿದೆ. ರಾಜ್ಯ ಟಿವಿಯ ಸುದ್ದಿ ನಿರೂಪಕರು ಅವರನ್ನು ‘ಜಾನ್ಬಾಜ್’ (ಯುದ್ಧದಲ್ಲಿ ತೀವ್ರವಾಗಿ ಗಾಯಗೊಂಡ ವೀರ) ಎಂದು ಕರೆದಿದ್ದಾರೆ. ಆದರೆ ಗಾಯದ ವ್ಯಾಪ್ತಿ ಕುರಿತು ಇರಾನ್ ಸರ್ಕಾರದಿಂದ ಯಾವುದೇ ಅಧಿಕೃತ ಹೇಳಿಕೆ ಹೊರ ಬಂದಿಲ್ಲ.
ಅಂತಾರಾಷ್ಟ್ರೀಯ ಕೂಲಂಕುಷ
ಮಾರ್ಚ್ 13 ರಂದು, ಅಮೆರಿಕದ ರಕ್ಷಣಾ ಕಾರ್ಯದರ್ಶಿ ಪೀಟ್ ಹೆಗ್ಸೆಥ್, ಮೊಜ್ತಾಬಾ ಖಮೇನಿ “ಗಾಯಗೊಂಡಿದ್ದಾರೆ ಮತ್ತು ಬಹುಶಃ ವಿಕೃತಗೊಂಡಿದ್ದಾರೆ” ಎಂದು ಹೇಳಿದ್ದರು. ಸಿಐಎ ಈ ವಿಷಯದಲ್ಲಿ ಪ್ರತಿಕ್ರಿಯಿಸಲು ನಿರಾಕರಿಸಿದೆ. ಇಸ್ರೇಲ್ ಪ್ರಧಾನಿ ಕಚೇರಿಯೂ ಸಹ ಪ್ರಶ್ನೆಗಳಿಗೆ ಉತ್ತರಿಸಿಲ್ಲ.
ಇಸ್ಲಾಮಾಬಾದ್ ಮಾತುಕತೆಯ ಹಿನ್ನೆಲೆ
ಈ ಬೆಳವಣಿಗೆಗಳು ನಡೆಯುತ್ತಿರುವಾಗಲೇ, ಇರಾನ್ ಮತ್ತು ಅಮೆರಿಕದ ನಡುವಿನ ಪ್ರಮುಖ ಮಾತುಕತೆಗಳು ಪಾಕಿಸ್ತಾನದ ಇಸ್ಲಾಮಾಬಾದ್ನಲ್ಲಿ ಪ್ರಾರಂಭವಾಗಿವೆ. ಈ ಸೂಕ್ಷ್ಮ ಸಂದರ್ಭದಲ್ಲಿ ಮೊಜ್ತಾಬಾ ಖಮೇನಿ ಅವರ ಆರೋಗ್ಯ ಸ್ಥಿತಿಯ ಅನಿಶ್ಚಿತತೆಯು ಇರಾನ್ನ ನಿರ್ಧಾರ ತೆಗೆದುಕೊಳ್ಳುವ ಪ್ರಕ್ರಿಯೆಯ ಮೇಲೆ ಗಂಭೀರ ಪರಿಣಾಮ ಬೀರುವ ಸಾಧ್ಯತೆಯಿದೆ.