ಗಿಲ್ಲಿಗೆ ರಾಜಯೋಗ.. ವಿವಾದದ ಮಧ್ಯೆ ‘ಸೂಪರ್ ಹಿಟ್’

ಕೀರ್ತಿ ಪಾಟೀಲ್, ಫಿಲಂ ಬ್ಯೂರೋ, ಗ್ಯಾರಂಟಿ ನ್ಯೂಸ್

ಬಿಗ್ ಬಾಸ್ ವಿನ್ನರ್ ಗಿಲ್ಲಿ ಈಗ ಕ್ರೇಜ್‌ನ ಪೀಕ್‌ನಲ್ಲಿ ಇದ್ದಾರೆ. ಒಂದೆಡೆ ಅಭಿಮಾನಿಗಳ ಕ್ರೇಜ್ ಗರಿಗೆದರಿದ್ರೆ ಮತ್ತೊಂದೆಡೆ ಚಿತ್ರದ ಪ್ರಚಾರ ವಿವಾದ, ಆರೋಪಗಳ ಮಧ್ಯೆ ಬ್ಯುಸಿ ಶೆಡ್ಯೂಲ್‌ನಲ್ಲಿ ಕಾಣೆಯಾಗಿದ್ದ ಗಿಲ್ಲಿ, ‘ಸೂಪರ್ ಹಿಟ್’ ವೇದಿಕೆಯಲ್ಲಿ ಕ್ಲಿಯರ್ ಕಟ್ ಸ್ಪಷ್ಟನೆ ನೀಡಿದ್ದಾರೆ.

ಬಿಗ್ ಬಾಸ್ ಕನ್ನಡ ಸೀಸನ್ 12ರ ವಿನ್ನರ್ ಗಿಲ್ಲಿ ನಟ ಇದೀಗ ಸಿಕ್ಕಾಪಟ್ಟೆ ಬ್ಯುಸಿ ಸ್ಟಾರ್. ಬಿಗ್ ಬಾಸ್ ಮನೆಯೊಳಗೆ ಹೋಗಿ ಬಂದ ಮೇಲೆ ಗಿಲ್ಲಿಯ ಜೀವನವೇ 360 ಡಿಗ್ರಿ ತಿರುವು ತಗೊಂಡಂತಾಗಿದೆ. ಕರ್ನಾಟಕದಾದ್ಯಂತ ಅಭಿಮಾನಿಗಳ ಸಾಗರ ಹರಿದು ಬರುತ್ತಿದೆ. ಎಲ್ಲಿಗೆ ಹೋದರೂ ಜನಸಾಗರ, ಗಿಲ್ಲಿ ಹೆಸರು ಕೇಳಿದ ತಕ್ಷಣ ಕೇಕೆ-ಚೀರಾಟ ಸದ್ಯ ಗಿಲ್ಲಿ ಹೆಸರೇ ಈಗ ಕ್ರೇಜ್ ಬ್ರ್ಯಾಂಡ್ ಆಗಿದೆ. ಆದರೆ ಈ ರಾಜಯೋಗದ ಮಧ್ಯೆಯೇ ಸಣ್ಣ ವಿವಾದದ ನೆರಳು ಕೂಡ ಬೆನ್ನಟ್ಟಿದೆ.

ಗಿಲ್ಲಿಗೆ ರಾಜಯೋಗ.. ವಿವಾದದ ಮಧ್ಯೆ ‘ಸೂಪರ್ ಹಿಟ್’

ಗಿಲ್ಲಿ ವಿರುದ್ದ ದೂರು.. ಮೌನ ಮುರಿದ ಬಿಗ್‌ ಚಾಂಪಿಯನ್

ಕಾಂಟ್ರವರ್ಸಿಗಿಂತ ಕೆಲಸ ಮುಖ್ಯ ಎಂದು ಗಿಲ್ಲಿ ಸಂದೇಶ..!

ಗಿಲ್ಲಿ ನಟ ಅಭಿನಯದ ಸರ್ಕಾರಿ ಶಾಲೆ H8 ಚಿತ್ರದ ಪ್ರಚಾರಕ್ಕೆ  ಹಾಜರಾಗಿಲ್ಲ ಎಂಬ ಆರೋಪದೊಂದಿಗೆ ಚಿತ್ರತಂಡ ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿಗೆ ದೂರು ದಾಖಲಿಸಿದ್ದು ಚರ್ಚೆಗೆ ಕಾರಣವಾಯಿತು. ಆದರೆ ‘ಸೂಪರ್ ಹಿಟ್’ ಸಿನಿಮಾದ ಸುದ್ದಿಗೋಷ್ಠಿಯಲ್ಲಿ ಮೊದಲ ಬಾರಿಗೆ ಗಿಲ್ಲಿ ಮೌನ ಮುರಿದಿದ್ದಾರೆ. ಸರ್ಕಾರಿ ಶಾಲೆ H8 ಸಿನಿಮಾ ನಾನು ನಟಿಸಿ ಸುಮಾರು 2ರಿಂದ 2.5 ವರ್ಷಗಳಾಗಿರಬಹುದು. ಚಿತ್ರದ ಪ್ರಚಾರಕ್ಕೆ ನನ್ನ ಬೈಟ್ಸ್ ಕಳಿಸಿದ್ದೇನೆ. ಹಾಗಿದ್ದರೂ ಯಾಕೆ ದೂರು ನೀಡಿದರೋ ನನಗೂ ಗೊತ್ತಿಲ್ಲ.ಬೇರೆ ಸಿನಿಮಾ ಕೆಲಸಗಳ ಒತ್ತಡ ಇತ್ತು. ಫಿಲಂ ಚೇಂಬರ್ ಅಧ್ಯಕ್ಷರ ಜೊತೆ ಮಾತಾಡಿ ಸರಿ ಪಡಿಸಿಕೊಂಡಿದೀನಿ ಎಂದು ಗಿಲ್ಲಿ ಸ್ಪಷ್ಟನೆ ನೀಡಿದ್ದಾರೆ.

ಇದರ ನಡುವೆಯೇ ಗಿಲ್ಲಿ ಮೊದಲ ಬಾರಿಗೆ ನಾಯಕನಾಗಿ ಮಿಂಚಿರುವ ‘ಸೂಪರ್ ಹಿಟ್’ ಸಿನಿಮಾದ ಟ್ರೈಲರ್ ಬಿಡುಗಡೆಗೊಂಡು ಭರ್ಜರಿ ಪ್ರತಿಕ್ರಿಯೆ ಪಡೆಯುತ್ತಿದೆ. ವಿಜಯಾನಂದ್ ನಿರ್ದೇಶನದಲ್ಲಿ ಮೂಡಿಬಂದಿರುವ ಈ ಚಿತ್ರವನ್ನು  ಜಿ. ಉಮೇಶ್ ನಿರ್ಮಿಸಿದ್ದಾರೆ.

ಗೌರವ್ ಶೆಟ್ಟಿ ಹಾಗೂ ಗಿಲ್ಲಿ ನಾಯಕರಾಗಿ, ಶ್ವೇತಾ ನಾಯಕಿಯಾಗಿ ಕಂಗೊಳಿಸಿದ್ದಾರೆ. ನಾಗೇಂದ್ರ ಪ್ರಸಾದ್ ವಿಶೇಷ ಪಾತ್ರದಲ್ಲಿ ಜೀವ ತುಂಬಿದ್ದು, ಡ್ರ್ಯಾಗನ್ ಮಂಜು, ಸಾಧು ಕೋಕಿಲ, ಸೀನು ಭಾಯ್, ನಾಗವರ್ಧನ್, ಪ್ರಮೋದ್ ಶೆಟ್ಟಿ, ಜೀಜಿ, ಗಿರಿ, ಟಿನಿಸ್ ಕೃಷ್ಣ, ಕರಿಸುಬ್ಬು ಸೇರಿದಂತೆ ಹಲವರು ಅಭಿನಯಿಸಿದ್ದಾರೆ. ಫೆಬ್ರವರಿ 27ರಂದು ರಾಜ್ಯಾದ್ಯಂತ ಇನ್ನೂರಕ್ಕೂ ಹೆಚ್ಚು ಚಿತ್ರಮಂದಿರಗಳಲ್ಲಿ ಅದ್ದೂರಿಯಾಗಿ ತೆರೆಕಾಣಲಿರುವ ‘ಸೂಪರ್ ಹಿಟ್’ ಸಿನಿಮಾ ವಿವಾದದ ಮಧ್ಯೆಯೇ ಗಿಲ್ಲಿಗೆ ನಿಜವಾದ ರಾಜಯೋಗ ತಂದುಕೊಡುತ್ತದೆಯೇ ಎಂಬ ಕುತೂಹಲ ಗರಿಗೆದರಿದೆ.