ಹಸೆಮಣೆ ಏರಿದ ‘ಪುಷ್ಪವತಿ’​ ಡಿ-ಬಾಸ್ ಬೆಡಗಿಯ ಬಾಳಲ್ಲಿ ಮದುವೆ ರಂಗು

ಕೀರ್ತಿ ಪಾಟೀಲ್, ಫಿಲಂ ಬ್ಯೂರೋ, ಗ್ಯಾರಂಟಿ ನ್ಯೂಸ್

ಸ್ಯಾಂಡಲ್‌ವುಡ್‌ನಲ್ಲಿ ಈಗ ಸಾಲು ಸಾಲು ಮದುವೆಯ ಸಂಭ್ರಮ. ಸದ್ಯ ಈಗ ಕೇಳಿಬರುತ್ತಿರುವ ಲೇಟೆಸ್ಟ್ ಸುದ್ದಿ ಎಂದರೆ, ಕನ್ನಡಿಗರ ಮನ ಗೆದ್ದಿದ್ದ ‘ಶೇಕ್ ಇಟ್ ಪುಷ್ಪವತಿ’ ಖ್ಯಾತಿಯ ನಿಮಿಕಾ ರತ್ನಾಕರ್ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದಾರೆ. ಡಿ-ಬಾಸ್ ಜೊತೆ ಸ್ಟೆಪ್ ಹಾಕಿ ಇಡೀ ಕರ್ನಾಟಕವೇ ತನ್ನತ್ತ ತಿರುಗಿ ನೋಡುವಂತೆ ಮಾಡಿದ್ದ ಈ ಮಂಗಳೂರು ಬೆಡಗಿ, ಈಗ ಮುಂಬೈ ಹುಡುಗನ ಕೈಹಿಡಿದು ಹೊಸ ಜೀವನ ಆರಂಭಿಸಿದ್ದಾರೆ. ಈ ಸಂಭ್ರಮದ ಕಂಪ್ಲೀಟ್ ಸ್ಟೋರಿ ಇಲ್ಲಿದೆ.

• ಹಸೆಮಣೆ ಏರಿದ ‘ಪುಷ್ಪವತಿ’​ ಡಿ-ಬಾಸ್ ಬೆಡಗಿಯ ಬಾಳಲ್ಲಿ ಮದುವೆ ರಂಗು
• ಮುಂಬೈ ಉದ್ಯಮಿ ಜೊತೆ ಕರಾವಳಿ ಬೆಡಗಿಯ ಕಲ್ಯಾಣ ವೈಭವ..!
• ಶೇಕ್ ಇಟ್ ಪುಷ್ಪವತಿ ಈಗ ಆಶೀಶ್ ಅರ್ಧಾಂಗಿನಿ..!
• ಮಲ್ಲಿಗೆ ನಾಡಲ್ಲಿ ಮದುವೆ ಸಂಭ್ರಮ..ನಿಮಿಕಾ ವೆಡ್ಡಿಂಗ್ ಝಲಕ್

ಚಾಲೆಂಜಿಂಗ್ ಸ್ಟಾರ್ ದರ್ಶನ್ ನಟನೆಯ ‘ಕ್ರಾಂತಿ’ ಸಿನಿಮಾದ ‘ಶೇಕ್ ಇಟ್ ಪುಷ್ಪವತಿ’ ಹಾಡಿನ ಮೂಲಕ ರಾತ್ರೋರಾತ್ರಿ ಸೆನ್ಸೇಷನ್ ಸೃಷ್ಟಿಸಿದ್ದ ನಟಿ ನಿಮಿಕಾ ರತ್ನಾಕರ್ ಈಗ ಅಧಿಕೃತವಾಗಿ ‘ಮಿಸಸ್’ ಆಗಿದ್ದಾರೆ. ಸದ್ಯದ ಟ್ರೆಂಡ್‌ನಂತೆ ವಿದೇಶಿ ತಾಣಗಳಲ್ಲಿ ‘ಡೆಸ್ಟಿನೇಶನ್ ವೆಡ್ಡಿಂಗ್’ ಮಾಡಿಕೊಳ್ಳುವ ಬದಲು, ತಾವು ಹುಟ್ಟಿ ಬೆಳೆದ ಮಣ್ಣಿನ ಮೇಲಿನ ಮಮಕಾರದಿಂದ ತಮ್ಮ ಹುಟ್ಟೂರಾದ ಮಂಗಳೂರಿನಲ್ಲೇ ಸಾಂಪ್ರದಾಯಿಕವಾಗಿ ವಿವಾಹವಾಗಿದ್ದಾರೆ. ಮುಂಬೈ ಮೂಲದ ಯಶಸ್ವಿ ಉದ್ಯಮಿ ಆಶೀಶ್ ಅವರೊಂದಿಗೆ ಸಪ್ತಪದಿ ತುಳಿದಿರುವ ನಿಮಿಕಾ, ಮಲ್ಲಿಗೆ ಹೂವಿನ ಪರಿಮಳ ಹಾಗೂ ನಾದಸ್ವರದ ಮಧುರ ಧ್ವನಿಯ ನಡುವೆ ಹಿರಿಯರ ಆಶೀರ್ವಾದಗಳೊಂದಿಗೆ ಹೊಸ ಬದುಕಿಗೆ ನಾಂದಿ ಹಾಡಿದ್ದಾರೆ.

ಮಾಡಲಿಂಗ್ ಲೋಕದಿಂದ ಬಣ್ಣದ ಪ್ರಪಂಚಕ್ಕೆ ಕಾಲಿಟ್ಟ ನಿಮಿಕಾ ರತ್ನಾಕರ್ ಕೇವಲ ಗ್ಲಾಮರ್ ಗೊಂಬೆಯಲ್ಲ, ಬದಲಿಗೆ ಬಹುಮುಖ ಪ್ರತಿಭೆ. ‘ರಾಮಧಾನ್ಯ’ ಚಿತ್ರದ ಮೂಲಕ ಚಂದನವನಕ್ಕೆ ಎಂಟ್ರಿ ಕೊಟ್ಟ ಇವರು ‘ಅಬ್ಬರ’, ‘ಮಿಸ್ಟರ್ ಬ್ಯಾಚುಲರ್’, ‘ಫ್ಲರ್ಟ್’ ನಂತಹ ಸಿನಿಮಾಗಳಲ್ಲಿ ನಟಿಸಿ ಸೈ ಎನಿಸಿಕೊಂಡಿದ್ದಾರೆ. ಕೇವಲ ನಟನೆಯಷ್ಟೇ ಅಲ್ಲದೆ, ಹಿನ್ನೆಲೆ ಗಾಯಕಿಯಾಗಿಯೂ ಗುರುತಿಸಿಕೊಂಡಿರುವ ನಿಮಿಕಾ ತುಳು ಸಿನಿಮಾ ‘ಮದಿಪು’ನಲ್ಲಿ ಹಾಡುವ ಮೂಲಕ ತಮ್ಮ ಕಂಠಸಿರಿಯನ್ನೂ ಪರಿಚಯಿಸಿದ್ದರು. ಆದರೆ ಇವರಿಗೆ ಅತಿ ದೊಡ್ಡ ಬ್ರೇಕ್ ನೀಡಿದ್ದು ಮಾತ್ರ ದರ್ಶನ್ ಅಭಿನಯದ ‘ಕ್ರಾಂತಿ’ ಸಿನಿಮಾ. ಆ ಒಂದು ಹಾಡು ನಿಮಿಕಾ ಅವರನ್ನು ಕನ್ನಡಿಗರ ನೆಚ್ಚಿನ ‘ಪುಷ್ಪವತಿ’ಯನ್ನಾಗಿ ಮಾಡಿತು.

ಯಾವುದೇ ಒಬ್ಬ ನಟಿಯ ವೃತ್ತಿಜೀವನ ಉತ್ತುಂಗದಲ್ಲಿರುವಾಗ ಮದುವೆಯ ನಿರ್ಧಾರ ತೆಗೆದುಕೊಳ್ಳುವುದು ಅಷ್ಟು ಸುಲಭವಲ್ಲ. ಅದರಲ್ಲೂ ಗ್ಲಾಮರ್ ಇಂಡಸ್ಟ್ರಿಯಲ್ಲಿ ಮದುವೆಯ ನಂತರ ಅವಕಾಶಗಳು ಕಡಿಮೆಯಾಗುತ್ತವೆ ಎಂಬ ಹಳೆಯ ಮಾತುಗಳು ಇಂದಿಗೂ ಚಾಲ್ತಿಯಲ್ಲಿದೆ. ಆದರೆ ಈಗ ಕಾಲ ಬದಲಾಗಿದೆ. ದೀಪಿಕಾ ಪಡುಕೋಣೆ, ಆಲಿಯಾ ಭಟ್, ಕರೀನಾ ಕಪೂರ್, ರಶ್ಮಿಕಾ ಹೀಗೆ ಅನೇಕ ನಟಿಯರು ಮದುವೆಯ ನಂತರವೂ ಸಿನಿಮಾದಲ್ಲಿ ಯಶಸ್ವಿಯಾಗಿ ಮುಂದುವರಿಯುತ್ತಿದ್ದಾರೆ. ನಿಮಿಕಾ ರತ್ನಾಕರ್ ಕೂಡ ತಮ್ಮ ವೈಯಕ್ತಿಕ ಜೀವನ ಹಾಗೂ ವೃತ್ತಿಜೀವನ ಎರಡನ್ನೂ ಸಮತೋಲನದಲ್ಲಿ ಕೊಂಡೊಯ್ಯುವ ಉದ್ದೇಶ ಹೊಂದಿದ್ದಾರೆ. ಮದುವೆ ಎಂಬುದು ಕೇವಲ ಸಂಬಂಧವಲ್ಲ, ಅದು ನಟಿಯರ ಜೀವನಕ್ಕೆ ಒಂದು ಭದ್ರತೆ ಹಾಗೂ ಸ್ಥಿರತೆಯನ್ನು ನೀಡುವ ಸುಂದರ ಘಟ್ಟವಾಗಿದೆ.

ಸದ್ಯ ತಮ್ಮ ಮದುವೆಯ ಸುಂದರ ಕ್ಷಣಗಳನ್ನು ಇನ್‌ಸ್ಟಾಗ್ರಾಂನಲ್ಲಿ ಹಂಚಿಕೊಂಡಿರುವ ನಿಮಿಕಾ, ಆ ಫೋಟೋಗಳಿಗೆ ‘ಮಲ್ಲಿಗೆ ಪರಿಮಳ, ನಾದಸ್ವರದ ಧ್ವನಿ ಮತ್ತು ಸಾವಿರ ಆಶೀರ್ವಾದಗಳು’ ಎಂದು ಕ್ಯಾಪ್ಶನ್ ನೀಡಿದ್ದಾರೆ. ಸಾಂಪ್ರದಾಯಿಕ ಉಡುಗೆಯಲ್ಲಿ ಕಂಗೊಳಿಸುತ್ತಿರುವ ನವಜೋಡಿಯನ್ನು ನೋಡಿ ಅಭಿಮಾನಿಗಳು ಫಿದಾ ಆಗಿದ್ದಾರೆ. ಉದ್ಯಮಿ ಆಶೀಶ್ ಅವರ ಬಗ್ಗೆ ಹೆಚ್ಚಿನ ಮಾಹಿತಿ ಸಿಗದಿದ್ದರೂ, ಫೋಟೋಗಳಲ್ಲಿ ಇವರಿಬ್ಬರ ಕೆಮಿಸ್ಟ್ರಿ ನೋಡಿ ‘ಮೇಡ್ ಫಾರ್ ಈಚ್ ಅದರ್’ ಜೋಡಿ ಎಂದು ನೆಟ್ಟಿಗರು ಕಮೆಂಟ್ ಮಾಡುತ್ತಿದ್ದಾರೆ. ಸದ್ಯ ಈ ಫೋಟೋಗಳು ಗಾಂಧಿನಗರದ ಗಲ್ಲಿಯಿಂದ ಹಿಡಿದು ಕರಾವಳಿಯವರೆಗೂ ಭರ್ಜರಿ ಸೌಂಡ್ ಮಾಡುತ್ತಿವೆ.

ಕಿರುತೆರೆ, ಬೆಳ್ಳಿಪರೆ ಹಾಗೂ ಮಾಡಲಿಂಗ್ ಲೋಕದಲ್ಲಿ ಸಕ್ರಿಯರಾಗಿದ್ದ ನಿಮಿಕಾ ಈಗ ಗೃಹಿಣಿಯಾಗಿ ಭಡ್ತಿ ಪಡೆದಿದ್ದಾರೆ. ಮುಂಬೈ ಉದ್ಯಮಿ ಆಶೀಶ್ ಅವರ ಜೊತೆಗಿನ ಇವರ ದಾಂಪತ್ಯ ಜೀವನ ಸುಖಕರವಾಗಿರಲಿ ಎಂದು ಚಿತ್ರರಂಗದ ಗಣ್ಯರು ಹಾರೈಸುತ್ತಿದ್ದಾರೆ. ವಿಜಯ್ ಅಭಿನಯದ ‘ಜನ ನಾಯಕನ್’ನಂತಹ ಸಿನಿಮಾಗಳ ಬಗ್ಗೆ ಸ್ಯಾಂಡಲ್‌ವುಡ್ ಚರ್ಚಿಸುತ್ತಿರುವಾಗಲೇ, ನಿಮಿಕಾ ಅವರ ಈ ಮದುವೆ ಸುದ್ದಿ ಸಖತ್ ಸೌಂಡ್ ಮಾಡಿದೆ. ಮದುವೆಯ ನಂತರವೂ ನಿಮಿಕಾ ತೆರೆಯ ಮೇಲೆ ಕಾಣಿಸಿಕೊಳ್ಳಲಿ, ಮತ್ತಷ್ಟು ಹಿಟ್ ಹಾಡು ಹಾಗು ಸಿನಿಮಾಗಳನ್ನ ನೀಡಲಿ ಎಂಬುದು ಅಭಿಮಾನಿಗಳ ಆಶಯವಾಗಿದೆ.