ಕೃಷ್ಣ ಜನ್ಮಾಷ್ಟಮಿ: ಬೆಂಗಳೂರು ಇಸ್ಕಾನ್‌ ದೇವಸ್ಥಾನಕ್ಕೆ ಬದಲಿ ಮಾರ್ಗ, ಸುಗಮ ಸಂಚಾರಕ್ಕೆ ವಿಶೇಷ ಕ್ರಮ!

ಬೆಂಗಳೂರು: ನಾಳೆ (ಆಗಸ್ಟ್ 16) ಶ್ರೀ ಕೃಷ್ಣ ಜನ್ಮಾಷ್ಟಮಿ ಹಬ್ಬವನ್ನು ಶನಿವಾರ ಬೆಂಗಳೂರಿನ ರಾಜಾಜಿನಗರದ ಇಸ್ಕಾನ್ ದೇವಸ್ಥಾನದಲ್ಲಿ ಲಕ್ಷಾಂತರ ಭಕ್ತರು ಆಚರಿಸಲಿದ್ದಾರೆ. ಈ ಸಂದರ್ಭದಲ್ಲಿ ಸಂಚಾರ ದಟ್ಟಣೆ ತಡೆಗಟ್ಟಲು ಮತ್ತು ಭಕ್ತರ ಸುರಕ್ಷತೆಗಾಗಿ ಬೆಂಗಳೂರು ಸಂಚಾರ ಪೊಲೀಸರು ವಿಶೇಷ ವ್ಯವಸ್ಥೆ ಮಾಡಿದ್ದಾರೆ. ಭಕ್ತರು ಸಾಧ್ಯವಾದಷ್ಟು ಬಿಎಂಟಿಸಿ ಬಸ್‌ಗಳು, ಮೆಟ್ರೋ, ಅಥವಾ ಇತರ ಸಾರ್ವಜನಿಕ ಸಾರಿಗೆಯನ್ನು ಬಳಸಲು ಸೂಚಿಸಲಾಗಿದೆ ಎಂದು ಬೆಂಗಳೂರು ಸಂಚಾರ ಉತ್ತರ, ಉಪ ಪೊಲೀಸ್ ಆಯುಕ್ತರು ಮಾಹಿತಿ ನೀಡಿದ್ದಾರೆ.

ಸಂಚಾರ ಬದಲಾವಣೆಗಳು:

• ವೆಸ್ಟ್ ಆಫ್ ಕಾರ್ಡ್ ರಸ್ತೆ: ಸೋಪ್ ಫ್ಯಾಕ್ಟರಿ ಜಂಕ್ಷನ್‌ನಿಂದ ವಿಜಯನಗರ, ನಂದಿನಿ ಲೇಔಟ್, ಮಹಾಲಕ್ಷ್ಮಿ ಲೇಔಟ್‌ಗೆ ತೆರಳುವ ವಾಹನಗಳು ಡಾ. ರಾಜ್ಕುಮಾರ್ ರಸ್ತೆಯ ಮೂಲಕ 10ನೇ ಕ್ರಾಸ್ ಅಥವಾ ಕೇತಮಾರನಹಳ್ಳಿ ಜಂಕ್ಷನ್‌ನಲ್ಲಿ ಬಲಗಡೆ ತಿರುಗಿ, 1ನೇ ಬ್ಲಾಕ್ ರಾಜಾಜಿನಗರ ಸಿಗ್ನಲ್ ಮೂಲಕ ಕಾರ್ಡ್ ರಸ್ತೆಗೆ ತಲುಪಬೇಕು.

• ಪಿಕ್‌ಅಪ್/ಡ್ರಾಪ್ ನಿಷೇಧ: ಸೋಪ್ ಫ್ಯಾಕ್ಟರಿ ಜಂಕ್ಷನ್‌ನಿಂದ ಮಹಾಲಕ್ಷ್ಮಿ ಮೆಟ್ರೋದವರೆಗೆ ವಾಹನಗಳ ಪಿಕ್‌ಅಪ್ ಮತ್ತು ಡ್ರಾಪ್ ನಿಷೇಧಿಸಲಾಗಿದೆ.

• ಆಟೋ/ಕ್ಯಾಬ್‌ಗಳಿಗೆ: ಇಸ್ಕಾನ್ ದೇವಸ್ಥಾನಕ್ಕೆ ಭಕ್ತರನ್ನು ಕರೆತರುವ ಆಟೋ ಮತ್ತು ಕ್ಯಾಬ್‌ಗಳು ಮಹಾಲಕ್ಷ್ಮಿ ಮೆಟ್ರೋ ಅಥವಾ ಸೋಪ್ ಫ್ಯಾಕ್ಟರಿ ಸಮೀಪದಲ್ಲಿ ಪಿಕ್‌ಅಪ್ ಮತ್ತು ಡ್ರಾಪ್ ಮಾಡಬೇಕು.

• ಸ್ವಂತ ವಾಹನಗಳಿಗೆ: ಸ್ವಂತ ವಾಹನದಲ್ಲಿ ಆಗಮಿಸುವವರು ಮಹಾಲಕ್ಷ್ಮಿ ಮೆಟ್ರೋದಿಂದ ಸೋಪ್ ಫ್ಯಾಕ್ಟರಿಗೆ ಹೋಗುವ ರಸ್ತೆಯಲ್ಲಿ ಪಿಕ್‌ಅಪ್ ಮತ್ತು ಡ್ರಾಪ್ ಮಾಡಬಹುದು.

• ಕೆ.ಎಸ್.ಆರ್.ಟಿ.ಸಿ/ಖಾಸಗಿ ಬಸ್‌ಗಳಿಗೆ: ತುಮಕೂರು ರಸ್ತೆಯಿಂದ ಮೆಜೆಸ್ಟಿಕ್‌ಗೆ ತೆರಳುವ ಬಸ್‌ಗಳು ಯಶವಂತಪುರ ಸರ್ಕಲ್, ಮಾರಮ್ಮ ಮಾರ್ಗೋಸಾ ರಸ್ತೆ, ಕೆ.ಸಿ. ಜನರಲ್ ಸಿಗ್ನಲ್ ಮೂಲಕ ಲಿಂಕ್ ರಸ್ತೆಯನ್ನು ಬಳಸಬೇಕು.

ಭಕ್ತರಿಗೆ ಸೂಚನೆಗಳು:

• ಸಾರ್ವಜನಿಕ ಸಾರಿಗೆ: ಭಕ್ತರು ಬಿಎಂಟಿಸಿ, ಮೆಟ್ರೋ, ಅಥವಾ ಇತರ ಸಾರ್ವಜನಿಕ ಸಾರಿಗೆಯನ್ನು ಬಳಸಬೇಕು.

• ಪಾರ್ಕಿಂಗ್: ದೇವಸ್ಥಾನದಿಂದ ನೀಡಲಾದ ಪಾಸ್‌ಗಳಿರುವವರು ನಿಗದಿತ ಸ್ಥಳಗಳಲ್ಲಿ ವಾಹನ ನಿಲುಗಡೆ ಮಾಡಬೇಕು.

• ದರ್ಶನದ ಸಮಯ: ಸಂಜೆ 5:00 ಗಂಟೆಯೊಳಗೆ ದರ್ಶನ ಪಡೆಯಲು ಶಿಫಾರಸು.

• ಹಿರಿಯ ನಾಗರಿಕರು/ಮಕ್ಕಳು: ಮಧ್ಯಾಹ್ನ 12:00 ಗಂಟೆಯೊಳಗೆ ದರ್ಶನಕ್ಕೆ ಕರೆತಂದು ಸುರಕ್ಷಿತವಾಗಿ ಮರಳಬೇಕು.

• ಆಭರಣಗಳು: ಆಭರಣಗಳು ಮತ್ತು ಬೆಲೆಬಾಳುವ ವಸ್ತುಗಳನ್ನು ತರುವುದನ್ನು ತಪ್ಪಿಸಿ.

• ದೇವಸ್ಥಾನದ ಆವರಣ: ದರ್ಶನದ ನಂತರ ಸೆಲ್ಫಿ/ಫೋಟೋ ತೆಗೆಯದೆ ಶೀಘ್ರವಾಗಿ ಆವರಣದಿಂದ ನಿರ್ಗಮಿಸಿ.

ಸುರಕ್ಷತಾ ಕ್ರಮಗಳು:

ಇಸ್ಕಾನ್ ದೇವಸ್ಥಾನದ ಸುತ್ತ ವಿಶೇಷ ಪೊಲೀಸ್ ಭದ್ರತೆ ಒದಗಿಸಲಾಗಿದೆ. ದೇವಸ್ಥಾನದ ಆಡಳಿತ ಮಂಡಳಿಯು ಸುಗಮ ದರ್ಶನಕ್ಕೆ ವಿಶೇಷ ವ್ಯವಸ್ಥೆ ಮಾಡಿದೆ. ಸಾರ್ವಜನಿಕರು ಸಂಚಾರ ನಿಯಮಗಳನ್ನು ಪಾಲಿಸಿ, ಪೊಲೀಸರಿಗೆ ಸಹಕರಿಸಬೇಕು.