ಮಡಿಕೇರಿ: ಇತ್ತೀಚೆಗಷ್ಟೇ ಬಹುಕಾಲದ ಗೆಳೆಯ, ಟಾಲಿವುಡ್ ಸ್ಟಾರ್ ವಿಜಯ್ ದೇವರಕೊಂಡ ಅವರೊಂದಿಗೆ ಹಸೆಮಣೆ ಏರಿ ದಾಂಪತ್ಯ ಜೀವನಕ್ಕೆ ಕಾಲಿಟ್ಟ ಕೊಡಗಿನ ಕುವರಿ ರಶ್ಮಿಕಾ ಮಂದಣ್ಣ ಅವರಿಗೆ ತವರಿನಿಂದ ಅದ್ಭುತವಾದ ಉಡುಗೊರೆಯೊಂದು ಲಭಿಸಿದೆ. ರಶ್ಮಿಕಾ ಅವರ ತಂದೆ ಮದನ್ ಮಂದಣ್ಣ ಅವರು ತಮ್ಮ ಐಷಾರಾಮಿ ಮನೆಯನ್ನು ಮಗಳ ಮದುವೆಯ ಉಡುಗೊರೆಯಾಗಿ ನೀಡಿದ್ದಾರೆ.
ಕೊಡಗು ಜಿಲ್ಲೆಯ ವಿರಾಜಪೇಟೆ ತಾಲ್ಲೂಕಿನ ಚೆಂಚೆಬೆಳ್ಳೂರು ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಕುಕ್ಲೂರು ಗ್ರಾಮದಲ್ಲಿ ಈ ಐಷಾರಾಮಿ ಬಂಗಲೆ ಇದೆ. ‘ಸೆರಿನಿಟಿ’ (Serenity) ಎಂದು ಕರೆಯಲ್ಪಡುವ ಈ ಮನೆಯು ಪ್ರಕೃತಿಯ ಮಡಿಲಲ್ಲಿರುವ ಅತ್ಯಂತ ಸುಂದರವಾದ ಮನೆಯಾಗಿದೆ. ರಶ್ಮಿಕಾ ಅವರ ತಂದೆ ಮದನ್ ಮಂದಣ್ಣ ಮತ್ತು ತಾಯಿ ಸುಮನ್ ಮಂದಣ್ಣ ಅವರ ಜಂಟಿ ಹೆಸರಿನಲ್ಲಿದ್ದ ಈ ಮನೆಯನ್ನು ಈಗ ಅಧಿಕೃತವಾಗಿ ರಶ್ಮಿಕಾ ಹೆಸರಿಗೆ ನೋಂದಣಿ ಮಾಡಿಕೊಡಲಾಗಿದೆ.
ವಿರಾಜಪೇಟೆಯ ಉಪನೋಂದಣಿ ಕಚೇರಿಯಲ್ಲಿ (Sub-Registrar Office) ಸರ್ವೆ ಸಂಖ್ಯೆ 142/1 ಮತ್ತು 142/2 ರ ಅಡಿಯಲ್ಲಿ ಬರುವ ಈ ಆಸ್ತಿಯನ್ನು ‘ದಾನಪತ್ರ’ದ (Gift Deed) ಮೂಲಕ ರಶ್ಮಿಕಾ ಅವರಿಗೆ ಹಸ್ತಾಂತರಿಸಲಾಗಿದೆ.
ಈ ಆಸ್ತಿ ವರ್ಗಾವಣೆಯ ಸಂದರ್ಭದಲ್ಲಿ ಮಂದಣ್ಣ ಕುಟುಂಬದ ಪರವಾಗಿ ವಕೀಲರಾದ ಪಟ್ಟಡ ರೀನಾ ಪ್ರಕಾಶ್ ಅವರು ಎಲ್ಲಾ ದಾಖಲೆ ಪತ್ರಗಳನ್ನು ನಿರ್ವಹಿಸಿದರು. ರಶ್ಮಿಕಾ ಮಂದಣ್ಣ ಅವರ ಖಾಸಗಿ ವ್ಯವಸ್ಥಾಪಕರು ಹಾಗೂ ಅಂಗರಕ್ಷಕರು ಉಪನೋಂದಣಿ ಕಚೇರಿಯಲ್ಲಿ ಉಪಸ್ಥಿತರಿದ್ದು ಪ್ರಕ್ರಿಯೆಯನ್ನು ಪೂರ್ಣಗೊಳಿಸಿದರು. ಮದನ್ ಮಂದಣ್ಣ ಅವರು ವಿರಾಜಪೇಟೆ ಪಟ್ಟಣ ಪಂಚಾಯಿತಿಯ ಮಾಜಿ ಸದಸ್ಯರಾಗಿದ್ದು, ಕೊಡಗಿನಲ್ಲಿ ತಮ್ಮದೇ ಆದ ಪ್ರಭಾವ ಹೊಂದಿದ್ದಾರೆ.
