ಮೈಸೂರು (ಆ. 12): ನಾಗರಹೊಳೆ ಅಭಯಾರಣ್ಯದಲ್ಲಿ ಸಫಾರಿಗೆ ತೆರಳಿದ್ದ ಪ್ರವಾಸಿಗರಿಗೆ ಅಪರೂಪದ ದೃಶ್ಯವೊಂದು ಕಣ್ತುಂಬಿಕೊಂಡಿದೆ. ಒಂದೇ ಬಾರಿ ಮೂರು ಹುಲಿಗಳು ರಸ್ತೆಗೆ ಅಡ್ಡಲಾಗಿ ಮಲಗಿ ಆಟವಾಡುತ್ತಿದ್ದ ದೃಶ್ಯ ಸಫಾರಿ ಪ್ರವಾಸಿಗರನ್ನು ಪುಳಕಿತರನ್ನಾಗಿಸಿದೆ.
ಮೈಸೂರು ಜಿಲ್ಲೆಯ ಎಚ್.ಡಿ. ಕೋಟೆ ತಾಲೂಕಿನ ನಾಗರಹೊಳೆ ಅಭಯಾರಣ್ಯ ವ್ಯಾಪ್ತಿಯ ದಮ್ಮನಕಟ್ಟೆ ಸಫಾರಿ ತಾಣದಲ್ಲಿ ಈ ಅಪರೂಪದ ಸೈಟಿಂಗ್ ನಡೆದಿದೆ. ದಮ್ಮನಕಟ್ಟೆ ಸಫಾರಿಯ ಸುಂಕದಕಟ್ಟೆ ರಸ್ತೆಯಲ್ಲಿ ಸಫಾರಿ ವಾಹನಗಳು ಸಂಚರಿಸುವ ಮಾರ್ಗದಲ್ಲೇ ಮೂರು ಹುಲಿಗಳು ಕಾಣಿಸಿಕೊಂಡಿವೆ.
ತಾಯಿ ಹುಲಿ ಹಾಗೂ ಎರಡು ಮರಿಗಳು ರಸ್ತೆಯಲ್ಲಿದ್ದ ಮಳೆ ನೀರಿನಲ್ಲಿ ಆಟವಾಡುತ್ತಾ, ಬಳಿಕ ಅಲ್ಲೇ ಮಲಗಿ ವಿಶ್ರಾಂತಿ ಪಡೆಯುತ್ತಿದ್ದವು. ವಾಹನಗಳು ಸಂಚರಿಸುವ ರಸ್ತೆಗೆ ಅಡ್ಡಲಾಗಿ ಹುಲಿಗಳು ಮಲಗಿದ್ದರಿಂದ ಕೆಲಕಾಲ ಸಫಾರಿ ವಾಹನಗಳು ಮುಂದೆ ಸಾಗಲು ಸಾಧ್ಯವಾಗದೆ ಅಲ್ಲೇ ನಿಲ್ಲಬೇಕಾಯಿತು.
ತಾಯಿ ಹುಲಿಯೊಂದಿಗೆ ಮರಿಗಳು ಆಟವಾಡುತ್ತಾ ನೀರಿನಲ್ಲಿ ಚೆಲ್ಲಾಟವಾಡುತ್ತಿದ್ದ ದೃಶ್ಯ ಪ್ರವಾಸಿಗರ ಗಮನ ಸೆಳೆದಿದೆ. ಕಾಡಿನ ಮಧ್ಯೆ ಒಂದೇ ಬಾರಿಗೆ ಮೂರು ಹುಲಿಗಳನ್ನು, ಅದರಲ್ಲೂ ತಾಯಿ ಹಾಗೂ ಮರಿಗಳನ್ನು ಇಷ್ಟು ಸಮೀಪದಲ್ಲಿ ನೋಡುವ ಅವಕಾಶ ಸಿಕ್ಕಿದ್ದರಿಂದ ಪ್ರವಾಸಿಗರು ಸಂತಸಗೊಂಡಿದ್ದಾರೆ.
ಹುಲಿಗಳು ಕೆಲಕಾಲ ರಸ್ತೆಯಲ್ಲೇ ಮಲಗಿ ವಿಶ್ರಾಂತಿ ಪಡೆದಿದ್ದು, ಸಫಾರಿ ವಾಹನಗಳ ಸದ್ದು ಹೆಚ್ಚಾದ ಬಳಿಕ ನಿಧಾನವಾಗಿ ಎದ್ದು ಕಾಡಿನೊಳಗೆ ತೆರಳಿವೆ. ಈ ಅಪರೂಪದ ಕ್ಷಣವನ್ನು ವನ್ಯಜೀವಿ ಛಾಯಾಗ್ರಾಹಕ ಮಧುಸೂದನ್ ತಮ್ಮ ಕ್ಯಾಮರಾದಲ್ಲಿ ಸೆರೆಹಿಡಿದಿದ್ದಾರೆ.
ನಾಗರಹೊಳೆ ಅಭಯಾರಣ್ಯವು ಹುಲಿ ಸೇರಿದಂತೆ ಹಲವು ಅಪರೂಪದ ವನ್ಯಜೀವಿಗಳ ತಾಣವಾಗಿದ್ದು, ಇಲ್ಲಿ ಸಫಾರಿಗೆ ಬರುವ ಪ್ರವಾಸಿಗರಿಗೆ ಆಗಾಗ್ಗೆ ವನ್ಯಜೀವಿಗಳ ಅಪರೂಪದ ದರ್ಶನ ಸಿಗುತ್ತದೆ. ಆದರೆ ತಾಯಿ ಹುಲಿ ಹಾಗೂ ಎರಡು ಮರಿಗಳು ಒಂದೇ ಸ್ಥಳದಲ್ಲಿ ರಸ್ತೆಗೆ ಅಡ್ಡಲಾಗಿ ಮಲಗಿ ಆಟವಾಡುತ್ತಿರುವ ದೃಶ್ಯ ಮಾತ್ರ ಪ್ರವಾಸಿಗರಿಗೆ ವಿಶೇಷ ಅನುಭವ ನೀಡಿದೆ.
ಮಳೆ ನೀರಿನಲ್ಲಿ ಆಟವಾಡುತ್ತಿದ್ದ ಮೂರು ಹುಲಿಗಳ ಈ ದೃಶ್ಯ ಇದೀಗ ಸಾಮಾಜಿಕ ಜಾಲತಾಣಗಳಲ್ಲೂ ಗಮನ ಸೆಳೆಯುತ್ತಿದ್ದು, ನಾಗರಹೊಳೆ ಸಫಾರಿಯ ಮತ್ತೊಂದು ಅದ್ಭುತ ಅನುಭವವಾಗಿ ವೈರಲ್ ಆಗುತ್ತಿದೆ.
