ಮುಂಬೈ (ಜುಲೈ . 27) : ದೇಶದ ಜನಪ್ರಿಯ ಗಾಯನ ರಿಯಾಲಿಟಿ ಶೋ ಗಳಲ್ಲಿ ಒಂದಾದ ಇಂಡಿಯನ್ ಐಡಲ್ ಸೀಸನ್ 16 ಇದೀಗ ಫಿನಾಲೆ ತಲುಪಿದೆ. ಈ ಸೀಸನ್ನಲ್ಲಿ ಒಡಿಶಾದ ಪ್ರತಿಭಾವಂತ ಗಾಯಕಿ ಜ್ಯೋತಿರ್ಮಯಿ ನಾಯಕ್ ವಿಜೇತೆಯಾಗಿದ್ದು, ಪ್ರತಿಷ್ಠಿತ ಟ್ರೋಫಿಯ ಜೊತೆಗೆ ₹20 ಲಕ್ಷ ನಗದು ಬಹುಮಾನ ತಮ್ಮದಾಗಿಸಿಕೊಂಡರು.
ಇಡೀ ಸ್ಪರ್ಧೆಯುದ್ದಕ್ಕೂ ಜ್ಯೋತಿರ್ಮಯಿ ತಮ್ಮ ಸುಮಧುರ ಗಾಯನ ಮತ್ತು ವಿಭಿನ್ನ ಶೈಲಿಯ ಪ್ರದರ್ಶನಗಳ ಮೂಲಕ ತೀರ್ಪುಗಾರರು ಹಾಗೂ ಪ್ರೇಕ್ಷಕರ ಮನಗೆದ್ದಿದ್ದರು. ಫಿನಾಲೆಯಲ್ಲಿ ಅಂಶಿಕಾ ಚೋಂಕರ್, ಮನರಾಜ್ ವೀರ್ ಸಿಂಗ್, ಸುಹೈಲ್ ಸೂಫಿ, ತನಿಷ್ಕ್ ಶುಕ್ಲಾ ಹಾಗೂ ಮೈಸ್ಕೆಮ್ ಬೋಸು ಸೇರಿದಂತೆ ಹಲವು ಪ್ರತಿಭಾವಂತ ಸ್ಪರ್ಧಿಗಳು ಪ್ರಶಸ್ತಿಗಾಗಿ ಪೈಪೋಟಿ ನಡೆಸಿದರು. ಅಂತಿಮವಾಗಿ ಜ್ಯೋತಿರ್ಮಯಿ ವಿಜಯದ ಕಿರೀಟ ಧರಿಸಿದರು. ಅಂಶಿಕಾ ಚೋಂಕರ್ ಮತ್ತು ಸುಹೈಲ್ ಸೂಫಿ ಅವರಿಗೆ ತಲಾ ₹3 ಲಕ್ಷ ನಗದು ಬಹುಮಾನ ನೀಡಲಾಯಿತು.
ವಿಜಯದ ಬಳಿಕ ಮಾತನಾಡಿದ ಜ್ಯೋತಿರ್ಮಯಿ, ಇಂಡಿಯನ್ ಐಡಲ್ ಗೆಲ್ಲುವುದು ತಮ್ಮ ಜೀವನದ ಅತ್ಯಂತ ದೊಡ್ಡ ಕನಸು ನನಸಾದ ಕ್ಷಣ ಎಂದು ಭಾವುಕರಾದರು. ಈ ಯಶಸ್ಸಿಗೆ ತಮ್ಮ ಕುಟುಂಬ, ಸ್ನೇಹಿತರು, ಅಭಿಮಾನಿಗಳು, ತೀರ್ಪುಗಾರರು ಹಾಗೂ ಸೋನಿ ಎಂಟರ್ಟೈನ್ಮೆಂಟ್ ಟೆಲಿವಿಷನ್ ತಂಡದ ಬೆಂಬಲವೇ ಕಾರಣ ಎಂದು ಅವರು ಕೃತಜ್ಞತೆ ಸಲ್ಲಿಸಿದರು. ಮುಂದೆಯೂ ಉತ್ತಮ ಸಂಗೀತದ ಮೂಲಕ ಜನರ ಮನಸ್ಸು ಗೆಲ್ಲುವ ಗುರಿಯಿದೆ ಎಂದು ತಿಳಿಸಿದರು.
ಒಡಿಶಾದ ಕೆಐಐಟಿ (KIIT) ವಿಶ್ವವಿದ್ಯಾಲಯದ ಹಳೆಯ ವಿದ್ಯಾರ್ಥಿನಿಯಾಗಿರುವ ಜ್ಯೋತಿರ್ಮಯಿ, ಇಂಡಿಯನ್ ಐಡಲ್ ಪ್ರಶಸ್ತಿ ಗೆದ್ದ ಮೊದಲ ಒಡಿಷಾ ಗಾಯಕಿ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಈ ಸಾಧನೆಗೆ KIIT ಮತ್ತು KIMS ಸಂಸ್ಥಾಪಕ ಅಚ್ಯುತ ಸಮಂತ ಸೇರಿದಂತೆ ಅನೇಕ ಗಣ್ಯರು ಅಭಿನಂದನೆ ಸಲ್ಲಿಸಿದ್ದಾರೆ.