ಬೆಟ್ಟಿಂಗ್ ಆ್ಯಪ್ ಕುರಿತು ಬಹುಭಾಷಾ ನಟ ಪ್ರಕಾಶ್ ರೈ ಸ್ಪಷ್ಟನೆ..!!

ಆಫ್ ಲೈನ್ ಹಾಗೂ ಆನ್ ಲೈನ್ ನಲ್ಲಿ ಬೆಟ್ಟಿಂಗ್, ಗೇಮಿಂಗ್ ಆ್ಯಪ್ ಗಳ ಹಾವಳಿ ದೀಪಾವಳಿ ಪಟಾಕಿಗಳಂತೆ ಆಗಿದೆ. ಅದ್ರಲ್ಲೂ ತಂತ್ರಜ್ಞಾನ ಮುಂದುವರೆದಂತೆ, ಆ್ಯಂಡ್ರಾಯ್ಡ್ ಫೋನ್ ಗಳು, ಟ್ಯಾಬ್ಸ್, ಲ್ಯಾಪ್ ಟಾಪ್ಸ್, ಅಪ್ಲಿಕೇಷನ್ಸ್, ಅನ್ ಲಿಮಿಟೆಡ್ ಇಂಟರ್ ನೆಟ್ ಇವೆಲ್ಲವುಗಳಿಂದಾಗಿ ಮನುಷ್ಯ ತನಗೆ ತಾನೇ ಮಾರಕವಾಗ್ತಿದ್ದಾನೆ. ಹೌದು.. ಆನ್ ಲೈನ್ ನಲ್ಲಿ ಬೆಟ್ಟಿಂಗ್ ಹಾಗೂ ಗೇಮಿಂಗ್ ಆ್ಯಪ್ ಗಳನ್ನ ಸೃಷ್ಠಿಸೋರು, ಅದ್ರಿಂದ ಕೋಟಿ ಕೋಟಿ ದುಡ್ಡು ಮಾಡೋರ ಸಂಖ್ಯೆ ಹೆಚ್ಚಾಗ್ತಿದೆ. ಇದು ನಿಜಕ್ಕೂ ಸಾಕಷ್ಟು ಮಂದಿ ಪ್ರಾಣ ಕಳೆದುಕೊಳ್ಳಲು, ಮನೆ-ಮಠ ಬಿಟ್ಟು ನಾಪತ್ತೆಯಾಗಲು ಕಾರಣವಾಗಿದೆ.

ಅದ್ರಲ್ಲೂ ಸಮಾಜಕ್ಕೆ ಸಂದೇಶ ನೀಡಿ, ಸ್ಫೂರ್ತಿಯಾಗಬೇಕಿರೋ ಕಲಾವಿದರೇ ಆ ಆ್ಯಪ್ ಗಳನ್ನ ಹಣ ಪಡೆದು, ಪ್ರಮೋಟ್ ಮಾಡ್ತಿರೋದು ದುರಂತ. ಸದ್ಯ ಆನ್ ಲೈನ್ ಬೆಟ್ಟಿಂಗ್ ಆ್ಯಪ್ ಗಳಿಗೆ ಕಡಿವಾಣ ಹಾಕಲು ತೆಲಂಗಾಣ IPS ಆಫೀಸರ್ ಒಬ್ಬರು ಮುಂದಾಗಿದ್ದಾರೆ. ಸದ್ಯ ಹೈದ್ರಾಬಾದ್ ನ ಮಿಯಾಪುರ ಸೈಬರ್ ಠಾಣೆಯಲ್ಲಿ 25 ಮಂದಿ ತೆಲುಗು ಸ್ಟಾರ್ ಗಳ ವಿರುದ್ಧ ಪ್ರಕರಣ ದಾಖಲಿಸಲಾಗಿದೆ ಅಂತ ಎಲ್ಲೆಡೆ ಸುದ್ದಿಯಾಗ್ತಿದೆ. ಆ ಪಟ್ಟಿಯಲ್ಲಿ ವಿಜಯ್ ದೇವರಕೊಂಡ, ರಾಣಾ ದಗ್ಗುಬಾಟಿ, ಪ್ರಣಿತಾ ಸುಭಾಷ್, ಮಂಚು ಲಕ್ಷ್ಮೀ ಸೇರಿದಂತೆ ನಮ್ಮ ಕನ್ನಡದ ಬಬಹುಮುಖ ಪ್ರತಿಭೆ ಪ್ರಕಾಶ್ ರೈ ಅವರ ಹೆಸರು ಕೂಡ ಕೇಳಿ ಬಂದಿದೆ.

ಇದು ಮಾಧ್ಯಮಗಳು ಹಾಗೂ ಸೋಶಿಯಲ್ ಮೀಡಿಯಾದಲ್ಲಿ ಬಿಕರಿ ಆಗ್ತಿದ್ದಂತೆ, ಕೂಡಲೇ ಶೂಟಿಂಗ್ ಸೆಟ್ ನಲ್ಲಿ ಬ್ಯುಸಿ ಅಗಿದ್ದ ನಟ ಪ್ರಕಾಶ್ ರೈ ವಿಡಿಯೋ ಒಂದರ ಮುಖೇನ ಅದಕ್ಕೆ ಸ್ಪಷ್ಟನೆ ನೀಡಿದ್ದಾರೆ. ಎಲ್ಲರನ್ನೂ ಪ್ರಶ್ನಿಸೋ ನಾನು ಕೂಡ ಉತ್ತರ ಕೊಡಬೇಕು ಅಲ್ಲವೇ..? ಸಾಕಷ್ಟು ಮಂದಿ ಈ ಬಗ್ಗೆ ನನಗೆ ಪ್ರಶ್ನೆ ಮಾಡ್ತಿದ್ದಾರೆ. ಹೌದು.. ನಿಜ.. 9 ವರ್ಷಗಳ ಹಿಂದೆ 2016ರಲ್ಲಿ ನಾನು ಆ್ಯಡ್ ಮಾಡಿದ್ದು ನಿಜ. ಆ ನಂತ್ರ ಕೆಲ ತಿಂಗಳಲ್ಲೇ ನನಗೆ ಅದು ತಪ್ಪು ಅನಿಸಿತು. 2017ರಲ್ಲಿ ಅದನ್ನ ರಿನೇವಲ್ ಮಾಡಲು ಕೇಳಿದ್ದರು. ನಾನು ಅಗಲ್ಲ ಅಂದೆ. ಅದು ತಪ್ಪಾಗಿದೆ. ಅರಿಯದೆ ಮಾಡಿಬಿಟ್ಟಿದ್ದೇನೆ. ನಾನು ಇನ್ಮುಂದೆ ಅದನ್ನ ಮಾಡಲ್ಲ ಅಂದೆ ಎಂದಿದ್ದಾರೆ. ಅಗ್ರಿಮೆಂಟ್ ಇದ್ದ ಕಾರಣಕ್ಕೆ ಮಾಡಿದ್ದೆ.. ಇನ್ಮೇಲೆ ಮುಂದುವರಿಸಲ್ಲ ಅಂತ ಆ ಆ್ಯಡ್ ಕಂಪೆನಿಗೂ ಸ್ಪಷ್ಟಪಡಿಸಿದ್ದರಂತೆ.
ಆ ನಂತ್ರ ಯಾವುದೇ ಗೇಮಿಂಗ್ ಆ್ಯಪ್ ಮಾಡಿಲ್ಲ ಪ್ರಕಾಶ್ ರೈ. 2021ರಲ್ಲೂ ಸಹ ದೇ ವಿಡಿಯೋನ ಕಂಪೆನಿ ಬಳಸಿತ್ತಂತೆ. ಆಗ ಖುದ್ದು ಪ್ರಕಾಶ್ ರೈ ಅವರೇ ಅವರಿಗೆ ನೋಟಿಸ್ ಕೂಡ ನೀಡಿದ್ದರಂತೆ. ಇದರಲ್ಲಿ ನಾನಿಲ್ಲ. ಇದರ ಕಾಂಟ್ರಾಕ್ಟ್ ಕೂಡ ಮುಗಿದಿದೆ ಅಂತ ಅವರಿಗೆ ಮನದಟ್ಟು ಮಾಡಿ, ಅದನ್ನ ಡಿಲೀಟ್ ಮಾಡಿಸಿದ್ದರಂತೆ.

ಅದೀಗ ಮತ್ತೆ ಯಾಕೆ ಮುನ್ನೆಲೆಗೆ ಬಂತು ಅಂತ ಗೊತ್ತಿಲ್ಲ. ಆದ್ರೆ ಪೊಲೀಸರಿಂದ ಯಾವುದೇ ನೋಟಿಸ್ ಬಂದಿಲ್ಲ. ಬಂದ್ರೆ ಖಂಡಿತಾ ಪೊಲೀಸರಿಗೆ ಉತ್ತರ ನೀಡುವೆ. ಅದಕ್ಕೂ ಮೊದಲು ನಿಮಗೆ ಉತ್ತರ ನೀಡಬೇಕಿದೆ. ಹಾಗಾಗಿ ವಿಡಿಯೋ ಮೂಲಕ ಸ್ಪಷ್ಟನೆ ನೀಡುತ್ತಿದ್ದೇನೆ ಅಂತ ತಮ್ಮ ಪೇಜ್ ಮೂಲಕ ಸಾಮಾಜಿಕ ಜಾಲತಾಣದಲ್ಲಿ ಪ್ರಕಾಶ್ ರೈ ಸ್ಪಷ್ಟನೆ ನೀಡಿದ್ದಾರೆ. ಜಸ್ಟ್ ಆಸ್ಕಿಂಗ್ ಹೆಸರಲ್ಲಿ ಎಲ್ಲರನ್ನ ಪ್ರಶ್ನಿಸೋ ಪ್ರಕಾಶ್ ರೈ ಅವರು ಹೀಗೆ ಮಾಡೋಕೆ ಸಾಧ್ಯವೇ..? ಮಾಡಿದ್ರೆ ಜನ ಸುಮ್ಮನಿರ್ತಾರೆಯೇ..? ಅಲ್ಲದೆ, ಭಾರತೀಯ ಚಿತ್ರರಂಗದ ಬಹುತೇಕ ಎಲ್ಲಾ ಭಾಷೆಗಳಲ್ಲಿ ಛಾಪು ಮೂಡಿಸಿರೋ ರೈ, ಎಲ್ಲೇ ಹೋದರೂ ಆ ಭಾಷೆ, ಅಲ್ಲಿನ ಜನರ ಆಚಾರ, ವಿಚಾರ, ಭೌಗೋಳಿಕ ಪ್ರದೇಶದ ಸಂಸ್ಕೃತಿ, ಹಿನ್ನೆಲೆಯನ್ನ ಅರಿತುಕೊಳ್ತಾರೆ. ಅದನ್ನ ಆ ಮಾತೃಭಾಷಿಗರಿಗಿಂತ ಹೆಚ್ಚಾಗಿ ಪಾಲಿಸ್ತಾರೆ. ಹೀಗಾಗಿ ಜವಾಬ್ದಾರಿಯುತ ನಟನ ಈ ನಡೆ ನಿಜಕ್ಕೂ ಶ್ಲಾಘನೀಯ. ಉಳಿದ ಕಲಾವಿದರು ಕೂಡ ಪ್ರಕಾಶ್ ರೈ ಹಾದಿಯಲ್ಲಿ ನಡೆದರೆ ಅದಕ್ಕಿಂತ ಖುಷಿ ಮತ್ತೊಂದಿಲ್ಲ.