ಗೋವಾ, ನವೆಂಬರ್ 30: ಬಾಲಿವುಡ್ ನಟ ರಣವೀರ್ ಸಿಂಗ್ ಅವರು ಕನ್ನಡದ ಬ್ಲಾಕ್‌ಬಸ್ಟರ್ ಚಿತ್ರ ‘ಕಾಂತಾರ’ದಲ್ಲಿನ ದೈವನ್ನು “ಫೀಮೇಲ್ ಘೋಸ್ಟ್” (ಸ್ತ್ರೀ ದೆವ್ವ) ಎಂದು ಕರೆದಿದ್ದಕ್ಕೆ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀಕರ ಆಕ್ರೋಶ ವ್ಯಕ್ತವಾಗಿದೆ. ಗೋವಾದಲ್ಲಿ ನಡೆದ 56ನೇ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವದ (IFFI 2025) ಸಮಾರೋಪ ಸಮಾರಂಭದಲ್ಲಿ ರಿಷಬ್ ಶೆಟ್ಟಿ ಅವರನ್ನು ವೇದಿಕೆಯಲ್ಲಿ ಹೊಗಳುತ್ತಾ ರಣವೀರ್ ಮಾಡಿದ ಈ ಹೇಳಿಕೆ ಈಗ ದೊಡ್ಡ ವಿವಾದಕ್ಕೆ ಕಾರಣವಾಗಿದೆ.
ಶುಕ್ರವಾರ ರಾತ್ರಿ ನಡೆದ ಸಮಾರೋಪ ಕಾರ್ಯಕ್ರಮದಲ್ಲಿ ರಿಷಬ್ ಶೆಟ್ಟಿ ಮತ್ತು ರಣವೀರ್ ಸಿಂಗ್ ಇಬ್ಬರೂ ಒಟ್ಟಿಗೆ ವೇದಿಕೆ ಹಂಚಿಕೊಂಡಿದ್ದರು. ರಣವೀರ್ ತಮ್ಮ ಗಟ್ಟಿ ಧ್ವನಿಯಲ್ಲಿ ರಿಷಬ್ ಅವರನ್ನು ಮತ್ತು ‘ಕಾಂತಾರ’ ಚಿತ್ರವನ್ನು ಹೊಗಳಿದರು. ರಿಷಬ್ ಭಾಯ್, ನೀನು ಮಾಡಿದ್ದು ಸಿನಿಮಾ ಅಲ್ಲ, ಅದೊಂದು ಅನುಭವ ! ಆ ದೈವ ನರ್ತನದಲ್ಲಿ ನೀನು ಫೀಮೇಲ್ ಘೋಸ್ಟ್ ಆಗಿ ಬಂದು ಎಲ್ಲರನ್ನೂ ರೋಮಾಂಚನಗೊಳಿಸಿದೆ” ಎಂದು ರಣವೀರ್, ರಿಷಬ್ ಅವರ ದೈವ ನರ್ತನವನ್ನು ಅಲ್ಲೇ ವೇದಿಕೆಯ ಮೇಲೆಯೇ ಅನುಕರಿಸಿ ತೋರಿಸಿದರು.
ಆದರೆ ಈ ಒಂದೇ ವಾಕ್ಯ ಕರಾವಳಿ ಕರ್ನಾಟಕದ ಜನರ ಕೋಪಕ್ಕೆ ಕಾರಣವಾಗಿದೆ. ಚೂರಿಯಂತೆ ತಗುಲಿದೆ. ‘ಕಾಂತಾರ’ ಚಿತ್ರದಲ್ಲಿ ಕೇಂದ್ರೀಯ ಪಾತ್ರವಾಗಿರುವ ಪಂಜುರ್ಲಿ ದೈವ ಮತ್ತು ಗುಳಿಗೆ ದೈವಗಳ ಸಂಯುಕ್ತ ರೂಪವೇ ಚಾಮುಂಡೇಶ್ವರಿ ದೈವ. ತುಳುನಾಡು, ಕರಾವಳಿ ಮತ್ತು ಮಲೆನಾಡಿನಲ್ಲಿ ಸಾವಿರಾರು ವರ್ಷಗಳಿಂದ ಪೂಜಿತವಾಗಿರುವ ಈ ದೈವಗಳನ್ನು “ದೆವ್ವ” ಅಥವಾ “ಘೋಸ್ಟ್” ಎಂದು ಕರೆದಿದ್ದು ಧಾರ್ಮಿಕ ಭಾವನೆಗಳಿಗೆ ಧಕ್ಕೆ ತಂದಂತಾಗಿದೆ ಎಂದು ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರ ಆಕ್ರೋಶ ವ್ಯಕ್ತವಾಘಿದೆ.
ದೈವ ಎಂದರೆ ನಮ್ಮ ಆರಾಧ್ಯ ದೇವರು. ಅದನ್ನು ಗೋಸ್ಟ್ ಎಂದು ಕರೆದರೆ ಸಹಿಸುವುದಾದರೂ ಹೇಗೆ ?, ರಣವೀರ್ ಸಿಂಗ್‌ಗೆ ದಕ್ಷಿಣ ಭಾರತದ ಸಂಸ್ಕೃತಿ, ಆಚಾರ-ವಿಚಾರಗಳ ಬಗ್ಗೆ ಗೊತ್ತಿಲ್ಲದಿದ್ದರೆ ಮೌನವಾಗಿರಬಹುದಿತ್ತು ಎದನ್ನ ಬಿಟ್ಟು ಹೊಗಳುವ ಭರದಲ್ಲಿ ಈ ರೀತಿ ದೈವಕ್ಕೆ ಅಪಮಾನ ಮಾಡಿರುವುದು ಸರಿಯಲ್ಲ. ಇದು ಕೇವಲ ಅಜ್ಞಾನವಲ್ಲ, ಉದ್ಧಟತನ ಮತ್ತು ಅಹಂಕಾರ ಎಂದು ಕನ್ನಡಿಗರು ಮತ್ತು ತುಳುನಾಡಿನವರು ರಣವೀರ್ ಸಿಂಗ್ ಅವರನ್ನು ತರಾಟೆಗೆ ತೆಗೆದುಕೊಂಡಿದ್ದಾರೆ.
ರಿಷಬ್ ಶೆಟ್ಟಿ ಅದೇ ಕಾರ್ಯಕ್ರಮದಲ್ಲಿದ್ದ ಸ್ವತಃ ಈ ವಿಷಯಕ್ಕೆ ಇನ್ನೂ ಪ್ರತಿಕ್ರಿಯಿಸಿಲ್ಲ, ಎಂದು ದೈವಾರಾಧಕರು ಬೇಸರ ವ್ಯಕ್ತಪಡಿಸಿದ್ದಾರೆ. ಕರ್ನಾಟಕದ ಜನತೆ ರಣವೀರ್ ಅವರು ತಕ್ಷಣ ಕ್ಷಮೆಯಾಚಿಸಬೇಕು ಎಂದು ಒತ್ತಾಯಿಸುತ್ತಿದ್ದಾರೆ. ರಣವೀರ್ ಸಿಂಗ್ ಈ ಹಿಂದೆಯೂ ತಮ್ಮ ಉತ್ಸಾಹದ ಮಾತುಗಳಿಂದ ವಿವಾದಕ್ಕೆ ಸಿಲುಕುತ್ತಿದ್ದರು. ಆದರೆ ಈ ಬಾರಿ ಕರ್ನಾಟಕದ ಜನರ ಧಾರ್ಮಿಕ ಭಾವನೆಗೆ ನೇರವಾಗಿ ಧಕ್ಕೆ ತಂದಿರುವುದರಿಂದ ವಿವಾದ ಇನ್ನಷ್ಟು ಉಲ್ಬಣಗೊಳ್ಳುವ ಸಾಧ್ಯತೆ ಇದೆ.
