ನವದೆಹಲಿ, ಜೂನ್ 30: ದೇಶದ ಇಂಧನ (Fuel) ಪೂರೈಕೆ ವ್ಯವಸ್ಥೆಯು ಸಂಪೂರ್ಣವಾಗಿ ಸುಧಾರಿಸಿರುವ ಹಿನ್ನೆಲೆ ಕೇಂದ್ರ ಸರ್ಕಾರವು ಮಹತ್ವದ ನಿರ್ಧಾರವೊಂದನ್ನು ಕೈಗೊಂಡಿದೆ. ಕೈಗಾರಿಕಾ ಹಾಗೂ ವಾಣಿಜ್ಯ ಗ್ರಾಹಕರಿಗೆ ಪೆಟ್ರೋಲ್ (Petrol) ಮತ್ತು ಡೀಸೆಲ್ (Diesel) ಮಾರಾಟದ ಮೇಲಿದ್ದ ಎಲ್ಲಾ ತಾತ್ಕಾಲಿಕ ನಿರ್ಬಂಧಗಳನ್ನು ಜುಲೈ 1 ರಿಂದ ಜಾರಿಗೆ ಬರುವಂತೆ ತೆರವುಗೊಳಿಸಲು ಸರ್ಕಾರ ನಿರ್ಧರಿಸಿದೆ. ಈ ಮೂಲಕ ಚಿಲ್ಲರೆ ಇಂಧನ ಮಾರಾಟ ಬಂಕ್ಗಳಲ್ಲಿ ವಾಹನಗಳಿಗೆ ದಿನವೊಂದಕ್ಕೆ ನೀಡಲಾಗುತ್ತಿದ್ದ ಡೀಸೆಲ್ ಮಿತಿಯೂ ಸಹ ಅಂತ್ಯಗೊಳ್ಳಲಿದ್ದು, ಇಂಧನ ಮಾರುಕಟ್ಟೆಯು ಮತ್ತೆ ಯಥಾಸ್ಥಿತಿಗೆ ಮರಳಲಿದೆ. ಇದು ವಾಹನ ಸವಾರರು, ಉದ್ಯಮಿಗಳು ಮತ್ತು ಸಾರ್ವಜನಿಕರಲ್ಲಿ ಸಮಾಧಾನ ತಂದಿದೆ.
ವಾಹನ ಸವಾರರಿಗಿದ್ದ ದಿನದ 200 ಲೀಟರ್ ಮಿತಿ ಅಂತ್ಯ
ಮಧ್ಯಪ್ರಾಚ್ಯದಲ್ಲಿನ ಸಂಘರ್ಷದಿಂದಾಗಿ ಜಾಗತಿಕ ಪೂರೈಕೆ ಸರಪಳಿಯಲ್ಲಿ ಏರುಪೇರು ಉಂಟಾಗಿತ್ತು. ಸ್ಥಳೀಯವಾಗಿ ಇಂಧನ ಕೊರತೆ ಉಂಟಾಗುವುದನ್ನು ತಡೆಗಟ್ಟಲು ಕೇಂದ್ರ ಪೆಟ್ರೋಲಿಯಂ ಸಚಿವಾಲಯವು ಜೂನ್ 12 ರಂದು ‘ಮೋಟಾರ್ ಸ್ಪಿರಿಟ್ ಮತ್ತು ಹೈ ಸ್ಪೀಡ್ ಡೀಸೆಲ್ ಆದೇಶ 2026’ ಅಡಿಯಲ್ಲಿ ತಾತ್ಕಾಲಿಕ ನಿಯಂತ್ರಣವನ್ನು ಹೇರಿತ್ತು.
ಇದರಡಿಯಲ್ಲಿ ವಾಹನವೊಂದಕ್ಕೆ ದಿನಕ್ಕೆ ಗರಿಷ್ಠ 200 ಲೀಟರ್ ಡೀಸೆಲ್ ಮಾತ್ರ ನೀಡಲು ಮಿತಿ ವಿಧಿಸಲಾಗಿತ್ತು. ಈ ಕ್ರಮವು ದೊಡ್ಡ ಪ್ರಮಾಣದ ಇಂಧನವನ್ನು ಬಳಸುವ ವಾಣಿಜ್ಯ ವಾಹನಗಳು, ಸಾರಿಗೆ ಕಂಪನಿಗಳು ಮತ್ತು ಕೈಗಾರಿಕಾ ಘಟಕಗಳಿಗೆ ತೀವ್ರ ತೊಂದರೆಯನ್ನು ಉಂಟುಮಾಡಿತ್ತು. ಆದರೆ, ಸದ್ಯ ಪೂರೈಕೆಯ ಸಮಸ್ಯೆಗಳು ಸಂಪೂರ್ಣವಾಗಿ ಪರಿಹಾರವಾಗಿರುವುದರಿಂದ ಈ ಮಿತಿಯನ್ನು ಜುಲೈ 1 ರಿಂದ ಅಧಿಕೃತವಾಗಿ ಹಿಂಪಡೆಯಲಾಗುತ್ತಿದೆ.
‘ಸಾರ್ವಜನಿಕ ಹಿತಾಸಕ್ತಿಯಲ್ಲಿ ಇನ್ನು ನಿರ್ಬಂಧ ಅಗತ್ಯವಿಲ್ಲ’
ಸೋಮವಾರ ಹೊರಡಿಸಲಾದ ನೂತನ ಆದೇಶದಲ್ಲಿ, ದೇಶದಲ್ಲಿ ಲಭ್ಯವಿರುವ ಪೆಟ್ರೋಲಿಯಂ ಉತ್ಪನ್ನಗಳ ಪೂರೈಕೆ ಪರಿಸ್ಥಿತಿಯನ್ನು ಕೇಂದ್ರ ಸರ್ಕಾರವು ಕೂಲಂಕಷವಾಗಿ ಪರಿಶೀಲಿಸಿದೆ. ದೇಶೀಯವಾಗಿ ಇಂಧನ ಪೂರೈಕೆಯು ಉತ್ತಮಗೊಂಡಿರುವುದರಿಂದ, ಈ ಹಿಂದಿನ ಕಟ್ಟುನಿಟ್ಟಿನ ನಿರ್ಬಂಧಗಳು “ಸಾರ್ವಜನಿಕ ಹಿತಾಸಕ್ತಿಯಲ್ಲಿ ಇನ್ನು ಮುಂದೆ ಅಗತ್ಯವಿಲ್ಲ” ಎಂದು ಸರ್ಕಾರವು ಸ್ಪಷ್ಟಪಡಿಸಿದೆ. ಸಾಕಷ್ಟು ಪ್ರಮಾಣದಲ್ಲಿ ಸ್ಟಾಕ್ ಲಭ್ಯವಿರುವುದರಿಂದ ಮತ್ತು ವಿತರಣಾ ವ್ಯವಸ್ಥೆಯು ಸುಧಾರಿಸಿರುವುದರಿಂದ ನಿರ್ಬಂಧಗಳನ್ನು ಸಡಿಲಿಸಲು ಸರ್ಕಾರ ಮುಂದಾಗಿದೆ.
ಸರ್ಕಾರಿ ತೈಲ ಕಂಪನಿಗಳಿಗೆ ಅನ್ವಯವಾಗಿದ್ದ ಆದೇಶ
ಜೂನ್ 12 ರಂದು ಜಾರಿಗೆ ತರಲಾಗಿದ್ದ ತಾತ್ಕಾಲಿಕ ಕ್ರಮಗಳನ್ನು ಇಂಡಿಯನ್ ಆಯಿಲ್ ಕಾರ್ಪೊರೇಷನ್ ಲಿಮಿಟೆಡ್ (IOCL), ಭಾರತ್ ಪೆಟ್ರೋಲಿಯಂ ಕಾರ್ಪೊರೇಷನ್ ಲಿಮಿಟೆಡ್ (BPCL) ಮತ್ತು ಹಿಂದೂಸ್ತಾನ್ ಪೆಟ್ರೋಲಿಯಂ ಕಾರ್ಪೊರೇಷನ್ ಲಿಮಿಟೆಡ್ (HPCL) – ಈ ಮೂರು ಸರ್ಕಾರಿ ಸ್ವಾಮ್ಯದ ತೈಲ ಕಂಪನಿಗಳು ನಿರ್ವಹಿಸುವ ಚಿಲ್ಲರೆ ಮಾರಾಟ ಮಳಿಗೆಗಳ ಮೂಲಕ ಜಾರಿಯಲ್ಲಿತ್ತು. ಸಾರ್ವಜನಿಕ ಹಿತಾಸಕ್ತಿ ಮತ್ತು ನ್ಯಾಯಯುತ ಬೆಲೆಯಲ್ಲಿ ಇಂಧನದ ಸಮಾನ ವಿತರಣೆಯನ್ನು ಖಚಿತಪಡಿಸಿಕೊಳ್ಳಲು ಅಂದು ಈ ಕ್ರಮವನ್ನು ಕೈಗೊಳ್ಳಲಾಗಿತ್ತು ಎಂದು ಸರ್ಕಾರ ತನ್ನ ಆದೇಶದಲ್ಲಿ ವಿವರಿಸಿದೆ.
ಜುಲೈ 1 ರಿಂದ ಆದೇಶ ಹಿಂಪಡೆಯುವಿಕೆ
ಈಗಿನ ಪರಿಸ್ಥಿತಿಯು ಸುಧಾರಿಸಿರುವುದರಿಂದ ಜೂನ್ 12 ರ ಅಧಿಸೂಚನೆಯನ್ನು ಪೆಟ್ರೋಲಿಯಂ ಸಚಿವಾಲಯವು ಜುಲೈ 1, 2026 ರಿಂದ ಪೂರ್ಣವಾಗಿ ಹಿಂತೆಗೆದುಕೊಂಡಿದೆ. ಇದರೊಂದಿಗೆ, ಬಂಕ್ಗಳಲ್ಲಿ ಯಾವುದೇ ರೀತಿಯ ಇಂಧನ ಮಿತಿ ಇರುವುದಿಲ್ಲ. ವಾಹನ ಮಾಲೀಕರು, ಸಾರಿಗೆ ಸಂಸ್ಥೆಗಳು ಮತ್ತು ಕೈಗಾರಿಕಾ ಘಟಕಗಳಿಗೆ ಬೇಕಾದಷ್ಟು ಇಂಧನವನ್ನು ಖರೀದಿಸಲು ಅವಕಾಶವಿದೆ. ಈ ಬದಲಾವಣೆಯಿಂದ ಇಂಧನ ಮಾರುಕಟ್ಟೆಯಲ್ಲಿ ಸ್ಥಿರತೆ ಮರಳಲಿದ್ದು, ಆರ್ಥಿಕ ಚಟುವಟಿಕೆಗಳಿಗೆ ಹೊಸ ಉತ್ತೇಜನ ಸಿಗಲಿದೆ.