ಮಂಡ್ಯ:ಜಿಲ್ಲೆಯ ಪಾಂಡವಪುರ ತಾಲೂಕಿನ ಕನಗನಮರಡಿ ಗ್ರಾಮದ ವಿಶ್ವೇಶ್ವರಯ್ಯ ನಾಲೆಗೆ 2018ರ ನವೆಂಬರ್ 24ರಂದು ಖಾಸಗಿ ಬಸ್ (ಕೆಎ-19, ಎ-5676) ಉರುಳಿದ ದುರಂತದಲ್ಲಿ 30 ಜನರು, ಮುಖ್ಯವಾಗಿ ಮಕ್ಕಳು, ಸಾವನ್ನಪ್ಪಿದ್ದರು. ಈ ಘಟನೆಯ ನಂತರ, ಅಧಿಮನೋವಿಜ್ಞಾನ ತಜ್ಞ ಡಾ. ರಾಹುಲ್ ಕುಮಾರ್ ಅವರು ತನಿಖೆ ನಡೆಸಿದ್ದು, ಬಸ್‌ನಲ್ಲಿ ಮತ್ತು ಸುತ್ತಮುತ್ತಲಿನ ಪ್ರದೇಶದಲ್ಲಿ ಮೃತ ಮಕ್ಕಳ ಆತ್ಮಗಳ ಚಟುವಟಿಕೆಯ ಸಂಕೇತಗಳನ್ನು ಗುರುತಿಸಿದ್ದಾರೆ ಎಂದು ಹೇಳಿದ್ದಾರೆ.
ಡಾ. ರಾಹುಲ್ ಕುಮಾರ್ ತನಿಖೆಯಲ್ಲಿ ಕಂಡಿದ್ದೇನು?
ಡಾ. ರಾಹುಲ್ ಕುಮಾರ್, ಅಧಿಮನೋವಿಜ್ಞಾನ ಕ್ಷೇತ್ರದಲ್ಲಿ ತೊಡಗಿರುವ ತಜ್ಞರಾಗಿದ್ದು, ಈ ರೀತಿಯ ಹಲವಾರು ಪ್ರಕರಣಗಳ ತನಿಖೆಯನ್ನು ನಡೆಸಿದ ಅನುಭವಿಗಳು. SHLLOKA ನಡೆಸಿದ ಪಾಡ್‌ಕಾಸ್ಟ್ ಸಂದರ್ಶನದಲ್ಲಿ ಈ ಘಟನೆಯ ಬಗ್ಗೆ ಮಾತನಾಡಿದ ಅವರು, ಪಾಂಡವಪುರ ಬಸ್ ದುರಂತದ ಸ್ಥಳದ ತನಿಖೆಯ ಸಂದರ್ಭದಲ್ಲಿ ತಾವು ಎದುರಿಸಿದ ಅತೀಂದ್ರಿಯ ಅನುಭವಗಳು ಜೀವನದಲ್ಲಿ ಮರೆಯಲಾಗದವು ಎಂದಿದ್ದಾರೆ.
ಅಪಘಾತದ ಸ್ಥಳದಲ್ಲಿ ಮಕ್ಕಳ ಶವಪರೀಕ್ಷೆ ನಡೆದಿತ್ತು, ಮತ್ತು ಅದಕ್ಕೂ ಮೊದಲು ಇದೇ ಸ್ಥಳದಲ್ಲಿ ಕಾರ್ ಅಪಘಾತವೂ ಸಂಭವಿಸಿತ್ತು. ಬಸ್‌ನ ತನಿಖೆಗಾಗಿ ಅದನ್ನು ಕಾಲುವೆಯಿಂದ ಹೊರತೆಗೆದು, ಪಾಂಡವಪುರ ಪೊಲೀಸ್ ಠಾಣೆಯ ಬಳಿಯ ಖಾಲಿ ಜಾಗದಲ್ಲಿ ನಿಲ್ಲಿಸಲಾಗಿತ್ತು. ಆದರೆ, ಈ ಸ್ಥಳದ ಸುತ್ತಮುತ್ತಲಿನ ಮನೆಗಳಿಗೆ ರಾತ್ರಿಯ ವೇಳೆ ಚೀರಾಟ ಮತ್ತು ಕಿರುಚಾಟ ಕೇಳಿಬಂದಿದ್ದರಿಂದ, ಸ್ಥಳೀಯರು ಬಸ್‌ನ ಸ್ಥಳಾಂತರಕ್ಕೆ ಒತ್ತಾಯಿಸಿದ್ದರು. ಇದರಿಂದಾಗಿ ಪೊಲೀಸರು ಡಾ. ರಾಹುಲ್ ಕುಮಾರ್ ತಂಡವನ್ನು ತನಿಖೆಗೆ ಕರೆಸಿದ್ದರು.
ತನಿಖೆಯಲ್ಲಿ ಕಂಡ ವಿಚಿತ್ರ ಅನುಭವಗಳು ನೆನೆಸಿಕೊಂಡರೆ ಎದೆ ಝೆಲ್ ಅನ್ನುತ್ತೆ: ಡಾ. ರಾಹುಲ್ ಕುಮಾರ್!
ತನಿಖೆಗೆ ತೆರಳಿದ ಡಾ. ರಾಹುಲ್ ಕುಮಾರ್ ತಂಡವು ಬಸ್‌ನ ಬಳಿ ಒಂದು ಟಾರ್ಚ್‌ಲೈಟ್‌ ಮತ್ತು ಎಲೆಕ್ಟ್ರೋಮ್ಯಾಗ್ನೆಟಿಕ್ ಗೊಂಬೆಯನ್ನು ಇರಿಸಿತ್ತು. “ಯಾವುದೇ ಶಕ್ತಿಯಿದ್ದರೆ ಟಾರ್ಚ್‌ ಆನ್ ಆಗುವಂತೆ ಕೇಳಿಕೊಂಡೆವು. ಐದು ನಿಮಿಷಗಳ ಒಳಗೆ ಟಾರ್ಚ್‌ ಆನ್ ಆಯಿತು. ಯಾರೂ ಟಾರ್ಚ್‌ನ ಬಳಿ ಇರಲಿಲ್ಲ, ಆದರೂ ಅದು ಆನ್-ಆಫ್ ಆಗುತ್ತಿತ್ತು,” ಎಂದು ರಾಹುಲ್ ಕುಮಾರ್ ವಿವರಿಸಿದ್ದಾರೆ.
ಬಸ್‌ನ ಚಕ್ರದ ಬಳಿ ಇರಿಸಿದ್ದ ಗೊಂಬೆಯೂ ಸಹ ಅಲುಗಾಡಲು ಆರಂಭಿಸಿತು. “ಮಕ್ಕಳಿಗೆ ಗೊಂಬೆ ತುಂಬಾ ಇಷ್ಟವಾಗುತ್ತದೆ. ಆದ್ದರಿಂದ ತನಿಖೆಗೆ ಸುಂದರವಾದ ಗೊಂಬೆಯನ್ನು ಬಳಸಿದೆವು. ಗೊಂಬೆಯ ಸುತ್ತಲೂ ಶಕ್ತಿಯ ಚಲನೆ ಕಂಡುಬಂದಿತು,” ಎಂದು ಅವರು ತಿಳಿಸಿದ್ದಾರೆ. ತಂಡದ ಒಬ್ಬ ಮಹಿಳಾ ಸದಸ್ಯೆ ಮೃತ ಮಕ್ಕಳ ಹೆಸರನ್ನು ಕೂಗಿದಾಗ, ಟಾರ್ಚ್‌ ಆನ್-ಆಫ್ ಆಗುವುದರ ಜೊತೆಗೆ ಗೊಂಬೆಯ ಚಲನೆಯೂ ತೀವ್ರವಾಯಿತು ಎಂದು ಡಾ. ರಾಹುಲ್ ಕುಮಾರ್ ವಿವರಿಸಿದ್ದಾರೆ.
ದುರಂತದ ವಿವರ:
2018ರ ನವೆಂಬರ್ 24ರಂದು, ಪಾಂಡವಪುರದಿಂದ ಕನಗನಮರಡಿ-ವದೇಸಮುದ್ರ-ಶಿವಳ್ಳಿ ಮಾರ್ಗವಾಗಿ ಮಂಡ್ಯಕ್ಕೆ ತೆರಳುತ್ತಿದ್ದ ಖಾಸಗಿ ಬಸ್, ಕಿರಿದಾದ ರಸ್ತೆ ಮತ್ತು ಗುಂಡಿಗಳಿಂದ ಕೂಡಿದ ಮಾರ್ಗದಲ್ಲಿ ಚಾಲಕನ ನಿಯಂತ್ರಣ ತಪ್ಪಿ ವಿಶ್ವೇಶ್ವರಯ್ಯ ನಾಲೆಗೆ ಉರುಳಿತ್ತು. ಬಸ್ ರಸ್ತೆಯ ಎಡಭಾಗದ ವಿದ್ಯುತ್ ಕಂಬಕ್ಕೆ ಡಿಕ್ಕಿ ಹೊಡೆದ ನಂತರ ಕಾಲುವೆಗೆ ಬಿದ್ದಿತ್ತು. ಈ ದುರಂತದಲ್ಲಿ 30 ಜನರು, ಮುಖ್ಯವಾಗಿ ಮಕ್ಕಳು, ಸಾವನ್ನಪ್ಪಿದ್ದರು.
ಈ ಘಟನೆಯಿಂದ ಸ್ಥಳೀಯರಲ್ಲಿ ಭಯ ಮತ್ತು ವಿಚಿತ್ರ ಅನುಭವಗಳು ಕಾಣಿಸಿಕೊಂಡಿದ್ದವು. ಇದರಿಂದ ಗ್ರಾಮಸ್ಥರು ದುರಂತದ ಸ್ಥಳದಲ್ಲಿ ವಿಶೇಷ ಹೋಮ-ಯಜ್ಞಗಳನ್ನು ನಡೆಸಿದ್ದರು.
ಡಾ. ರಾಹುಲ್ ಕುಮಾರ್‌ರ ಈ ತನಿಖೆಯ ವಿಡಿಯೋ ಮತ್ತು ಅನುಭವಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಜನರಲ್ಲಿ ಚರ್ಚೆಗೆ ಕಾರಣವಾಗಿವೆ. ಕೆಲವರು ಇದನ್ನು ಅತೀಂದ್ರಿಯ ಘಟನೆಯೆಂದು ನಂಬಿದರೆ, ಇತರರು ವೈಜ್ಞಾನಿಕವಾಗಿ ವಿಶ್ಲೇಷಿಸಬೇಕೆಂದು ಒತ್ತಾಯಿಸಿದ್ದಾರೆ.