ನ್ಯೂಯಾರ್ಕ್: ಆಧುನಿಕ ಜಗತ್ತಿನಲ್ಲಿ ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ (AI) ಎಷ್ಟರಮಟ್ಟಿಗೆ ಬೆಳೆದಿದೆ ಎಂದರೆ, ಅದು ಈಗ ಮನುಷ್ಯರ ನಡುವಿನ ಸುಳ್ಳು ಮತ್ತು ವಂಚನೆಯನ್ನು ಪತ್ತೆ ಹಚ್ಚುವ ಡಿಟೆಕ್ಟಿವ್ ಕೆಲಸವನ್ನೂ ಮಾಡುತ್ತಿದೆ. ಇತ್ತೀಚೆಗೆ ನ್ಯೂಯಾರ್ಕ್ನಲ್ಲಿ ನಡೆದ ಘಟನೆಯೊಂದು ಸಂಚಲನ ಮೂಡಿಸಿದೆ. ಒಬ್ಬ ವ್ಯಕ್ತಿ ತನ್ನ ಪ್ರೇಯಸಿಗೆ ಹೇಳದ ಗುಟ್ಟನ್ನು ಅವನ ಫೋನ್ನಲ್ಲಿದ್ದ ಚಾಟ್-ಜಿಪಿಟಿ ರಟ್ಟು ಮಾಡಿದೆ.
27 ವರ್ಷದ ಯುವತಿಯೊಬ್ಬಳು ಹಣಕಾಸು ಕ್ಷೇತ್ರದಲ್ಲಿ ಕೆಲಸ ಮಾಡುತ್ತಿದ್ದ 40 ವರ್ಷದ ವ್ಯಕ್ತಿಯೊಂದಿಗೆ ಡೇಟಿಂಗ್ಗೆ ಹೋಗಿದ್ದಳು. ಬ್ರೇನ್ ಆಂಡರ್ಸನ್ ಎಂಬ ಡೇಟಿಂಗ್ ಕೋಚ್ ಹಂಚಿಕೊಂಡಿರುವ ಈ ಮಾಹಿತಿಯ ಪ್ರಕಾರ, ಆ ವ್ಯಕ್ತಿ ಇಡೀ ರಾತ್ರಿ ತನ್ನ ಫೋನ್ನಲ್ಲಿ ಚಾಟ್-ಜಿಪಿಟಿಯೊಂದಿಗೆ ಕಾಲ ಕಳೆಯುತ್ತಿದ್ದ. ಕಾಕ್ಟೇಲ್ಗಳ ಇತಿಹಾಸ ಮತ್ತು ವಿವಿಧ ವಿಷಯಗಳ ಬಗ್ಗೆ ಚಾಟ್-ಜಿಪಿಟಿಗೆ ಪ್ರಶ್ನೆ ಕೇಳಿ, ಅದು ನೀಡುತ್ತಿದ್ದ ಉತ್ತರಗಳನ್ನು ಗಟ್ಟಿಯಾಗಿ ಓದುತ್ತಿದ್ದ. ಅವನ ಈ ವಿಚಿತ್ರ ನಡವಳಿಕೆಯಿಂದ ಯುವತಿಗೆ ಸಾಕಷ್ಟು ಕಿರಿಕಿರಿ ಉಂಟಾಗಿತ್ತು.
ʼನನ್ನ ಬೆಸ್ಟ್ ಫ್ರೆಂಡ್ನ ಕೇಳುʼ
ಡಿನ್ನರ್ ಮುಗಿಯುವ ಸಮಯದಲ್ಲಿ ಯುವತಿ ಅವನ ಚಾಟ್-ಜಿಪಿಟಿ ಹುಚ್ಚಿನ ಬಗ್ಗೆ ತಮಾಷೆ ಮಾಡಿದಳು. ಅದಕ್ಕೆ ಆ ವ್ಯಕ್ತಿ ಬಹಳ ಹೆಮ್ಮೆಯಿಂದ, ಚಾಟ್-ಜಿಪಿಟಿ ನನ್ನ ಬೆಸ್ಟ್ ಫ್ರೆಂಡ್. ಇದು ನನ್ನ ಬಗ್ಗೆ ಎಲ್ಲವನ್ನೂ ತಿಳಿದಿದೆ. ನಿನಗೆ ನನ್ನ ಬಗ್ಗೆ ಏನು ಬೇಕಾದರೂ ಇದನ್ನು ಕೇಳಿ ತಿಳಿದುಕೋ ಎಂದು ತನ್ನ ಫೋನ್ ಅವಳ ಕೈಗಿಟ್ಟನು. ಆತ ತನ್ನ ಬಗ್ಗೆ ನಾನು ಅಪ್ಪಟ ನಾನು ಅವಿವಾಹಿತ ಎಂದು ಹೇಳಿಕೊಂಡಿದ್ದನು.
ಕುತೂಹಲಗೊಂಡ ಯುವತಿ ಚಾಟ್-ಜಿಪಿಟಿಗೆ ಒಂದು ಪ್ರಶ್ನೆ ಕೇಳಿದಳು, ಬೇರೆ ಯಾರೊಂದಿಗೂ ಹಂಚಿಕೊಳ್ಳದ, ಆತನಲ್ಲಿ ನನಗೆ ಇಷ್ಟವಾಗುವಂತಹ ಒಂದು ವಿಷಯವನ್ನು ಹೇಳು. ಈ ಪ್ರಶ್ನೆಗೆ ಎಐ ನೀಡಿದ ಉತ್ತರ ಯುವತಿಯನ್ನ ಅಚ್ಚರಿಗೊಳಿಸಿದೆ. ಅದಕ್ಕೆ ಚಾಟ್-ಜಿಪಿಟಿ ಹೀಗೆ ಉತ್ತರಿಸಿತು, ನಿಮ್ಮ ಪತ್ನಿಗೆ ನೀವು ಎಷ್ಟು ಕಾಳಜಿಯುಳ್ಳ ಪತಿ ಮತ್ತು ನಿಮ್ಮ ಮಕ್ಕಳಿಗೆ ನೀವು ಎಷ್ಟು ಉತ್ತಮ ತಂದೆಯಾಗಿದ್ದೀರಿ ಎಂಬುದು ನನಗೆ ತುಂಬಾ ಇಷ್ಟ.
ಇದನ್ನು ಓದಿದ ಯುವತಿ ಬೆಚ್ಚಿಬಿದ್ದಳು. ಅಲ್ಲಿಯವರೆಗೆ ತಾನು ಅವಿವಾಹಿತ ಎಂದು ನಂಬಿಸಿ ಡೇಟಿಂಗ್ ಮಾಡುತ್ತಿದ್ದ ವ್ಯಕ್ತಿ ವಾಸ್ತವದಲ್ಲಿ ಮದುವೆಯಾಗಿ ಮಕ್ಕಳನ್ನು ಹೊಂದಿದ್ದ ಸಂಸಾರಿಯಾಗಿದ್ದ. ಚಾಟ್-ಜಿಪಿಟಿಯೊಂದಿಗೆ ಆತ ತನ್ನ ಕೌಟುಂಬಿಕ ವಿಷಯಗಳನ್ನು ಚರ್ಚಿಸಿದ್ದರಿಂದ, ಅದು ಆತನ ಸತ್ಯವನ್ನು ಹೊರಹಾಕಿತ್ತು.
ಈ ಕಥೆ ವೈರಲ್ ಆಗುತ್ತಿದ್ದಂತೆ ನೆಟ್ಟಿಗರು ಭಿನ್ನವಾಗಿ ಪ್ರತಿಕ್ರಿಯಿಸುತ್ತಿದ್ದಾರೆ. ತಂತ್ರಜ್ಞಾನವು ಪ್ರಣಯವನ್ನು ಹಾಳುಮಾಡುತ್ತಿದೆ ಎಂದು ಕೆಲವರು ಅಸಮಾಧಾನ ವ್ಯಕ್ತಪಡಿಸಿದರೆ, ಬಹುಪಾಲು ಜನರು ಚಾಟ್-ಜಿಪಿಟಿ ಆ ಯುವತಿಗೆ ದೊಡ್ಡ ಉಪಕಾರ ಮಾಡಿದೆ. ಒಬ್ಬ ಮೋಸಗಾರನಿಂದ ಅವಳನ್ನು ಕಾಪಾಡಿದೆ ಎಂದು ಎಐ ಅನ್ನು ಶ್ಲಾಘಿಸುತ್ತಿದ್ದಾರೆ. ಒಟ್ಟಿನಲ್ಲಿ, ಈ ಘಟನೆಯು ಡಿಜಿಟಲ್ ಯುಗದಲ್ಲಿ ಯಾರನ್ನೂ ಅಷ್ಟು ಸುಲಭವಾಗಿ ನಂಬಬಾರದು ಮತ್ತು ನಮ್ಮ ಡಿಜಿಟಲ್ ಫುಟ್ಪ್ರಿಂಟ್ಸ್ ಎಂದಿಗೂ ಸುಳ್ಳು ಹೇಳುವುದಿಲ್ಲ ಎಂಬುದನ್ನು ಸಾಬೀತುಪಡಿಸಿದೆ.