ಬಹುಭಾಷಾ ನಟಿ ಮೀನಾ ದುರೈರಾಜ್‌ ದಕ್ಷಿಣ ಭಾರತೀಯ ಚಿತ್ರರಂಗದ ಖ್ಯಾತ ನಾಮ. 48 ವರ್ಷದ ವಯಸ್ಸಿನಲ್ಲೂ 28ರ ಯುವತಿಯಂತೆ ಕಾಣುವ ಮೀನಾ, ಮೂರು ದಶಕಗಳಿಂದ ಸಿನಿಮಾ ರಂಗದಲ್ಲಿ ತಮ್ಮ ಸೌಂದರ್ಯ ಮತ್ತು ಅಭಿನಯದಿಂದ ಜನರ ಮನಗೆದ್ದಿದ್ದಾರೆ. ಆರು ವರ್ಷದ ಬಾಲಕಿಯಾಗಿ ಚಿತ್ರರಂಗಕ್ಕೆ ಕಾಲಿಟ್ಟು, 42 ವರ್ಷಗಳಿಂದ ನಟಿಯಾಗಿ ಮಿಂಚುತ್ತಿರುವ ಇವರ ಜೀವನದ ಕೆಲವು ಘಟನೆಗಳು ಇತ್ತೀಚೆಗೆ ಸುದ್ದಿಯಾಗಿವೆ.
2021ರಲ್ಲಿ ಕೋವಿಡ್‌ ಸೋಂಕಿನಿಂದ ಮೀನಾ ಅವರ ಪತಿ ವಿದ್ಯಾಸಾಗರ್‌ ಶ್ವಾಸಕೋಶದ ತೊಂದರೆಯಿಂದ ನಿಧನರಾದರು. ಇದಾದ ನಂತರ, ಮೀನಾ ಮರುಮದುವೆಯಾಗುತ್ತಾರೆ ಎಂಬ ವದಂತಿಗಳು ಹರಡಿದವು. ಇತ್ತೀಚೆಗೆ ಸೂಪರ್‌ಸ್ಟಾರ್‌ ರಜನಿಕಾಂತ್‌ ಅವರ ಮಾಜಿ ಅಳಿಯ ಧನುಷ್‌ ಜೊತೆ ಮೀನಾ ಮದುವೆಯಾಗುತ್ತಿದ್ದಾರೆ ಎಂಬ ಸುದ್ದಿ ಕಾಡ್ಗಿಚ್ಚಿನಂತೆ ಹರಡಿತು. ಈ ವದಂತಿಗಳಿಗೆ ಮೀನಾ ಹಲವು ಬಾರಿ ಸ್ಪಷ್ಟನೆ ನೀಡಿದ್ದಾರೆ. ಆದರೆ, ಈಗ ಈ ಬಗ್ಗೆ ಮಾತನಾಡುವುದನ್ನು ನಿಲ್ಲಿಸಿದ್ದಾರೆ.
ನಟಿ ಸುಹಾಸಿನಿ ನಡೆಸಿಕೊಡುವ ಕಾರ್ಯಕ್ರಮವೊಂದರಲ್ಲಿ ಮೀನಾ ತಮ್ಮ ಪ್ರೇಮ ಜೀವನದ ರಹಸ್ಯವನ್ನು ಬಿಚ್ಚಿಟ್ಟರು. ವಿದ್ಯಾಸಾಗರ್‌ ಅವರನ್ನು ಮದುವೆಯಾಗುವ ಮೊದಲು ತಾವು ಬಾಲಿವುಡ್ ನಟ ಹೃತಿಕ್‌ ರೋಷನ್‌ ಅವರನ್ನು ಪ್ರೀತಿಸುತ್ತಿದ್ದೆವು ಎಂದು ಬಹಿರಂಗವಾಗಿ ಒಪ್ಪಿಕೊಂಡರು. “ನಾನು ಹೃತಿಕ್‌ ರೋಷನ್‌ ಅವರನ್ನು ತುಂಬಾ ಪ್ರೀತಿಸುತ್ತಿದ್ದೆ. ಅವರಂತಹ ವ್ಯಕ್ತಿಯನ್ನು ಮದುವೆಯಾಗಬೇಕೆಂದು ನನ್ನ ತಾಯಿಗೆ ಹೇಳುತ್ತಿದ್ದೆ. ಆದರೆ, ಈ ವಿಷಯವನ್ನು ಎಂದಿಗೂ ಹೃತಿಕ್‌ಗೆ ತಿಳಿಸಲಿಲ್ಲ. ಅವರ ಮದುವೆಯ ಸುದ್ದಿ ಕೇಳಿದಾಗ ಬೇಸರವಾಯಿತು,” ಎಂದು ಮೀನಾ ತಮ್ಮ ಮನದಾಳದ ಮಾತುಗಳನ್ನು ಹಂಚಿಕೊಂಡರು. ಈ ಸಂದರ್ಭದಲ್ಲಿ ಸುಹಾಸಿನಿ, ಮೀನಾ ಮತ್ತು ಹೃತಿಕ್‌ ಭೇಟಿಯಾದ ಹಳೆಯ ಫೋಟೋವನ್ನು ತೋರಿಸಿದರು, ಇದು ಕಾರ್ಯಕ್ರಮದಲ್ಲಿ ಗಮನ ಸೆಲೆಯಿತು.
ಮೀನಾ ತಮ್ಮ ಮಗಳು ನೈನಿಕಾ ಅವರ ಸಿನಿಮಾ ಪಯಣದ ಬಗ್ಗೆಯೂ ಮಾತನಾಡಿದರು. “ನೈನಿಕಾ ವಿಜಯ್ ನಟನೆಯ ‘ಥೇರಿ’ ಚಿತ್ರದ ಮೂಲಕ ಚಿತ್ರರಂಗಕ್ಕೆ ಕಾಲಿಟ್ಟಳು. ಈ ಚಿತ್ರ ದೊಡ್ಡ ಯಶಸ್ಸು ಕಂಡಿತ್ತು. ಇದು ನನಗೆ ಹೆಮ್ಮೆಯ ವಿಷಯ,” ಎಂದು ಮೀನಾ ಹೇಳಿದರು. ತಮ್ಮ ಸಿನಿಮಾ ಜೀವನದ ಬಗ್ಗೆಯೂ ಮಾಹಿತಿ ಹಂಚಿಕೊಂಡರು. ರಜನಿಕಾಂತ್‌ ಅವರ ‘ಪಡಯಪ್ಪ’ ಚಿತ್ರದಲ್ಲಿ ರಮ್ಯಾ ಕೃಷ್ಣನ್‌ ನಿರ್ವಹಿಸಿದ ಖಳನಾಯಕಿ ಪಾತ್ರಕ್ಕೆ ಮೊದಲು ತಾವೇ ಆಯ್ಕೆಯಾಗಿದ್ದೆವು ಎಂದು ಬಹಿರಂಗಪಡಿಸಿದರು. “ಆದರೆ, ನನ್ನ ತಾಯಿ ಆ ಪಾತ್ರವನ್ನು ಒಪ್ಪದಿರಲು ಸಲಹೆ ನೀಡಿದರು. ನಾಯಕಿಯಾಗಿ ನಟಿಸುತ್ತಿರುವಾಗ ಖಳನಾಯಕಿ ಪಾತ್ರ ನನ್ನ ವೃತ್ತಿಜೀವನಕ್ಕೆ ಪರಿಣಾಮ ಬೀರಬಹುದು ಎಂದು ಭಾವಿಸಿದ್ದರು. ಆದರೆ, ನಂತರ ಆ ಪಾತ್ರವನ್ನು ನಾನು ಮಾಡಬಹುದಿತ್ತು ಎಂದು ಅನಿಸಿತು,” ಎಂದು ಮೀನಾ ಹೇಳಿದರು.
