ಬೆಂಗಳೂರಿಗೆ ಸಾಗಿಸುವ 2.5 ಕೋಟಿ ರೂಪಾಯಿ ಮೌಲ್ಯದ 2.1 ಕೆಜಿ ಚಿನ್ನದ ಆಭರಣಗಳನ್ನು ವಿಮಾನ ನಿಲ್ದಾಣ ಸಿಬ್ಬಂದಿಯೇ ಬಾಲಿವುಡ್ ಸಿನಿಮಾ ಮೀರಿಸುವ ಶೈಲಿಯಲ್ಲಿ ಕದಿಯಲು ಯತ್ನಿಸಿದ್ದ ದೊಡ್ಡ ಸಂಚು ಪೊಲೀಸರ ಮಿಂಚಿನ ಕಾರ್ಯಾಚರಣೆಯಲ್ಲಿ ವಿಫಲವಾಗಿದೆ. ಈ ಪ್ರಕರಣದಲ್ಲಿ ಮಾಸ್ಟರ್ ಮೈಂಡ್ ಸೇರಿದಂತೆ 8 ಆರೋಪಿಗಳನ್ನು ಬಂಧಿಸಲಾಗಿದೆ.
ಏಪ್ರಿಲ್ 18ರಂದು ಅಹಮದಾಬಾದ್ನ ಸರ್ದಾರ್ ವಲ್ಲಭಭಾಯಿ ಪಟೇಲ್ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದಿಂದ ಬೆಂಗಳೂರಿಗೆ ಏರ್ ಕಾರ್ಗೋ ಮೂಲಕ 13 ಕೆಜಿ ತೂಕದ 2.58 ಕೋಟಿ ರೂಪಾಯಿ ಮೌಲ್ಯದ ಚಿನ್ನದ ಆಭರಣಗಳನ್ನು ಸಾಗಿಸುವ ಏಳು ಪಾರ್ಸೆಲ್ಗಳಿದ್ದವು. ಟೈಟಾನ್ ಕಂಪೆನಿಗೆ ಸಂಬಂಧಿಸಿದ ಈ ಆಭರಣಗಳನ್ನು ಕದಿಯುವ ಗುಂಪು ವಿಮಾನ ನಿಲ್ದಾಣದ ಒಳಗಿನ ಸಿಬ್ಬಂದಿಯ ನೆರವಿನಿಂದ ಸಂಚು ರೂಪಿಸಿತ್ತು.
ಮಾಸ್ಟರ್ ಮೈಂಡ್ ಯಾರು?
ಆಕಾಶ ಏರ್ನ ಕ್ಲೀನಿಂಗ್ ಇನ್ಚಾರ್ಜ್ ರೋಷನ್ ಪಟೇಲ್ ಈ ಸಂಚಿನ ಮುಖ್ಯ ಸೂತ್ರಧಾರಿ ಎಂದು ಪೊಲೀಸರು ತಿಳಿಸಿದ್ದಾರೆ. ವಿಮಾನಯಾನ ಸಂಸ್ಥೆಯ ಭದ್ರತಾ ಅಧಿಕಾರಿ ಜೈದ್ ಹಸನ್ ಅನ್ಸಾರಿ, ಸುಲ್ತಾನ್ ಸಾಮಾ ಸೇರಿದಂತೆ ಇತರರು ಈ ಗುಂಪಿನ ಪ್ರಮುಖ ಸದಸ್ಯರು. ಆರೋಪಿಗಳು ಸಿಸಿಟಿವಿ ಕ್ಯಾಮೆರಾಗಳನ್ನು ತಪ್ಪಿಸಿ, ಹೈ-ಸೆಕ್ಯುರಿಟಿ ವಲಯದಿಂದ ಚಿನ್ನದ ಪಾರ್ಸೆಲ್ ಅನ್ನು ಬೇರ್ಪಡಿಸಿ, ನಕಲಿ ಪ್ರಯಾಣಿಕ ಸಲೀಂ ಮೊಹಮ್ಮದ್ ಅನ್ಸಾರಿ ಮೂಲಕ ಹೊರಗೆ ಸಾಗಿಸುವ ಯೋಜನೆ ಹಾಕಿಕೊಂಡಿದ್ದರು.
ಪೊಲೀಸ್ ಉಪ ಆಯುಕ್ತ ಅತುಲ್ ಬನ್ಸಾಲ್ ಪ್ರಕಾರ, ಆರೋಪಿಗಳು ಮಾರ್ಚ್ ತಿಂಗಳಿನಿಂದಲೇ ಇಂತಹ ಕಳ್ಳತನಕ್ಕೆ ಪ್ರಯತ್ನಿಸುತ್ತಿದ್ದರು. ಈ ಬಾರಿ ಅವರ ಸಂಚು ಭಾಗಶಃ ಯಶಸ್ವಿಯಾಗುವಂತೆ ಕಾಣುತ್ತಿತ್ತು. ಆದರೆ ಪೊಲೀಸರ ತನಿಖೆಯಿಂದಾಗಿ ಯೋಜನೆ ವಿಫಲವಾಗಿದೆ.
ಪೊಲೀಸ್ ಕಾರ್ಯಾಚರಣೆ
ಪೊಲೀಸರು ತ್ವರಿತ ಕಾರ್ಯಾಚರಣೆ ನಡೆಸಿ 8 ಮಂದಿಯನ್ನು ಬಂಧಿಸಿದ್ದಾರೆ. ಅವರಿಂದ 1.72 ಕೋಟಿ ರೂಪಾಯಿ ಮೌಲ್ಯದ ನಗದು, ಚಿನ್ನ ಮತ್ತು ಬೆಳ್ಳಿ ಆಭರಣಗಳನ್ನು ವಶಪಡಿಸಿಕೊಂಡಿದ್ದಾರೆ. ಕದ್ದ ಚಿನ್ನವನ್ನು ಕರಗಿಸಿ ಮಾರಾಟ ಮಾಡುವ ಜಾಲವನ್ನೂ ಪತ್ತೆ ಮಾಡಲಾಗಿದೆ. ತನಿಖೆ ಅಹಮದಾಬಾದ್ ಮತ್ತು ರಾಜ್ಕೋಟ್ಗೆ ವಿಸ್ತರಿಸಿದೆ.
ಹಿಂದಿನ ಪ್ರಯತ್ನಗಳು
ಆರೋಪಿಗಳು ಹಿಂದೆಯೂ ಮೂರು ಬಾರಿ ಇದೇ ರೀತಿಯ ಕಳ್ಳತನಕ್ಕೆ ಪ್ರಯತ್ನಿಸಿದ್ದರೂ ವಿಫಲರಾಗಿದ್ದರು. ವಿಮಾನ ನಿಲ್ದಾಣದ ಒಳಗಿನ ಸಿಬ್ಬಂದಿಯ ಭಾಗವಹಿಸುವಿಕೆ ಈ ಸಂಚನ್ನು ಹೆಚ್ಚು ಅಪಾಯಕಾರಿಯಾಗಿಸಿತ್ತು. ಈ ಘಟನೆಯಿಂದಾಗಿ ಅಕಾಶ ಏರ್ ಇಬ್ಬರು ಉದ್ಯೋಗಿಗಳನ್ನು ವಜಾಗೊಳಿಸಿದೆ.
ಈ ಬಾಲಿವುಡ್ ಸ್ಟೈಲ್ ದರೋಡೆಯ ಸಂಚು ವಿಫಲವಾಗಿರುವುದು ಪೊಲೀಸರಿಗೆ ದೊಡ್ಡ ಯಶಸ್ಸು ಎಂದು ಪರಿಗಣಿಸಲಾಗುತ್ತಿದೆ. ತನಿಖೆ ಮುಂದುವರಿದಿದ್ದು, ತಲೆಮರೆಸಿಕೊಂಡಿರುವ ಉಳಿದ ಆರೋಪಿಗಳನ್ನು ಬಂಧಿಸುವ ಕೆಲಸ ನಡೆಯುತ್ತಿದೆ.
