ಪಾಕಿಸ್ತಾನದ ಕರಾಚಿಯ ಡಿಫೆನ್ಸ್‌ ಹೌಸಿಂಗ್‌ ಅಥಾರಿಟಿಯ (DHA) ಇತ್ತಿಹಾದ್‌ ಕಮರ್ಷಿಯಲ್‌ ಪ್ರದೇಶದ ಒಂದು ಫ್ಲಾಟ್‌ನಲ್ಲಿ ಪ್ರಖ್ಯಾತ ನಟಿ ಮತ್ತು ಮಾಡೆಲ್‌ ಹುಮೈರಾ ಅಸ್ಗರ್ ಅಲಿಯ ಶವ ಜುಲೈ 8ರಂದು ಪತ್ತೆಯಾಗಿದೆ. ಡಿಜಿಟಲ್‌ ಮತ್ತು ಫೋರೆನ್ಸಿಕ್‌ ಸಾಕ್ಷ್ಯಗಳ ಆಧಾರದ ಮೇಲೆ, 2024ರ ಅಕ್ಟೋಬರ್‌ನಲ್ಲಿ ನಟಿ ಮೃತಪಟ್ಟಿರಬಹುದು ಎಂದು ತನಿಖಾಧಿಕಾರಿಗಳು ಶಂಕಿಸಿದ್ದಾರೆ, ಆದರೆ ಶವವು ಸುಮಾರು 9 ತಿಂಗಳವರೆಗೆ ಅನಾಥವಾಗಿ ಕೊಳೆತ ಸ್ಥಿತಿಯಲ್ಲಿ ಪತ್ತೆಯಾಗಿದೆ. ಈ ಘಟನೆ ಪಾಕಿಸ್ತಾನದ ಚಿತ್ರರಂಗದಲ್ಲಿ ಆಘಾತ ಮೂಡಿಸಿದೆ.
ಹುಮೈರಾ ಅಸ್ಗರ್ ಅಲಿ (32) ಲಾಹೋರ್‌ ಮೂಲದವರಾಗಿದ್ದು, 2015ರಲ್ಲಿ ತಮ್ಮ ವೃತ್ತಿಜೀವನವನ್ನು ಆರಂಭಿಸಿದರು. ‘ತಮಾಶಾ ಘರ್‌’ ರಿಯಾಲಿಟಿ ಶೋ ಮತ್ತು ‘ಜಲೈಬೀ’ (2015) ಚಿತ್ರದ ಮೂಲಕ ಜನಪ್ರಿಯರಾಗಿದ್ದ ಅವರು, ‘ಜಸ್ಟ್‌ ಮ್ಯಾರಿಡ್‌’, ‘ಎಹ್ಸಾನ್‌ ಫರಾಮೋಶ್‌’, ‘ಗುರು’ ಮತ್ತು ‘ಚಲ್‌ ದಿಲ್‌ ಮೆರೆ’ ಧಾರಾವಾಹಿಗಳಲ್ಲಿ ಪೋಷಕ ಪಾತ್ರಗಳನ್ನು ನಿರ್ವಹಿಸಿದ್ದರು. 2023ರಲ್ಲಿ ‘ನ್ಯಾಷನಲ್‌ ವುಮನ್‌ ಲೀಡರ್‌ಶಿಪ್‌ ಅವಾರ್ಡ್‌’ನಲ್ಲಿ ‘ಬೆಸ್ಟ್‌ ಎಮರ್ಜಿಂಗ್‌ ಟ್ಯಾಲೆಂಟ್‌ ಆಂಡ್‌ ರೈಸಿಂಗ್‌ ಸ್ಟಾರ್‌’ ಪ್ರಶಸ್ತಿಯನ್ನು ಪಡೆದಿದ್ದರು. ಇನ್‌ಸ್ಟಾಗ್ರಾಮ್‌ನಲ್ಲಿ 7 ಲಕ್ಷಕ್ಕೂ ಹೆಚ್ಚು ಫಾಲೋವರ್ಸ್‌ ಹೊಂದಿದ್ದ ಅವರು, ನಟನೆಯ ಜೊತೆಗೆ ವರ್ಣಚಿತ್ರಕಾರಿಣಿ, ಶಿಲ್ಪಿ ಮತ್ತು ಫಿಟ್‌ನೆಸ್‌ ಉತ್ಸಾಹಿಯಾಗಿಯೂ ಗುರುತಿಸಿಕೊಂಡಿದ್ದರು.
ಶವ ಪತ್ತೆಯ ಹಿನ್ನೆಲೆ:
2024ರಿಂದ ಹುಮೈರಾ ಫ್ಲಾಟ್‌ನ ಬಾಡಿಗೆಯನ್ನು ಪಾವತಿಸಿರಲಿಲ್ಲ. ಇದರಿಂದ ಫ್ಲಾಟ್‌ ಮಾಲೀಕರು ಕಾನೂನು ಕ್ರಮಕ್ಕೆ ಮೊರೆ ಹೋಗಿದ್ದರು. ಕೋರ್ಟ್‌ ಆದೇಶದಂತೆ ಜುಲೈ 8, 2025ರಂದು ಗಿಝ್ರಿ ಪೊಲೀಸ್‌ ಸ್ಟೇಷನ್‌ ಅಧಿಕಾರಿಗಳು ಮತ್ತು ಕೋರ್ಟ್‌ನಿಂದ ನೇಮಕಗೊಂಡ ಬೈಲಿಫ್‌ ಫ್ಲಾಟ್‌ಗೆ ಭೇಟಿ ನೀಡಿದರು. ಬಾಗಿಲಿಗೆ ಪ್ರತಿಕ್ರಿಯೆ ಸಿಗದಿದ್ದಾಗ, ಪೊಲೀಸರು ಬಾಗಿಲನ್ನು ಮುರಿದು ಒಳಗೆ ಪ್ರವೇಶಿಸಿದಾಗ, ಕೊಳೆತ ಸ್ಥಿತಿಯಲ್ಲಿ ಹುಮೈರಾ ಅವರ ಶವ ಕಂಡುಬಂದಿತು. ಶವವು ತೀವ್ರವಾಗಿ ಕೊಳೆತಿದ್ದರಿಂದ, ಸಾವಿನ ನಿಖರ ಕಾರಣವನ್ನು ಕಂಡುಹಿಡಿಯಲು ಜಿನ್ನಾ ಪೋಸ್ಟ್‌ಗ್ರಾಜುಯೇಟ್‌ ಮೆಡಿಕಲ್‌ ಸೆಂಟರ್‌ಗೆ ಶವವನ್ನು ವರ್ಗಾಯಿಸಲಾಗಿದೆ. ಶವವು “ತೀವ್ರ ಕೊಳೆತ ಸ್ಥಿತಿಯಲ್ಲಿ” ಇತ್ತು, ಮತ್ತು ರಾಸಾಯನಿಕ ವಿಶ್ಲೇಷಣೆ ವರದಿಗಳಿಗಾಗಿ ಕಾಯಲಾಗುತ್ತಿದೆ ಪೊಲೀಸ್‌ ಸರ್ಜನ್‌ ಡಾ. ಸುಮ್ಮಾಯಿಯಾ ಸೈಯದ್‌ ತಿಳಿಸಿದ್ದಾರೆ.
ಕುಟುಂಬದಿಂದ ನಿರಾಕರಣೆ:
ಹುಮೈರಾ ಅವರ ತಂದೆ ನಿವೃತ್ತ ಸೈನ್ಯದ ವೈದ್ಯ ಡಾ. ಅಸ್ಗರ್ ಅಲಿ, ತಮ್ಮ ಮಗಳೊಂದಿಗೆ ಎರಡು ವರ್ಷಗಳಿಂದ ಸಂಪರ್ಕ ಕಡಿದುಕೊಂಡಿದ್ದೇವೆ ಎಂದು ತಿಳಿಸಿ, ಶವವನ್ನು ಸ್ವೀಕರಿಸಲು ನಿರಾಕರಿಸಿದ್ದಾರೆ. ಅವರ ಸಹೋದರ ಕೂಡ ಶವವನ್ನು ಸ್ವೀಕರಿಸಲು ಒಪ್ಪಲಿಲ್ಲ. ಕೊನೆಗೆ, ಅವರ ಅಳಿಯ ಲಾಹೋರ್‌ನಿಂದ ಕರಾಚಿಗೆ ಆಗಮಿಸಿ ಶವವನ್ನು ಸ್ವೀಕರಿಸಲು ಒಪ್ಪಿಕೊಂಡರು. ಒಂದು ವೇಳೆ ಅವರು ಶವವನ್ನು ಸ್ವೀಕರಿಸದಿದ್ದರೆ, ಸಿಂಧ್‌ ಸಾಂಸ್ಕೃತಿಕ ಇಲಾಖೆ ಮತ್ತು ಚಿತ್ರರಂಗದ ಕೆಲವು ಸದಸ್ಯರು ಅಂತ್ಯಸಂಸ್ಕಾರಕ್ಕೆ ಜವಾಬ್ದಾರಿಯನ್ನು ವಹಿಸಿಕೊಳ್ಳಲು ಮುಂದೆ ಬಂದಿದ್ದಾರೆ ಎಂದು ತಿಳಿದುಬಂದಿದೆ.
ಹುಮೈರಾ ಅವರ ಫೋನ್‌ನ ಕೊನೆಯ ಸಂದೇಶವು 2024ರ ಅಕ್ಟೋಬರ್ 7ರಂದು ರೈಡ್‌-ಹೇಲಿಂಗ್‌ ಸೇವೆಯಿಂದ ಬಂದಿತ್ತು, ಮತ್ತು ಅವರ ಕೊನೆಯ ವಾಟ್ಸಾಪ್‌ ‘ಲಾಸ್ಟ್‌ ಸೀನ್‌’ ಕೂಡ ಇದೇ ದಿನಾಂಕದ್ದಾಗಿತ್ತು. ಅಕ್ಟೋಬರ್ 20ರಂದು ಅವರ ಸ್ಟೈಲಿಸ್ಟ್‌ ಡ್ಯಾನಿಶ್‌ ಮಕ್ಸೂದ್‌ ಕಳುಹಿಸಿದ ಸಂದೇಶವು ಓದಲ್ಪಡದೆ ಉಳಿದಿತ್ತು. ಫ್ಲಾಟ್‌ನ ವಿದ್ಯುತ್‌ ಸಂಪರ್ಕವು 2024ರ ಅಕ್ಟೋಬರ್‌ನಲ್ಲಿ ಬಿಲ್‌ ಪಾವತಿಯಾಗದ ಕಾರಣ ಕಡಿತಗೊಂಡಿತ್ತು. ಫ್ರಿಜ್‌ನಲ್ಲಿನ ಆಹಾರ ಪದಾರ್ಥಗಳ ಗಡುವು ದಿನಾಂಕಗಳು ಸೆಪ್ಟೆಂಬರ್ 2024ರವರೆಗಿನವು, ಮತ್ತು ಕಿಚನ್‌ನಲ್ಲಿನ ಜಾರ್‌ಗಳು ತುಕ್ಕು ಹಿಡಿದಿದ್ದವು. ಒಟ್ಟಾರೆಯಾಗಿ, ಈ ಸಾಕ್ಷ್ಯಗಳು ನಟಿ 2024ರ ಅಕ್ಟೋಬರ್‌ನಲ್ಲಿ ಮೃತಪಟ್ಟಿರಬಹುದು ಎಂಬುದನ್ನು ಸೂಚಿಸುತ್ತವೆ. ಪೊಲೀಸರು ಯಾವುದೇ ಅನೈತಿಕ ಚಟುವಟಿಕೆಯ ಲಕ್ಷಣಗಳನ್ನು ಕಾಣದಿದ್ದರೂ, ಟಾಕ್ಸಿಕಾಲಜಿ ಮತ್ತು ಫೋರೆನ್ಸಿಕ್‌ ವರದಿಗಳಿಗಾಗಿ ಕಾಯುತ್ತಿದ್ದಾರೆ.
ಹುಮೈರಾ ಅವರ ಸಾವಿನ ಸುದ್ದಿ ಪಾಕಿಸ್ತಾನದ ಚಿತ್ರರಂಗದಲ್ಲಿ ದುಃಖ ತಂದಿದೆ. ‘ತಮಾಶಾ ಘರ್‌’ನ ಸಂಚಾಲಕ ಆದ್ನಾನ್‌ ಸಿದ್ದಿಕಿ ಮತ್ತು ‘ಎಹ್ಸಾನ್‌ ಫರಾಮೋಶ್‌’ ಧಾರಾವಾಹಿಯ ಸಹನಟಿ ಅತಿಕಾ ಒಧೊ ಸೇರಿದಂತೆ ಹಲವು ಗಣ್ಯರು ಸಾಮಾಜಿಕ ಜಾಲತಾಣಗಳಲ್ಲಿ ಶೋಕ ವ್ಯಕ್ತಪಡಿಸಿದ್ದಾರೆ.
