ಬೆಂಗಳೂರು: ಇಂದು ನಾಡಿನೆಲ್ಲೆಡೆ ವರಮಹಾಲಕ್ಷ್ಮಿ ಹಬ್ಬದ ಸಂಭ್ರಮವು ಮನೆಮಾಡಿದೆ. ಶ್ರಾವಣ ಮಾಸದ ಈ ವಿಶೇಷ ದಿನದಂದು, ಬೆಂಗಳೂರಿನ ಕೆ.ಆರ್. ಮಾರ್ಕೆಟ್‌ನಲ್ಲಿ ಖರೀದಿಯ ಭರಾಟೆ ಜೋರಾಗಿದೆ. ಆದರೆ, ಹಬ್ಬದ ಸಂತೋಷದ ನಡುವೆಯೇ ಹೂವು, ಹಣ್ಣು, ಮತ್ತು ತರಕಾರಿಗಳ ಬೆಲೆ ಗಗನಕ್ಕೇರಿದ್ದು, ಗ್ರಾಹಕರ ಜೇಬಿಗೆ ಕತ್ತರಿ ಬಿದ್ದಿದೆ. ಕಳೆದ ವಾರಕ್ಕಿಂತ ಈ ವಾರ ದರಗಳು ಗಣನೀಯವಾಗಿ ಏರಿಕೆಯಾಗಿವೆ.
ಶ್ರಾವಣ ಮಾಸದಲ್ಲಿ ಸಾಲುಸಾಲು ಹಬ್ಬಗಳಿಂದಾಗಿ ಹೂವು, ಹಣ್ಣು, ಮತ್ತು ತರಕಾರಿಗಳಿಗೆ ಬೇಡಿಕೆ ತೀವ್ರವಾಗಿ ಹೆಚ್ಚಾಗಿದೆ. ಆದರೆ, ಪೂರೈಕೆ ಕಡಿಮೆಯಾಗಿರುವುದರಿಂದ ಬೆಲೆಗಳು ದುಪ್ಪಟ್ಟಾಗಿವೆ. ಕೆ.ಆರ್. ಮಾರ್ಕೆಟ್‌ನಲ್ಲಿ ಕನಕಾಂಬರ ಹೂವಿನ ಬೆಲೆ ಕೆಜಿಗೆ 1600 ರೂ., ಮಲ್ಲಿಗೆ ಮತ್ತು ಮಳ್ಳೆ ಹೂವು ಕೆಜಿಗೆ 900 ರೂ., ಕಾಕಡ ಹೂವು ಮತ್ತು ಸೇವಂತಿಗೆ ತಲಾ 800 ರೂ.ಗೆ ತಲುಪಿದೆ. ಗುಲಾಬಿ, ಕಣಗಲೆ, ಮತ್ತು ಸುಗಂಧರಾಜ ಹೂವುಗಳು ಕೆಜಿಗೆ 500 ರೂ., ತಾವರೆ ಹೂವಿನ ಜೋಡಿಗೆ 150 ರೂ., ಮತ್ತು ಜೋಡಿ ಬಾಳೆಕಂದು 80 ರೂ.ಗೆ ಮಾರಾಟವಾಗುತ್ತಿವೆ.
ತರಕಾರಿಗಳ ಬೆಲೆಯೂ ಗಗನಕ್ಕೇರಿದೆ. ಹುರುಳಿಕಾಯಿ ಕೆಜಿಗೆ 80 ರೂ.ನಿಂದ 150 ರೂ.ಗೆ, ಕ್ಯಾಪ್ಸಿಕಂ ಮತ್ತು ಬೀನ್ಸ್ ತಲಾ 40 ರೂ.ನಿಂದ 80 ರೂ.ಗೆ, ಬದನೆಕಾಯಿ 40 ರೂ.ನಿಂದ 60 ರೂ.ಗೆ, ಹೂಕೋಸು 15 ರೂ.ನಿಂದ 30 ರೂ.ಗೆ, ಮತ್ತು ತೊಂಡೆಕಾಯಿ 30 ರೂ.ನಿಂದ 45 ರೂ.ಗೆ ಏರಿಕೆಯಾಗಿದೆ.
ಹಣ್ಣುಗಳ ಬೆಲೆಯೂ ತೀವ್ರವಾಗಿ ಏರಿಕೆಯಾಗಿದೆ. ಸೇಬು ಕೆಜಿಗೆ 180 ರೂ.ನಿಂದ 300 ರೂ.ಗೆ, ದಾಳಿಂಬೆ 150 ರೂ.ನಿಂದ 280 ರೂ.ಗೆ, ಕಿತ್ತಳೆ 120 ರೂ.ನಿಂದ 200 ರೂ.ಗೆ, ಮೂಸಂಬಿ 70 ರೂ.ನಿಂದ 150 ರೂ.ಗೆ, ಸಪೋಟ 100 ರೂ.ನಿಂದ 150 ರೂ.ಗೆ, ದ್ರಾಕ್ಷಿ 150 ರೂ.ನಿಂದ 200 ರೂ.ಗೆ, ಮತ್ತು ಸೀತಾಫಲ 60 ರೂ.ನಿಂದ 200 ರೂ.ಗೆ ಏರಿಕೆಯಾಗಿದೆ.
ಹಬ್ಬದ ಸಂತೋಷದ ನಡುವೆಯೂ, ಬೆಲೆ ಏರಿಕೆಯಿಂದ ಗ್ರಾಹಕರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. “ಹೂವು, ಹಣ್ಣು, ತರಕಾರಿಗಳ ಬೆಲೆ ಕೇಳಿದರೆ ಶಾಕ್ ಆಗುತ್ತಿದೆ. ಹಬ್ಬದ ಸಂದರ್ಭದಲ್ಲಿ ಇಂತಹ ದರ ಏರಿಕೆ ಸಾಮಾನ್ಯ ಜನರಿಗೆ ಭಾರವಾಗುತ್ತಿದೆ,” ಎಂದು ಕೆ.ಆರ್. ಮಾರ್ಕೆಟ್‌ನಲ್ಲಿ ಖರೀದಿಗೆ ಬಂದಿದ್ದ ಮಹಾಸ್ವಾಮಿ ಮಂಡ್ಯ ಎಂಬ ಗ್ರಾಹಕ ತಿಳಿಸಿದ್ದಾರೆ.
ರೈತರಿಗೆ ಲಾಭ:
ಬೆಲೆ ಏರಿಕೆಯಿಂದ ಗ್ರಾಹಕರು ಕಂಗಾಲಾಗಿದ್ದರೂ, ಹೂವು ಬೆಳೆದ ರೈತರಿಗೆ ಇದು ಲಾಭದಾಯಕವಾಗಿದೆ. ಕೋಲಾರದಲ್ಲಿ ಮಲ್ಲಿಗೆ ಹೂವಿನ ಖರೀದಿಯ ಭರಾಟೆ ಜೋರಾಗಿದ್ದು, ರೈತರು ಉತ್ತಮ ಲಾಭ ಗಳಿಸಿದ್ದಾರೆ. “ಹಬ್ಬದ ಸಂದರ್ಭದಲ್ಲಿ ಬೇಡಿಕೆ ಹೆಚ್ಚಾದರೂ, ಪೂರೈಕೆ ಕಡಿಮೆಯಿರುವುದರಿಂದ ಬೆಲೆ ಏರಿಕೆಯಾಗಿದೆ,” ಎಂದು ವರ್ತಕರೊಬ್ಬರು ತಿಳಿಸಿದ್ದಾರೆ.
