ಗಾಜಾ, ನವೆಂಬರ್ 23: ಅಕ್ಟೋಬರ್ 10ರಂದು ಅಮೆರಿಕ ಮಧ್ಯಸ್ಥಿಕೆಯಲ್ಲಿ ಇಸ್ರೇಲ್-ಹಮಾಸ್ ನಡುವೆ ಘೋಷಿತವಾದ ಕದನವಿರಾಮ ಕೇವಲ 45 ದಿನಗಳಲ್ಲೇ ತತ್ತರಿಸಿದೆ. ಶನಿವಾರ (ನವೆಂಬರ್ 23) ಬೆಳಗ್ಗೆಯಿಂದಲೇ ಇಸ್ರೇಲಿ ಡ್ರೋನ್‌ಗಳು ಮತ್ತು ಯುದ್ಧ ವಿಮಾನಗಳು ಗಾಜಾ ಪಟ್ಟಿಯ ದಕ್ಷಿಣ ಭಾಗದಲ್ಲಿ ತೀವ್ರ ಗುಂಡಿನ ಚಕಮಕಿ ಮತ್ತು ಕ್ಷಿಪಣಿ ದಾಳಿ ನಡೆಸಿದ್ದು, ಕನಿಷ್ಠ 24 ಪ್ಯಾಲೆಸ್ಟೀನಿಯನ್ನರು ಸಾವನ್ನಪ್ಪಿದ್ದಾರೆ, 80ಕ್ಕೂ ಹೆಚ್ಚು ಮಂದಿ ಗಂಭೀರವಾಗಿ ಗಾಯಗೊಂಡಿದ್ದಾರೆ ಎಂದು ಹಮಾಸ್ ನಡೆಸುತ್ತಿರುವ ಗಾಜಾ ಆರೋಗ್ಯ ಇಲಾಖೆ ತಿಳಿಸಿದೆ.
ಇಸ್ರೇಲಿ ಸೇನೆ (IDF) ತನ್ನ ಹೇಳಿಕೆಯಲ್ಲಿ, “ದಕ್ಷಿಣ ಗಾಜಾದ ಖಾನ್ ಯೂನಿಸ್ ಮತ್ತು ರಫಾ ಪ್ರದೇಶದಲ್ಲಿ ಇಸ್ರೇಲಿ ಸೈನಿಕರ ಮೇಲೆ ಹಮಾಸ್ ಉಗ್ರರು ಆರ್‌ಪಿಜಿ ಮತ್ತು ಯಂತ್ರಗುಂಡು ದಾಳಿ ನಡೆಸಿದ್ದಕ್ಕೆ ಪ್ರತಿಯಾಗಿ ಉಗ್ರರ ಗುಂಪುಗಳು, ಆಯುಧ ಡಿಪೋಗಳು ಮತ್ತು ಭೂಗತ ಸುರಂಗಗಳನ್ನು ಗುರಿಯಾಗಿಸಿ ದಾಳಿ ನಡೆಸಲಾಗಿದೆ” ಎಂದು ಹೇಳಿಕೊಂಡಿದೆ. ಆದರೆ ದಾಳಿಗೊಳಗಾದ ಪ್ರದೇಶಗಳಲ್ಲಿ ಹಲವು ನಿರಾಶ್ರಿತ ಶಿಬಿರಗಳು ಮತ್ತು ವಾಸದ ಮನೆಗಳು ಧ್ವಂಸವಾಗಿರುವುದು ವರದಿಯಾಗಿದೆ.
ಅಕ್ಟೋಬರ್ 10ರ ಕದನವಿರಾಮ ಒಪ್ಪಂದದ ನಂತರ ಇದು ಇಸ್ರೇಲ್ ನಡೆಸಿದ ಅತಿ ದೊಡ್ಡ ಏಕದಿನ ದಾಳಿ ಎಂದು ಪರಿಗಣಿಸಲಾಗಿದೆ. ಕದನವಿರಾಮ ಜಾರಿಗೆ ಬಂದ ನಂತರ ಒಟ್ಟು 312 ಪ್ಯಾಲೆಸ್ಟೀನಿಯನ್ನರು ಇಸ್ರೇಲಿ ದಾಳಿಗಳಲ್ಲಿ ಸಾವನ್ನಪ್ಪಿದ್ದಾರೆ ಎಂದು ಗಾಜಾ ಆರೋಗ್ಯ ಸಚಿವಾಲಯ ಆರೋಪಿಸಿದೆ. “ಇದು ಕದನವಿರಾಮದ ಸ್ಪಷ್ಟ ಉಲ್ಲಂಘನೆ. ಇಸ್ರೇಲ್ ಒಪ್ಪಂದದ ಎಲ್ಲ ನಿಯಮಗಳನ್ನು ತಿರಸ್ಕರಿಸುತ್ತಿದೆ” ಎಂದು ಹಮಾಸ್ ಮಾತನಾಡುವವರು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಅಕ್ಟೋಬರ್ 13ರಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಏರ್ ಫೋರ್ಸ್ ಒನ್‌ನಲ್ಲಿ ಮಾಧ್ಯಮಗಳೊಂದಿಗೆ ಮಾತನಾಡುತ್ತಾ, “ಗಾಜಾ ಯುದ್ಧ ಸಂಪೂರ್ಣ ಮುಗಿಯಿತು. ಇಸ್ರೇಲ್-ಹಮಾಸ್ ಸಂಘರ್ಷಕ್ಕೆ ತಾತ್ಕಾಲಿಕವಲ್ಲ, ಶಾಶ್ವತವಾಗಿ ಅಂತ್ಯವಾಯಿತು. ಯಹೂದಿಗಳು, ಮುಸ್ಲಿಮರು, ಅರಬ್ಬರು – ಎಲ್ಲರೂ ಈಗ ಸಂತೋಷದಿಂದ ಇದ್ದಾರೆ ಎಂದು ಘೋಷಿಸಿದ್ದರು. ಆದರೆ ಕೇವಲ 40 ದಿನಗಳಲ್ಲೇ ಆ ಘೋಷಣೆಗೆ ಗಾಜಾದಲ್ಲಿ ಸಿಡಿದ ಗುಂಡುಗಳು ಮತ್ತು ಕ್ಷಿಪಣಿಗಳು ಗುಂಡಿಕೊಟ್ಟಿವೆ.
ಹಮಾಸ್ ಈಗಾಗಲೇ 2023ರ ಅಕ್ಟೋಬರ್ 7ರ ದಾಳಿಯಲ್ಲಿ ಒತ್ತೆಯಾಳುಗಳಾಗಿದ್ದ 110ಕ್ಕೂ ಹೆಚ್ಚು ಇಸ್ರೇಲಿ ಮತ್ತು ವಿದೇಶಿ ನಾಗರಿಕರನ್ನು ಬಿಡುಗಡೆ ಮಾಡಿತ್ತು. ಆದರೆ ಇಸ್ರೇಲ್ ತನ್ನ ಭಾಗದ ಒಪ್ಪಂದದಂತೆ 1,900ಕ್ಕೂ ಹೆಚ್ಚು ಪ್ಯಾಲೆಸ್ಟೀನಿ ಕೈದಿಗಳನ್ನು ಬಿಡುಗಡೆ ಮಾಡಿಲ್ಲ ಎಂಬ ಆರೋಪವೂ ಎದ್ದಿದೆ. ಈ ಹಿನ್ನೆಲೆಯಲ್ಲೇ ಸಣ್ಣಪುಟ್ಟ ಘರ್ಷಣೆಗಳು ನಡೆಯುತ್ತಿದ್ದವು.
ಈ ದಾಳಿಯ ನಂತರ ಹಮಾಸ್ ಇಸ್ರೇಲ್ ಯುದ್ಧವನ್ನು ಮತ್ತೆ ಆರಂಭಿಸಲು ಬಯಸುತ್ತಿದೆ. ಆದರೆ ನಾವು ರಕ್ಷಣೆಗಾಗಿ ಸಿದ್ಧರಿದ್ದೇವೆ ಎಂದು ಪ್ರತಿಕ್ರಿಯಿಸಿದೆ. ಕತಾರ್ ಮತ್ತು ಈಜಿಪ್ಟ್ ಮಧ್ಯಸ್ಥರು ತುರ್ತು ಸಂಪರ್ಕದಲ್ಲಿದ್ದು, ಪರಿಸ್ಥಿತಿಯನ್ನು ನಿಯಂತ್ರಿಸಲು ಯತ್ನಿಸುತ್ತಿದ್ದಾರೆ ಎನ್ನಲಾಗಿದೆ.
