ಕನ್ನಡ ಚಿತ್ರರಂಗದ ಮೊದಲ ಮಹಿಳಾ ಸೂಪರ್ಸ್ಟಾರ್ ಬಿ. ಸರೋಜಾ ದೇವಿ ಇಂದು ಬೆಂಗಳೂರಿನ ಮಲ್ಲೇಶ್ವರಂನ ತಮ್ಮ ನಿವಾಸದಲ್ಲಿ ಕೊನೆಯುಸಿರೆಳೆದರು. 87 ವರ್ಷದವರಾದ ಅವರಿಗೆ ದಿಢೀರ್ ತಲೆಸುತ್ತು ಕಾಣಿಸಿಕೊಂಡಿತ್ತು. ಆದರೆ ಆಸ್ಪತ್ರೆಗೆ ಕರೆದೊಯ್ಯುವಷ್ಟರಲ್ಲಿ ಅವರ ಪ್ರಾಣಪಕ್ಷಿ ಹಾರಿಹೋಗಿತ್ತು. ನಾಳೆ ಅವರ ಅಂತ್ಯಕ್ರಿಯೆ ನಡೆಯಲಿದೆ.
1938ರ ಜನವರಿ 7ರಂದು ಬೆಂಗಳೂರಿನ ಒಕ್ಕಲಿಗ ಕುಟುಂಬದಲ್ಲಿ ಜನಿಸಿದ ಬಿ. ಸರೋಜಾ ದೇವಿ, ತಂದೆ ಭೈರಪ್ಪ (ಪೊಲೀಸ್ ಅಧಿಕಾರಿ) ಮತ್ತು ತಾಯಿ ರುದ್ರಮ್ಮ ಅವರ ನಾಲ್ಕನೇ ಪುತ್ರಿಯಾಗಿದ್ದರು. ಸಂಪ್ರದಾಯಸ್ಥ ಕುಟುಂಬದಲ್ಲಿ ಬೆಳೆದ ಅವರು, ತಾಯಿಯ ಆದೇಶದಂತೆ ತಮ್ಮ ಜಾತಿಯ ಯುವಕನನ್ನೇ ಮದುವೆಯಾದರು. 1967ರ ಮಾರ್ಚ್ 1 ರಂದು, ಯಶಸ್ಸಿನ ಉತ್ತುಂಗದಲ್ಲಿದ್ದ ಸರೋಜಾ ದೇವಿ, ಮೆಕಾನಿಕಲ್ ಎಂಜಿನಿಯರ್ ಶ್ರೀಹರ್ಷ ಅವರನ್ನು ವಿವಾಹವಾದರು.
ಶ್ರೀಹರ್ಷ ಯಾರು?
ಶ್ರೀಹರ್ಷ ಒಬ್ಬ ಬುದ್ಧಿವಂತ ಮತ್ತು ಸರಳ ವ್ಯಕ್ತಿಯಾಗಿದ್ದರು. ಮದುವೆಯ ಸಂದರ್ಭದಲ್ಲಿ ಸರೋಜಾ ದೇವಿಯನ್ನು ಭೇಟಿಯಾಗಿ, “ನಾನು ಎಂಜಿನಿಯರ್, ನೀವು ಆಕ್ಟರ್, ಇಬ್ಬರಿಗೂ ಆತ್ಮಸ್ಟ್ ಆಗುತ್ತಾ?” ಎಂದು ಕೇಳಿದ್ದರಂತೆ. ಆದರೆ, ತಾಯಿಯ ಕಟ್ಟುನಿಟ್ಟಿನ ಆದೇಶದಿಂದ ಸರೋಜಾ ದೇವಿ ಕೇವಲ “ಹೂಂ” ಎಂದು ತಲೆಯಾಡಿಸಿದ್ದರು. ಬೆಂಗಳೂರಿನ ವುಡ್ಲ್ಯಾಂಡ್ಸ್ ಹೋಟೆಲ್ನಲ್ಲಿ ಅದ್ಧೂರಿಯಾಗಿ ನಡೆದ ಈ ವಿವಾಹ, ಸರೋಜಾ ದೇವಿಯ ಜೀವನದ ಒಂದು ಮಹತ್ವದ ಘಟ್ಟವಾಯಿತು.
ಮದುವೆಯಾದಾಗ ಸರೋಜಾ ದೇವಿ ಆರ್ಥಿಕ ಸಂಕಷ್ಟದಲ್ಲಿದ್ದರು. ಇನ್ಕಮ್ ಟ್ಯಾಕ್ಸ್ ಸಮಸ್ಯೆಯಿಂದ ಕಂಗಾಲಾಗಿದ್ದ ಅವರಿಗೆ ಶ್ರೀಹರ್ಷ ಆರ್ಥಿಕವಾಗಿ ಬೆಂಬಲ ನೀಡಿದರು. ತಾಯಿ ರುದ್ರಮ್ಮ, “ಮದುವೆಯಾದರೆ ಸಿನಿಮಾ ಬಿಡು” ಎಂದಿದ್ದರೂ, ಶ್ರೀಹರ್ಷ ತಮ್ಮ ಪತ್ನಿಯ ಅಭಿನಯ ಪ್ರತಿಭೆಯನ್ನು ಗುರುತಿಸಿ, “ನಟನೆ ಮುಂದುವರೆಸು” ಎಂದು ಪ್ರೋತ್ಸಾಹಿಸಿದರು. ರಾಜೇಶ್ ಖನ್ನಾ ಅವರಿಗೆ ದಿಲೀಪ್ ಕುಮಾರ್ರವರ ಸಲಹೆಯನ್ನು ಉಲ್ಲೇಖಿಸಿ, ಶ್ರೀಹರ್ಷ ಈ ನಿರ್ಧಾರಕ್ಕೆ ಬಂದಿದ್ದರು.
ಇದರಿಂದ ಸರೋಜಾ ದೇವಿ, ಮದುವೆಯಾದ ನಂತರವೂ ‘ಮಲ್ಲಮ್ಮನ ಪವಾಡ’, ‘ನ್ಯಾಯವೇ ದೇವರು’, ‘ಶ್ರೀ ಶ್ರೀನಿವಾಸ ಕಲ್ಯಾಣ’, ‘ಬಬ್ರುವಾಹನ’ ಮುಂತಾದ ಕನ್ನಡ ಚಿತ್ರಗಳಲ್ಲಿ ನಾಯಕಿಯಾಗಿ ಮಿಂಚಿದರು. ತಮಿಳಿನ ಎಂ.ಜಿ.ಆರ್. ಜೊತೆ 26, ಶಿವಾಜಿ ಗಣೇಶನ್ ಜೊತೆ 22, ಜೆಮಿನಿ ಗಣೇಶನ್ ಜೊತೆ 17 ಹಿಟ್ ಚಿತ್ರಗಳಲ್ಲಿ ನಟಿಸಿದ್ದ ಅವರು, ತೆಲುಗು ಮತ್ತು ಕನ್ನಡ ಚಿತ್ರರಂಗದಲ್ಲೂ ಬಹುಬೇಡಿಕೆಯ ನಟಿಯಾಗಿದ್ದರು. ಪದ್ಮಶ್ರೀ (1969) ಮತ್ತು ಪದ್ಮಭೂಷಣ (1992) ಗೌರವಗಳು ಅವರಿಗೆ ಮದುವೆಯ ನಂತರವೇ ಲಭಿಸಿದವು.
ಶ್ರೀಹರ್ಷರ ನಿಧನ
1985ರಿಂದ ಶ್ರೀಹರ್ಷರ ಆರೋಗ್ಯ ಕ್ಷೀಣಿಸತೊಡಗಿತು. 1986ರಲ್ಲಿ ಹೃದಯಾಘಾತದಿಂದ ಅವರು ವಿಧಿವಶರಾದರು. ಈ ದುರಂತ ಸರೋಜಾ ದೇವಿಯನ್ನು ತೀವ್ರವಾಗಿ ಕಾಡಿತು. ಆಘಾತದಲ್ಲಿ ತಮ್ಮ ಫಿಯೆಟ್ ಕಾರನ್ನು ಜಜ್ಜಿಹಾಕಿದ್ದರು. ಪತಿಯ ನಿಧನದ ನಂತರ ಸರೋಜಾ ದೇವಿ ಒಂದು ವರ್ಷ ನಟನೆಯಿಂದ ವಿರಾಮ ಪಡೆದರು. ಆಗ ಒಪ್ಪಿಕೊಂಡಿದ್ದ 8 ಚಿತ್ರಗಳನ್ನು 1987ರ ವೇಳೆಗೆ ಮುಗಿಸಿದರು. ನಂತರ 5 ವರ್ಷಗಳ ಕಾಲ ಅವರು ಸಿನಿಮಾದಿಂದ ದೂರವಾದರು. 1993ರಿಂದ ಪೋಷಕ ಪಾತ್ರಗಳಲ್ಲಿ ಕಾಣಿಸಿಕೊಂಡರು.
ಪತಿಯ ನಿಧನದ ನಂತರ ಸರೋಜಾ ದೇವಿ ಮತ್ತೊಂದು ಮದುವೆಯಾಗಲಿಲ್ಲ. ತಾಯಿಯ ಹಠದ ಒತ್ತಡದ ಹೊರತಾಗಿಯೂ, ಶ್ರೀಹರ್ಷರ ಜಾಗವನ್ನು ಬೇರೊಬ್ಬರಿಗೆ ಕೊಡಲು ಅವರ ಮನಸ್ಸು ಒಪ್ಪಲಿಲ್ಲ. ಸಮಾಜದಿಂದ ಕುಂಕುಮ, ಶುಭಕಾರ್ಯಗಳಿಗೆ ಆಹ್ವಾನಗಳು ಸಿಗದೇ ಇದ್ದರೂ, ಅವರು ತಮ್ಮ ಜೀವನವನ್ನು ಮುಂದುವರೆಸಿದರು.
ಕನ್ನಡ, ತಮಿಳು, ತೆಲುಗು ಸೇರಿದಂತೆ ಹಲವು ಭಾಷೆಗಳಲ್ಲಿ 200ಕ್ಕೂ ಹೆಚ್ಚು ಚಿತ್ರಗಳಲ್ಲಿ ನಟಿಸಿದ ಬಿ. ಸರೋಜಾ ದೇವಿ, ‘ಅಭಿನಯ ಸರಸ್ವತಿ’ ಎಂದೇ ಖ್ಯಾತರಾದರು.