ಬೇಸಿಗೆಯ ಬಿಸಿಲಲ್ಲಿ ಬೆಂಗಳೂರಿನ ಕೆರೆಗಳ ಬರ: ಬೋರ್‌ವೆಲ್ ಬರಿದಾಗುವ ಆತಂಕ!

ಉದ್ಯಾನ ನಗರಿಯೆಂದೇ ಖ್ಯಾತವಾದ ಬೆಂಗಳೂರಿನ 53 ಕೆರೆಗಳು ಈ ಬೇಸಿಗೆಯಲ್ಲಿ ಸಂಪೂರ್ಣ ಬತ್ತಿ, ಆಟದ ಮೈದಾನದಂತೆ ಪರಿವರ್ತನೆಯಾಗಿವೆ. ಇನ್ನೂ ಹಲವು ಕೆರೆಗಳಲ್ಲಿ ನೀರಿನ ಮಟ್ಟ ಗಣನೀಯವಾಗಿ ಕುಸಿಯುತ್ತಿದ್ದು, ಸುತ್ತಮುತ್ತಲಿನ ನಿವಾಸಿಗಳಲ್ಲಿ ಆತಂಕಕ್ಕೆ ಕಾರಣವಾಗಿದೆ. ಬಿಬಿಎಂಪಿ ವರದಿಯ ಪ್ರಕಾರ, ನಗರದ 202 ಸಕ್ರಿಯ ಕೆರೆಗಳ ಪೈಕಿ 183 ಕೆರೆಗಳಲ್ಲಿ ಕೇವಲ ಶೇಕಡಾ 35ರಷ್ಟು ನೀರಿನ ಸಂಗ್ರಹವಿದೆ. 53 ಕೆರೆಗಳು ಸಂಪೂರ್ಣ ಖಾಲಿಯಾಗಿದ್ದು, 130 ಕೆರೆಗಳಲ್ಲಿ ಶೇಕಡಾ 40ರಷ್ಟು ಮಾತ್ರ ನೀರು ಉಳಿದಿದೆ.

ಕಳೆದ ವರ್ಷದ ಮುಂಗಾರು ಮಳೆಯಿಂದ ಕೆರೆಗಳು ಭರ್ತಿಯಾಗಿದ್ದವಾದರೂ, 2025ರ ಮಾರ್ಚ್-ಏಪ್ರಿಲ್‌ಗೆ ಬಿಸಿಲಿನ ತಾಪಮಾನ ಮತ್ತು ಅಪೂರ್ಣ ಪೂರ್ವ ಮುಂಗಾರು ಮಳೆಯಿಂದ ನೀರು ಆವಿಯಾಗಿ ಕೆರೆಗಳು ಬತ್ತಿವೆ. ಇದರಿಂದ ಅಂತರ್ಜಲ ಮಟ್ಟ ಕುಸಿಯುತ್ತಿದ್ದು, 3 ಲಕ್ಷಕ್ಕೂ ಅಧಿಕ ಬೋರ್‌ವೆಲ್‌ಗಳು ಬರಿದಾಗಿವೆ.

ಕೆರೆಗಳು ಬತ್ತಿರುವುದರಿಂದ ಸುತ್ತಲಿನ ಬಡಾವಣೆಗಳಲ್ಲಿ ಬೋರ್‌ವೆಲ್‌ಗಳಲ್ಲಿ ನೀರಿನ ಕೊರತೆ ಉಂಟಾಗಿದೆ. ಪೂರ್ವ ಮುಂಗಾರು ಮಳೆ ಆಗಾಗ ಸುರಿಯುತ್ತಿದ್ದರೂ, ಅಧಿಕ ತಾಪಮಾನದಿಂದ ನೀರು ಶೀಘ್ರವಾಗಿ ಆವಿಯಾಗುತ್ತಿದೆ. ಬಿಬಿಎಂಪಿ ವಲಯವಾರು ವರದಿಗಳ ಪ್ರಕಾರ, ಮಹದೇವಪುರದಲ್ಲಿ 50 ಕೆರೆಗಳ ಪೈಕಿ 19, ಯಲಹಂಕದಲ್ಲಿ 27ರಲ್ಲಿ 12, ಆರ್.ಆರ್. ನಗರದಲ್ಲಿ 33ರಲ್ಲಿ 12, ಮತ್ತು ದಾಸರಹಳ್ಳಿಯಲ್ಲಿ 12ರಲ್ಲಿ 6 ಕೆರೆಗಳು ಸಂಪೂರ್ಣ ಬತ್ತಿವೆ. ಈ ಬಿಕ್ಕಟ್ಟು ಅಂತರ್ಜಲ ಮಟ್ಟದ ಮೇಲೆ ಗಂಭೀರ ಪರಿಣಾಮ ಬೀರುತ್ತಿದೆ.

ಪರಿಸರವಾದಿಗಳ ಪ್ರಕಾರ, ಕೆರೆಗಳ ಬರವು ಪ್ರತಿ ವರ್ಷದ ಬೇಸಿಗೆಯ ಸಮಸ್ಯೆಯಾಗಿದ್ದು, ಇದಕ್ಕೆ ಮಳೆ ನೀರು ಕೊಯ್ದು ಮತ್ತು ಕೆರೆಗಳ ಪುನರ್ ಅಭಿವೃದ್ಧಿಯೇ ಪರಿಹಾರ. ಬಿಬಿಎಂಪಿ ಕಟ್ಟಡಗಳಿಗೆ ಮಳೆ ನೀರು ಕೊಯ್ದು ಕಡ್ಡಾಯಗೊಳಿಸಿದರೂ, ದೊಡ್ಡ ಕಟ್ಟಡಗಳಲ್ಲಿ ಇದನ್ನು ಪರಿಣಾಮಕಾರಿಯಾಗಿ ಜಾರಿಗೊಳಿಸಲಾಗಿಲ್ಲ.