ಆಕಾಶದಲ್ಲಿ ಏಕಾಏಕಿ ನಾಲ್ಕು ಚಂದ್ರ: ವೈರಲ್ ಆದ ಅದ್ಭುತ ವಿಡಿಯೋ

ಇತ್ತೀಚೆಗೆ ಸಾಮಾಜಿಕ ಜಾಲತಾಣಗಳಲ್ಲಿ ಹರಡುತ್ತಿರುವ ಒಂದು ವಿಡಿಯೋ ಇಡೀ ಪ್ರಪಂಚದ ಜನರನ್ನು ಬೆರಗುಗೊಳಿಸಿದೆ. ಪ್ರತಿದಿನವೂ ಒಂದಲ್ಲ ಒಂದು ವಿಚಿತ್ರ, ಅಪರೂಪದ ಘಟನೆಗಳು ವೈರಲ್ ಆಗುತ್ತಲೇ ಇರುತ್ತವೆ. ಆದರೆ ಕೆಲವೊಂದು ದೃಶ್ಯಗಳು “ಇದು ನಿಜಾನಾ?” ಎಂಬ ಅನುಮಾನವನ್ನೇ ಹುಟ್ಟಿಸುತ್ತವೆ. ಇದೀಗ ಅಂತಹದ್ದೇ ಒಂದು ಅಪರೂಪದ ಮತ್ತು ಅಚ್ಚರಿಯ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗಿದೆ.

ಆಕಾಶದಲ್ಲಿ ಒಂದೇ ಚಂದ್ರನನ್ನು ನಾವು ನೋಡಿದ್ದೇವೆ. ಕೆಲವೊಮ್ಮೆ ಮೋಡಗಳ ನಡುವೆ ಮಸುಕಾದ ಚಂದ್ರ, ಪೂರ್ಣಚಂದ್ರ, ಅರ್ಧಚಂದ್ರ ಇವೆಲ್ಲಾ ಸಾಮಾನ್ಯ. ಆದರೆ ಒಂದೇ ಸಮಯದಲ್ಲಿ ನಾಲ್ಕು ಚಂದ್ರರು ಆಕಾಶದಲ್ಲಿ ಹೊಳೆಯುತ್ತಿರುವ ದೃಶ್ಯ ಕಂಡರೆ ನೀವು ನಂಬುತ್ತೀರಾ? ಹೌದು, ರಷ್ಯಾದ ಸೇಂಟ್ ಪೀಟರ್ಸ್ಬರ್ಗ್ ನಗರದಲ್ಲಿ ಇಂತಹ ಅಪರೂಪದ ದೃಶ್ಯವೊಂದು ಕಂಡುಬಂದಿದ್ದು, ಅದರ ವಿಡಿಯೋ ಇದೀಗ ವಿಶ್ವಾದ್ಯಂತ ವೈರಲ್ ಆಗಿದೆ.

ಒಂದೇ ಚಂದ್ರ… ಆದರೆ ನಾಲ್ಕು ಪ್ರತಿಬಿಂಬ!

ವೈರಲ್ ಆಗಿರುವ ವಿಡಿಯೋದಲ್ಲಿ ಆಕಾಶದಲ್ಲಿ ಮಧ್ಯದಲ್ಲಿ ಒಂದು ಪ್ರಕಾಶಮಾನ ಚಂದ್ರನಿದ್ದು, ಅದರ ಎರಡೂ ಬದಿಗಳಲ್ಲಿ ಇನ್ನೂ ಮೂರು ಚಂದ್ರ ಕಾಣಿಸುತ್ತದೆ. ಈ ದೃಶ್ಯವನ್ನು ಕಂಡ ಸ್ಥಳೀಯರು ಮಾತ್ರವಲ್ಲ, ವಿಡಿಯೋ ನೋಡಿದ ನೆಟ್ಟಿಗರೂ ಬೆರಗಾಗಿದ್ದಾರೆ. ಕೆಲವರು ‘ಇದು ಭೂಮಿಗೆ ಮತ್ತೊಂದು ಉಪಗ್ರಹವೇ?’ ಎಂದು ಪ್ರಶ್ನಿಸಿದ್ದಾರೆ. ಆದರೆ ವಿಜ್ಞಾನ ಈ ರಹಸ್ಯಕ್ಕೆ ಸ್ಪಷ್ಟ ಉತ್ತರ ನೀಡಿದೆ.

ಏನಿದು ಪ್ಯಾರಾಸೆಲಿನ್ (Paraselene)?

ಈ ದೃಶ್ಯವನ್ನು ವಿಜ್ಞಾನದಲ್ಲಿ ‘ಪ್ಯಾರಾಸೆಲಿನ್’ ಎಂದು ಕರೆಯಲಾಗುತ್ತದೆ. ಇದನ್ನು ಸಾಮಾನ್ಯವಾಗಿ ‘ಮೂನ್ ಡಾಗ್’ (Moon Dog) ಅಥವಾ ‘ನಕಲಿ ಚಂದ್ರ’ ಎಂದೂ ಹೇಳುತ್ತಾರೆ. ಇದು ಯಾವುದೋ ಹೊಸ ಚಂದ್ರಗಳಲ್ಲ, ಬದಲಿಗೆ ವಾತಾವರಣದಲ್ಲಿ ಉಂಟಾಗುವ ಒಂದು ವಿಶಿಷ್ಟ ಆಪ್ಟಿಕಲ್ ಇಲ್ಯೂಷನ್ ಮಾತ್ರ.

ಭೂಮಿಯ ಮೇಲ್ಭಾಗದ ವಾತಾವರಣದಲ್ಲಿ ಇರುವ ತೆಳುವಾದ ಸಿರಸ್ ಮೋಡಗಳು ಹಾಗೂ ಅವುಗಳಲ್ಲಿ ಇರುವ ಷಡ್ಭುಜಾಕೃತಿಯ (Hexagonal) ಮಂಜುಗಡ್ಡೆಯ ಸ್ಪಟಿಕಗಳು ಈ ದೃಶ್ಯಕ್ಕೆ ಕಾರಣವಾಗುತ್ತವೆ. ಚಂದ್ರನ ಬೆಳಕು ಈ ಐಸ್ ಕ್ರಿಸ್ಟಲ್‌ಗಳ ಮೂಲಕ ಹಾದುಹೋಗುವಾಗ ಬೆಳಕು ವಕ್ರೀಭವನಗೊಳ್ಳುತ್ತದೆ. ಇದರ ಪರಿಣಾಮವಾಗಿ ನಿಜವಾದ ಚಂದ್ರನ ಪಕ್ಕದಲ್ಲೇ ಇನ್ನೂ ಕೆಲವು ಪ್ರಕಾಶಮಾನ ಪ್ರತಿಬಿಂಬಗಳು ಕಾಣಿಸಿಕೊಳ್ಳುತ್ತವೆ.

ನಾಸಾ ಏನು ಹೇಳುತ್ತದೆ?

ನಾಸಾ (NASA) ಪ್ರಕಾರ, ಪ್ಯಾರಾಸೆಲಿನ್ ಅಥವಾ ನಕಲಿ ಚಂದ್ರಗಳು ಸಾಮಾನ್ಯವಾಗಿ ನಿಜವಾದ ಚಂದ್ರನಿಂದ ಸುಮಾರು 22 ಡಿಗ್ರಿ ದೂರದಲ್ಲಿ ಕಾಣಿಸಿಕೊಳ್ಳುತ್ತವೆ. ಇವು ನಿಜವಾದ ಚಂದ್ರನಷ್ಟು ಪ್ರಕಾಶಮಾನವಾಗಿರುವುದಿಲ್ಲ, ಸ್ವಲ್ಪ ಮಸುಕಾಗಿ ಕಾಣಿಸುತ್ತವೆ. ಚಂದ್ರನು ಆಕಾಶದಲ್ಲಿ ಕಡಿಮೆ ಎತ್ತರದಲ್ಲಿರುವಾಗ ಈ ದೃಶ್ಯವನ್ನು ಗಮನಿಸುವುದು ಇನ್ನಷ್ಟು ಸುಲಭ.

‘ಸೈಬ್ರೇರಿ’ ವರದಿಯ ಪ್ರಕಾರ, ಮಂಜುಗಡ್ಡೆಯ ಸ್ಪಟಿಕಗಳ ಚಲನೆಯ ಮೇಲೆ ಅವಲಂಬಿಸಿ ಈ ನಕಲಿ ಚಂದ್ರಗಳ ಗಾತ್ರ ಮತ್ತು ಆಕಾರ ಬದಲಾಗಬಹುದು. ಕೆಲವೊಮ್ಮೆ ಎರಡು, ಕೆಲವೊಮ್ಮೆ ಮೂರು ಅಥವಾ ನಾಲ್ಕು ಪ್ರತಿಬಿಂಬಗಳೂ ಕಾಣಿಸಿಕೊಳ್ಳಬಹುದು.

ಶೀತ ಪ್ರದೇಶಗಳಲ್ಲಿ ಹೆಚ್ಚಾಗಿ ಕಾಣಿಸಿಕೊಳ್ಳುವುದೇಕೆ?

ಪ್ಯಾರಾಸೆಲಿನ್ ಸಾಮಾನ್ಯವಾಗಿ ರಷ್ಯಾ, ಸ್ಕ್ಯಾಂಡಿನೇವಿಯಾ, ಕೆನಡಾ ಮುಂತಾದ ಅತೀ ಶೀತ ಪ್ರದೇಶಗಳಲ್ಲಿ ಹೆಚ್ಚಾಗಿ ಕಂಡುಬರುತ್ತದೆ. ಕಾರಣ ಅಲ್ಲಿ ವಾತಾವರಣದಲ್ಲಿ ಮಂಜುಗಡ್ಡೆಯ ಕಣಗಳ ಪ್ರಮಾಣ ಹೆಚ್ಚು ಇರುತ್ತದೆ. ಭಾರತದಲ್ಲಿ ಇದು ಅಪರೂಪವಾಗಿದ್ದು, ಆದರೆ ಉತ್ತರ ಭಾರತ ಅಥವಾ ಹಿಮಾಲಯ ಪ್ರದೇಶಗಳಲ್ಲಿ ಕೆಲವೊಮ್ಮೆ ಕಾಣಿಸಿಕೊಂಡಿರುವ ಉದಾಹರಣೆಗಳಿವೆ.

ನಿಜವಲ್ಲ… ಆದರೆ ಪ್ರಕೃತಿಯ ಅದ್ಭುತ!

ಆಕಾಶದಲ್ಲಿ ನಾಲ್ಕು ಚಂದ್ರರು ಕಾಣಿಸಿಕೊಂಡಿದ್ದು ನಿಜವಾದ ಖಗೋಳೀಯ ಘಟನೆ ಅಲ್ಲ. ಆದರೆ ಇದು ಪ್ರಕೃತಿಯ ವೈಜ್ಞಾನಿಕ ಅದ್ಭುತಕ್ಕೆ ಅದ್ಭುತ ಉದಾಹರಣೆ. ವಾತಾವರಣ, ಬೆಳಕು ಮತ್ತು ಹವಾಮಾನದ ಸಂಯೋಜನೆಯಿಂದ ಮೂಡುವ ಇಂತಹ ದೃಶ್ಯಗಳು ನಮಗೆ ವಿಜ್ಞಾನ ಎಷ್ಟು ರೋಚಕವೋ ಎಂಬುದನ್ನು ಮತ್ತೊಮ್ಮೆ ನೆನಪಿಸುತ್ತವೆ.